1. Wanem nao iu savve finis abaotem Jehovah?

SAPOS mami and dadi blo iu insaed lo truth taem iu smol, masbi tufala teachim iu abaotem Jehovah. Olketa teachim iu Jehovah nao wakem olketa samting, hem garem olketa gudfala wei, and hem bae mekem earth kamap paradaes.​—Jenesis 1:1; Acts 17:24-27.

2. Wanem nao samfala sei abaotem pipol wea biliv lo creation?

² Staka pipol no biliv lo God, so hem hard for olketa bilivim God wakem evri samting. Olketa biliv lo evolution and sei laef kamap seleva. Staka savveman bilivim datwan tu. Olketa sei olketa scientist pruvim Bible hem rong, and olketa sei masbi pipol wea biliv lo wanfala creator no skul gud, no kleva, and bilivim samting wea no tru.

3. Why nao hem important for strongim faith blo iumi?

³ Taem iumi herem kaen samting olsem, waswe, bae datwan mekem iumi start for daotem Jehovah hem wakem evri samting? Hem gud for tingim why iumi bilivim God wakem evri samting. Waswe, iumi bilivim datwan bikos hem wanfala teaching blo Olketa Jehovah’s Witness, or iumi sure lo diswan bikos iumi pruvim lo iumiseleva? (1 Cor. 3:12-15) Nomata iumi Jehovah’s Witness for longtaem, iumi need for gohed strongim faith blo iumi. Datwan bae helpem iumi for no daotem creation taem olketa savveman sei datwan no tru. (Col. 2:8; Heb. 11:6) For helpem iumi strongim faith lo Jehovah, disfala article bae storyim (1) why staka pipol no biliv lo creation,  (2) hao for strongim faith blo iumi lo Jehovah, and (3) why iumi mas gohed strongim faith blo iumi.

4. Olsem Hebrew 11:1 storyim, wanem nao mekem iumi garem faith?

⁴ Samfala tingse sapos man garem faith hem no need for pruvim wanem hem bilivim. Bat Bible no teachim datwan. (Readim Hebrew 11:1.) Olsem example, nomata iumi no savve lukim Jehovah, Jesus, and datfala Kingdom lo heven, iumi garem faith lo olketa samting hia bikos iumi garem kliafala pruv olketa samting hia stap. (Heb. 11:3) Davey Loos, wanfala Witness wea hem scientist sei: “Olketa Jehovah’s Witness no againstim science, bat olketa garem pruv for wanem olketa bilivim.”

5. Why nao staka pipol no biliv lo creation?

⁵ Maet iumi sei, ‘Sapos staka pruv stap wea showimaot God nao wakem earth, why nao staka pipol no bilivim datwan?’ Samfala no savve pruv hem stap. Robert, wea hem wanfala Witness distaem sei: “Lo skul and university, olketa no storyim creation so mi tingse hem no tru. Taem mi 22 years, mi story witim wanfala Jehovah’s Witness. Hem firstaem for mi herem wanem Bible talem abaotem creation and hem mek sense lo mi.” *​—Lukim box “ Parents, Plis Teachim Pikinini Abaotem Creation.”

6. Why nao samfala no biliv lo God?

⁶ Samfala sei olketa no biliv lo God bikos olketa no lukim hem. Nomata olsem,  olketa biliv lo olketa nara samting wea olketa no lukim, olsem air, bikos olketa garem pruv hem stap. Nomata man no savve lukim God, Bible sei pipol savve garem faith lo hem bikos kliafala pruv hem stap for showimaot diswan. (Heb. 11:1) Bat bae hem tek taem for studyim olketa pruv hia, and samfala no laek duim datwan. Man wea no studyim olketa pruv maet faendem hem hard for bilivim God hem stap.

7. Waswe, evriwan wea go lo university biliv lo evolution? Explainim.

⁷ Samfala scientist studyim olketa pruv abaotem creation, and gogo olketa bilivim God nao wakem universe. * Olsem Robert, wea iumi storyim bifor, staka  scientist biliv lo evolution bikos university no teachim creation. Nomata olsem, bihaen samfala scientist lane abaotem Jehovah, gogo olketa biliv lo hem and start for worshipim hem. Olketa scientist hia waka hard for garem faith lo Jehovah, bat iumi tu need for waka hard for strongim faith blo iumi lo God, so iumi need for duim study seleva.

8-9. (a) Wanem kwestin nao bae iumi storyim distaem? (b) Why nao hem gud for lane abaotem olketa samting wea God wakem?

⁸ Wanem nao iumi savve duim for strongim faith blo iumi lo Jehovah? Bae iumi storyim fofala wei for duim datwan.

⁹ Lane abaotem olketa samting God wakem. Taem iumi lane abaotem olketa animal, plant, and star, datwan bae strongim faith blo iumi lo Jehovah. (Sams 19:1; Aesaea 40:26) Staka pablikeson blo iumi garem olketa article wea story abaotem creation. Hem gud for readim kaen story olsem for lanem samfala samting abaotem creation, nomata maet iumi no minim evri samting iumi readim. And tu, hem gud for lukim moa olketa video lo jw.org website abaotem creation wea kamap lo olketa convention bifor.

10. Wanem example nao showimaot God hem stap? (Rome 1:20)

¹⁰ Taem iumi lane abaotem olketa samting wea Jehovah wakem, ting raonem wanem datwan teachim iumi abaotem Jehovah. (Readim Rome 1:20.) Olsem example, hot from sun mekem iumi fit for laef lo earth, bat samfala laet (ultraviolet laet) from sun savve spoelem olketa samting wea laef lo earth, so wanem nao God wakem for protectim iumi? Hem wakem ozone layer, wea olsem shield raonem earth wea stopem sun for no spoelem iumi. Haomas ozone stap lo air hem savve change for fitim haomas ultraviolet laet hem kam from sun. Datwan helpem iumi for luksavve God nao wakem ozone layer and hem duim datwan bikos hem tingim iumi.

11. Wea nao iumi savve readim olketa story wea bae strongim faith blo iumi lo creation? (Lukim box “ Olketa Pablikeson and Video for Strongim Faith blo Iumi.”)

¹¹ Lo Watch Tower Publications Index and lo jw.org, staka story stap wea bae strongim faith blo iumi lo creation. Samfala article and video hem stap lo wanfala sekson lo jw.org wea garem title “Waswe, Samwan Designim?” Olketa article and video hia short nomoa and storyim tu-thri interesting samting abaotem olketa animal and plant, and hao olketa scientist trae for copyim wanem olketa lanem abaotem olketa animal and plant hia.

12. Taem iumi studyim Bible, wanem nao samfala samting iumi savve ting raonem?

¹² Studyim Bible. Davey Loos, datfala scientist wea iumi storyim bifor no biliv lo God firstaem, bat gogo hem changem tingting blo hem. Hem sei: “Wanem mi savve abaotem science helpem mi for luksavve God mas stap. Bat taem mi studyim Bible datwan helpem mi for garem faith lo God.” Nomata iumi savve finis lo olketa tru teaching lo Bible, iumi need for gohed strongim faith blo iumi, and gohed studyim Bible. (Josua 1:8; Sams 119:97) Olsem example, taem iumi studyim Bible, tingim hao wanem  Bible storyim hem stret witim history, hao olketa profesi kamap tru, and hao evri buk lo Bible agree witim each other. Datwan bae strongim faith blo iumi lo God and mekem iumi sure God nao givim kam Bible. *​—2 Tim. 3:14; 2 Pet. 1:21.

13. Wanem nao wanfala example blo gudfala advaes from Bible?

¹³ Taem iumi studyim Bible, tingim tu hao advaes from Bible savve helpem iumi. Olsem example, Bible sei sapos man laekem tumas selen datwan bae “spoelem” hem. (1 Tim. 6:9, 10; Prov. 28:20; Matt. 6:24) Waswe, datfala advaes fitim iumi distaem? Wanfala savveman sei: “Nomata pipol garem staka material samting datwan no savve mekem olketa hapi. And pipol wea laek for garem staka samting no hapi tu.” So advaes blo Bible for no laekem tumas selen hem gudfala advaes. Waswe, iu savve tingim eni nara advaes lo Bible wea helpem iu finis? Taem iumi luksavve advaes blo Creator barava helpem iumi, bae iumi laek for gohed followim wanem Bible talem. (Jas. 1:5) Datwan bae mekem iumi for barava enjoyim laef.​—Aesaea 48:17, 18.

14. Taem iumi studyim Bible, hao nao datwan savve helpem iumi for lanem moa samting abaotem Jehovah?

¹⁴ Taem iumi studyim Bible garem goal for lanem moa samting abaotem Jehovah. (John 17:3) Bae iumi minim gud olketa gudfala wei blo God wea showaot lo creation, and datwan bae strongim faith blo iumi hao God hem stap. (Eksodas 34:6, 7; Sams 145:8, 9) Taem iumi studyim Bible, datwan bae helpem iumi for savve gud lo Jehovah, fren gud witim hem, and barava lovem hem.

15. Taem iumi story abaotem God lo pipol, hao nao datwan savve strongim faith blo iumi?

¹⁵ Story abaotem God lo pipol. Bat hao sapos samwan wea iumi preach lo hem sei hem no biliv lo God, and iumi no savve hao for ansarem hem? Lukaotem eni article lo olketa pablikeson blo iumi wea storyim datfala subject, then go storyim datwan witim hem. (1 Pet. 3:15) Iumi savve askem nara brata or sista for helpem iumi tu. Nomata man wea no biliv lo God acceptim ansa blo iumi or nomoa, iumi bae lanem samting from research wea iumi duim, and datwan bae strongim faith blo iumi. Diswan bae helpem iumi for no wikdaon taem olketa savveman sei God hem no stap.

16. Wanem nao savve happen sapos iumi no gohed strongim faith blo iumi?

¹⁶ Nomata iumi worshipim Jehovah for longtaem finis, iumi mas gohed for strongim faith blo iumi. Why nao olsem? Bikos olketa idea lo world savve spoelem faith blo iumi. From iumi no savve lukim God, maet iumi start for daotem hem stap. Dastawe Paul sei daot hem wanfala “sin wea savve isi for spoelem” iumi. (Heb. 12:1) Wanem nao savve helpem iumi for garem strongfala faith?​—2 Thess. 1:3.

17. Wanem nao savve helpem iumi for garem strongfala faith?

¹⁷ First samting, evritaem askem Jehovah for holy spirit. Why nao olsem? Bikos holy spirit helpem iumi for garem faith. (Gal. 5:22, 23) Iumi needim  faith, so gohed askem Jehovah for holy spirit blo hem and hem bae givim lo iumi. (Luke 11:13) Iumi savve prea olsem: “Strongim go moa faith bilong mifala.”​—Luke 17:5.

18. Olsem Sams 1:2, 3 sei, wanem privilege nao iumi garem?

¹⁸ Nara samting, evritaem studyim Bible. (Readim Sams 1:2, 3.) Taem olketa raetem datfala psalm, no staka Israelite garem full copy lo Law blo God. Bat King and olketa priest savve kasem copy, and evri mek-seven year olketa arrange for olketa man, woman, pikinini, and olketa narawan wea stap witim olketa Israelite for lisin taem olketa readim Law blo God. (Diutronomi 31:10-12) Lo taem blo Jesus, copy blo olketa Scripture stap lo olketa sinagog and no staka narawan garem. Bat distaem staka savve garem chance for readim Bible. Iumi barava tinghae lo datfala privilege, so hao nao iumi savve showimaot iumi tinghae?

19. Wanem nao iumi need for duim for garem strongfala faith?

¹⁹ Iumi bae showimaot iumi tinghae lo privilege for garem Bible taem iumi readim evriday. Hem gud for markem taem for readim and studyim Bible bikos taem iumi duim datwan bae iumi garem strongfala faith.

20. Wanem nao iumi laek for duim?

²⁰ Iumi no olsem staka savveman wea no biliv lo God, bikos iumi garem kliafala pruv God hem stap. (Matt. 11:25, 26) From iumi studyim Bible, iumi minim why evri samting lo earth hem gogo for nogud and wanem Jehovah bae duim for stretem datwan. So strongim faith blo iumi, and helpem olketa narawan for garem faith lo God wea wakem evri samting. (1 Tim. 2:3, 4) And distaem tu, iumi luk forward lo taem wea evriwan wea stap lo earth bae talem sem samting olsem Revelation 4:11 talem: “Jehovah, . . . iu nao fit for kasem glory . . . bikos iu wakem evri samting.”