STUDY ARTICLE 33
SONG 130 Forgivim Narawan
Hao Kongregeson Savve Followim Tingting blo Jehovah Abaotem Olketa wea Duim Sin
“Sapos eniwan hem sin, wanfala man . . . stap for helpem iumi.”—1 JOHN 2:1.
MAIN FOCUS
Disfala article bae storyim wat iumi savve lanem from hao kongregeson lo Corinth lo first century hem deal witim case blo wanfala brata wea duim serious sin.
1. Wat nao Jehovah laekem evriwan for kasem?
JEHOVAH creatim olketa man for garem freedom for chus. Iu iusim datfala present evriday taem iu mekem olketa disison. Main important disison wea eniwan savve mekem, hem nao for dedicatem laef blo hem lo Jehovah and for kamap part lo famili blo hem for worshipim hem. Jehovah laekem evriwan for duim datwan. Why? Bikos hem lovem pipol and laekem best samting for olketa. Hem laekem olketa for fren witim hem and laef olowe.—Deut. 30:19, 20; Gal. 6:7, 8.
2. Hao nao Jehovah feel abaotem olketa wea duim serious sin bat olketa no repent? (1 John 2:1)
2 Jehovah no forcem eniwan for servem hem. Hem letem each wan for disaed seleva wat bae hem duim. Wat if wanfala baptaes Christian no obeyim law blo God, and duim serious sin? If hem no repent, olketa mas aotem hem from kongregeson. (1 Cor. 5:13) Nomata olsem, Jehovah still laekem datfala person wea duim serious sin for kam bak lo hem. Datwan hem wanfala important reason why Jehovah provaedem ransom for mekem olketa sinner wea repent for kasem forgiveness. (Readim 1 John 2:1.) Loving Dadi blo iumi barava laekem olketa wea duim serious sin for repent, and hem encouragem olketa for duim datwan.—Zech. 1:3; Rome 2:4; Jas. 4:8.
3. Wat nao bae iumi discussim lo disfala article?
3 Jehovah laekem iumi for garem sem tingting blo hem abaotem sin and olketa wea duim serious sin. Lo disfala article, bae iumi storyim datwan. Bae iumi lukim (1) hao kongregeson lo Corinth lo first century deal witim case blo wanfala brata wea duim serious sin, (2) wat nao direction wea aposol Paul givim taem man hia hem repent, and (3) wat nao disfala story lo Bible teachim iumi abaotem tingting blo Jehovah lo olketa Christian wea duim serious sin.
HAO KONGREGESON LO FIRST CENTURY DEAL WITIM SERIOUS SIN
4. Wat nao situation wea kamap lo kongregeson lo Corinth lo first century? (1 Corinth 5:1, 2)
4 Readim 1 Corinth 5:1, 2. Lo third missionary tour blo Paul, hem herem nius abaotem nogud samting wea happen insaed niu kongregeson lo Corinth. Wanfala brata lo kongregeson gohed for duim sex witim stepmami blo hem. Kaen wei olsem, nogud tumas and “nomata pipol wea no biliv no savve duim tu kaen samting olsem”! Bat, olketa lo datfala kongregeson acceptim nomoa wat hem duim, and luk olsem, olketa praod abaotem tu. Maet olketa tingse taem olketa acceptim datwan, hem showim God garem mercy and understandim hao iumi no perfect. Bat Jehovah barava no acceptim pipol blo hem for duim serious sin. Taem man hia no shame for duim kaen wei olsem, hem barava spoelem gud reputation blo kongregeson. Wat hem duim maet influencim tu olketa nara Christian wea associate witim hem. So, wat nao direction wea Paul givim lo kongregeson?
5. Wat nao Paul talem kongregeson for duim, and wat nao datwan minim? (1 Corinth 5:13) (Lukim tu piksa.)
5 Readim 1 Corinth 5:13. Jehovah iusim Paul for raetem datfala leta for givim direction for aotem datfala man wea no repent from kongregeson. Hao nao olketa faithful Christian hia shud treatim datfala man? Paul talem olketa for stop for gohed “fren witim” hem. Wat nao datwan minim? Paul explainim hao datwan minim for no even “sidaon and kaikai witim man olsem.” (1 Cor. 5:11) For sidaon and kaikai witim samwan, savve lead go lo wei for spendem moa taem tugeta. So hem klia, Paul minim dat kongregeson shud no associate or duim eni social activity witim datfala person. Datwan bae protectim kongregeson from nogud wei blo datfala man. (1 Cor. 5:5-7) And tu, wei for no fren klos witim man hia maet helpem hem for luksavve dat hem barava go difren from wei blo Jehovah, and taem olsem maet hem feel sorre and laek for repent.
God iusim Paul for raetem wanfala leta for givim direction abaotem hao kongregeson mas aotem wanfala man wea duim serious sin, and wea no repent (Lukim paragraf 5)
6. Hao nao leta blo Paul affectim olketa lo kongregeson and datfala man wea duim serious sin?
6 Bihaen Paul sendem leta blo hem for olketa Christian lo Corinth, hem wonder hao nao kongregeson bae react lo datfala leta. Then, Titus tekem kam nius wea mekem hem barava hapi. Kongregeson acceptim direction wea olketa kasem. (2 Cor. 7:6, 7) Olketa followim instruction blo hem. And tu, no longtaem bihaen Paul sendem first leta blo hem, datfala man wea duim serious sin hem repent and stop for duim datfala sin! Hem changem wei and attitude blo hem and start for followim raeteous standard blo Jehovah. (2 Cor. 7:8-11) So, wat nao next direction wea Paul givim lo kongregeson?
HAO KONGREGESON SHUD TREATIM DATFALA MAN WEA REPENT
7. Wat nao gud samting wea kamaot from wei wea olketa aotem datfala man wea duim serious sin from kongregeson? (2 Corinth 2:5-8)
7 Readim 2 Corinth 2:5-8. Paul sei “panis wea plande long iufala givim long man hia hem fitim nao.” So datwan showim datfala discipline kasem goal, hem helpem datfala man. Wat nao datfala goal? Hem nao for leadim hem for repent.—Heb. 12:11.
8. Wat nao next samting wea Paul talem olketa lo kongregeson for duim?
8 So Paul givim direction lo kongregeson and sei: “Iufala mas willing for forgivim and comfortim” datfala brata wea repent and “showim long hem iufala lovem hem.” Paul no just laekem kongregeson for acceptim bak datfala brata for stap moa witim pipol blo Jehovah. Bat, hem laekem toktok, wei, and akson blo olketa for helpem datfala man wea repent for luksavve dat olketa really forgivim hem and lovem hem. Datwan bae showimaot klia hao olketa hapi for welkamim hem bak lo kongregeson.
9. Why nao maet samfala hol bak for forgivim datfala sinner wea repent?
9 Hao, samfala lo kongregeson hol bak for welkamim datfala sinner wea repent? Bible no talem, bat maet samfala feel olsem. Maet samfala tingim hao samting wea hem duim hem spoelem nem blo kongregeson and mek shame lo samfala insaed kongregeson. Maet samfala wea waka hard for keepim wei blo olketa klin and gohed faithful, feel olsem hem no fair for kongregeson showimaot love lo datfala brata. (Comparem Luke 15:28-30.) Bat, why nao hem important for kongregeson showim tru love for datfala brata wea kam bak?
10-11. Wat nao bae happen if olketa elder no laek for forgivim sinner wea repent?
10 Imaginim wat maet happen if olketa elder no letem man wea repent for kam bak lo kongregeson, or if afta hem kam bak, olketa brata and sista no laek for showimaot love lo hem. Datwan maet mekem hem “sorre tumas.” Maet hem isi for feel dat situation blo hem hopeles. Maet hem even givap for duim samting for fren bak witim Jehovah.
11 And worse samting, if olketa brata and sista no forgivim datfala sinner wea repent, datwan savve spoelem frenship blo olketa witim Jehovah. Why? Bikos if olketa no followim wei blo Jehovah for forgivim olketa wea repent, datwan minim olketa showimaot wei blo Satan wea no kaen and no showimaot mercy. Taem olsem, olketa kamap tul blo Satan for spoelem datfala man for no servem Jehovah.—2 Cor. 2:10, 11; Eph. 4:27.
12. Hao nao kongregeson savve followim example blo Jehovah?
12 So, wat nao kongregeson lo Corinth savve duim for followim example blo Jehovah, and no Satan? Olketa need for followim wei blo Jehovah for deal witim sinner wea repent. Tingim wat samfala Bible raeta talem abaotem Jehovah. David sei: “Jehovah, iu gud tumas and redi for forgive.” (Ps. 86:5) Micah sei: “Hao, eni God hem olsem iu, wea savve forgivim sin and no tingim rong?” (Mic. 7:18) And Isaiah sei: “Wicked man mas lusim olketa nogud wei blo hem, and nogud man mas lusim nogud tingting blo hem. Hem mas kam bak lo Jehovah, wea bae showim mercy lo hem, lo God blo iumi, bikos hem bae barava forgivim hem.”—Isa. 55:7.
13. Why nao hem fitim for olketa reinstatem datfala sinner wea repent? (Lukim tu box “ Wat Taem Nao Datfala Man lo Corinth Hem Reinstate?”)
13 For followim example blo Jehovah, kongregeson lo Corinth mas welkamim bak datfala man wea repent and showimaot love lo hem. Taem olketa followim direction wea Paul givim for welkamim bak datfala sinner wea repent, kongregeson showimaot olketa “obey long evri samting.” (2 Cor. 2:9) Hem tru, datfala man hem aot from kongregeson for tu-thri months nomoa, bat discipline wea hem kasem barava leadim hem for repent. Dastawe, no eni reason stap for olketa delay for reinstatem man hia lo kongregeson.
SHOWIMAOT JUSTICE AND MERCY OLSEM JEHOVAH
14-15. Wat nao iumi lanem from hao olketa lo Corinth bifor deal witim case blo datfala man? (2 Peter 3:9) (Lukim tu piksa.)
14 Datfala story abaotem hao olketa lo Corinth bifor deal witim datfala case blo man wea duim serious sin, hem stap lo Bible “for teachim iumi.” (Rome 15:4) Datfala story teachim iumi dat Jehovah no acceptim pipol blo hem for duim serious sin. Hem no garem kaen tingting for sei, ‘Hem olraet nomoa for olketa wea duim serious sin and no repent, for kasem mercy and associate witim olketa faithful worshipper blo hem.’ Jehovah savve showimaot mercy, bat hem no letem pipol blo hem for gohed for duim nogud samting, and hem no changem standard blo hem. (Jude 4) Really, Jehovah no showimaot mercy if hem letem man wea duim serious sin for gohed stap lo kongregeson bikos datwan bae mekem evriwan lo kongregeson for stap lo danger.—Prov. 13:20; 1 Cor. 15:33.
15 Nomata olsem, Jehovah no laekem eniwan for dae. Hem laek for givim chance for evriwan sev. Hem showim mercy lo pipol wea changem wei blo olketa and laek for fren bak moa witim hem. (Ezek. 33:11; readim 2 Peter 3: 9.) So taem datfala man lo Corinth repent and lusim nogud wei blo hem, Jehovah iusim Paul for explainim dat olketa shud forgivim and welkamim bak datfala man.
Kongregeson showimaot love and mercy blo Jehovah, taem olketa welkamim bak olketa wea reinstate (Lukim paragraf 14-15)
16. Taem iu lane abaotem hao olketa lo Corinth deal witim datfala case, wat nao datwan mekem iu laek for duim?
16 Taem iumi studyim hao olketa lo Corinth deal witim disfala case, hem helpem iumi for lukim hao Jehovah showimaot love, raeteous wei, and justice. (Ps. 33:5) Diswan mekem iumi barava laek for praisem Jehovah. Bikos iumi evriwan sinner and each wan lo iumi needim forgiveness blo hem. Each wan lo iumi garem reason for thankiu lo Jehovah for datfala ransom wea mekem iumi fit for kasem forgiveness. Hem barava comfortim and encouragem iumi, bikos iumi savve Jehovah barava lovem pipol blo hem and laekem best samting for olketa!
17. Wat nao bae iumi discussim lo next tufala article?
17 So, hao nao olketa kongregeson distaem savve deal witim case blo olketa wea duim serious sin? Hao nao olketa elder lo kongregeson savve showimaot olketa garem sem feeling olsem Jehovah for leadim samwan wea duim serious sin for repent? Hao nao kongregeson shud react taem olketa elder disaed for aotem or reinstatem samwan? Bae iumi storyim olketa kwestin hia lo next tufala article.
SONG 109 Barava Lovem Narawan From Heart
