1. Hao nao iumi savve waka tugeta witim Jehovah?

TAEM Jehovah creatim olketa man, hem laekem olketa for waka tugeta witim hem for fulfillim olketa plan bilong hem. Nomata distaem pipol no perfect, olketa wea faithful savve waka tugeta witim Jehovah evriday. Olsem example, iumi “waka tugeta witim God” taem iumi preachim gud nius abaotem Kingdom and teachim pipol for kamap disaepol. (1 Cor. 3:5-9) Hem nambawan privilege for Creator bilong universe chusim iumi for waka tugeta witim hem for duim datfala important waka! Bat for waka witim Jehovah hem no minim for preach and teach nomoa. Long disfala study iumi bae storyim olketa nara wei, olsem wei for helpem famili and olketa brata and sista, wei for kaen and welkamim narawan, volunteer for duim olketa project long organization, and for duim moa samting long waka bilong Jehovah.—Col. 3:23.

2. Why nao hem no stret for comparem wanem iumi duim for Jehovah witim samting wea narawan duim?

² Taem iumi story raonem disfala study, no comparem wanem iumi savve duim for Jehovah witim samting wea olketa narawan fit for duim. Tingim hao age, health, living, and savve wea man garem hem no semsem. Aposol Paul sei: “Man mas lukluk gud long wanem hemseleva duim, then bae hem hapi long wanem  hem duim. Hem shud no comparem wanem hem duim witim wanem narawan duim.”—Gal. 6:4.

3. Why nao wei for provaedem need bilong famili showimaot iumi waka witim God?

³ Jehovah expectim olketa wea worshipim hem for lukaftarem famili bilong olketa. Olsem example, maet iu need for waka for selen for provaedem need bilong famili. Staka mami mas stap long haos for lukaftarem pikinini bilong olketa. And maet samfala mas lukaftarem dadi and mami bilong olketa wea sik or olo. Olketa samting hia hem important samting wea iumi mas duim. Bible sei: “Sapos eniwan hem no provaedem need bilong olketa wea hem lukaftarem, and main wan nao olketa wea stap long haos bilong hem, hem showimaot hem no garem faith and hem worse winim man wea no biliv.” (1 Tim. 5:8) Sapos iu garem olketa responsibility olsem, maet hem hard for iu duim evri samting wea iu laek duim for Jehovah. Nomata olsem, no feel wikdaon! Jehovah barava hapi taem iu provaedem need bilong famili bilong iu.—1 Cor. 10:31.

4. Hao nao parents savve putim Kingdom first winim wanem olketa seleva maet laekem, and wanem nao kamaot from datwan?

⁴ Olketa Christian parents waka witim Jehovah taem olketa helpem pikinini for garem olketa spiritual goal. Staka parents wea duim diswan lukim hao gogo pikinini bilong olketa disaed for duim full-taem service, nomata maet long ples wea farawe from hom. Samfala kamap missionary, pioneer long ples wea needim staka pablisa, or waka long Bethel. Wei wea pikinini stap farawe maet mekem parents no savve spendem taem witim olketa, wea hem nao samting wea parents laekem. Nomata olsem, olketa parents wea no tingim olketa seleva, olketa willing for letem pikinini bilong olketa for gohed serve long assignment bilong olketa. Why nao olsem? Bikos olketa hapi and satisfae taem olketa lukim pikinini bilong olketa putim Kingdom first long laef bilong olketa. (3 John 4) Maet olketa parents wea duim datwan feel olsem Hannah wea “givim” son bilong hem Samuel for waka for Jehovah. Olketa parents hia ting long disfala wei for waka witim Jehovah olsem wanfala nambawan privilege. Olketa barava laekem pikinini bilong olketa for gohed duim datfala waka.—Fas Samuel 1:28.

5. Hao nao iu savve helpem olketa brata and sista long kongregeson bilong iu? (Lukim piksa long start bilong study.)

⁵ Sapos iu no garem staka famili responsibility distaem, waswe, iu savve helpem olketa brata or sista wea lukaftarem narawan? Or waswe, iu savve helpem olketa wea sik, olo, or wea needim help? Trae for tingim eniwan long kongregeson bilong iu wea maet needim help. Olsem example, maet iu savve spendem taem witim olo dadi or mami bilong wanfala sista wea evritaem lukaftarem hem, mekem datfala sista free for duim eni nara samting. Or maet iu savve helpem olketa narawan for go long meeting, go long stoa, duim olketa nara smol waka, or for go visitim samwan wea stap long hospital. Taem iu duim datwan, maet iu waka witim Jehovah for ansarem prea bilong samwan.—Readim 1 Corinth 10:24.

6. Hao nao iumi showimaot iumi kaen and welkamim narawan?

⁶ Pipol luksavve olketa wea waka witim God olketa kaen and welkamim narawan. Insaed Bible, Greek toktok wea olketa transleitim olsem “kaen long pipol and welkamim olketa” hem minim for kaen long olketa stranger. (Heb. 13:2) Bible storyim samfala example long diswan wea teachim iumi for kaen long narawan. (Jenesis 18:1-5) Iumi shud evritaem lukaotem chance for helpem narawan, nomata sapos ‘iumi garem sem biliv’ or nomoa.—Gal. 6:10.

7. Why nao hem gud for kaen and welkamim olketa long full-taem service wea visitim kongregeson bilong iu?

 ⁷ Iu savve waka witim God tu taem iu kaen and welkamim olketa wea insaed full-taem service wea visitim kongregeson. (Readim 3 John 5, 8.) Long olketa taem olsem iumi garem chance for “iumi evriwan strongim” each other. (Rome 1:11, 12) Tingim story bilong Olaf. Taem hem young, wanfala singol circuit overseer visitim kongregeson bilong hem bat no eniwan fit for provaedem accommodation for hem. Olaf askem parents bilong hem, wea no Witness, sapos datfala circuit overseer savve stap witim olketa. Tufala agree bat tufala sei sapos olsem Olaf mas sleep long kusun chair. Olaf hapi nomoa for duim datwan, and hem nating regret. Olaf sei: “Mi barava enjoyim datfala week! Evri morning mitufala circuit overseer savve wekap early and storyim staka interesting topic taem mitufala kaikai. Encouragement wea mi kasem muvim mi for laek pioneer.” Insaed 40 year wea go pas, Olaf serve olsem missionary long samfala difren kantri.

8. Why nao iumi laek for kaen nomata long firstaem maet samfala no tinghae long datwan? Storyim example.

⁸ Iu savve showimaot love long olketa stranger long staka difren wei, nomata firstaem olketa maet no tinghae long wanem iu duim. Tingim disfala example. Wanfala sista long Spain studyim Bible witim Yesica, wanfala woman long Ecuador. Wanday taem tufala study, Yesica gohed for krae. Datfala sista askem why nao hem krae. Yesica sei bifor hem muv kam long Spain hem barava poor gogo wanday hem no garem eni kaikai nao. Wata nomoa hem garem for givim for baby gele bilong hem. Yesica prea for help taem hem trae for mekem baby bilong hem sleep. No longtaem bihaen, tufala Witness visitim hem, bat hem no kaen long tufala and brekem magasin wea tufala sista hia givim. Hem sei: “Diswan nao kaikai wea iutufala laekem mi for givim long baby bilong mi?” Tufala sista trae for comfortim hem, bat hem no laek herem. Bihaen, tufala leavim wanfala basket kaikai front long door bilong hem. Yesica barava tinghae long kaenfala fasin bilong tufala. So long datfala study hem krae bikos hem luksavve hem no herehere nomoa taem God ansarem prea bilong hem. Bat distaem, Yesica disaed strong for worshipim Jehovah. Tru nao, gud samting kamaot from kaenfala fasin bilong tufala sista hia!—Eklesiastes 11:1, 6.

9, 10. (a) Wanem nao samfala waka wea olketa Israelite volunteer for duim? (b) Wanem nao samfala waka wea olketa brata savve duim insaed kongregeson?

⁹ Long bifor, olketa Israelite garem staka chance for volunteer long olketa difren waka. (Eksodas 36:2; Fas Kronikols 29:5; Nehemaea 11:2) Distaem tu, iu garem staka chance for iusim taem, selen, and savve wea iu garem for helpem olketa brata and sista bilong iu. Taem iu duim olsem, iu bae barava hapi and kasem staka blessing.

¹⁰ Bible encouragem olketa brata long kongregeson for waka witim Jehovah taem olketa serve olsem ministerial servant and elder. (1 Tim. 3:1, 8, 9; 1 Pet. 5:2, 3) Olketa wea duim datfala waka laek for helpem olketa narawan long physical and spiritual wei. (Acts 6:1-4) Waswe, olketa elder askem iu sapos iu willing for duim waka olsem attendant or for lukaftarem literature, territory, duim maintenance, or olketa nara samting? Olketa wea duim kaen waka olsem sei olketa barava hapi taem olketa helpem narawan.

11. Wanem gud samting nao wanfala sista kasem from wei wea hem garem olketa fren taem hem joinim olketa project bilong organization?

¹¹ Staka taem olketa wea volunteer for duim olketa project long organization garem  olketa niu fren. Tingim example bilong Margie, wanfala sista wea waka long olketa Kingdom Hall construction project for 18 year. Long olketa year wea go pas, hem kaen and showimaot interest long olketa young sista wea hem trainim. Hem luksavve wei for waka tugeta long olketa project hem wanfala best wei for encouragem narawan long spiritual wei. (Rome 1:12) Gogo taem Margie kasem hard taem, olketa fren bilong hem wea olketa waka tugeta long construction encouragem hem. Waswe, enitaem iu volunteer long wanfala construction project? Iu savve volunteer nomata sapos iu no savve hao for duim disfala waka.

12. Hao nao maet iu savve help bihaen wanfala disaster?

¹² Taem natural disaster kamap, pipol bilong God garem chance for waka tugeta witim Hem taem olketa helpem olketa brata. Olsem example, olketa givim selen for sapotim olketa. (John 13:34, 35; Acts 11:27-30) Nara wei for helpem olketa hem for klinim or repairim haos bilong olketa. Gabriela, wanfala sista from Poland wea flood spoelem haos bilong hem, barava hapi taem hem lukim olketa brata from nara kongregeson wea stap klosap kam for helpem hem. Hem sei: “Mi no laek for tok abaotem samting wea mi lusim. Olketa samting hia hem material samting nomoa. Bat mi laek for storyim olketa gud samting wea mi kasem. Experience hia helpem mi for luksavve wei for part long Christian kongregeson hem wanfala spesol privilege, and tu, hem mekem man for barava hapi.” Staka wea kasem help bihaen wanfala natural disaster tu garem sem feeling. And tu, olketa wea waka witim Jehovah for provaedem help olsem barava hapi and satisfae.—Readim Acts 20:35; 2 Corinth 9:6, 7.

13. Hao nao wei for volunteer savve strongim wei wea iumi fren witim Jehovah? Storyim example.

¹³ Stephanie and olketa nara pablisa waka witim God taem olketa helpem olketa Witness wea refugee wea ranawe go long United States bikos war kamap long kantri bilong olketa. Olketa helpem olketa refugee hia for faendem haos and furniture. Stephanie sei: “Mifala barava hapi taem mifala lukim olketa hapi and tinghae long love wea olketa brata  and sista garem evriwea long world. Olketa hia tingse mifala nao helpem olketa, bat really olketa nao helpem mifala. Taem mifala lukim olketa brata and sista hia garem love, wei for wan mind, faith, and wei for depend long Jehovah, datwan barava strongim love bilong mifala for Jehovah and mekem mifala tinghae go moa long evri samting mifala kasem thru long organization bilong hem.”

14, 15. (a) Hao nao profet Isaiah feel abaotem wei for duim waka bilong Jehovah? (b) Hao nao olketa Christian distaem savve followim example bilong Isaiah?

¹⁴ Waswe, iu laek for duim moa samting for waka witim Jehovah? Waswe, bae iu willing for muv go long ples wea olketa needim staka pablisa? Hem tru, olketa wea worshipim Jehovah no need for muv farawe from hom for helpem narawan. Bat samfala brata and sista fit for muv go long farawe ples. Olketa garem sem tingting olsem profet Isaiah. Taem Jehovah ask olsem: “Hu nao bae mi sendem? ?An hu nao bae hemi go fo talemaot toktok blong yumi?” Isaiah sei: “!Mi long hia! !Yu sendem mi!” (Aesaea 6:8) Waswe, iu willing and fit for help long organization bilong Jehovah? Wanem nao samfala samting iu savve duim for help?

¹⁵ Taem Jesus story abaotem waka for preach and teachim pipol for kamap disaepol, hem sei: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Matt. 9:37, 38) Waswe, iu savve go pioneer long ples wea needim staka pablisa? Or waswe, iu savve helpem eni narawan for duim datwan? Staka brata and sista sei best wei for showimaot iumi lovem God and olketa neiba hem for pioneer long ples wea needim staka pablisa for preach. Waswe, iu savve tingim eni nara wei moa for duim moa samting long waka bilong Jehovah? Iu bae barava hapi sapos iu duim datwan.

16, 17. Wanem nao samfala nara wei wea iumi savve duim moa samting long waka bilong Jehovah?

¹⁶ Waswe, iu willing for serve long Bethel or for help for duim construction waka, nomata iu duim temporary waka or iu waka for tu-thri day insaed wanfala week? Organization bilong Jehovah needim pipol wea willing for serve long eni ples wea need hem stap and for duim eni waka wea olketa askem olketa for duim. Diswan maet minim taem need kamap olketa mas duim wanfala waka, nomata olketa garem savve for duim difren kaen waka. Nomata olsem, Jehovah tinghae long olketa wea willing for duim eni waka taem need kamap.—Sams 110:3.

¹⁷ Waswe, iu barava laek for kasem moa training mekem iu duim gud waka bilong Jehovah? Sapos olsem, maet iu fit for attendim datfala Skul for Olketa Kingdom Evangelizer. Disfala skul trainim olketa brata and sista wea duim full-taem service for duim moa samting long ministry. Olketa wea apply for attendim disfala skul mas willing for acceptim eni assignment taem olketa graduate. Waswe, iu willing for attendim disfala skul mekem iu fit for duim moa samting for Jehovah?—1 Cor. 9:23.

18. Wanem nao olketa blessing wea iu bae kasem sapos iu waka witim Jehovah evriday?

¹⁸ From iumi pipol bilong Jehovah, iumi willing for give, wea minim iumi garem gudfala fasin, iumi kaen, and iumi showimaot love. Iumi tingim each other evriday. Taem iumi duim datwan, iumi bae hapi and garem peace. (Gal. 5:22, 23) Nomata wanem samting iu feisim long laef, iu savve hapi taem iu followim example bilong Jehovah for willing for give and taem iu gohed waka tugeta witim hem!—Provebs 3:9, 10.