STUDY ARTICLE 35
SONG 123 Faithful for Obeyim Olketa wea Lead
Help for Olketa wea Aot From Kongregeson
“Olketa long heven hapi long 99 raeteous man wea no need for repent, bat iu savve, bae olketa barava hapi tumas taem wanfala man wea sin hem repent.”—LUKE 15:7.
MAIN FOCUS
Lo disfala article bae iumi lanem why olketa elder mas aotem samfala from kongregeson and hao olketa savve helpem olketa hia for repent and fren bak witim Jehovah.
1-2. (a) Hao nao Jehovah ting lo olketa wea min for duim serious sin? (b) Wat nao Jehovah hope olketa sinner bae duim?
JEHOVAH heitim wei for duim eni sin, and no letem pipol blo hem for gohed for duim nogud samting. (Ps. 5:4-6) Jehovah laekem iumi for mas followim olketa raeteous standard blo hem wea stap lo Bible. Nomata olsem, hem no expectim pipol wea no perfect for duim samting lo perfect wei. (Ps. 130:3, 4) Bat lo semtaem, hem no acceptim ‘olketa wea no followim hem’ and wea ting lo wei wea God hem kaen tumas olsem excuse for “olketa nating shame for duim rong samting.” (Jude 4) Tru nao, Bible sei “pipol wea no obeyim” God bae distroe lo Armageddon.—2 Pet. 3:7; Rev. 16:16.
2 Bat, Jehovah no laekem eniwan for distroe. Olsem iumi storyim finis lo olketa firstfala article lo disfala series, Bible talem klia dat Jehovah “laekem evriwan for garem chance for repent.” (2 Pet. 3:9) Olketa elder followim example blo Jehovah for patient taem olketa traem best for helpem man wea duim serious sin for changem wei blo hem and for fren bak witim Jehovah. Nomata olsem, samfala wea duim serious sin no laek for repent. (Isa. 6:9) Samfala gohed for duim sin nomata olketa elder traem best for leadim olketa for repent. Wat nao olketa elder need for duim lo kaen situation olsem?
“AOTEM MAN WEA DUIM RABIS SAMTING”
3. (a) Wat nao Bible sei olketa shud duim taem samwan wea duim sin hem no repent? (b) Why nao hem olsem datfala sinner seleva nao chus for aot from kongregeson?
3 Taem samwan wea duim serious sin no laek for repent, olketa elder mas followim direction wea stap lo 1 Corinth 5:13 wea sei: “Aotem man wea duim rabis samting from kongregeson.” Hem olsem datfala person wea duim serious sin, hemseleva chus for aot from kongregeson, bikos hem savve if hem no repent bae olketa aotem hem from kongregeson, wat hem plantim bae hem a harvestim. (Gal. 6:7) Why nao olsem? Bikos hemseleva no laek for acceptim wei wea olketa elder trae for helpem hem staka taem for leadim hem for repent. (2 Ki. 17:12-15) Wat hem duim showim hem chus for no laek followim olketa standard blo Jehovah.—Deut. 30:19, 20.
4. Taem olketa aotem wanfala sinner wea no repent from kongregeson, why nao olketa announcem datwan?
4 Taem olketa aotem from kongregeson samwan wea duim serious sin and wea no repent, olketa elder bae mekem wanfala announcement lo kongregeson dat hem no wanfala lo Olketa Jehovah’s Witness distaem. b Datfala announcement hem no for mek shame lo datfala person. Bat, hem for letem kongregeson savve, mekem olketa followim kaonsel blo Bible for “no fren witim” datfala person, or even no “kaikai witim” hem. (1 Cor. 5:9-11) Jehovah garem gud reason for givim datfala direction. Aposol Paul sei: “Lelebet yeast nomoa savve mekem evri flour wea man mixim hem rise.” (1 Cor. 5:6) Olketa wea duim serious sin and no repent savve affectim olketa narawan wea traem best for followim olketa raeteous standard blo Jehovah.—Prov. 13:20; 1 Cor. 15:33.
5. Hao nao iumi shud ting lo wanfala brata or sista wea olketa aotem from kongregeson, and why nao olsem?
5 Hao nao iumi shud ting lo wanfala brata or sista wea olketa aotem from kongregeson? Nomata iumi bae no fren or associate witim hem, iumi shud no tingse dat hem hard for kam bak, bat iumi ting lo hem olsem sheepsheep wea lus. Wanfala sheepsheep wea lus, hem savve kam bak. Remember, datfala sheepsheep wea lus hem dedicate finis lo Jehovah. Bat sorre samting, hem no gohed followim dedication blo hem distaem, and datwan putim laef blo hem lo danger. (Ezek. 18:31) Nomata olsem, from Jehovah still givim taem for showim mercy, hope hem stap yet for datfala person for kam bak. Hao nao olketa elder savve showimaot hope hem stap yet for samwan wea aot from kongregeson?
HAO OLKETA ELDER HELPEM OLKETA WEA AOT FROM KONGREGESON
6. Wat nao samfala samting wea olketa elder bae duim for helpem man wea olketa aotem from kongregeson?
6 Taem olketa aotem samwan from kongregeson, hao, hem mas stragol seleva nao for kam bak lo Jehovah? Barava nomoa! Taem wanfala komiti blo olketa elder talem datfala person wea no repent, dat olketa bae aotem hem from kongregeson, komiti bae explainim tu wat hem savve duim for kam bak. Bat, olketa elder bae duim samfala samting moa for help. Lo staka situation, bae olketa elder talem datfala person dat olketa laek for meet witim hem moa afta samfala months for lukim if tingting blo hem change. If hem willing for meet witim olketa moa, olketa elder bae barava encouragem hem for repent and kam bak. Even if tingting blo hem no change lo datfala taem, olketa elder bae markem taem for contactim hem moa lo future.
7. Taem olketa elder deal witim samwan wea olketa aotem from kongregeson, hao nao olketa followim example blo Jehovah for kea? (Jeremiah 3:12)
7 Taem olketa elder deal witim samwan wea olketa aotem from kongregeson, olketa traem best for followim example blo Jehovah for kea. For example, Jehovah no just weit for pipol blo hem lo Israel wea disobey for duim samting firstaem bifor hem helpem olketa. Bat hem nao duim samting firstaem for reach aot for helpem olketa, nomata olketa no duim eni samting wea showim olketa repent. Olsem iumi lanem finis lo second article blo disfala series, Jehovah iusim example blo profet Hosea for showimaot hem kea, hem talem Hosea for forgivim waef blo hem and tekem bak nomata hem still duim serious sin. (Hos. 3:1; Mal. 3:7) Olketa elder followim example blo Jehovah taem olketa showimaot olketa barava laekem datfala person wea duim serious sin for kam bak, and olketa no mekem hem hard tumas for hem duim datwan.—Readim Jeremiah 3:12.
8. Hao nao parabol blo Jesus abaotem son wea lus helpem iumi for luksavve hao Jehovah kea and showimaot mercy? (Luke 15:7)
8 Olsem iumi storyim finis lo second article blo disfala series, Jesus iusim wanfala parabol abaotem son wea lus. Taem datfala dadi lukim from farawe yet, hao son blo hem kam bak, “hem ran go long hem, and hem holem and kissim hem.” (Luke 15:20) Lukim hao datfala dadi hem no weitim son blo hem for askem forgiveness firstaem. Bat hem duim wat eni loving dadi savve duim, hem ran go firstaem. Olketa elder trae for showimaot sem attitude lo olketa wea lusim Jehovah. Olketa laekem sheepsheep wea lus for “kam bak” hom. (Luke 15:22-24, 32) Olketa lo heven and iumi lo earth tu, barava hapi taem wanfala sinner hem kam bak!—Readim Luke 15:7.
9. Wat nao Jehovah barava laekem olketa sinner for duim?
9 Olsem iumi lanem finis, iumi lukim klia hao Jehovah no acceptim wei wea samwan duim serious sin and no repent. Nomata olsem, hem no les lo olketa. Hem laekem olketa for kam bak. Hosea 14:4 storyim feeling blo Jehovah for olketa wea repent, hem sei: “Mi bae healim olketa and no enitaem moa bae olketa no faithful lo mi. Mi bae lovem olketa bikos mi laek for duim datwan, bikos kros blo mi tane finis from olketa.” Disfala scripture helpem olketa elder for traem best for luk for eni saen wea showim samwan hem start for repent and duim samting for helpem hem. And tu, disfala scripture helpem olketa wea lusim Jehovah for no delay for kam bak kwiktaem.
10-11. Hao nao olketa elder bae trae for helpem olketa wea aot from kongregeson for staka year finis?
10 Waswe lo samwan wea aot from kongregeson for staka year finis? Maet datfala person stop finis for duim datfala serious sin wea mekem hem for aot from kongregeson. Samfala taem, maet olketa seleva no rememberim reason why olketa aotem hem. Nomata wat nao situation, olketa elder bae traem best for savve wea nao olketa stap and visitim olketa. During lo olketa visit hia, olketa elder bae even ask for prea witim olketa and encouragem olketa for kam bak lo kongregeson. And if hem aot from kongregeson for staka year finis, for sure hem bae wik lo spiritual wei. So, if datfala person talem dat hem laek for kam bak lo kongregeson, olketa elder maet arrange for samwan study witim hem nomata hem no reinstate yet. Lo evri situation olsem, olketa elder nao bae arrangem study.
11 Olketa elder laek for followim example blo Jehovah for kea taem olketa reach aot and helpem staka for savve dat door hem still open for olketa kam bak. Taem wanfala sinner showim hem repent and lusim olketa nogud wei blo hem, olketa elder no need for delay for reinstatem hem.—2 Cor. 2:6-8.
12. (a) Wat nao olketa situation wea olketa elder need for barava careful lo hem? (b) Why nao iumi shud no ting dat hem hard for Jehovah showimaot mercy lo samfala specific sin? (Lukim tu footnote.)
12 Lo samfala situation, olketa elder need for barava careful bifor olketa reinstatem samwan. For example, if samwan hem duim child abuse or hem apostate or hem plan and duim samting for finisim marit blo hem, then olketa elder need for mek sure dat hem barava repent. (Mal. 2:14; 2 Tim. 3:6) Olketa elder mas protectim olketa sheepsheep. Bat lo semtaem, iumi need for understandim dat Jehovah bae acceptim bak eniwan wea bin duim serious sin bat wea showimaot hem barava repent and stop for duim datfala sin. So olketa elder need for barava careful taem olketa deal witim olketa sinner wea duim samting wea barava spoelem trust blo olketa narawan, nomata olsem, olketa shud no ting dat Jehovah hard for showimaot mercy for samfala specific sin. c—1 Pet. 2:10.
WAT KONGREGESON SAVVE DUIM
13. Wat nao difference lo hao iumi treatim samwan wea kasem repruv and samwan wea olketa aotem from kongregeson?
13 Olsem iumi storyim finis lo article bifor diswan, samfala taem olketa announcem dat samwan kasem repruv. Taem olsem, iumi still savve associate witim hem bikos iumi savve hem repent and stop for duim samting wea no stret. (1 Tim. 5:20) Hem still part lo kongregeson and hem needim encouragement from wei for associate witim olketa brata and sista. (Heb. 10:24, 25) Bat, datwan difren from man wea olketa aotem hem from kongregeson. Iumi bae “no fren witim” datfala person and no even ‘kaikai witim hem.’—1 Cor. 5:11.
14. Hao nao olketa Christian savve iusim konsens blo olketa wea Bible trainim for deal witim olketa wea aot from kongregeson? (Lukim tu piksa.)
14 So hao, toktok lo 1 Corinth 5:11 minim dat iumi bae barava ignorem nao eniwan wea olketa aotem from kongregeson? Nomoa. Really, hem minim iumi bae no fren or socialize witim datfala person. Bat olketa Christian savve iusim konsens blo olketa wea Bible trainim for disaed if olketa bae invaetem samwan wea olketa aotem from kongregeson for attendim meeting, wea maet hem wanfala relative or klos fren blo olketa bifor. Hao if hem kam lo meeting? Lo bifor, iumi no savve greetim samwan olsem. Bat lo diswan tu, each Christian need for iusim konsens blo hem wea Bible trainim for disaed seleva. Samfala maet disaed hem olraet for greetim datfala person or welkamim hem lo meeting. Bat, iumi bae no gohed for story longtaem witim hem or socialize witim hem.
Olketa Christian savve iusim konsens blo olketa wea Bible trainim for disaed if olketa bae invaetem samwan wea aot from kongregeson for kam lo meeting or talem wanfala simpol greeting for welkamim hem lo meeting (Lukim paragraf 14)
15. Hu nao olketa wea 2 John 9-11 hem describem? (Lukim tu box “ Hao, John and Paul Storyim Semkaen Sin?”)
15 Bat samfala maet ting, ‘Mi tingse, Bible hem sei dat if wanfala Christian hello lo man olsem, hem join insaed nogud samting wea datfala man duim.’ (Readim 2 John 9-11.) Context blo disfala scripture showim hao disfala direction hem for olketa apostate and olketa wea gohed encouragem wei for duim nogud samting. (Rev. 2:20) So, if wanfala person gohed for promotim olketa apostate teaching or wei for duim nogud samting, olketa elder bae no mekem eni arrangement for visitim hem. Nomata olsem, olketa elder hope datfala person bae kasem bak gudfala tingting. Bat go kasem datfala taem, iumi bae no greetim man olsem or invaetem hem for kam lo kongregeson meeting.
FOLLOWIM EXAMPLE BLO JEHOVAH FOR KEA AND SHOWIMAOT MERCY
16-17. (a) Wat nao Jehovah laekem olketa sinner for duim? (Ezekiel 18:32) (b) Hao nao olketa elder showim dat olketa waka witim Jehovah taem olketa trae for helpem samwan wea duim serious sin?
16 Wat nao iumi lanem from faevfala study article lo disfala series? Jehovah no laekem eniwan for dae! (Readim Ezekiel 18:32.) Hem laekem olketa sinner for fren bak witim hem. (2 Cor. 5:20) Dastawe, start from bifor kam, staka taem nao Jehovah askem pipol blo hem, and samwan wea no obeyim hem, for repent and kam bak lo hem. Olketa elder lo kongregeson garem spesol privilege for waka witim Jehovah for traem best for leadim olketa wea duim serious sin for repent.—Rome 2:4; 1 Cor. 3:9.
17 Imaginim bigfala hapi wea kamap lo heven taem wanfala sinner hem repent! Each taem wanfala sheepsheep wea lus hem kam bak lo kongregeson, Dadi blo iumi lo heven, Jehovah, hem barava hapi. Taem iumi ting raonem wei wea Jehovah kea, showimaot mercy, and hem kaen tumas, datwan barava strongim go moa love blo iumi for hem.—Luke 1:78.
SONG 111 Olketa Reason Why Iumi Hapi
a Lo disfala article, taem iumi storyim samwan wea duim serious sin hem savve minim wanfala brata or sista.
b Distaem bae iumi no iusim word disfellowship for describem olketa hia. Diswan hem bikos lo toktok blo Paul wea stap lo 1 Corinth 5:13, so distaem bae iumi iusim word aotem from kongregeson.
c Lo Bible, wanfala sin wea Jehovah hard for forgivim hem no minim wanfala specific sin, bat hem minim attitude blo samwan wea duim sin and barava no laek for change nao and disaed for barava againstim God. Only Jehovah and Jesus nomoa savve if samwan hem duim kaen sin olsem.—Mark 3:29; Heb. 10:26, 27.
