Kwestin From Reader
Hao nao datfala article “Mifala Laekem Nem Bilong Iu for Holy” lo Wastaoa blo June 2020 explainim klia biliv blo iumi abaotem nem blo Jehovah and rul blo hem?
Lo datfala article, hem storyim wanfala main issue wea affectim olketa human being and olketa angel. Datfala issue nao hem for mekem nambawan nem blo Jehovah kamap holy. Issue abaotem if rul blo Jehovah nao hem best, hem connect tu witim datfala main issue. And nara issue wea join witim datwan tu, hem if olketa man bae gohed faithful lo Jehovah.
Why nao issue abaotem nem blo Jehovah and for mekem datfala nem holy hem barava important? Bae iumi storyim thrifala reason.
Start lo garden blo Eden kam kasem distaem Satan gohed laea for spoelem nem blo God
First reason, Satan tok spoelem nem blo Jehovah lo garden blo Eden. Kwestin wea Satan askem lo Eve hem mekem for luk olsem Jehovah holem bak olketa gud samting from Adam and Eve, and instruction wea Jehovah givim for tufala hem no fair. Then Satan talem opposite samting from wat Jehovah talem, for luk olsem God hem laea. So hem tok spoelem nem blo Jehovah. From datwan, hem kamap “Devil,” wea minim “man wea laea for spoelem nem bilong narawan.” (John 8:44) Bikos Eve bilivim laea blo Satan, Eve disobeyim God, and bighed againstim rul blo Jehovah. (Gen. 3:1-6) Satan gohed tok spoelem nem blo God kam kasem distaem, and hem gohed for spredim laea story abaotem Jehovah. And hem maet isi for pipol wea bilivim olketa laea blo Satan for disobeyim Jehovah. Pipol blo God ting lo olketa laea blo Satan againstim holy nem blo Jehovah hem barava no followim justice. So staka barava nogud samting wea happen lo world hem bikos lo datfala laea blo Satan.
Second reason, for evri creation kasem gud samting, Jehovah bae mekhae lo nem blo hem and kliarem evri laea blo Satan abaotem datfala nem. Datwan nao barava important lo Jehovah. Dastawe hem sei: “Mi bae mekhae lo nambawan nem blo mi.” (Ezek. 36:23) And Jesus talem klia barava important samting wea olketa faithful servant blo Jehovah shud prea abaotem. Hem sei: “Mifala laekem nem bilong iu for holy.” (Matt. 6:9) Bible storyim staka taem hao hem important for givim glory lo nem blo Jehovah. Tingim samfala example: “Givim Jehovah glory wea hem fit for kasem bikos lo nem blo hem.” (1 Chron. 16:29; Ps. 96:8) “Yumi mas singsing fo liftimap biknem blong hem!” (Sams 66:2, SIPB) “Bae mi liftimap hae nem blong yu olowe.” (Sams 86:12, SIPB) Wantaem wea Jehovah story kam from heven, hem lo temple lo Jerusalem taem Jesus sei: “Dadi, mekhae long nem bilong iu.” Then Jehovah sei: “Mi mekhae long nem bilong mi finis, and bae mi mekhae long hem moa.”—John 12:28. a
Third reason, purpose blo Jehovah hem evritaem connect witim nem blo hem. Tingim, wat moa bae happen afta last test bihaen lo Wan Thousand Year Rul blo Christ? Hao nao evri human being and olketa angel bae ting lo nem blo Jehovah lo datfala taem? For kasem ansa, hem gud for tingim moa tufala important issue wea connect witim nem blo Jehovah. Hem nao if olketa human being bae gohed faithful lo Jehovah, and if rul blo Jehovah nao hem best. Waswe, evriwan wea pruvim olketa faithful finis bae gohed feisim challenge for gohed faithful lo Jehovah? Nomoa. Evriwan bae perfect and winim finis datfala last test. Olketa bae kasem laef olowe. And tu, evriwan lo heven and earth bae no need for pruvim if rul blo Jehovah nao hem best. Lo datfala taem, evriwan bae wan mind and acceptim rulership blo Jehovah. Bat waswe lo nem blo Jehovah?
Lo datfala taem, evriwan bae savve lo truth abaotem Jehovah and nem blo hem bae barava holy. Bat olketa wea faithful wea stap lo heven and lo earth bae gohed for mekhae lo nem blo Jehovah. Why nao olsem? Bikos Jehovah bae gohed for duim olketa nambawan samting. Tingim, from Jesus bae givim bak rulership lo Jehovah, and God bae “rul ovarem evriwan.” (1 Cor. 15:28) Afta datwan, olketa human being lo earth bae hapi tumas bikos “olketa bae free olsem olketa pikinini bilong God.” (Rome 8:21) And Jehovah bae fulfillim purpose blo hem for mekem olketa angel lo heven and olketa man lo earth for kam tugeta lo wanfala big famili wea wan mind.—Eph. 1:10.
Hao nao famili blo Jehovah lo heven and lo earth bae feel abaotem evriting hia? Tru nao, iumi bae still laekem tumas for praisem nem blo Jehovah. Holy spirit muvim David for raetem disfala psalm: “Preisim [Jehovah] . . . Preisim hae nem blong hem olowe an olowe.” (Sams 72:18, 19, SIPB) For olowe, iumi bae gohed for faendem olketa niu and interesting reason for duim datwan.
Tru nao, nem blo Jehovah representim evriting abaotem hem. Taem iumi ting abaotem nem blo hem, datwan remindim iumi abaotem love blo hem. (1 John 4:8) Iumi bae evritaem remember dat Jehovah creatim iumi bikos hem lovem iumi, hem provaedem ransom sakrifaes bikos hem lovem iumi, and iumi bae evritaem remember hao rulership blo hem raeteous and showimaot love. And bae iumi gohed for lukim hao Jehovah hem lovem iumi. For olowe, iumi bae laek tumas for fren klos witim Dadi blo iumi and singsing for praisem nambawan nem blo hem.—Ps. 73:28.
