Aposol Paul raet for olketa Christian lo Thessalonica, and sei: “Sapos eniwan hem no obeyim wanem mifala talem long disfala leta, iufala mas lukluk gud [or, markem] hem.” (2 Thess. 3:​14, ftn.) Lo bifor, iumi sei diswan hem direction for olketa elder. If samwan gohed for no laek followim olketa Bible principle, nomata hem kasem staka kaonsel finis, olketa elder savve disaed for givim wanfala warning tok for kongregeson. Then bihaen, olketa pablisa bae no associate lo olketa hapitaem or socialize witim datfala person wea olketa markem.

Bat distaem, wanfala adjustment kamap abaotem datwan. Luk olsem, kaonsel wea Paul givim hem abaotem samting wea each Christian shud duim lo samfala specific situation. So olketa elder no need for givim eni warning tok lo kongregeson. Why nao disfala change kamap? Tingim context blo datfala kaonsel wea Paul givim.

Paul lukim dat samfala lo kongregeson duim samting wea no stret or “olobaot.” Olketa les for followim kaonsel from Bible. During lo wanfala visit, hem givim disfala kaonsel: “Man wea no laek waka shud no kaikai tu.” Nomata olsem, samfala still les for waka for sapotim olketa seleva, nomata olketa fit for duim datwan. And tu, olketa savve poke nose lo bisnis blo olketa narawan. Hao nao olketa Christian shud treatim olketa wea olsem?—2 Thess. 3:​6, 10-12.

Paul sei: “Lukluk gud [or, markem] hem.” Greek word wea hem iusim hem minim for lukluk gud or careful lo wat datfala person duim. Paul talem diswan lo full kongregeson, no just olketa elder. (2 Thess. 1:1; 3:6) So each Christian wea luksavve dat wanfala brata or sista hem no gohed for obeyim olketa kaonsel lo Bible, savve disaed for “stap klia” or stop for associate witim hem.

Hao, datwan minim bae olketa treatim hem lo sem wei wea olketa treatim samwan wea olketa aotem from kongregeson? Nomoa, bikos Paul sei tu: “Gohed for helpem hem bikos hem brata bilong iufala.” So each Christian wea disaed for markem datfala person, bae hem still associate witim datfala brata or sista lo olketa meeting and lo ministry, bat maet olketa chus for no associate witim hem lo eni social activity or recreation. Why? Paul sei: “For mekem hem savve feel shame.” Datfala wei for markem hem, maet helpem datfala Christian wea gohed for duim samting wea no stret or olobaot, for feel shame lo wat hem duim and changem wei blo hem.—2 Thess. 3:​14, 15.

Hao nao olketa Christian distaem savve followim datfala kaonsel? First, iumi need for mek sure wat datfala person duim hem really olsem wat Paul story abaotem taem hem iusim datfala toktok “olobaot.” Tingim hao Paul no story abaotem wei wea iumi evriwan garem difren konsens or laekem difren samting. And tu, hem no story abaotem samwan wea mekem iumi feel nogud. Bat, wat Paul story abaotem, hem nao wei wea samwan hem chus for no obeyim olketa kliafala kaonsel from God.

Distaem, if wanfala brata or sista garem kaen wei olsem for no obey, a iumiseleva bae mekem personal disison for no associate witim hem lo olketa social activity or recreation. From diswan hem personal disison, bae iumi no storyim disison blo iumi lo olketa wea no part lo famili blo iumi. And iumi still savve associate witim datfala person lo olketa meeting and ministry. Taem hem changem wei blo hem, then bae iumi savve spendem taem tugeta moa witim hem lo olketa normal activity wea iumi duim.