1. Hu nao help for startim kongregeson lo Philippi?

TAEM aposol Paul, Silas, Luke, and Timothy arrive lo Philippi wea stap anda lo gavman blo Rome, staka pipol nao interest lo datfala Kingdom message. Fofala faithful brata hia help for startim datfala kongregeson and evriwan savve hipap tugeta, maet lo haos blo datfala kaenfala sista, Lydia.—Acts 16:40.

2. Wanem challenge nao datfala kongregeson feisim?

² Datfala niu kongregeson start for feisim olketa challenge. Satan mekem olketa wea no laekem truth for againstim preaching waka blo olketa faithful Christian hia. Olketa arrestim Paul and Silas, whipim tufala lo stik and putim tufala lo prison. Bihaen tufala kamaot from prison, tufala visitim olketa niu disaepol hia and encouragem olketa. Then Paul, Silas, and Timothy lusim datfala taon, bat maet Luke nao stay bak. Wanem nao olketa lo datfala niu kongregeson duim? Spirit blo Jehovah helpem olketa for gohed strong for duim waka blo Jehovah. (Phil. 2:12) Paul barava hapi lo wanem olketa duim.

3. Olsem Philippi 1:9-11 storyim, wanem nao Paul prea abaotem?

³ Samting olsem tenfala year bihaen, Paul raetem wanfala leta lo kongregeson lo Philippi. Taem iu readim datfala leta, iu bae luksavve hao Paul barava lovem olketa brata blo hem. Hem sei: “Mi barava laek for lukim iufala evriwan from mi lovem iufala olsem Christ Jesus hem lovem iufala.” (Phil. 1:8) Hem talem olketa dat hem prea for olketa. Hem sei hem askem Jehovah for helpem olketa for mekem love blo olketa gohed kamap big, for olketa luksavve lo wanem nao barava important, for klin or perfect, no mekem narawan stambol, and for olketa gohed garem gudfala wei or raeteous frut. Iumi evriwan bae agree hao toktok wea Paul talem from heart, hem fitim iumi distaem tu. So iumi bae readim wanem Paul talem  lo leta wea hem raetem for olketa lo Philippi. (Readim Philippi 1:9-11.) Then iumi bae story raonem olketa point wea hem storyim and hao iumi savve followim datwan.

4. (a) Olsem 1 John 4:9, 10 storyim, hao nao Jehovah showimaot love blo hem for iumi? (b) Love blo iumi for God mas hao?

⁴ Taem Jehovah sendem kam Son blo hem Jesus for dae for sin blo iumi, datwan showimaot hem barava love iumi. (Readim 1 John 4:9, 10.) Datfala love wea God showimaot muvim iumi for lovem hem. (Rome 5:8) Love blo iumi for God mas hao? Jesus ansarem datfala kwestin taem hem talem wanfala Pharisee: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” (Matt. 22:36, 37) Iumi no laekem love blo iumi for God for hafhaf. Bat, iumi laek for mekem datfala love grow and kamap strong each day. Paul talem olketa lo Philippi dat love blo olketa mas “gohed kamap big.” Wanem nao iumi savve duim for strongim love blo iumi for God?

5. Wanem nao mekem love blo iumi for kamap moa strong?

⁵ For iumi lovem God, iumi need for savve lo hem. Bible sei: “Man wea no showimaot love hem no savve long God bikos God hem love.” (1 John 4:8) Aposol Paul showimaot love blo iumi for God bae kamap moa strong taem iumi “garem stretfala savve and gudfala tingting.” (Phil. 1:9) Firstaem wea iumi studyim Bible, iumi start for lovem God bikos iumi start for savve abaotem olketa gudfala wei blo hem. Then taem iumi gohed lane moa abaotem Jehovah, love blo iumi for hem bae kamap moa strong. Dastawe, wei for studyim Bible and ting raonem datwan, hem wanfala lo olketa barava important samting lo laef blo iumi!—Phil. 2:16.

6. Olsem 1 John 4:11, 20, 21 storyim, hao nao iumi savve mekem love blo iumi kamap moa big?

⁶ Bigfala love blo God for iumi muvim iumi for lovem olketa brata blo iumi. (Readim 1 John 4:11, 20, 21.) Iumi maet tingse love for brata and sista blo iumi hem samting wea bae kamap seleva nomoa. Maet iumi ting olsem bikos iumi worshipim Jehovah and traem best for followim olketa nambawan wei blo hem. Iumi followim example blo Jesus, wea lovem iumi tumas dastawe hem willing for givim laef blo hem for iumi. Nomata olsem, samfala taem wei for obeyim disfala komand for lovem narawan hem no isi. Bae iumi storyim wanfala example lo kongregeson lo Philippi.

7. Wanem nao iumi savve lanem from kaonsel wea Paul givim lo Euodia and Syntyche?

⁷ Euodia and Syntyche tufala faithful sista wea “waka tugeta” witim aposol Paul. Bat, tufala letem wei for feel nogud lo each other for mekem tufala no fren nao. Lo leta wea Paul raetem lo kongregeson lo Philippi, wea hem nao kongregeson blo tufala sista hia, Paul tok stret lo Euodia and Syntyche and talem tufala for “mas wan mind.” (Phil. 4:2, 3) Paul feel hem need for talem datfala sem samting lo full kongregeson, hem sei: “Taem iufala duim eni samting, iufala mas no komplen or raoa abaotem datwan.” (Phil. 2:14) For sure, wei wea Paul tok stret taem hem givim datfala kaonsel, hem no just helpem tufala sista hia nomoa, bat hem helpem full kongregeson for strongim love wea olketa garem for each other.

8. Wanem nao savve mekem hem hard for iumi lovem olketa brata blo iumi, and hao nao iumi savve winim datwan?

⁸ Olsem Euodia and Syntyche, iumi tu maet faendem hem hard for barava lovem olketa  brata blo iumi bikos iumi maet garem diskaen wei for lukluk nomoa lo wik point blo narawan. Iumi evriwan savve mekem olketa mistek evriday. Sapos iumi tingim nomoa mistek blo olketa narawan then love blo iumi for olketa bae katdaon. Olsem example, sapos wanfala brata forget for help for klinim Kingdom Hall, maet iumi feel nogud lo hem. Then sapos iumi start for tingim moa olketa nara mistek blo datfala brata bae gogo iumi just feel nogud go moa and love wea iumi garem bae katdaon. Sapos iumi nao garem kaen tingting olsem, hem gud for iumi tingim diswan: Jehovah luksavve lo mistek blo iumi and mistek blo brata blo iumi. Nomata olsem, hem still gohed for lovem brata blo iumi and hem lovem iumi tu. From datwan, iumi need for followim example blo Jehovah for lovem evriwan and tingim gud saed blo olketa. Taem iumi waka hard for lovem olketa brata blo iumi, iumi bae strongim wei wea iumi wan mind.—Phil. 2:1, 2.

9. Wanem nao olketa “samting wea barava important” wea Paul storyim lo leta blo hem for olketa lo Philippi?

⁹ Holy spirit muvim Paul for talem olketa lo Philippi and evri Christian for mas “luksavve long olketa samting wea barava important.” (Phil. 1:10) Olketa samting hia wea important nao, hem for mekem nem blo Jehovah holy, olketa promis blo hem kamap tru, and wei wea kongregeson garem peace and wan mind. (Matt. 6:9, 10; John 13:35) Taem iumi mekem olketa samting hia kamap important lo laef blo iumi, datwan pruvim iumi lovem Jehovah.

10. Wanem nao iumi savve duim for Jehovah ting lo iumi olsem iumi perfect?

¹⁰ Paul talem tu for iumi “mas klin” or perfect. Datwan no minim for iumi mas barava perfect. Hard for iumi barava perfect olsem Jehovah God. Bat Jehovah bae ting lo iumi olsem iumi perfect, sapos iumi barava duim best for strongim love blo iumi and duim olketa samting wea barava important. Wanfala wei for showimaot love blo iumi hem for traem best for no mekem narawan stambol.

11. Why nao iumi mas no mekem narawan for stambol?

¹¹ Instruction wea Paul talem for no mekem narawan stambol hem wanfala warning. Hao nao iumi maet mekem narawan stambol? Maet hapitaem, kaleko, or waka wea iumi chusim hem mekem narawan for stambol. Maet iumi no duim eni rong samting. Bat sapos wanem iumi chusim hem spoelem konsens blo narawan or datwan mekem hem stambol, datwan hem serious samting. Jesus sei man wea mekem wanfala lo olketa sheepsheep blo hem for stambol olketa shud taengem wanfala big ston raonem nek blo man olsem and torowem lo sea!—Matt. 18:6.

12. Wanem nao iumi savve lanem from example blo wanfala pioneer couple?

¹² Tingim hao wanfala pioneer couple followim wanem Jesus talem. Tufala stap lo wanfala kongregeson wea garem wanfala couple wea just baptaes, wea kam from famili wea strict tumas lo samfala samting. Disfala couple wea just baptaes tingse hem no fitim for wanfala Christian watchim olketa movie, nomata olketa gud movie tu. So tufala feel nogud taem tufala faendaot datfala pioneer couple watchim wanfala movie. Bihaen datwan, datfala pioneer couple stop nao for watchim eni movie go kasem taem tufala niu wan hia trainim konsens blo tufala for minim gud wanem hem stret and no stret. (Heb. 5:14) Taem datfala pioneer couple sakrifaesim wanem tufala laekem, datwan pruvim love blo tufala for datfala niu brata and sista hem no  lo toktok nomoa bat lo samting wea tufala duim tu.—Rome 14:19-21; 1 John 3:18.

13. Lo wanem wei nao iumi maet duim samting wea kosim narawan for duim sin?

¹³ Narafala wei wea iumi savve mekem narawan stambol hem taem iumi duim samting wea kosim narawan for sin. Hao nao datwan savve happen? Tingim disfala example, wanfala Bible study hem barava stragol for kontrolem wei wea hem addict lo alcohol. Hem luksavve hem mas barava stop for drinkim eni alcohol. Hem changem staka samting lo laef blo hem and hem baptaes. Then wantaem, wanfala brata invaetem hem lo wanfala hapitaem and laek givim hem alcohol, then datfala brata wea invaetem hem sei: “Distaem iu wanfala Christian nao, so iu garem spirit blo Jehovah. Wanfala wei blo holy spirit hem for kontrolem seleva. So sapos iu savve kontrolem seleva, bae iu fit for drinkim lelebet alcohol.” Tingim sapos datfala niu brata hem lisin lo rong advaes hia, maet bae hem start moa for addict lo alcohol.

14. Hao nao olketa meeting helpem iumi for followim instruction wea stap lo Philippi 1:10?

¹⁴ Olketa meeting blo iumi helpem iumi for followim olketa instruction wea stap lo Philippi 1:10. First samting, olketa spiritual kaikai lo meeting remindim iumi lo olketa samting wea important lo Jehovah. Mek-tu, iumi lane hao for followim wanem iumi lanem mekem iumi savve kamap perfect. And mek-thri, iumi encouragem each other for “showimaot love and duim olketa gudfala samting.” (Heb. 10:24, 25) Taem iumi kasem encouragement from olketa brata blo iumi, love wea  iumi garem for God and for olketa brata bae kamap moa big. Taem iumi lovem God and olketa brata blo iumi, iumi bae traem best for no mekem olketa narawan for stambol.

15. Wanem nao hem minim for garem staka raeteous frut?

¹⁵ Paul sei olsem lo olketa lo Philippi: “Mi prea tu for full laef and wei bilong iufala bae gud [or bae garem staka raeteous frut].” (Phil. 1:11) Samfala lo olketa raeteous frut hia nao, hem wei for lovem Jehovah and lovem pipol blo hem. Datwan minim tu wei for story abaotem faith wea olketa garem lo Jesus and nambawan hope blo olketa. Philippi 2:15 iusim nara tokpiksa wea hem nao for “shaen olsem laet insaed long disfala world.” Datwan barava fitim bikos Jesus kolem olketa disaepol blo hem “laet bilong world.” (Matt. 5:14-16) And tu, hem talem olketa disaepol blo hem for ‘teachim pipol for kamap disaepol’ and hem sei for olketa mas ‘talem pipol abaotem hem long evri farawe ples long earth.’ (Matt. 28:18-20; Acts 1:8) Iumi garem raeteous frut taem iumi busy for duim disfala important waka.

16. Hao nao Philippi 1:12-14 showimaot hao iumi savve shaen olsem laet nomata iumi deal witim olketa hard taem? (Lukim piksa lo kava.)

¹⁶ Nomata wanem nao iumi mas deal witim, iumi savve shaen olsem laet. Samfala taem, wanfala samting wea happen wea iumi tingse bae mekem hem hard for iumi talemaot gud nius, hem kamap wanfala chance for iumi preach. Olsem example, taem aposol Paul prisoner lo wanfala haos lo Rome, hem raetem datfala leta lo olketa lo Philippi. Nomata hem garem olketa chain lo hand blo hem, datwan no mekem hem hol bak for preach lo olketa wea gardim hem and olketa wea visitim  hem. Paul strong for preach nomata hem mas deal witim olketa hard taem hia, and datwan mekem olketa brata kasem strong and “no fraet nao for talemaot toktok bilong God.”—Readim Philippi 1:12-14; 4:22.

17. Wanem nao wanfala example distaem abaotem gud samting wea kamaot from preaching waka nomata olketa feisim hard taem?

¹⁷ Staka lo olketa brata and sista garem chance for followim example blo Paul wea no fraet. Olketa stap lo kantri wea olketa no free for preach lo pablik or from haos tu haos, so olketa mas faendem olketa nara wei for talemaot gud nius. (Matt. 10:16-20) Lo wanfala kantri olsem, circuit overseer givim idea for each pablisa mas garem preaching “territory” blo hemseleva, wea hem nao olketa relative, neiba, skulfren, wakfren, and olketa narawan wea olketa savve lo hem. Insaed lo tufala year nomoa, namba blo kongregeson lo datfala circuit hem barava go ap. Iumi maet stap lo kantri wea iumi free for preach. Nomata olsem, iumi savve lanem wanfala important leson from example blo olketa brata and sista hia, hem nao: Iumi mas evritaem lukaotem wei for duim gud ministry, iumi trustim hao Jehovah bae givim iumi paoa wea iumi needim for winim eni hard samting.—Phil. 2:13.

18. Wanem nao iumi disaed strong for duim?

¹⁸ Lo disfala barava important taem, iumi mas disaed strong for followim kaonsel blo Paul for olketa lo Philippi. Iumi laek for mek sure lo olketa samting wea barava important, for mas perfect, no mekem narawan stambol, and for gohed garem olketa raeteous frut. Then iumi bae mekem love for kamap moa big and iumi mekhae lo Dadi wea lovem iumi, Jehovah.