WANFALA man, George Young, travel insaed ship wea kat go thru long raf sea for go long Europe. Taem wave gohed for bangam ship, hem tingting bak long gud waka wea hem bin duim long Brazil for preach abaotem Kingdom. Diswan mekem hem barava hapi and satisfae. * Bat, taem hem gohed for travel hem start for ting abaotem niu assignment bilong hem, wea hem nao olketa ples long Spain and Portugal wea no eniwan preach yet long hem. Taem hem kasem long there, hem plan for mekem olketa arrangement for Brata Joseph Rutherford givim olketa Bible tok and givimaot 300,000 tract!

Taem Brata Young arrive long Lisbon long 1925, hem lukim hao laef long there barava no isi. Long 1910, pipol aotem King bilong olketa and startim niu gavman. Catholic Church tu lusim hae position wea hem garem bifor. Bat, nomata pipol long datfala kantri garem moa freedom, olketa no garem peace and no stap gud tugeta.

Long semtaem wea Brata Young gohed mekem arrangement for tok bilong Brata Rutherford, samfala trae for tekovarem gavman, so gavman givim paoa for army kontrolem datfala kantri. Secretary bilong British and Foreign Bible Society talem Brata Young hao pipol bae againstim hem. Nomata olsem, Brata Young askem wanfala permit for iusim Camões Secondary Skul sports hall, and olketa givim datwan.

Then long May 13 Brata Rutherford redi for givim tok bilong hem. Pipol barava luk forward long samting wea bae kamap! Olketa advertisem datfala tok wea garem title “How to Live on the Earth Forever” long olketa niuspepa and olketa saen wea stap long olketa building. Olketa bigman bilong religion kwiktaem pablisim wanfala article long niuspepa bilong olketa for warnim pipol for no herem “olketa laea profet” hia wea just arrive. Olketa bigman long religion hia standap front long door bilong datfala hall tu, and givimaot staka thousand brochure wea againstim olketa teaching wea Brata Rutherford storyim.

Nomata olsem, klosap 2,000 pipol nao fulimap datfala hall, and samting olsem 2,000 pipol mas go bak bikos no inaf spes. Samfala wea interest for lisin hange long olketa rope ladder insaed long datfala hall and olketa narawan sidaon antap long olketa samting for exercise.

Bat taem tok hia gohed, staka wea againstim olketa tu stap long there. Olketa shout big and brekem olketa chair. Bat Brata Rutherford nating fraet and hem klae antap wanfala tebol for mekem evriwan savve herem hem. Klosap midolnaet nao hem finisim tok bilong hem and winim 1,200 pipol nao givim nem and address mekem olketa kasem Bible literature. Long next day, datfala niuspepa O Século pablisim wanfala article abaotem tok bilong Brata Rutherford.

 Long September 1925, olketa long Portugal start for pablisim Wastaoa long Portuguese languis. (Bifor datwan, olketa long Brazil pablisim finis Wastaoa long Portuguese languis.) Long datfala taem tu, Virgílio Ferguson, wanfala Bible Student long Brazil, plan for muv go long Portugal for duim preaching waka. Long bifor, hem waka witim Brata Young long smol branch office bilong olketa Bible Student long Brazil. So Virgílio and waef bilong hem, Lizzie, go for joinim Brata Young for olketa waka tugeta moa. Brata Ferguson arrive long barava taem wea fitim, bikos Brata Young klosap for muv long olketa nara assignment, wea insaed diswan hem Soviet Union.

Taem army tekovarem gavman bilong Portugal, olketa chusim wanfala man for kontrolem full kantri. Datwan mekem pipol againstim waka bilong iumi. Brata Ferguson no fraet. Hem duim samting for protectim smol grup bilong olketa Bible Student and strongim olketa for duim waka bilong olketa. Hem askem permission from gavman for olketa Bible Student savve meeting insaed haos bilong hem. Long October 1927, gavman appruvim datwan.

Insaed first year wea datfala man kontrolem kantri, samting olsem 450 pipol long Portugal nao kasem subscription bilong olketa Wastaoa magasin. And tu, thru long olketa tract and buklet, truth kasem olketa farawe ples wea Portugal rul ovarem olsem Angola, Azores, Cape Verde, East Timor, Goa, Madeira, and Mozambique.

Long 1929, Manuel da Silva Jordão, wanfala hambol man from Portugal wea savve waka raonem haos bilong pipol, kam long Lisbon. Bifor, taem hem stap long Brazil, hem herem wanfala pablik tok bilong Brata Young. Hem luksavve datwan nao truth and hem barava laek helpem Brata Ferguson for preach long staka ples. So, Manuel start serve olsem colporteur, wea distaem olketa kolem pioneer. From waka for printim and givimaot Bible literature hem organize gud, niu kongregeson long Lisbon gohed grow!

Long 1934, Brata and Sista Ferguson mas go bak long Brazil. Nomata olsem, olketa seed bilong truth hem start for grow finis. Spanish Civil War and World War II affectim Europe, bat olketa brata and sista long Portugal gohed faithful. For lelebet taem, olketa brata and sista olsem sakol bilong fire wea no laet big bikos laef hem no isi. Bat long 1947, taem wanfala missionary, John Cooke, wea skul long Gilead, hem arrive and strongim olketa moa. Bihaen datwan, namba bilong olketa pablisa hem gohed for grow big. Nomata gavman banim waka bilong Olketa Jehovah’s Witness long 1962, namba bilong olketa pablisa hem gohed for grow. Long December 1974 gavman luksavve long waka bilong Olketa Jehovah’s Witness and long datfala taem winim 13,000 pablisa nao stap.

Distaem, winim 50,000 pablisa preachim gud nius abaotem Kingdom bilong God long Portugal and olketa nara island wea story long Portuguese languis, olsem Azores and Madeira. Samfala pablisa olketa mek-thri genereson bilong samfala wea stap taem Brata Rutherford givim tok long 1925.

Iumi thankiu long Jehovah and olketa faithful brata and sista bifor wea no fraet for kamap wakaman bilong Jesus for talemaot gud nius long evri pipol.—Rome 15:15, 16.—From branch office long Portugal.