1. Wat nao savve happen lo samfala wea duim serious sin?

 LO LAST article, iumi lanem hao aposol Paul deal witim case blo wanfala man wea duim serious sin lo Corinth. Datfala sinner no repent and olketa mas aotem hem from kongregeson. Bat olsem theme scripture showim, samfala wea duim serious sin savve repent taem olketa kasem help. Jehovah savve leadim olketa for repent. (Rome 2:4) Hao nao olketa elder savve helpem olketa for repent?

2-3. Wat nao iumi shud duim if iumi savve wanfala brata or sista duim serious sin, and why nao olsem?

² Bifor olketa elder savve helpem samwan, olketa need for savve wat nao happen. If iumi savve wanfala brata or sista duim serious sin wea maet gogo bae olketa aotem hem from kongregeson, wat nao iumi shud duim? Iumi shud encouragem datfala person for go lo olketa elder for kasem help.—Isa. 1:18; Acts 20:28; 1 Pet. 5:2.

³ Bat, wat if datfala man wea duim serious sin no laek story lo olketa elder? Then iumi nao bae go story lo olketa elder for mek sure hem kasem help wea hem needim. Taem iumi duim datwan, iumi showimaot love bikos iumi no laekem eni brata or sista for lusim Jehovah. If datfala person gohed duim serious sin, hem bae spoelem go moa frenship blo hem witim Jehovah. And tu, maet hem spoelem nem blo kongregeson. So iumi bae no fraet for story lo olketa elder bikos iumi lovem Jehovah and datfala person wea duim sin.—Ps. 27:14.

HAO OLKETA ELDER HELPEM OLKETA WEA DUIM SERIOUS SIN

4. Wat nao goal blo olketa elder taem olketa meet witim samwan wea duim serious sin?

⁴ Taem samwan lo kongregeson duim serious sin, body of elders savve chusim thrifala qualify elder for serve olsem wanfala  komiti. a Olketa man hia need for hambol and no ova tumas. Olketa bae traem best for helpem datfala person for repent, bat olketa luksavve hem hard for olketa forcem samwan for change. (Deut. 30:19) Olketa elder luksavve dat no evriwan wea duim serious sin bae respond lo sem positive wei olsem King David. (2 Sam. 12:13) Samfala maet chus for no followim kaonsel blo Jehovah. (Gen. 4:​6-8) Nomata olsem, goal blo olketa elder hem for traem best for leadim samwan wea duim serious sin for repent. Wat nao olketa principle wea olketa elder followim taem olketa meet witim man wea duim serious sin?

5. Wat nao olketa elder need for tingim taem olketa meet witim samwan wea duim serious sin? (2 Timothy 2:​24-26) (Lukim tu piksa.)

⁵ Olketa elder ting lo samwan wea duim serious sin olsem sheepsheep wea lus and hem still spesol lo Jehovah. (Luke 15:​4, 6) So taem olketa meet witim datfala person, hao olketa story and attitude blo olketa mas no raf bat kaen. And tu, bae olketa no just askem olketa kwestin and faendaot information followim wanfala set wei. Instead, olketa bae showimaot olketa quality wea stap lo 2 Timothy 2:​24-26. (Readim.) Olketa elder bae gohed for kaen and no raf taem olketa traem best for kasem heart blo datfala person.

6. Wat nao olketa elder bae duim for redyim heart blo olketa bifor olketa meet witim samwan wea duim sin? (Rome 2:4)

⁶ Olketa elder redyim heart blo olketa. Olketa trae for barava followim example blo Jehovah taem olketa deal witim samwan wea duim sin, olketa tingim toktok blo Paul wea sei: “God hem kaen tumas long iu and hem laekem [or, leadim iu] for repent.” (Readim Rome 2:4.) Olketa elder mas remember dat olketa waka olsem shepherd anda lo direction blo Christ. (Isa. 11:​3, 4; Matt. 18:​18-20) Bifor olketa meet witim samwan wea duim serious sin, datfala komiti bae prea abaotem goal blo olketa. Datfala goal hem nao for leadim man wea sin for repent. Olketa bae duim research lo Bible and olketa pablikeson blo iumi, and prea lo Jehovah for helpem olketa understandim datfala situation. Bae olketa need for savve lo samfala samting abaotem baekgraon blo hem wea maet contribute lo tingting, attitude, and wat hem duim.—Prov. 20:5.

7-8. Hao nao olketa elder savve followim example blo Jehovah for patient taem olketa meet witim samwan wea duim serious sin?

⁷ Olketa elder followim example blo Jehovah for patient. Olketa rememberim hao Jehovah deal witim samfala lo bifor wea duim serious  sin. For example, Jehovah patient taem hem story witim Cain, warnim hem abaotem wat savve happen if hem duim sin, and helpem hem luksavve lo gud samting hem bae kasem if hem obey. (Gen. 4:​6, 7) Jehovah iusim profet Nathan for kaonselem David and iusim wanfala illustration wea kasem heart blo datfala king. (2 Sam. 12:​1-7) And “staka taem” nao Jehovah God “gohed for sendem” olketa profet blo hem for helpem nation blo Israel wea no obey. (Jer. 7:​24, 25) Hem no weitim pipol blo hem for repent bifor hem helpem olketa. Bat, hem duim samting firstaem, hem gohed for encouragem olketa for repent.

⁸ Taem olketa elder trae for helpem samwan wea duim serious sin, olketa followim example blo Jehovah. Olsem 2 Timothy 4:2 talem, taem olketa elder story for helpem datfala brata or sista, olketa “mas barava patient.” Wanfala study note lo datfala verse sei olsem abaotem olketa elder: “Hem bae evritaem need for kontrolem hemseleva, patient for helpem datfala [sinner] for laek duim wat hem stret. If [datfala elder] letem feeling for kros or feel nogud for affectim hem, datwan maet mekem samwan wea sin for go farawe moa or even mekem [datfala sinner] for stambol.”

9-10. Hao nao olketa elder savve helpem samwan wea sin for ting raonem wat hem duim?

⁹ Olketa elder trae for understandim wat nao olketa situation wea lead go lo datfala sin. For example, hao, datfala brata or sista isisi kamap wik bikos hem stop for duim personal study or no duim ministry? Hao, hem no prea olowe lo Jehovah or evritaem prea abaotem sem samting nomoa? Hao, hem letem feeling for laek duim nogud samting for affectim olketa disison blo hem? Hao, hem no wise taem hem chusim entertainment or pipol wea hem associate witim? Hao nao olketa choice hia affectim heart blo hem? Hao, hem luksavve olketa disison and akson blo hem affectim Dadi blo hem, Jehovah?

¹⁰ Taem olketa elder iusim olketa gud kwestin, olketa bae no ask abaotem detail wea olketa no need for savve, bat lo kaenfala wei olketa bae askem olketa kwestin wea bae helpem datfala person for story and ting raonem wat hem duim. (Prov. 20:5) And tu, olsem hao Nathan deal witim David, olketa elder savve iusim illustration for helpem datfala person for ting raonem and luksavve lo rong wea hem duim. Maet during lo first meeting nomoa, hem bae feel sorre for wat hem duim. And maet hem bae repent.

11. Hao nao Jesus deal witim olketa wea duim sin?

¹¹ Olketa elder traem best for followim example blo Jesus. Taem Jesus deal witim Saul from Tarsus, hem askem kwestin wea helpem Saul for ting raonem wat hem duim, hem sei: “Saul, Saul, why nao iu againstim mi?” Datfala kwestin helpem Paul for luksavve wat hem duim, hem no stret. (Acts 9:​3-6) And lo case blo ‘datfala woman Jezebel,’ Jesus sei: “Mi givim hem taem for hem repent.”—Rev. 2:​20, 21.

12-13. Maet hao nao olketa elder savve givim taem for man wea sin for repent? (Lukim tu piksa.)

¹² From olketa elder followim example blo Jesus, bae olketa no kwiktaem for conclude dat wanfala sinner bae hard for repent. Samfala maet repent lo firstaem wea komiti meet witim olketa, bat olketa narawan maet needim moa taem. So olketa elder maet arrange for meet witim datfala person winim wanfala taem. Maet afta first taem wea komiti meet witim hem, datfala brata or sista bae start for ting serious abaotem wat olketa talem hem. Maet hem hambol and prea lo Jehovah for  forgivim sin blo hem. (Ps. 32:5; 38:18) So, lo next meeting, maet datfala sinner garem difren attitude from firstaem wea olketa meet witim hem.

¹³ For help for leadim datfala sinner for repent, olketa elder need for showimaot olketa kaen and tingim hem. Olketa hope and prea dat Jehovah bae blessim hard waka blo olketa and bae datfala person kasem bak gudfala tingting and repent.—2 Tim. 2:​25, 26.

14. Hu nao fit for kasem praise taem wanfala sinner repent, and why nao olsem?

¹⁴ If wanfala sinner hem repent, datwan mekem iumi for barava hapi! (Luke 15:​7, 10) Hu nao fit for kasem praise? Hao, hem olketa elder? Tingim wat Paul talem abaotem olketa wea sin, hem sei: “Maet God bae letem olketa for changem tingting bilong olketa.” (2 Tim. 2:25) Wanfala study note lo datfala verse hem sei: “Praise for wei wea man changem tingting blo hem no go lo eni man, bat lo Jehovah wea helpem olketa Christian wea go difren for mekem disfala important change. Paul gohed for storyim samfala lo olketa barava nambawan samting wea kamaot from wei for repent,—hem leadim man wea sin for garem stretfala savve abaotem truth, helpem hem for garem gudfala tingting, and helpem hem for ranawe from trap blo Satan.—2Ti 2:26.”

15. Hao nao olketa elder savve gohed for helpem wanfala sinner wea repent?

¹⁵ Taem wanfala sinner repent, datfala komiti bae arrangem olketa shepherding visit for gohed givim help wea datfala person needim for faet againstim olketa trap blo Satan and wakabaot followim stretfala road. (Heb. 12:​12, 13) Olketa elder no savve storyim lo eniwan detail abaotem wat datfala sinner duim. Bat, maet wat nao kongregeson need for savve abaotem?

“STRETEM OLKETA WEA GOHED FOR DUIM SIN. DUIM DISWAN FRONT LONG EVRIWAN”

16. Olsem iumi readim lo 1 Timothy 5:​20, wat nao Paul minim taem hem sei “evriwan”?

¹⁶ Readim 1 Timothy 5:20. Paul raet go lo Timothy wea hem wanfala elder, and hem  story abaotem hao for deal witim “olketa wea gohed for duim sin.” Wat nao Paul minim taem hem sei “evriwan”? Disfala toktok “evriwan” hem no evritaem minim full kongregeson. Bat, hem minim olketa wea savve finis abaotem datfala sin. Maet hem olketa wea lukim wat hem happen, or olketa wea datfala sinner talem sin blo hem lo olketa. Olketa elder bae letem olketa hia for savve dat olketa deal witim datfala person and stretem finis datfala situation.

17. If staka lo kongregeson savve finis or klosap for savve abaotem wanfala serious sin wea happen, wat announcement nao bae kamap, and why nao olsem?

¹⁷ Samfala taem, maet staka lo kongregeson nao savve finis abaotem datfala serious sin or maet hem samting wea klosap evriwan bae savve abaotem. Taem olsem, datfala toktok “evriwan” hem includim full kongregeson. So wanfala elder bae announcem lo kongregeson hao datfala brata or sista hem kasem repruv. Why? Paul sei: “Datwan olsem wanfala warning for olketa” narawan for no duim sin.

18. Hao nao bae olketa elder deal witim situation blo olketa young wan wea anda 18 years old and wea baptaes finis? (Lukim tu piksa.)

¹⁸ Wat if wanfala young wan wea baptaes finis and anda 18 years, hem duim wanfala serious sin? Body of elders bae arrange for tufala elder meet witim datfala young wan witim Christian parents b blo hem. Tufala elder hia bae faendaot wat nao parents duim finis for helpem datfala pikinini for repent. If datfala pikinini garem gud attitude and parents gohed for helpem hem, tufala elder hia  maet disaed dat no eni need stap for wanfala komiti meet witim olketa. Olketa elder luksavve dat God givim lo parents responsibility for stretem pikinini blo olketa lo loving wei. (Deut. 6:​6, 7; Prov. 6:20; 22:6; Eph. 6:​2-4) Bihaen datwan, olketa elder bae gohed chek witim parents for mek sure datfala pikinini gohed for kasem help wea hem needim. Bat, hao if datfala pikinini wea baptaes hem no laek for repent bat gohed for duim nogud samting? If olsem, bae wanfala komiti meet witim hem and Christian parents blo hem.

“JEHOVAH HEM LOVEM MAN AND HEM SHOWIMAOT MERCY”

19. Hao nao olketa elder traem best for followim example blo Jehovah taem olketa deal witim samwan wea duim serious sin?

¹⁹ Olketa elder wea serve lo wanfala komiti garem responsibility front lo Jehovah for keepim kongregeson klin. (1 Cor. 5:7) And tu, olketa traem best for helpem samwan wea duim serious sin for repent. Bikos lo datwan, olketa elder garem positive tingting and hope dat person hia bae change. Why? Bikos olketa laek for followim example blo Jehovah, wea hem “lovem man and hem showimaot mercy.” (Jas. 5:11) Lukim hao datfala olo aposol John hem garem datkaen attitude. Hem sei: “Olketa pikinini bilong mi, mi raetem kam olketa samting hia long iufala mekem iufala no sin. Bat sapos eniwan hem sin, wanfala man wea raeteous hem stap for helpem iumi, wea hem nao Jesus Christ wea stap witim Dadi long heven.”—1 John 2:1.

20. Wat nao bae iumi storyim lo last article blo disfala series?

²⁰ Bat sorre samting, samfala taem wanfala Christian hem no laek for repent. If olsem, olketa elder bae aotem hem from kongregeson. Hao nao olketa elder deal witim olketa serious case olsem? Bae iumi storyim datwan lo last article blo disfala series.