STUDY ARTICLE 31
SONG 12 Nambawan God, Jehovah
Wat Jehovah Duim for Rescuem Evriwan wea Sin
“God barava lovem tumas pipol long world dastawe hem givim kam spesol Son bilong hem.”—JOHN 3:16.
MAIN FOCUS
Lo disfala article bae iumi lanem wat Jehovah gohed duim for helpem iumi faet againstim sin and hao Jehovah mekem hem possible for iumi enjoyim laef olowe lo future and free from sin.
1-2. (a) Wat nao sin, and hao nao iumi savve win for faet againstim? (Lukim tu “Mining blo Wanfala Toktok.”) (b) Wat nao bae iumi discussim lo disfala article and olketa nara article wea stap lo disfala Wastaoa magasin? (Lukim tu “Note for Reader” lo disfala magasin.)
HAO, iu laek for savve hao big nao love blo Jehovah God for iu? Wanfala gud wei for kasem ansa for datwan, hem for studyim wat hem duim for sevem iu from sin and dae. Sin a hem wanfala barava nogud enemy wea iu hard for faet againstim seleva. Iumi evriwan sin evriday, and iumi dae bikos lo sin. (Rome 5:12) Bat wanfala gud nius hem stap. Jehovah savve helpem iumi for winim sin. And datwan hem samting wea iumi barava sure lo hem!
2 For samting olsem 6,000 years, Jehovah God gohed for helpem pipol for faet againstim sin. Why? Bikos hem lovem iumi. Start from creation hem lovem iumi evriwan, so hem duim staka samting for helpem iumi faet againstim sin. God savve sin hem kosim dae, and hem no laekem iumi for dae. Hem laekem iumi for laef olowe. (Rome 6:23) And hem nao wat hem laekem iu for kasem. Lo disfala article, bae iumi storyim thrifala kwestin: (1) Wat nao Jehovah duim for givim hope lo evriwan wea sin? (2) Lo taem blo Bible, wat nao olketa wea no perfect duim for mekem Jehovah hapi? (3) Wat nao Jesus duim for rescuem evriwan wea sin?
WAT NAO JEHOVAH DUIM FOR GIVIM HOPE LO EVRIWAN WEA SIN?
3. Hao nao gogo first parents blo iumi sin?
3 Taem Jehovah creatim first man and woman, hem laekem tufala for hapi. Hem givim lo tufala naes ples for stap, hapi marit, and wanfala interesting assignment. Datfala assignment hem for tufala fulimap disfala earth witim olketa pikinini, and mekem full earth for kamap paradaes olsem lo garden blo Eden. Hem stopem tufala for duim wanfala simpol samting. And hem warnim tufala dat if tufala no obeyim datfala komand and disaed for bighed againstim hem, tufala bae sin and datwan bae lead go lo dae. Iumi savve wat nao happen. Wanfala angel wea no lovem God or tufala, hem temptim tufala for sin. Adam and Eve disaed for followim datfala wicked angel. Tufala no trustim loving Dadi blo tufala, so tufala sin. And wat Jehovah talem hem kamap tru. Start lo datfala day, tufala mas deal witim evri nogud samting wea kamap from sin, tufala start for olo, and gogo tufala dae.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Why nao Jehovah heitim sin and laek helpem iumi for faet againstim datwan? (Rome 8:20, 21)
4 Jehovah mek sure disfala story stap lo Bible mekem iumi lanem wanfala important samting. Disfala story helpem iumi for minim why Jehovah barava heitim sin. Sin separatem iumi from Dadi blo iumi, and kosim dae. (Isa. 59:2) Dastawe datfala bighed angel Satan, wea startim disfala trabol, hem laekem tumas for pipol sin and hem duim samting for promotim datwan. Maet hem tingse hem barava win for spoelem plan blo Jehovah lo garden lo Eden. Bat, hem no understandim dat Jehovah hem barava loving God. Plan blo God for olketa pikinini blo Adam and Eve hem no change. Hem lovem pipol, so kwiktaem nomoa hem givim hope for evriwan. (Readim Rome 8:20, 21.) Jehovah savve dat samfala pikinini blo tufala bae chus for lovem hem and laek kasem help from hem for faet againstim sin. And from hem Dadi and Creator blo olketa, hem bae duim samting for mekem olketa kamap free from sin and fren klos witim hem. For datwan happen, wat nao Jehovah duim?
5. Wat taem nao firstaem wea Jehovah givim hope for olketa man wea sin? Explainim. (Genesis 3:15)
5 Readim Genesis 3:15. Firstaem wea Jehovah givim hope for olketa man, hem taem hem talemaot judgment againstim Satan. God talem profesi hao thru lo datfala “pikinini,” iumi olketa man bae kasem hope. Disfala pikinini bae gogo hem smasem Satan, and bae hem finisim evri problem wea Satan kosim lo Eden. (1 John 3:8) Bat, datfala pikinini mas safa firstaem for mekem datwan hem happen. Satan bae killim bihaen lo foot blo datfala pikinini, and bae hem dae. Jehovah sorre tumas taem datwan happen. Bat Jehovah willing for go thru lo datfala pain bikos datwan bae sevem staka pipol from sin and dae.
LO TAEM BLO BIBLE, WAT NAO OLKETA WEA NO PERFECT DUIM FOR MEKEM JEHOVAH HAPI?
6. Wat nao Abel, Noah, and olketa nara faithful man duim for kamap klos fren blo Jehovah?
6 Insaed staka handred year bihaen, Jehovah isisi showimaot klia hao iumi olketa man wea sin savve kamap klos fren blo hem. Second son blo Adam and Eve, Abel, hem nao first man wea showimaot faith lo Jehovah bihaen datfala problem kamap lo Eden. Bikos Abel lovem Jehovah and laek for mekem hem hapi and fren klos witim hem, hem offerim wanfala sakrifaes. Abel hem wanfala shepherd, so hem tekem samfala young sheepsheep blo hem and killim dae and offerim lo Jehovah. Hao nao Jehovah feel abaotem datwan? “Jehovah hapi lo Abel and lo offering blo hem.” (Gen. 4:4) Jehovah showim hem acceptim tu sakrifaes blo olketa nara faithful man wea lovem and trustim hem, olsem Noah. (Gen. 8:20, 21) Taem Jehovah duim datwan, hem showimaot dat olketa man wea sin savve mekem hem hapi and fren klos witim hem. b
7. Wat nao iumi lanem from wei wea Abraham willing for sakrifaesim son blo hem?
7 Abraham garem strong faith, and Jehovah askem hem for duim wanfala samting wea barava hard, hem nao for offerim son blo hem Isaac olsem wanfala sakrifaes. Masbi datwan barava no isi for Abraham duim. Nomata olsem, hem redi for duim datwan. Bat lo last minute, God stopem Abraham for sakrifaesim Isaac. Bat, evriwan wea garem strong faith savve lanem wanfala important samting from story blo Abraham. Samting wea Abraham duim hem piksarem hao Jehovah willing for offerim beloved Son blo hem olsem sakrifaes. Datwan showimaot hem barava lovem tumas pipol.—Gen. 22:1-18.
8. Wat nao olketa sakrifaes lo Law blo Moses piksarem? (Leviticus 4:27-29; 17:11)
8 Staka handred year bihaen, Jehovah givim Law lo nation blo Israel wea includim wei for offering staka difren sakrifaes for kavarem sin blo olketa. (Readim Leviticus 4:27-29; 17:11.) Olketa sakrifaes hia piksarem nomoa wanfala sakrifaes wea Jehovah bae provaedem, and datfala sakrifaes nao bae barava sevem evriwan from sin. Olketa profet blo God explainim hao datfala promis pikinini, wea hem nao spesol Son blo God, hem bae safa and pipol killim hem dae. Olketa bae killim hem olsem wanfala sheepsheep wea olketa busarem for sakrifaesim. (Isa. 53:1-12) Tingim: Jehovah willing for mekem arrangement for olketa sakrifaesim beloved Son blo hem for sevem evriwan from sin and dae, datwan includim iu tu!
WAT NAO JESUS DUIM FOR RESCUEM EVRIWAN?
9. Wat nao John Baptaesa talem abaotem Jesus? (Hebrew 9:22; 10:1-4, 12)
9 Lo first century C.E., servant blo God John Baptaesa hem point go lo Jesus blo Nazareth and sei: “Lukim . . . hem nao Pikinini Sheepsheep bilong God wea aotem sin bilong evri pipol long disfala world!” (John 1:29) Toktok blo John showim dat Jesus nao datfala promis pikinini wea Bible profesi abaotem. Hem bae givim laef blo hem olsem sakrifaes. Winim enitaem bifor, olketa man wea sin garem strongfala reason for garem hope for kamap free from sin.—Readim Hebrew 9:22; 10:1-4, 12.
10. Hao nao Jesus showimaot dat hem “kam” for helpem olketa sinner?
10 Jesus barava laek for helpem pipol wea feel sorre bikos lo sin wea olketa duim and hem invaetem olketa for kamap follower blo hem. Hem savve sin nao main samting wea kosim wei for safa. So hem willing for duim samting for helpem olketa man and woman wea duim sin. Jesus iusim wanfala illustration for explainim datwan, hem sei: “Pipol wea sik nao need for go lukim doctor, no olketa wea strong.” Hem sei tu: “Mi no kam for talem gudfala pipol for repent, bat for talem pipol wea sin nao for repent.” (Matt. 9:12, 13) And datwan nao wat Jesus duim. Hem kaen and forgivim sin blo wanfala woman wea wasim leg blo hem witim tias blo hem. (Luke 7:37-50) Nomata Jesus savve laef blo wanfala Samaritan woman hem olobaot, hem teachim olketa important truth lo hem. (John 4:7, 17-19, 25, 26) God even givim paoa lo Jesus for winim dae, wea hem nao result blo sin. Hao nao hem duim datwan? Jesus resurrectim pipol, olketa man, woman, pikinini, and olketa adult.—Matt. 11:5.
11. Why nao olketa wea sin feel free for kam lo Jesus?
11 Dastawe, even pipol wea duim serious sin olketa feel free for kam lo Jesus. Hem kea abaotem olketa and understandim hao olketa feel. Olketa no fraet for story witim hem. (Luke 15:1, 2) And Jesus praisem and rewardim olketa hia bikos olketa showimaot faith lo hem. (Luke 19:1-10) Hem showimaot mercy blo Dadi blo hem lo prefect wei. (John 14:9) Toktok and wat Jesus duim, teachim iumi hao Dadi blo hem kea abaotem iumi, garem mercy, lovem pipol, and laek helpem each wan for win for faet againstim sin. Jesus helpem olketa sinner for laek changem wei blo olketa and followim hem.—Luke 5:27, 28.
12. Wat nao Jesus talem abaotem dae blo hem?
12 Jesus savve bae hem sakrifaesim laef blo hem. Staka taem nao hem talem olketa follower blo hem, dat samwan bae betrayim hem and olketa bae nilam hem lo post and hem bae dae. (Matt. 17:22; 20:18, 19) Jesus savve dat sakrifaes blo hem bae tekem aot sin blo disfala world, olsem wat John and olketa profet bifor talem. Jesus talem tu dat afta hem dae, bae hem “leadim kam evri difren kaen pipol” for followim hem. (John 12:32) Iumi olketa man wea sin savve mekem God hapi taem iumi acceptim Jesus olsem Lord and followim example blo hem. Taem olsem, bae man savve kamap “free nao from wei for slave long sin.” (Rome 6:14, 18, 22; John 8:32) So Jesus willing and no fraet for safa and dae for sevem iumi.—John 10:17, 18.
13. Wat nao happen taem Jesus dae, and wat nao dae blo hem teachim iumi abaotem Jehovah God? (Lukim tu piksa.)
13 Olketa betrayim Jesus, arrestim hem, tok spoelem hem, judgem hem, and mekem hem barava safa. Olketa soldia leadim hem go lo ples for olketa killim hem dae and nilam hem lo post. Taem Jesus faithful and gohed for safa, nara Person tu hem feelim bigfala pain and barava safa from wat hem gohed happen. Datfala person hem Jehovah God. Nomata Jehovah garem bigfala paoa, hem no stopem son blo hem for safa. Why? Why nao wanfala loving Dadi bae duim datwan? Hem bikos lo love. Jesus sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”—John 3:16.
For mekem iumi free from sin and dae, Jehovah letem for olketa killim dae Son blo hem, nomata datwan mekem Jehovah feelim bigfala pain and barava safa (Lukim paragraf 13)
14. Wat nao iu lanem from sakrifaes blo Jesus?
14 Ransom sakrifaes blo Jesus barava pruvim hao Jehovah lovem tumas olketa pikinini blo Adam and Eve. Hem pruvim hao Jehovah barava lovem iu. Jehovah duim big samting and willing for barava safa for rescuem iu from sin and dae. (1 John 4:9, 10) Yes, hem laek for helpem each wan lo iumi for faet againstim sin and for helpem iumi win!
15. Wat nao iumi mas duim for kasem gud samting from ransom sakrifaes blo Jesus wea hem present from God?
15 Datfala ransom sakrifaes blo spesol Son blo God, hem present wea God givim wea mekem iumi fit for kasem forgiveness for olketa sin blo iumi. Bat for kasem forgiveness blo God, iumi mas duim samting. Wat nao iumi mas duim? John Baptaesa, and Jesus seleva tu givim ansa, tufala sei: “Iufala repent bikos Kingdom bilong God hem kam klosap.” (Matt. 3:1, 2; 4:17) So important samting wea iumi need for duim for faet againstim sin, hem nao for repent and fren klos witim loving Dadi blo iumi. Bat wat nao hem minim for repent, and hao nao datwan savve helpem iumi faet againstim sin? Iumi bae kasem ansa for datfala kwestin lo next study article.
SONG 18 Thankiu for Ransom
a MINING BLO WANFALA TOKTOK: Lo Bible, datfala word “sin” hem savve minim wei for duim olketa rong samting, or fail for followim olketa standard blo Jehovah. Bat word “sin” savve minim tu wei wea iumi no perfect, or sin wea iumi kasem from Adam. Datfala sin wea iumi inheritim nao kosim iumi for dae.
