FAITH garem bigfala paoa. Olsem example, nomata Satan laek spoelem iumi lo spiritual wei, faith helpem iumi for “blokem olketa arrow bilong Satan wea laet long fire.” (Eph. 6:16) Faith savve helpem iumi for deal witim olketa problem wea big olsem maunten. Jesus talem olketa disaepol blo hem: “Nomata sapos faith bilong iufala hem smol olsem wanfala seed bilong mustard tree nomoa, iufala bae sei long disfala maunten, ‘Iu muv go long narasaed,’ and bae hem muv nao.” (Matt. 17:20) From faith savve strongim iumi lo spiritual wei, hem gud for ting raonem olketa kwestin hia: Wanem nao faith? Hao nao iumi savve showimaot faith lo heart blo iumi? Hao nao iumi savve strongim faith blo iumi? And iumi shud garem faith lo hu?—Rome 4:3.

Faith minim moa samting winim wei for just biliv or luksavve lo truth. Nomata “olketa demon tu bilivim [God hem stap] and olketa fraet fogud.” (Jas. 2:19) Sapos olsem, wanem nao faith?

Bible explainim hao faith garem tufala part. First, “faith hem mekem man sure samting wea hem hope long hem bae kamap tru.” (Heb. 11:1a) Sapos iu garem faith, iu bae barava bilivim hao evri samting wea Jehovah talem hem tru and bae fulfill. Olsem example, Jehovah talem olketa blo Israel: “Mi mekem spesol agrimen wetem de an naet, wea oltaem nomoa, de bae hemi kam long stret taem blong hem, an naet bae hemi kam tu long stret taem blong hem. An no eniwan save brekem disfala strongfala agrimen enitaem. Long sem wei tu, mi mekem spesol agrimen wetem King Deved . . . no eniwan save brekem.” (Jeremaea 33:20, 21) Waswe, enitaem iu wari dat sun bae stop for kamap and go daon, wea minim bae iumi no garem eni day or naet? Sapos iu no daotem olketa law wea kontrolem wei wea earth go raonem sun, waswe, bae iu daotem hao Man wea wakem olketa law hia hem fit for fulfillim olketa promis blo hem? Nomoa, iu bae no daotem datwan!—Aesaea 55:10, 11; Matt. 5:18.

Mek-tu, faith hem “kliafala pruv wea showimaot samting wea man hope long hem, hem tru, nomata hem no savve lukim datwan.” Faith minim man mas garem “kliafala pruv” lo hao wanfala samting hem really stap nomata eye no lukim. (Heb. 11:1b) Lo wanem wei? Sapos wanfala pikinini askem iu, ‘Hao nao iu savve air hem really stap?’ Nomata iu no lukim air, iu bae laek for helpem datfala pikinini for tingim wanem nao pruvim air hem really stap, olsem taem man brith, feelim taem wind blow, and olketa nara samting olsem. Taem pikinini hia pruvim hao air hem wanfala real samting, bae hem bilivim datwan nomata hem no savve lukim. Olsem tu, faith mas garem strongfala pruv.—Rome 1:20.

Faith minim man mas garem pruv, so man mas kasem “stretfala savve abaotem olketa tru teaching.” (1 Tim. 2:4) Bat for garem savve hem no inaf. Paul raet olsem: “Mas showimaot faith long heart.” (Rome 10:10) Man mas no just biliv lo truth nomoa, bat hem mas tinghae lo truth.  Sapos hem duim olsem, datwan bae muvim hem for showimaot faith, wea minim hem bae duim samting wea showimaot hem followim truth. (Jas. 2:20) Man wea no tinghae lo truth from heart, bae rejectim eni pruv, bikos hem laekem nomoa for followim tingting blo hemseleva or hem mek excuse for olketa samting wea hemseleva laekem. (2 Pet. 3:3, 4; Jude 18) Dastawe lo taem blo Bible no evriwan wea lukim olketa mirakol olketa showimaot faith lo datwan. (Nambas 14:11; John 12:37) Holy spirit blo God mekem pipol garem faith, only sapos olketa lovem truth from heart blo olketa.—Gal. 5:22; 2 Thess. 2:10, 11.

Wanfala man wea garem strongfala faith hem King David. (Heb. 11:32, 33) Bat, no evriwan lo famili blo David garem kaen faith olsem. Olsem example, wantaem firstborn brata blo David, Eliab, showimaot hem no garem faith taem hem tok strong lo David bikos David feel nogud lo hao Goliath challengem olketa. (Fas Samuel 17:26-28) No eniwan born witim faith, and man no savve kasem faith from parents. So faith wea David garem hem bikos lo wei wea hemseleva fren witim God.

Lo Psalm 27, NW, David showimaot wanem nao helpem hem for garem strongfala faith. (Vs. 1) David ting raonem samting wea happen lo laef blo hem bifor and hao Jehovah helpem hem for deal witim olketa enemy. (Vs. 2, 3) Hem barava tinghae lo arrangement blo Jehovah for worship. (Vs. 4) David joinim olketa narawan for worshipim God lo tabernacle. (Vs. 6) Hem barava askem Jehovah lo prea for helpem hem. (Vs. 7, 8) David laekem tu for God teachim hem lo olketa wei blo hem. (Vs. 11) From faith hem barava important lo David, dastawe hem talem disfala toktok: “Sapos mi no garem faith, bae mi hao nao ia?”—Vs. 13.

Iu savve garem faith olsem David sapos iu followim sem wei and tingting wea stap lo Psalm 27. From faith depend lo stretfala savve, taem iu spendem moa taem for studyim Bible and olketa pablikeson, datwan bae mekem hem moa isi for iu garem disfala wei blo holy spirit. (Sams 1:2, 3) Spendem taem for ting raonem wanem iu studyim. Olsem plant wea grow lo graon, wei for tinghae savve grow sapos iumi garem wei for ting raonem samting. Taem wei wea iu tinghae lo Jehovah hem grow, bae iu barava laek for showimaot faith lo hem taem iu worshipim hem lo olketa meeting and storyim hope blo iu lo olketa narawan. (Heb. 10:23-25) And tu, iumi pruvim iumi garem faith, taem iumi gohed “prea evritaem and no givap.” (Luke 18:1-8) So “prea evritaem” lo Jehovah, and trustim hao hem bae lukaftarem iu. (1 Thess. 5:17; 1 Pet. 5:7) Faith muvim iumi for duim samting, and taem iumi duim, datwan bae strongim faith blo iumi.—Jas. 2:22.

Lo evening bifor Jesus dae, hem talem olketa disaepol blo hem: “Showimaot faith long God, and showimaot faith long mi tu.” (John 14:1) So iumi need for showimaot faith no lo Jehovah nomoa, bat lo Jesus tu. Hao nao iumi savve showimaot faith lo Jesus? Bae iumi storyim thrifala wei.

First samting, ting lo ransom olsem wanfala present for iu. Aposol Paul sei: “Mi showimaot faith long Son bilong God wea lovem mi and wea dae for sevem mi.” (Gal. 2:20) Taem iu showimaot faith lo Jesus, datwan showimaot iu bilivim datfala ransom hem for iu, hem mekem iu kasem forgiveness for olketa sin blo iu, iu kasem hope for laef olowe, and hem pruvim bigfala love wea God garem for iu. (Rome 8:32, 38, 39; Eph. 1:7) Diswan bae strongim iu for no garem olketa negative tingting abaotem iuseleva.—2 Thess. 2:16, 17.

Mek-tu samting, sakrifaes blo Jesus mekem iumi savve kam klosap lo Jehovah thru lo prea. Bikos lo datfala ransom, iumi no hol bak for prea lo Jehovah “mekem hem showimaot mercy long iumi and kaen long iumi taem iumi needim help.” (Heb. 4:15, 16; 10:19-22) Prea strongim iumi for againstim eni temptation for duim sin.—Luke 22:40.

Mek-thri samting, obeyim Jesus. Aposol John sei: “Man wea showimaot faith long Son hem kasem laef olowe. Man wea no obeyim Son bae no kasem laef, bat God bae kros long hem.” (John 3:36) Lukim hao John storyim wei for showimaot faith hem opposite from wei for no obey. So, taem iu obeyim Jesus iu showimaot faith lo hem. Iu obeyim Jesus taem iu followim “law bilong Christ,” wea hem nao olketa samting wea hem teachim and komandim. (Gal. 6:2) Iu obeyim Jesus tu taem iu followim direction wea hem givim thru lo “wakaman wea faithful and wise.” (Matt. 24:45) Taem iu obeyim Jesus, bae iu gohed strong nomata iu kasem olketa hard taem wea olsem strong wind.—Luke 6:47, 48.

Wantaem wanfala man sei lo Jesus: “Mi garem faith! Helpem mi for strongim faith bilong mi!” (Mark 9:24) Man hia garem lelebet faith, bat hem hambol and luksavve hem needim samfala faith moa. Olsem disfala man, bae iumi evriwan mas feisim samfala situation wea needim iumi for mas garem moa faith. Iumi evriwan savve strongim faith blo iumi distaem. Olsem iumi storyim finis, iumi strongim faith blo iumi taem iumi studyim Bible and ting raonem, and datwan bae helpem iumi for tinghae go moa lo Jehovah. Nara samting wea bae strongim faith blo iumi, hem taem iumi joinim olketa narawan for worshipim Jehovah, talemaot hope blo iumi, and gohed for prea. And tu, taem iumi strongim faith blo iumi, bae iumi kasem bigfala reward. Bible encouragem iumi olsem: “Gohed iusim holy faith wea iufala garem finis for strongim iufala seleva . . . mekem iufala gohed kasem gud samting from love bilong God.”—Jude 20, 21.