1. Wanem privilege nao iu garem?

HEM wanfala nambawan privilege for part lo kongregeson blo Jehovah! Iumi insaed lo wanfala spiritual paradaes wea fulap lo pipol wea garem peace and hapi. Wat nao waka blo iu insaed kongregeson?

2. Wanem tokpiksa nao aposol Paul iusim lo samfala leta blo hem?

² Tokpiksa wea Paul iusim lo samfala leta blo hem savve teachim iumi staka samting abaotem ples blo iumi lo kongregeson. Lo each leta hia, Paul sei kongregeson hem olsem wanfala body. Hem comparem each wan insaed kongregeson olsem olketa didifren part blo body.—Rome 12:4-8; 1 Cor. 12:12-27; Eph. 4:16

3. Wanem thrifala leson nao bae iumi storyim lo disfala article?

³ Lo disfala study article, bae iumi storyim thrifala important leson from disfala tokpiksa blo Paul. First wan, iumi bae lanem hao each wan lo iumi garem ples * insaed kongregeson blo Jehovah. Mek-tu, bae iumi story raonem wanem iumi savve duim sapos iumi faendem hem hard for luksavve lo ples blo iumi insaed kongregeson. And mek-thri, iumi bae storyim why iumi need for gohed busy for duim waka blo iumi insaed kongregeson blo God.

4. Wanem nao Rome 12:4, 5 teachim iumi?

⁴ Firstfala leson wea iumi savve lanem from tokpiksa blo Paul hem abaotem hao each wan lo iumi garem ples insaed famili blo Jehovah. Lo start blo datfala tokpiksa, Paul sei: “Body bilong iumi garem staka part, bat evri part duim difren waka. Long sem wei tu, nomata iumi staka, iumi wanfala body nomoa wea wan mind witim Christ and wea iumi evriwan depend long narawan.” (Rome 12:4, 5) Wanem nao Paul minim? Each wan lo iumi garem didifren waka insaed kongregeson, bat iumi evriwan important.

5. Olketa wanem “present” nao Jehovah givim lo kongregeson?

⁵ Taem iu tingim disfala toktok, ‘Olketa wea garem waka insaed kongregeson,’ stretawe bae iu tingim olketa wea lead insaed kongregeson. (1 Thess. 5:12; Heb. 13:17) Thru lo Christ, Jehovah hem givim “olketa man olsem present” for kongregeson blo Hem. (Eph. 4:8) ‘Olketa man hia wea olsem present’ hem nao olketa member blo Governing Body, olketa helper blo Governing Body, olketa Branch Komiti member, circuit overseer, instructor lo olketa skul, elder lo kongregeson, and olketa ministerial servant. Holy spirit nao appointim olketa brata hia for lukaftarem olketa sheepsheep wea barava spesol lo Jehovah and for strongim kongregeson.—1 Pet. 5:2, 3.

6. Olsem 1 Thessalonica 2:6-8 storyim, wanem nao olketa brata wea holy spirit appointim olketa waka hard for duim?

⁶ Holy spirit appointim olketa brata for duim olketa didifren responsibility. Lo sem wei wea olketa didifren part lo body, olsem hand and leg, waka tugeta for helpem full body, olketa brata wea holy spirit appointim olketa waka hard for helpem full kongregeson. Olketa no duim samting for olketa narawan praisem olketa. Bat, olketa waka hard for strongim olketa brata and sista blo olketa. (Readim 1 Thessalonica 2:6-8.) Iumi thankiu lo Jehovah from hem givim olketa spiritual man hia wea no tingim olketa seleva!

7. Olketa wanem blessing nao olketa wea insaed full-taem service enjoyim?

⁷ Maet samfala lo kongregeson kasem appointment for serve olsem missionary, spesol pioneer, or regular pioneer. Tru nao, staka brata and sista evriwea lo world mekem preaching waka kamap full-taem waka blo olketa. Taem olketa duim olsem, olketa helpem staka for kamap disaepol blo Christ Jesus. Nomata olketa hia wea duim full-taem service maet garem tu-thri material samting nomoa, Jehovah hem barava blessim olketa. (Mark 10:29, 30) Iumi tinghae lo olketa brata and sista olsem, and iumi barava hapi dat olketa part lo kongregeson!

8. Why nao evri pablisa blo gud nius olketa spesol lo Jehovah?

⁸ Waswe, olketa appointed brata and olketa wea duim full-taem ministry nomoa garem ples insaed kongregeson? Nomoa! Evri pablisa blo gud nius olketa important lo God and lo kongregeson. (Rome 10:15; 1 Cor. 3:6-9) Diswan hem bikos main goal blo kongregeson hem for helpem pipol kamap disaepol blo Lord blo iumi, Jesus Christ. (Matt. 28:19, 20; 1 Tim. 2:4) Evriwan insaed kongregeson, nomata sapos olketa baptaes or olketa anbaptaes pablisa, olketa trae for mekem disfala waka for kamap main samting lo laef blo olketa.—Matt. 24:14.

9. Why nao iumi tinghae lo olketa faithful sista blo iumi?

⁹ Jehovah showimaot hem tinghae lo olketa sista insaed kongregeson. Hem tinghae lo olketa waef, mami, widow, and olketa  singol sista wea faithful for servem hem. Bible story abaotem staka woman wea mekem God hapi. Olketa kasem praise from wei wea olketa showimaot nambawan example blo wisdom, faith, wei wea olketa waka hard, no fraet, kaen, and duim olketa gudfala waka. (Luke 8:2, 3; Acts 16:14, 15; Rome 16:3, 6; Phil. 4:3; Heb. 11:11, 31, 35) Iumi thankiu lo Jehovah for olketa faithful woman lo kongregeson blo iumi, wea garem olketa naesfala wei olsem olketa woman lo bifor!

10. Why nao iumi tinghae lo olketa olo brata and sista blo iumi?

¹⁰ Iumi hapi tu bikos iumi garem staka olo brata and sista witim iumi. Samfala kongregeson garem olketa faithful olo brata and sista wea bin givim full laef blo olketa for servem Jehovah. Maet olketa nara olo just kam insaed truth. Nomata olsem, maet olketa olo hia stragol witim olketa didifren problem saed lo health blo olketa bikos olketa kamap olo nao. Olketa problem hia maet mekem olketa no fit for duim staka samting olsem bifor lo kongregeson and lo preaching waka. Nomata olsem, olketa olo brata and sista hia traem best for duim wanem olketa fit for duim lo ministry, and olketa iusim strong blo olketa for encouragem and trainim olketa narawan. Iumi savve kasem gud samting from experience blo olketa. Olketa barava luk naes lo Jehovah and lo iumi tu.—Provebs 16:31.

11-12. Hao nao iu kasem encouragement from olketa young wan insaed kongregeson blo iu?

¹¹ Tingim tu olketa young wan blo iumi. Olketa feisim staka challenge bikos olketa growap insaed disfala world wea Satan nao kontrolem and wea fulap witim olketa nogud idea blo hem. (1 John 5:19) Nomata olsem, iumi hapi tumas for lukim hao olketa young wan hia savve givim olketa koment lo meeting, share lo ministry, and no fraet for defendim wanem olketa bilivim. Yes, iufala olketa young wan garem important waka insaed lo kongregeson blo Jehovah!—Sams 8:2.

¹² Bat samfala lo olketa brata and sista blo iumi maet faendem hem hard for bilivim hao olketa tu important insaed lo kongregeson. Wanem nao savve helpem iumi for feel olsem  each wan lo iumi garem ples insaed kongregeson? Bae iumi storyim datwan.

13-14. Why nao samfala feel olsem olketa nating important nomoa lo kongregeson?

¹³ Tingim mek-tu leson wea iumi lanem from tokpiksa blo Paul. Paul helpem iumi luksavve lo wanfala problem wea staka feisim distaem. Staka faendem hem hard for luksavve dat olketa important lo kongregeson. Paul raet olsem: “Sapos leg hem sei: ‘From mi no wanfala hand, mi no part bilong body,’ waswe, datwan minim hem no part bilong body nao? And tu, sapos ear hem sei: ‘From mi no wanfala eye, mi no part bilong body,’ waswe, datwan minim hem no part bilong body tu?” (1 Cor. 12:15, 16) Wanem point nao Paul laek for teachim?

¹⁴ Sapos iu comparem iuseleva witim olketa narawan insaed kongregeson, maet bae iu feel olsem iu nating important nomoa. Samfala lo kongregeson savve tumas for teach, for organize, or olketa gudfala shepherd. Maet iu feel iu nating savve gud olsem olketa. Diswan showimaot iu hambol and iu luksavve lo wanem iu no fit for duim. (Phil. 2:3) Bat iu mas careful. Sapos iu evritaem comparem iuseleva witim olketa narawan wea savve tumas, iu bae ting daonem iuseleva. Gogo, olsem wanem Paul storyim, iu maet feel dat iu no garem eni ples nomoa insaed kongregeson. Wat nao savve helpem iu for winim kaen feeling olsem?

15. Olsem wanem 1 Corinth 12:4-11 storyim, wanem nao iumi need for luksavve abaotem eni waka or savve wea iumi garem?

¹⁵ Tingim diswan, Jehovah givim holy spirit lo samfala Christian lo first century for duim samfala spesol waka, bat no evriwan kasem sem kaen waka. (Readim 1 Corinth 12:4-11.) Jehovah givim spesol waka and savve lo each wan lo olketa, and evriwan important. Distaem iumi no kasem spesol paoa from holy spirit. Bat principle blo hem still fitim iumi. Iumi no kasem olketa sem waka, bat iumi evriwan important lo Jehovah.

16. Wanem kaonsel nao Paul hem givim wea iumi need for followim?

 ¹⁶ Winim wei for comparem iuseleva witim olketa nara Christian, iumi need for followim kaonsel wea aposol Paul storyim, hem sei: “Man mas lukluk gud long wanem hemseleva duim, then bae hem hapi long wanem hem duim. Hem shud no comparem wanem hem duim witim wanem narawan duim.”—Gal. 6:4.

17. Hao nao wei for followim kaonsel blo Paul hem helpem iumi?

¹⁷ Sapos iumi followim kaonsel blo Paul wea stap insaed lo Bible and iumi lukluk lo wanem iumi savve duim, bae iumi start for luksavve iumi tu garem waka and iumi savve hao for duim samfala samting. Olsem example, wanfala elder maet hem no barava gudfala teacher lo platform, bat hem savve tumas hao for teach lo ministry. Or maet wanfala elder no barava savve hao for organize gud olsem olketa nara elder lo kongregeson, bat evriwan savve lo hem olsem wanfala shepherd wea evritaem showimaot love and olketa pablisa feel free for story witim hem from hem savve givim olketa gud advaes from Bible. Or maet hem garem naesfala wei for showimaot love and welkamim olketa narawan. (Heb. 13:2, 16) Taem iumi luksavve lo gud waka wea iumi savve duim, diswan bae helpem iumi for hapi lo wanem iumi fit for duim for helpem kongregeson. And tu, iumi bae no jealous lo savve or waka wea olketa narawan duim wea hem difren from wanem iumi duim.

18. Hao nao iumi savve kamap gud lo hao iumi duim waka blo iumi?

¹⁸ Nomata wanem waka nao iumi garem insaed kongregeson, iumi evriwan laek for duim moa samting lo service blo iumi and iumi laek for kasem moa savve lo hao for duim waka blo iumi. For helpem iumi duim datwan, Jehovah provaedem staka naesfala training thru lo organization blo hem. Olsem example, lo midol week meeting blo iumi, iumi kasem olketa instruction lo hao for duim gud ministry blo iumi. Waswe, iu mekius lo olketa training hia for helpem iu?

19. Hao nao iu savve kasem goal for attendim Skul for Olketa Kingdom Evangelizer?

¹⁹ Nara nambawan training program hem datfala Skul for Olketa Kingdom Evangelizer. Disfala skul hem for olketa brata and sista wea insaed full-taem service wea age blo olketa between 23 year and 65 year. Iu maet tingse iu bae hard for kasem disfala goal. Bat winim wei for mekem wanfala list blo olketa reason why iu no fit for attendim datfala skul, hem gud for mekem wanfala list lo olketa reason why iu laek for attend. Then iu savve mekem wanfala plan wea bae helpem iu for kamap fit mekem iu savve apply. Sapos iu waka hard, and from Jehovah helpem iu, samting wea iu tingse iu bae no fit for duim firstaem, bae iu fit for duim nomoa.

20. Wanem nao iumi lanem from Rome 12:6-8?

²⁰ Mek-thri leson iumi savve lanem from tokpiksa blo Paul hem stap lo Rome 12:6-8. (Readim.) Lo there, Paul story abaotem hao evriwan insaed kongregeson garem olketa didifren waka. Bat hem storyim tu hao iumi shud iusim savve blo iumi for strongim and encouragem kongregeson.

21-22. Olketa wanem leson nao iumi savve lanem from story blo Robert and Felice?

²¹ Tingim example blo wanfala brata wea maet iumi savve kolem hem Robert. Hem bin serve lo wanfala difren kantri, then hem kasem assignment for go bak and serve lo Bethel lo hom kantri blo hem. Nomata olketa brata talem hem dat disfala change hem no bikos hem duim eni rong samting, hem sei: “For staka month mi garem negative tingting abaotem  miseleva. Mi feel olsem mi fail lo assignment blo mi. Samfala taem mi feel olsem mi laek for finis nomoa from Bethel service.” Hao nao hem kasem bak hapi blo hem? Wanfala elder remindim hem hao Jehovah savve iusim olketa assignment for trainim iumi for savve duim gud assignment wea iumi garem distaem. Robert luksavve winim wei for ting go bak lo olketa samting wea happen finis, hem need for start for ting raonem wanem nao hem savve duim distaem.

²² Brata Felice Episcopo feisim semkaen challenge tu. Hem and waef blo hem graduate from Gilead lo 1956 and serve lo circuit waka lo Bolivia. Lo 1964, tufala garem pikinini. Felice sei: “Mitufala faendem hem wanfala challenge for lusim assignment wea mitufala lovem tumas. Mi mas talem stret hao for samting olsem wan year mi gohed for sorre nomoa lo miseleva. Bat, witim help blo Jehovah mi changem tingting blo mi and mi gohed witim niufala responsibility blo mi olsem wanfala parent.” Waswe, iu tu feel olsem Robert or Felice? Waswe, iu maet feel discourage bikos iu no garem nao olketa assignment wea iu maet garem bifor? Sapos olsem, iu savve hapi sapos iu changem tingting blo iu and tingim nomoa wanem iu savve duim distaem for servem Jehovah and for helpem olketa brata. Gohed busy, iusim savve blo iu for duim waka for helpem olketa narawan, and iu bae hapi taem iu strongim kongregeson.

23. Wanem nao iumi shud duim, and wanem nao bae iumi storyim lo nextfala article?

²³ Each wan lo iumi spesol lo Jehovah. Hem laekem iumi for part lo famili blo hem. Sapos iumi ting raonem wanem iumi savve duim for strongim olketa brata and sista blo iumi, then iumi waka hard for duim datwan, bae iumi no garem disfala feeling dat iumi no garem ples lo kongregeson! Bat, hao nao iumi shud ting lo olketa narawan lo kongregeson? Hao nao iumi savve showimaot iumi tinghae lo olketa? Lo nextfala article, bae iumi story raonem datfala important topic.