Olketa hasband and waef shud mekem disison abaotem diswan long wei wea bae mekem olketa garem gud konsens. For duim datwan, olketa mas minim gud wanem nao IUD and ting raonem tu olketa Bible principle wea join witim diswan.

Jehovah komandim Adam and Eve, and bihaen, Noah and famili bilong hem for “garem plande pikinini.” (Gen. 1:28; 9:1) Bible no sei olketa Christian need for followim disfala komand. Dastawe, tufala wea marit savve disaed sapos tufala bae iusim famili planning for markem haomas pikinini for garem and wanem taem for garem pikinini. Wanem nao samfala samting tufala mas tingim?

Olketa Christian shud followim olketa Bible principle taem olketa mekem eni disison abaotem famili planning. Dastawe olketa shud no iusim abortion olsem wanfala wei for duim famili planning. Abortion hem againstim wanem Bible talem abaotem wei for respectim laef. Dastawe olketa Christian no laek for killim dae datfala laef wea start finis wea gogo bae hem kamap wanfala baby. (Ex. 20:13; 21:22, 23; Ps. 139:16; Jer. 1:5) Waswe saed long wei for iusim IUD?

The Watchtower bilong May 15, 1979, page 30-31 hem story abaotem diswan. Long datfala taem, staka IUD wea pipol iusim olketa wakem from plastic and olketa savve putim insaed uterus (basket bilong pikinini) for stopem woman for babule. Datfala article explainim hao long datfala taem pipol no savve gud hao IUD hem stopem woman for babule. Staka scientist sei IUD hem stopem sperm for no go kasem olketa egg for fertilize (start  for laef and grow). Sapos egg hem no fertilize, hard for wanfala laef hem start.

Bat olketa faendaot hao samfala taem, sperm hem go kasem egg and hem fertilize. Maet datfala fertilize egg grow insaed Fallopian tube (olketa kolem diswan ectopic pregnancy), or maet egg hia go stap insaed uterus. Sapos olsem, maet datfala IUD mekem egg hia no fit for grow insaed uterus and bae datfala egg wea fertilize finis hem dae. Diswan hem olsem wanfala abortion. Datfala article sei: “Olketa faithful Christian wea no sure sapos wei for iusim IUD hem stret or nomoa, mas tingting gud abaotem disfala information taem olketa markem witim datfala Bible principle wea showimaot laef hem holy.”—Ps. 36:9.

From 1979 kam kasem distaem, staka change kamap saed long science and long medical.

Distaem tufala type IUD nao hem stap. Wankaen type hem garem copper and olketa start for iusim diswan long United States long 1988. Nara type hem savve releasem hormone and olketa start for salem datwan long 2001. Hao nao tufala IUD hia hem waka?

Copper: Olsem iumi storyim finis, IUD savve mekem hem hard for sperm go thru long uterus for go kasem egg. And tu, from olketa wakem datfala IUD long copper, luk olsem copper hem poison for sperm, so hem killim dae olketa sperm. * And olketa kaen IUD olsem savve affectim tu insaed uterus.

Hormone: Diskaen type IUD garem hormone wea semsem olsem datwan wea olketa putim insaed long contraceptive pill. IUD hia hem olsem olketa IUD wea olketa iusim bifor, bat hem savve releasem hormone insaed long uterus. Long samfala woman, diswan affectim wei wea ovary savve garem olketa egg. So sapos no eni egg release, bae hem hard for fertilize. Olketa IUD hia savve affectim tu insaed uterus. * And tu, olketa IUD savve mekem mucus long cervix hem thick mekem hem hard for sperm go from vagina go long uterus.

Olsem iumi storyim finis, tufala type IUD hia savve mekem insaed uterus for kamap thin. Diswan minim sapos gogo datfala woman garem egg and hem fertilize, maet hem kasem datfala uterus bat bae hem dae nomoa bikos hem no savve grow insaed datfala uterus and datfala woman bae no babule. Bat olketa scientist sei diswan no happen staka taem, and olketa sei diswan hem happen samfala taem witim contraceptive pill tu.

Dastawe, no eniwan savve barava sure copper or hormone IUD savve stopem evribit egg for fertilize. Bat olketa research bilong science showimaot hao IUD hem stopem egg for fertilize, dastawe olketa woman bae no babule.

Tufala wea marit wea laek for iusim IUD maet story firstaem witim doctor. Doctor savve talem tufala wanem kaen IUD olketa garem long ples wea olketa stap, and hem savve storyim gud saed and nogud saed wea maet bae affectim waef. Tufala hia shud no expectim or letem eniwan, nomata doctor tu, for disaedem wanem tufala bae duim. (Rome 14:12; Gal. 6:4, 5) Datwan hem disison bilong tufala seleva nomoa. Goal bilong tufala hem for mekem God hapi and for garem klin konsens.—Lukim 1 Timothy 1:18, 19; 2 Timothy 1:3.