1. Why nao wei for baptaes hem barava important? (Lukim piksa long start bilong study.)

EVRI year staka thousand Bible study olketa baptaes. Staka olketa young wan wea teenager or maet young winim datwan. Maet olketa born insaed truth. Waswe, iu wanfala long olketa? Sapos olsem, samting iu duim hem barava gud. Evri Christian need for baptaes and datwan wanfala important step for kasem salvation.—Matt. 28:19, 20; 1 Pet. 3:21.

2. Why nao iu shud no hol bak for dedicate long Jehovah?

² Taem iu baptaes, door hem open for iu kasem staka blessing from Jehovah. Bat iu garem olketa niu responsibility tu. Wanem nao datwan minim? Long day wea iu baptaes, brata wea givim tok askem iu disfala kwestin: “Long sakrifaes bilong Jesus Christ, waswe, iu repent from olketa sin bilong iu and dedicatem iuseleva long Jehovah for duim wanem hem laekem?” Taem iu sei yes, iu showimaot iu dedicate finis long Jehovah. Datwan hem serious promis for lovem Jehovah and duim wanem hem  laekem winim eni nara samting. Waswe, iu shud regret from iu talem datfala serious promis? Nomoa, iu shud no regret. Taem iu leavim iuseleva long hand bilong Jehovah, bae iu nating sorre bihaen. Tingim diswan, pipol wea no savve long Jehovah olketa part long world bilong Satan and hem nating kea long olketa and iu tu. Satan bae hapi sapos iu followim hem and lusim chance for laef olowe bikos iu disaed for no followim Jehovah.

3. Wanem nao olketa blessing wea iu kasem from iu dedicate long Jehovah?

³ Tingim olketa blessing wea iu kasem from Jehovah bikos iu dedicate and baptaes. Iu givim laef bilong iu for Jehovah, so iu fit for sei: “Jehovah hem saedem mi. Bae mi no fraet. No eniwan savve spoelem mi.” (Ps. 118:6) No eni nara samting hem winim wei wea iu disaed for sapotim God bilong iu and hem barava tinghae long iu from iu duim datwan.

4, 5. (a) Why nao iumi fit for sei dedication hem responsibility bilong man wanwan? (b) Wanem nao olketa test wea evri Christian mas feisim?

⁴ Wei wea iu fren witim Jehovah, hem responsibility bilong iuseleva. Hem no olsem dadi and mami nomoa waka for selen and full famili kasem gud samting from datwan. Wei wea iu bae kasem laef olowe hem responsibility bilong iuseleva nomata sapos iu stap witim dadi and mami yet. Why nao hem important for tingim datwan? Bikos iumi no savve wanem test nao bae iumi feisim long future. Olsem example, maet iu baptaes taem iu no teenager yet. Bat distaem, iu wanfala teenager and feeling bilong iu maet change and iu feisim olketa difren problem tu. Wanfala teenage gele sei: “Maet hem isi nomoa for wanfala pikinini no acceptim eni pis birthday cake long skul from hem wanfala Jehovah’s Witness. Bat maet bihaen tu-thri year taem hem start for garem feeling for laekem sex, hem need for barava sure hao wei for obeyim olketa law bilong Jehovah nao best samting for duim.”

⁵ No olketa young wan nomoa feisim olketa difren kaen test. Nomata olketa wea no young, wea baptaes, bae feisim tu staka test wea olketa no expectim for kasem. Maet olketa test hia kamap insaed marit, maet from sik or long ples wea olketa waka. Nomata wanem nao age bilong iumi, iumi need for faithful long Jehovah taem iumi feisim olketa difren samting wea kamap.—Jas. 1:12-14.

6. (a) Why nao dedication bilong iu long Jehovah hem no savve change? (b) Wanem nao iu savve lanem from Philippi 4:11-13?

⁶ Nomata wanem hem happen, remember promis wea iu talem long Jehovah hem no savve change. Datwan bae helpem iu gohed faithful evritaem. Wei wea iu promis long Most Hae God for worshipim hem bae no change nomata sapos parents or olketa fren bilong iu no gohed for duim datwan. (Ps. 27:10) So taem eni samting happen, iu savve askem Jehovah for strongim iu mekem iu gohed keepim promis bilong iu.—Readim Philippi 4:11-13.

7. Wanem nao hem minim for “fraet and seksek” taem iu traem best for kasem laef?

⁷ Jehovah laekem iu for fren witim hem. Bat iu mas waka hard for duim datwan and for traem best for kasem laef. And Philippi 2:12 sei: “Iufala [mas] fraet and seksek taem iufala gohed traem best bilong iufala for kasem laef.” So diswan minim iumi mas ting raonem hao iumi savve keepim wei for fren gud witim Jehovah and gohed faithful nomata wanem samting happen. Iumi mas no tingse diswan savve happen seleva nomoa. Nomata samfala wea worshipim God for staka year tu olketa no gohed faithful  long hem. Wanem nao iumi savve duim for traem best for kasem laef?

8. For study seleva hem minim wanem, and why nao datwan important?

⁸ For fren witim Jehovah iumi need for lisin long hem and for story witim hem. Main wei wea iumi lisin long Jehovah hem for duim study seleva long Bible. Diswan minim for readim and ting raonem Bible and olketa pablikeson bilong iumi. Wei for studyim Bible hem no olsem wei for prepare for exam long skul. Bat, hem olsem iu travel go long wanfala niu ples and lanem staka niu samting abaotem Jehovah. Diswan bae helpem iu for savve gud long Jehovah and hem bae fren gud witim iu.—Jas. 4:8.

9. Wanem nao samfala tul wea helpem iu for duim study seleva?

⁹ Organization bilong Jehovah provaedem staka tul for helpem iu for duim study seleva. Olsem example, iu savve faendem olketa leson wea olketa kolem “Bible Study Activities,” long jw.org, anda long sekson bilong “Teenagers.” Diswan savve helpem iu for lane from olketa story long Bible. And tu, long jw.org iu savve lukim olketa study guide for “What Does the Bible Really Teach?” Diswan savve helpem iu for strongim faith bilong iu and explainim olketa biliv bilong iu long olketa narawan. Olketa nara idea stap long “Young People Ask . . . How Can I Make Bible Reading Enjoyable?” wea stap long April 2009 Awake! magasin. Wei for study and ting raonem samting hem important bikos hem helpem iu for duim samting for kasem laef.—Readim Psalm 119:105.

10. Why nao hem important for man wea baptaes finis for mas prea?

¹⁰ Taem iumi studyim Bible, iumi lisin long Jehovah, and taem iumi prea iumi story long hem. Iumi mas no ting long wei for prea olsem samting wea iumi mas duim nomoa or prea for askem samting nomoa. Prea hem wei for story long Creator bilong iumi. Tingim, Jehovah laek for herem iu story witim hem. (Readim Philippi 4:6.) So sapos iu warim eni samting, Bible sei for iu “torowem evri hevi bilong iu long Jehovah.” (Ps. 55:22) Staka million brata and sista savve pruvim long iu hao datwan hem  barava helpem olketa. And hem bae helpem iu tu!

11. Why nao iumi mas evritaem thankiu long Jehovah?

¹¹ Iumi shud no prea nomoa taem iumi laekem Jehovah for helpem iumi. Bible sei: “Showimaot iufala thankiu long God.” (Col. 3:15) Samfala taem iumi wari tumas abaotem olketa problem and iumi nating luksavve long evri gud samting wea iumi kasem. So traem diswan: Evriday, trae for tingim thrifala samting wea iu laek sei thankiu for hem, and then talem thankiu long Jehovah for olketa samting hia. Wanfala teenager wea nem bilong hem Abigail wea hem baptaes taem hem 12 year, hem sei: “Mi ting Jehovah nao iumi fit for sei thankiu long hem winim eniwan long full universe. Iumi shud iusim evri chance iumi garem for talem thankiu long hem for olketa samting wea hem givim iumi. Mi rememberim disfala example wea samwan hem talem: Wanem nao bae iu duim sapos only samting wea iu bae kasem tumoro hem olketa samting wea iu sei thankiu long Jehovah for hem tuday?” *

12, 13. Why nao hem important for ting raonem gud samting Jehovah duim for iu?

¹² Jehovah helpem King David for deal witim staka hard samting wea kasem hem. So dastawe hem fit for sei: “Teistim and lukim wei wea Jehovah hem gud tumas. Man wea trustim hem for protectim hem bae hapi.” (Ps. 34:8) Verse hia helpem iumi for luksavve iumiseleva need for lukim wei wea Jehovah bae duim gud samting for iumi. Taem iu readim Bible and olketa pablikeson bilong iumi and attendim olketa meeting, bae iu lukim wei wea God helpem olketa narawan gohed faithful. Bat taem iu gohed strongim wei wea iu fren witim Jehovah, iu tu need for luksavve hao Jehovah helpem iu. Wanem nao wanfala samting wea kasem iu wea mekem iu luksavve Jehovah duim gud samting for iu?

¹³ Wanfala wei wea evri Christian teistim finis hao Jehovah hem gud tumas, hem nao taem hem invaetem iumi for fren gud witim hem and Son bilong hem. Jesus sei: “Hard for eniwan kam long mi sapos Dadi wea sendem mi kam hem no leadim hem kam long mi firstaem.” (John 6:44) Waswe, iu ting Jehovah nao leadim iu kam long hem? Or maet iu sei, ‘Jehovah leadim parents bilong mi kam long hem bat mi followim olketa nomoa.’ Bat remember, taem iu dedicatem iuseleva and baptaes, iuseleva garem spesol wei for fren witim Jehovah. Bible sei: “Sapos eniwan lovem God, God hem savve gud long datfala man.” (1 Cor. 8:3) Evritaem tinghae long wei wea iu part long organization bilong Jehovah.

14, 15. Hao nao ministry savve strongim faith bilong iu?

¹⁴ Wanfala nara wei wea Jehovah duim gud samting for iu, hem taem hem helpem iu no fraet for story long olketa narawan abaotem wanem iu bilivim, long ministry, or long skul. Hem no isi for preach long olketa skulfren. Maet iu wari abaotem hao olketa bae ting long iu. Hem maet hard for explainim wanem iu bilivim taem staka long olketa stap. Wanem nao savve helpem iu for deal witim datwan?

¹⁵ Tingim, why nao iu bilivim olketa samting wea Bible talem. Iu savve iusim olketa study guides long English, wea hem stap anda long jw.org, for helpem iu for ting raonem samting wea iu bilivim, why iu bilivim  datwan, and hao for explainim datwan long narawan. Taem iu barava bilivim samting iu lanem and iu prepare gud, bae iu barava willing for preach abaotem Jehovah.—Jer. 20:8, 9.

16. Wanem nao savve helpem iu for no fraet for explainim wanem iu bilivim?

¹⁶ Nomata iu prepare gud, maet iu still feel fraet for explainim wanem iu bilivim. Wanfala sista wea 18 year and wea baptaes taem hem 13 year, hem sei: “Mi savve long wanem mi bilivim, bat samfala taem hem hard for mi storyim tingting bilong mi.” So hem trae story long normal wei and long wei wea mekem olketa feel free for story witim hem. Hem sei: “Olketa classmate savve story abaotem olketa samting wea olketa duim. So mi tu shud feel free for storyim samting mi duim. So mi savve sei olsem, ‘Long nara day mi teachim Bible and . . . Then mi gohed storyim samting wea mi ting for talem. Samtaem wanem mi storyim hem no abaotem Bible, bat staka taem olketa bae laek for savve wanem nao mi duim taem mi teachim Bible. Samfala taem olketa askem olketa kwestin abaotem datwan. From mi iusim diskaen wei for story evritaem, gogo hem isi for mi startim story. And bihaen, mi feel hapi tumas!”

17. Wanem nao savve helpem iu for story long olketa narawan abaotem wanem iu bilivim?

¹⁷ Taem olketa narawan luksavve iu tingim olketa and respectim olketa, hem isi for olketa respectim iu and wanem iu bilivim. Olsem Olivia, wea 17 year and wea baptaes taem hem young, hem sei: “Mi savve fraet for talem eniting abaotem Bible taem mifala story bikos mi no laekem olketa for tingse mi ova tumas long lotu bilong mi.” Then hem start for changem tingting bilong hem. Winim wei for hem tingim wei wea hem fraet, hem ting olsem: “Staka young pipol no savve eniting abaotem Olketa Jehovah’s Witness. Mifala nomoa olketa Witness wea olketa meetim. So samting mifala duim bae affectim tingting bilong olketa abaotem iumi. Waswe sapos iumi shame or fraet, or faendem hard for tok abaotem wanem iumi bilivim, or taem iumi mas tok abaotem biliv bilong iumi, iumi showimaot long feis hao iumi no really laek for storyim datwan? Olketa bae tingse iumi nating tinghae long wei wea iumi wanfala Jehovah’s Witness. Taem olsem, maet bae olketa talem or duim samting wea no kaen long iumi bikos iumi showimaot iumi fraet. Bat sapos iumi feel free for story and iumi sure long wanem iumi bilivim, hem bae kamap wei bilong iumi for storyim Bible, and datwan savve mekem olketa respectim iumi.”

18. Wanem nao iu need for duim for kasem laef?

¹⁸ Olsem iumi lanem finis hem serious responsibility for iu duim samting for kasem laef. Iu need for readim and ting raonem Bible, prea long Jehovah, and tingim olketa blessing wea iu kasem finis and samting wea hem duim for helpem iu. Taem iu duim olsem, bae iu barava sure Jehovah hem fren bilong iu. Datwan bae helpem iu tu for story long olketa narawan abaotem wanem iu bilivim.—Readim Psalm 73:28.

19. Why nao iu mas traem best for duim samting for kasem laef?

¹⁹ Jesus sei: “Sapos eniwan laek followim mi, hem mas givim laef bilong hem for God and hem mas karem post wea mi karem, and gohed followim mi olowe.” (Matt. 16:24) So for followim Jesus hem minim each Christian mas dedicate long Jehovah and baptaes. Datwan minim door hem open for iu kasem staka blessing distaem, and bae hem lead go long laef olowe long niu world. So gohed traem best bilong iu for duim samting for kasem laef!