1. Wat nao repent hem minim?

 TAEM iumi duim samting wea hem rong, hem important tumas for repent. Bible storyim dat if samwan hem repent datwan minim hem changem tingting blo hem abaotem wat hem duim, hem stop for duim, and disaed strong for no duim moa datfala sin.—Matt. 3:8; Acts 3:19; 2 Pet. 3:9. (Lukim Dictionary blo Olketa Toktok lo Bible, “Repent.”)

2. Why nao iumi evriwan need for lane abaotem wei for repent? (Nehemiah 8:​9-11)

² Evri human being need for lane abaotem why hem important for repent. Why? Bikos iumi sin evriday. From iumi pikinini blo Adam and Eve, iumi each wan inheritim sin and dae. (Rome 3:23; 5:12) No eniwan savve misstim datwan. Even olketa wea garem strong faith, olsem aposol Paul, olketa stragol for faet againstim sin. (Rome 7:​21-24) So hao, datwan minim iumi shud evritaem feel iusles bikos lo sin wea iumi duim? Nomoa, Jehovah showim mercy and laekem iumi for hapi. Tingim wat happen lo olketa Jew lo taem blo Nehemiah. (Readim Nehemiah 8:​9-11.) Jehovah no laekem olketa for gohed for feel sorre lo sin wea olketa duim bifor, bat hem laekem olketa for hapi taem olketa worshipim hem. Jehovah savve wei for repent bae mekem man hapi. So hem teachim iumi abaotem datwan. If iumi repent from sin blo iumi, iumi sure Dadi blo iumi bae showim mercy and forgivim iumi.

3. Wat nao bae iumi storyim lo disfala article?

³ Distaem bae iumi lanem samfala samting moa abaotem wei for repent. Lo disfala article, bae iumi storyim thrifala samting. First, iumi bae lanem wat Jehovah teachim lo olketa Israelite abaotem wei for repent. Second, bae iumi focus lo wat  Jehovah duim for leadim olketa sinner for repent. Then last samting, bae iumi discussim wat olketa follower blo Jesus lanem abaotem wei for repent.

WAT JEHOVAH TEACHIM OLKETA ISRAELITE ABAOTEM WEI FOR REPENT

4. Wat nao Jehovah teachim nation blo Israel abaotem wei for repent?

⁴ Taem Jehovah mekem olketa Israelite for kamap wanfala nation, hem mekem wanfala covenant, or agreement, witim olketa. If olketa obeyim olketa law blo Jehovah, hem bae protectim and blessim olketa. Hem sei: “Disfala komandment wea mi komandim lo iu tuday hem no hard tumas for iu and hem no farawe from iu.” (Deut. 30:​11, 16) Bat if olketa againstim hem, for example, olketa chus for worshipim olketa nara god, hem bae aotem blessing blo hem, and olketa bae safa. Nomata olsem, olketa savve duim samting for mekem God acceptim olketa moa. Olketa savve “kam bak lo Jehovah, God blo [olketa], and lisin lo voice blo hem.” (Deut. 30:​1-3, 17-20) So datwan minim olketa savve repent. If olketa duim datwan, Jehovah bae fren bak witim olketa and blessim olketa moa.

5. Hao nao Jehovah showim hem no givap for helpem pipol blo hem? (2 Kings 17:​13, 14)

⁵ Staka taem nao pipol blo Jehovah bighed for againstim hem. Olketa worshipim idol, and duim olketa nara barava nogud samting. From datwan, olketa safa. Bat Jehovah no givap for helpem pipol blo hem wea no obey. Staka taem nao hem sendem olketa profet blo hem for talem olketa for repent and kam bak lo hem.—Readim 2 Kings 17:​13, 14.

6. Hao nao Jehovah iusim olketa profet for teachim pipol blo hem for luksavve dat hem important for olketa repent? (Lukim tu piksa.)

⁶ Staka taem Jehovah iusim olketa profet blo hem for warnim and stretem pipol blo hem. For example, thru lo Jeremiah God sei: “O bighed Israel, kam bak lo mi . . . Mi bae no luk kam daon and kros lo iu moa bikos mi loyal . . . Mi bae no keepim kros for olowe. Only samting nomoa hem for iu talemaot dat iu guilty bikos iu bighed againstim  Jehovah.” (Jer. 3:​12, 13) Thru lo Joel, Jehovah sei: “Kam bak lo mi witim full heart blo iufala.” (Joel 2:​12, 13) Hem talem Isaiah for sei: “Mekem iufala seleva klin. Stop for duim olketa rabis samting wea mi lukim iufala duim. Stop nao for duim olketa nogud samting.” (Isa. 1:​16-19) And Jehovah iusim Ezekiel for sei: “Waswe, mi hapi dat wanfala man wea wicked hem dae? . . . Mi laekem sapos hem lusim olketa nogud wei blo hem and hem gohed stap laef. Mi nating hapi taem eniwan hem dae, . . . so iufala kam bak and stap laef.” (Ezek. 18:​23, 32) Jehovah hapi taem hem lukim pipol repent bikos hem laekem olketa for laef olowe! So, Jehovah no just weit nomoa for olketa sinner for change firstaem bifor hem helpem olketa. Distaem bae iumi storyim samfala example lo datwan.

7. Hao nao Jehovah iusim story blo Hosea and waef blo hem for teachim pipol blo hem?

⁷ Tingim real-laef example wea Jehovah iusim for teachim pipol blo hem. Datfala example hem abaotem Gomer, waef blo profet Hosea. Gomer duim adultery and lusim Hosea and stap witim olketa difren man. Hao, hem hard nao for Gomer change? Jehovah, wea savve lo wat hem stap lo heart blo man, talem Hosea: “Iu go and lovem moa datfala woman wea nara man lovem and wea hem [gohed] duim adultery, olsem Jehovah hem lovem pipol blo Israel nomata olketa tane go lo olketa nara god.” (Hos. 3:1; Prov. 16:2) Lukim hao waef blo Hosea hem still gohed duim serious sin. Nomata olsem, Jehovah talem Hosea for go tekem hem bak, forgivim hem, and hem mas kamap waef blo hem moa. a Lo sem wei tu, Jehovah no givap for helpem pipol blo hem wea bighed. Nomata olketa gohed duim olketa barava nogud sin, hem still lovem olketa and duim samting for reach aot and helpem olketa for repent and changem wei blo olketa. Hao, disfala example showim dat Jehovah wea “lukluk gud insaed lo olketa heart,” bae duim samting for trae leadim samwan for repent nomata hem gohed duim serious sin? (Prov. 17:3) Bae iumi storyim.

HAO JEHOVAH LEADIM OLKETA SINNER FOR REPENT

8. Wat nao Jehovah duim for leadim Cain for repent? (Genesis 4:​3-7) (Lukim tu piksa.)

⁸ Cain hem first son blo Adam and Eve. Hem inheritim sin from parents blo hem. And tu, Bible sei “hemseleva duim olketa nogud samting.” (1 John 3:12) Maet datwan nao reason why Jehovah “no hapi lo Cain and lo offering blo hem.” Instead for Cain changem wei blo hem, “hem barava kros and feel nogud tumas.” Wat nao next samting wea Jehovah duim? Hem story lo Cain. (Readim Genesis 4:​3-7.) Lukim hao Jehovah story kaen lo Cain, givim hem chance for kasem gud samting, and warnim hem abaotem danger blo sin. Bat sorre samting, Cain no laek for lisin. Hem no letem Jehovah for leadim hem for repent. Bihaen Cain rejectim help blo Jehovah, hao, Jehovah stop nao for leadim olketa wea sin for repent? Barava nomoa!

9. Hao nao Jehovah leadim David for repent?

⁹ Jehovah barava lovem King David. Hem even sei, David “hem barava wan mind witim mi.” (Acts 13:22) Bat David duim samfala barava serious sin, hem duim adultery and murder. Lo Law blo Moses, hem fit for dae. (Lev. 20:10; Num. 35:31) Bat, Jehovah seleva nao duim samting for helpem David for repent. b  Hem sendem profet Nathan for visitim King David, nomata hem no showim yet eni saen dat hem repent. Nathan iusim wanfala illustration for kasem heart blo David. From datwan, David sorre lo wat hem duim and repent. (2 Sam. 12:​1-14) David raetem wanfala psalm wea showimaot dat hem barava repent. (Ps. 51, smol toktok lo start) Datfala psalm encouragem staka wea sin and helpem olketa for repent. Iumi hapi tumas dat Jehovah leadim servant blo hem David wea hem lovem, for repent.

10. Hao nao iu feel abaotem wei blo Jehovah for patient and forgivim iumi olketa sinner?

¹⁰ Jehovah heitim sin, and hem no acceptim wei for duim sin, nomata hem big or smol. (Ps. 5:​4, 5) Bat, hem savve iumi evriwan olketa sinner, and from hem lovem iumi, hem disaed for helpem iumi for faet againstim sin. Hem evritaem trae for helpem, even olketa wea duim worse sin, for repent and fren klos witim hem. Datwan barava comfortim iumi! Taem iumi ting raonem wei blo Jehovah for patient and forgive, iumi disaed strong for gohed faithful and kwiktaem repent taem iumi duim sin. Distaem bae iumi lanem hao Jesus teachim Christian kongregeson abaotem wei for repent.

WAT OLKETA FOLLOWER BLO JESUS LANEM ABAOTEM WEI FOR REPENT

11-12. Wat nao Jesus teachim olketa wea lisin lo hem abaotem wei blo Dadi blo hem for forgive? (Lukim piksa.)

¹¹ Lo first century C.E., hem kasem taem for Messiah hem arrive. Olsem iumi storyim lo first article, Jehovah iusim John Baptaesa and Jesus Christ for teachim pipol hao hem important for repent.—Matt. 3:​1, 2; 4:17.

¹² Taem Jesus duim ministry blo hem, hem teachim olketa wea lisin lo hem abaotem wei blo Dadi blo hem for forgive. Jesus duim diswan taem hem iusim wanfala parabol abaotem son wea lus. Datfala young man lo parabol disaed for lusim hom and duim staka nogud samting. Bat then hem “kasem bak gudfala tingting” and hem go bak hom. Then wat nao  dadi blo hem duim? Jesus sei taem son “hem lelebet farawe yet, dadi bilong hem lukim hem and barava sorre long hem. Hem ran go long hem, and hem holem and kissim hem.” Datfala son askem dadi blo hem for hem kamap servant blo hem, bat dadi blo hem kolem hem “son bilong mi” and acceptim hem bak lo famili. Datfala dadi sei olsem abaotem son blo hem: “Hem lus and hem kam bak nao.” (Luke 15:​11-32) Bifor Jesus kam lo earth, masbi hem lukim hao Dadi blo hem showim semkaen wei for kea lo staka sinner wea repent. Datfala story barava comfortim iumi bikos iumi lanem hao Dadi blo iumi Jehovah hem man for showimaot mercy!

13-14. Wat nao aposol Peter lanem abaotem wei for repent, and wat nao hem teachim lo olketa narawan abaotem datwan? (Lukim tu piksa.)

¹³ Aposol Peter lanem staka important leson from Jesus abaotem wei for repent and kasem forgiveness. Staka taem nao Peter needim forgiveness, and Jesus willing tumas for forgivim hem. For example, afta Peter denyim Lord blo hem thrifala taem, hem feel guilty tumas. (Matt. 26:​34, 35, 69-75) Bat bihaen Jesus resurrect, hem go lukim Peter, and luk olsem tufala story seleva. (Luke 24:​33, 34; 1 Cor. 15:​3-5) Maet lo datfala taem nao Jesus forgivim and comfortim datfala aposol wea repent.—Lukim Mark 16:7 and English study note “and Peter.”

¹⁴ From Peter seleva experiencem wei for repent and kasem forgiveness, hem fit for teachim olketa narawan abaotem datwan. Bihaen lo datfala festival blo Pentecost, Peter story lo wanfala big crowd wea olketa Jew, and hem explainim dat olketa killim dae Messiah. Bat lo loving wei hem sei: “Iufala mas repent and changem wei bilong iufala, mekem Jehovah savve forgivim olketa sin bilong iufala, [and] strongim iufala.” (Acts 3:​14, 15, 17, 19) So wat Peter talem showim wei for repent  hem muvim man for tane raon, wea minim hem changem tingting blo hem, stop for duim sin, and start for duim wat God laekem. Datfala aposol talem tu dat God savve forgivim or barava rabemaot sin blo olketa. Staka year bihaen, Peter talem olketa Christian: “Jehovah . . . hem patient witim iufala. Diswan hem bikos hem no laekem eniwan for dae bat hem laekem evriwan for garem chance for repent.” (2 Pet. 3:9) Datwan hem nambawan hope for olketa Christian if olketa duim sin, even if datwan hem serious sin!

15-16. (a) Hao nao aposol Paul lane abaotem forgiveness? (1 Timothy 1:​12-15) (b) Wat nao bae iumi storyim lo next article?

¹⁵ Saul wea kam from Tarsus, hem man wea barava need for repent and kasem forgiveness. Hem raf tumas taem hem persecutim olketa follower blo Christ. Maet olketa Christian lo datfala taem ting hem hard tumas for Saul repent and change. Bat, Jesus wea resurrect finis, no ting olsem. Hem and Dadi blo hem lukim olketa gud quality wea Saul garem. Jesus sei: “Mi chusim disfala man.” (Acts 9:15) Jesus even duim mirakol for leadim Saul for repent. (Acts 7:58–8:3; 9:​1-9, 17-20) Afta Saul kamap Christian, olketa kolem hem aposol Paul, and staka taem hem thankiu tumas lo wei wea Jehovah kaen and showim mercy lo hem. (Readim 1 Timothy 1:​12-15.) From datwan, aposol Paul teachim olketa narawan and sei: “God hem kaen tumas long iu and hem [leadim] iu for repent.”—Rome 2:4.

¹⁶ Taem Paul herem dat Christian kongregeson lo Corinth garem wanfala problem wea join witim wanfala serious sin abaotem wei for durong, wat nao hem talem olketa for duim? Samting wea kongregeson duim, hem teachim iumi wanfala important leson abaotem hao Jehovah savve givim loving discipline and why hem important for showimaot mercy. Bae iumi storyim moa detail abaotem datwan lo next article.