1, 2. Taem pikinini laek dedicate and baptaes, why nao maet samfala parents wari?

STAKA thousand Bible study dedicate long Jehovah and baptaes. Staka long olketa hem olketa young wan wea born long truth and chus for servem Jehovah, wea datwan hem best laef. (Ps. 1:1-3) Sapos iu wanfala dadi or mami, maet iu luk forward long day wea son or dota bilong iu bae baptaes.—Lukim 3 John 4.

² Bat, maet iu wari lelebet. Maet iu lukim samfala young wan wea baptaes bat bihaen olketa daotem wei for followim olketa standard bilong God. Gogo, samfala lusim truth tu. So maet iu wari nogud pikinini bilong iu worshipim Jehovah bat bihaen, hem lusim love wea hem garem for truth. Maet pikinini bilong iu olsem samfala Christian long Ephesus long first century, wea Jesus sei olsem abaotem olketa: “Love wea iu garem long firstaem hem nomoa nao.” (Rev. 2:4) Hao nao iu savve helpem pikinini for gohed grow for kasem salvation? (1 Pet. 2:2) Iumi savve lane from example bilong Timothy.

3. (a) Hao nao Timothy kamap wanfala Christian, and wanem nao hem duim? (b) Wanem nao thrifala samting wea Paul talem abaotem Timothy?

³ Long samting olsem 47 C.E. aposol Paul visitim Lystra. Maet long datfala taem nao Timothy just lane abaotem olketa teaching bilong Jesus. Nomata maet hem teenager nomoa, hem followim wanem hem lanem and bihaen tufala year, hem start for travel witim Paul. Samting olsem 16-fala year bihaen, Paul raet long Timothy and sei: “Gohed for followim olketa samting wea iu lanem and wea olketa narawan helpem iu for bilivim bikos iu savve trustim olketa wea teachim iu. Start kam from taem iu baby yet, iu savve long olketa Holy Raeting [olketa Hebrew Scripture] wea savve mekem iu wise and wea savve sevem iu bikos iu garem faith long Christ Jesus.” (2 Tim. 3:14, 15) Tingim wanem Paul talem abaotem Timothy, hem sei (1) hem savve long olketa holy raeting, (2) narawan helpem hem for bilivim samting hem lanem, and (3) from hem garem faith long Christ Jesus, datwan mekem hem wise mekem hem sev.

4. Wanem tul nao iu iusim for teachim pikinini bilong iu? (Lukim piksa long start bilong study.)

⁴ Iufala Christian parents laekem pikinini bilong iu for savve long olketa holy raeting, wea distaem hem olketa Hebrew Scripture and olketa Christian Greek Scripture. Nomata pikinini smol yet hem savve lane abaotem olketa story long Bible. Organization bilong Jehovah provaedem staka tul olsem olketa buk, brochure, and video, wea parents savve iusim for helpem pikinini. Which wan nao stap long languis bilong iu? Pikinini need for savve long olketa samting long Bible mekem hem savve fren gud witim Jehovah.

5. (a) Long Greek languis, datfala toktok wea Paul iusim hem minim wanem? (b) Wanem nao showimaot Timothy barava bilivim gud nius?

⁵ Hem important for savve long olketa holy raeting, bat hem no inaf for teachim nomoa olketa pikinini abaotem olketa story long Bible. Tingim hao olketa narawan helpem Timothy for mas bilivim samting hem lanem. Long Greek languis, datfala toktok wea Paul iusim, hem minim “for barava sure” or “barava bilivim and sure wanfala samting hem tru.” Timothy savve long olketa Hebrew Scripture ‘start kam from taem hem baby yet.’ Gogo, taem hem kasem pruv hao Jesus nao datfala Messiah, hem barava bilivim datwan. So savve bilong hem abaotem olketa holy raeting hem join witim wei wea hem bilivim samting wea hem lanem. Timothy barava bilivim gud nius dastawe hem baptaes and duim missionary waka witim Paul.

6. Hao nao iu savve helpem pikinini bilong iu for barava bilivim Bible?

⁶ Hao nao iu savve helpem pikinini bilong iu for garem strongfala faith olsem Timothy, mekem hem tu savve barava bilivim samting hem lanem? First samting, hem important for iu patient. Faith hem no samting wea seknomoa man garem. And from iu bilivim samting datwan no minim pikinini bilong iu tu bae bilivim datwan. Pikinini need for lane for “chekim evri samting for mek sure” hem barava bilivim olketa samting long Bible hem tru. (Readim 1 Thessalonica 5:21.) From iu wanfala dadi or mami, iu fit for helpem pikinini for garem strong faith, especially taem hem askem olketa kwestin. Bae iumi lane from example bilong wanfala dadi.

7, 8. (a) Hao nao wanfala dadi showimaot hem patient taem hem teachim dota bilong hem? (b) Wanem taem nao iu bin patient witim pikinini bilong iu?

 ⁷ Thomas, wea garem smol gele wea 11 year nomoa hem sei, “Gele bilong mi savve askem olketa kwestin olsem: ‘Waswe, maet Jehovah iusim evolution for wakem evri samting long earth?’ or ‘Why nao iumi no joinim community for duim olketa samting for mekem laef kamap moabeta, olsem wei for joinim election?’ Samfala taem, mi mas traem best for kontrolem miseleva for no talem hem ansa nomoa. Bikos wei for barava bilivim samting, hem no kamap from wanfala pruv nomoa, bat hem kamap from staka pruv wea man gohed for lanem.”

⁸ Thomas savve hem need for patient mekem hem savve teachim gele bilong hem. Tru nao, evri Christian mas patient. (Col. 3:12) Thomas luksavve for helpem dota bilong hem garem strong faith hem need for story witim hem staka taem. Hem need for story raonem olketa scripture for mekem gele bilong hem barava bilivim samting hem lanem. Thomas sei: “Taem mi and waef teachim gele bilong mitufala olketa main teaching, mitufala barava laek for savve sapos hem bilivim wanem hem lanem and sapos samting hem lanem mek sense long hem. Hem gud for hem askem olketa kwestin. Really, mi savve wari sapos hem just agree nomoa long evri samting and no askem kwestin.”

9. Hao nao iu savve helpem pikinini bilong iu for bilivim Bible?

⁹ Taem parents patient for teachim pikinini bae hem start for minim “waed, long, hae, and deep bilong truth.” (Eph. 3:18) Iumi savve teachim olketa fitim age and savve wea olketa garem. Taem faith bilong olketa kamap strong, hem bae isi for olketa ansarem eniwan wea askem kwestin abaotem biliv bilong olketa, olsem olketa skul fren. (1 Pet. 3:15) Olsem example, waswe, pikinini bilong iu savve iusim Bible for explainim wanem hem happen long olketa wea dae? Waswe, samting wea Bible talem mek sense long hem? * Tingim hao iufala evriwan savve kasem gud samting sapos iu patient for teachim pikinini for bilivim Bible.—Deut. 6:6, 7.

10. Wanem nao main samting iu shud duim taem iu teach?

¹⁰ Tru nao, for helpem pikinini garem faith, hem barava important for showimaot gudfala example. Stephanie wea garem thrifala dota, hem sei: “From taem olketa pikinini bilong mi smol yet, mi savve askem miseleva, ‘Waswe, mi storyim long olketa why nao mi barava bilivim Jehovah hem stap, hem garem love, and hem evritaem duim stret samting? Waswe, olketa pikinini bilong mi luksavve mi really lovem Jehovah?’ Mi shud no expectim olketa pikinini bilong mi for bilivim truth sapos miseleva no barava bilivim datwan.”

11, 12. Wanem nao wisdom, and hao nao wei for wise no depend long age?

¹¹ Iumi lanem hao Timothy (1) savve gud long olketa scripture and hem (2) barava bilivim wanem hem lanem. Bat wanem nao Paul minim taem hem sei olketa holy raeting savve mekem Timothy ‘wise and datwan bae sevem hem’?

¹² Insight on the Scriptures, Volume 2, explainim hao long Bible, wisdom hem join witim wei for “garem savve and wei for minim samting, wea mekem man savve hao for stretem problem, stap klia long danger,  kasem goal bilong hem, or givim kaonsel long narawan. Wisdom hem opposite long krangge.” Bible sei “krangge wei hem stap long heart bilong pikinini.” (Prov. 22:15, ftn.) So man wea garem wisdom showimaot hem mature. For kamap mature long spiritual wei hem no minim man bae mature long age bilong hem, bat hem minim for fraet long Jehovah and laek obeyim hem.—Readim Psalm 111:10.

13. Hao nao olketa young wan savve showimaot olketa wise?

¹³ Young wan wea mature lelebet long spiritual wei no “olsem wanfala boat long sea wea wind and olketa wave pushim hem olobaot.” Hem no letem feeling bilong hemseleva or tingting bilong olketa nara young wan for affectim hem. (Eph. 4:14) Bat, olketa young wan olsem savve isisi kamap mature taem olketa ‘evritaem iusim tingting bilong olketa for luksavve long wanem hem stret and no stret.’ (Heb. 5:14) Datwan helpem olketa for mekem olketa wise disison nomata parents or nara mature Christian no stap witim olketa. (Phil. 2:12) Datkaen wisdom savve sevem olketa. (Readim Proverbs 24:14.) Hao nao iu savve helpem pikinini bilong iu for garem kaen wisdom olsem? Iu need for mek sure iu teachim olketa abaotem olketa standard insaed long Bible. Wanem iu talem and duim shud showimaot klia long olketa iu followim olketa standard hia.—Rome 2:21-23.

14, 15. (a) Wanem nao young wan wea laek for baptaes need for ting raonem? (b) Hao nao iu savve helpem pikinini for ting raonem olketa blessing from wei for obeyim law bilong God?

¹⁴ Bat, for helpem pikinini bilong iu for garem faith hem no inaf for talem nomoa wanem hem stret and no stret. Iu need for helpem hem tu for ting raonem olketa kwestin olsem: ‘Why nao Bible stopem samfala samting wea maet mi laek for duim? Why nao mi bilivim olketa standard long Bible savve helpem mi?’—Isa. 48:17, 18.

¹⁵ Sapos pikinini bilong iu laek baptaes, helpem hem for ting raonem wanem Jehovah expectim hem for mas duim bihaen hem baptaes. Askem hem wanem nao tingting bilong hem abaotem datwan. Wanem gud  samting nao bae hem kasem? And wanem nao samfala hard samting wea maet bae hem feisim? Why nao olketa gud samting hem kasem, hem winim olketa hard samting wea hem bae feisim? (Mark 10:29, 30) Hem barava important for pikinini tingting gud abaotem olketa samting hia bifor hem baptaes. Helpem hem for ting raonem olketa blessing hem bae kasem from wei for obey and olketa nogud samting hem bae kasem sapos hem no obey. Datwan bae helpem hem for bilivim wei for followim olketa standard long Bible bae evritaem helpem hem.—Deut. 30:19, 20.

16. Wanem nao parents shud duim sapos pikinini wea baptaes finis start for no interest long truth?

¹⁶ Wanem nao bae iu duim sapos pikinini bilong iu talemaot hao hem daotem truth bihaen hem baptaes? Olsem example, maet son or dota bilong iu start for laekem olketa samting long world. Or maet hem start for daotem sapos hem gud for followim olketa Bible principle. (Ps. 73:1-3, 12, 13) Wei wea iufala dadi or mami, deal witim datwan bae barava affectim sapos pikinini gohed worshipim Jehovah or nomoa. Trae for no argue witim pikinini bilong iu, nomata hem smol or hem teenager finis. Bat, mek sure hem savve iu lovem and laek for helpem hem.

17, 18. Sapos wanfala young wan garem daot, hao nao parents savve helpem hem?

¹⁷ Young wan wea baptaes hem dedicate finis long Jehovah. Diswan minim hem promis for lovem and duim wanem Jehovah laekem winim wei for duim wanem hemseleva laekem. (Readim Mark 12:30.) Jehovah tingim promis bilong iu hem wanfala serious samting, and iumi tu shud garem sem tingting. (Eccl. 5:4, 5) Long taem wea fitim and long kaenfala wei, remindim pikinini bilong iu abaotem dedication bilong hem. Bat firstaem, readim and studyim olketa tul wea organization bilong Jehovah provaedem for parents. Datwan bae helpem iu for story long hem abaotem hao datfala disison for dedicate hem serious samting, and hao wei for keepim datfala promis bae helpem hem for kasem staka blessing.

¹⁸ Olsem example, iu savve faendem gud advaes insaed appendix bilong Questions Young People Ask—Answers That Work, Volume 1 anda long heding “Questions Parents Ask.” Insaed datfala appendix hem storyim hao parents shud no kwiktaem tingse pikinini rejectim truth, bat olketa shud faendaot wanem nao really kosim problem. Maet tingting bilong olketa nara young wan affectim hem. Or maet hem feel lonely, or tingse olketa nara young wan long kongregeson duim staka samting long waka bilong Jehovah winim hem. Datfala appendix gohed for explainim hao olketa samting hia wea gohed happen hem no minim pikinini bilong iu les long wanem iu bilivim. Maet hem ting olsem from hem feisim olketa nara problem. Datfala appendix givim tu olketa idea long hao parents savve helpem olketa pikinini wea lelebet daotem truth.

19. Hao nao parents savve helpem pikinini for kamap ‘wise mekem datwan savve sevem hem’?

¹⁹ Dadi or mami, iu garem wanfala privilege and important waka for “stretem and trainim olketa [pikinini] followim samting wea Jehovah talem.” (Eph. 6:4) Olsem iumi lanem, diswan minim iu mas teachim pikinini wanem Bible talem and helpem hem for bilivim wanem hem lanem. Taem faith bilong hem strong, datwan bae muvim hem for dedicatem hemseleva long Jehovah and for duim best for Jehovah. Toktok and spirit bilong Jehovah, witim wei wea iu waka hard, bae helpem pikinini bilong iu for kamap ‘wise and datwan savve sevem hem.’