DIANA hem winim 80 year old. Hasband bilong hem garem datfala sik Alzheimer and hem stap long wanfala nursing hom for samfala year bifor hem dae. Tufala son bilong hem tu dae, and hem mas deal witim wei wea hem kasem datfala sik breast cancer. Nomata olsem, taem olketa brata and sista long kongregeson lukim Diana long Kingdom Hall or long ministry, olketa lukim hem evritaem hapi nomoa.

John hem wanfala circuit overseer for winim 43 year. Hem barava lovem tumas datfala waka and hem laek for iusim full laef bilong hem for datwan. Bat, hem mas stop for duim circuit waka mekem hem go for lukaftarem relative bilong hem wea sik, and distaem hem stap long wanfala kongregeson. Taem olketa wea savve long John meetim hem long olketa assembly and convention, olketa lukim wei bilong hem still semsem nomoa. Hem evritaem hapi nomoa.

Wanem nao mekem Diana and John for gohed hapi? Hao nao samwan wea deal witim sorre and pain savve gohed hapi? And hao nao samwan savve gohed hapi nomata sapos hem lusim assignment wea hem lovem? Bible sei: “Evri stretfala pipol bae i hapi fogud long wanem [Jehovah] hemi bin duim.” (Sams 64:10) For minim gud disfala scripture, hem gud for iumi luksavve wanem nao savve mekem iumi kasem trufala hapi and wanem nao mekem iumi no kasem datwan.

Iumi savve samfala samting savve mekem man for hapi. Olsem example, tingim tufala wea barava lovem tufala and wea redi for marit. Or tingim olketa wea garem pikinini or samwan wea kasem wanfala privilege insaed organization bilong Jehovah. Olketa samting hia savve mekem man hapi bikos hem olketa present from Jehovah. Hem nao startim marit, mekem pipol fit for garem pikinini, and hem givim olketa privilege thru long organization bilong hem.—Jenesis 2:18, 22; Sams 127:3; 1 Tim. 3:1.

Bat, samfala samting wea man hapi long hem no savve mekem man hapi for olowe. Sorre samting nao, maet wanfala marit partner no faithful or hem dae. (Esikiel 24:18; Hosia 3:1) Samfala pikinini no obeyim parents and no obeyim God, and maet olketa disfellowship tu. Olketa  son bilong Samuel worshipim Jehovah long wei wea God no acceptim, and sin wea David duim mekem hem kasem staka problem insaed famili. (Fas Samuel 8:1-3; Mektu Samuel 12:11) Kaen samting olsem savve mekem man sorre and kasem staka problem and hem no hapi.

And tu, iumi savve lusim olketa privilege wea iumi kasem insaed organization bilong Jehovah, maet from iumi sik, lukaftarem famili, or from olketa change wea kamap insaed organization. Staka wea kasem kaen samting olsem, storyim hao olketa barava misstim hapi wea olketa feelim taem olketa duim datfala waka.

Olsem iumi lukim, samfala samting savve mekem iumi hapi for lelebet taem nomoa. Bat waswe, eni samting stap wea savve mekem iumi gohed hapi nomata iumi kasem olketa hard taem? Mas olsem, bikos Samuel, David, and olketa narawan gohed for hapi nomata olketa kasem hard taem.

Jesus savve wanem nao savve mekem man barava hapi. Taem hem long heven, laef bilong hem barava gud, and Bible storyim hao hem evritaem hapi for stap witim Jehovah. (Provebs 8:30) Bat taem hem kam long earth, samfala taem hem kasem olketa barava hard taem. Nomata olsem, Jesus hapi for duim wanem Dadi bilong hem laekem. (John 4:34) Bat waswe taem Jesus klosap for dae? Bible sei: “From hem tingim hapi wea hem bae kasem, hem no givap and hem no shame nomata hem dae long wanfala post.” (Heb. 12:2) Dastawe hem gud for ting raonem tufala samting wea Jesus talem abaotem trufala hapi.

Wantaem, 70-fala disaepol bilong Jesus go preach. Taem olketa kam bak, olketa barava hapi bikos olketa kasem paoa for duim mirakol and for raosem olketa demon tu. Then Jesus sei: “Iufala mas no hapi bikos olketa demon obeyim iufala, bat iufala mas hapi bikos God hem raetem finis nem bilong iufala long heven.” (Luke 10:1-9, 17, 20) Tru nao, wei for mekem Jehovah hapi hem barava important winim wei for duim olketa spesol assignment. Jehovah bae no forgetim olketa, and datwan nao fit for mekem olketa barava hapi.

Long narataem, Jesus story witim big crowd long pipol. Then wanfala woman long Jew talem hao masbi mami bilong Jesus, disfala nambawan  teacher, hem barava hapi. Bat Jesus sei: “Nomoa ia, olketa wea herem toktok bilong God and obeyim datwan nao olketa hapi!” (Luke 11:27, 28) Wei for tinghae long samting wea pikinini duim savve mekem parents hapi, bat wei for fren gud witim Jehovah and obeyim hem nao mekem man barava hapi.

Tru nao, main samting wea mekem iumi kasem trufala hapi hem nao taem iumi luksavve Jehovah hapi long iumi. Nomata iumi no laek kasem olketa hard taem, datwan no savve aotem hapi wea iumi kasem. Really, taem iumi gohed faithful, datwan bae mekem iumi barava hapi. (Rome 5:3-5) And tu, Jehovah givim spirit bilong hem long olketa wea trustim hem, and hapi hem wanfala long olketa wei bilong holy spirit. (Gal. 5:22) Datwan helpem iumi for luksavve why Sams 64:10 hem sei: “Evri stretfala pipol bae i hapi fogud long wanem [Jehovah] hemi bin duim.”

Dastawe, Diana and John, tufala gohed for hapi nomata tufala kasem olketa hard taem. Diana sei: “Mi trust long Jehovah olsem wei wea wanfala pikinini trustim dadi and mami.” Hao nao hem luksavve God hapi long hem? Hem sei: “Mi feel olsem Jehovah blessim mi and givim mi strong for gohed smile taem mi preach evritaem.” John wea gohed long ministry nomata hem finis for duim circuit waka, hem storyim samting wea barava helpem hem. Hem sei: “Start long 1998, taem mi kasem assignment for teach long Ministerial Training Skul, mi duim study seleva winim enitaem bifor.” Hem sei tu: “Tingting bilong mi and waef, abaotem why mitufala servem Jehovah hem mekem hem isi for mitufala change fitim eni assignment wea mitufala kasem. Mitufala duim datwan and no regret.”

Staka narawan luksavve hao toktok long Sams 64:10 hem tru. Olsem example, tingim wanfala couple wea serve long Bethel long United States for winim 30 year. Tufala kasem assignment for spesol pioneer. Tufala sei: “Wei for sorre hem wanfala natural samting wea savve kamap taem man lusim samting wea hem lovem. Bat disfala feeling for sorre hem bae no gohed for olowe.” Taem tufala long assignment, tufala kwiktaem waka tugeta witim kongregeson for duim preaching waka. Tufala sei tu: “Mitufala prea and talem stret wanem mitufala needim. And taem mitufala lukim wei wea Jehovah ansarem prea bilong mitufala, datwan encouragem and mekem mitufala barava hapi. No longtaem bihaen mitufala arrive, olketa narawan long kongregeson start for pioneer and mitufala garem tufala Bible study wea barava gohed gud.”

Hem tru, hem no evritaem isi for gohed hapi bikos iumi savve feel sorre samfala taem. Nomata olsem, toktok bilong Jehovah long Sams 64:10 hem comfortim iumi. Taem iumi barava feel wikdaon, iumi savve trustim hao sapos iumi gohed faithful nomata samfala samting long laef bilong iumi hem change, iumi bae hapi fogud long Jehovah. And tu, iumi luk forward for taem wea olketa promis bilong Jehovah abaotem niu skae and niu earth bae kamap tru. Iumi evriwan bae perfect. Then pipol bilong God bae “hapi olowe” bikos long evri samting wea Jehovah creatim and wea hem provaedem for olketa.—Aesaea 65:17, 18.

Tingim hao long datfala taem iumi evriwan bae perfect and evri morning taem iumi wekap iumi feel strong and no taed. Nomata nogud samting happen long iumi bifor wea mekem iumi barava sorre, iumi bae no tingim moa. Jehovah promisim hao iumi bae no tingim moa evri samting wea happen bifor. Iumi bae welkamim olketa wea iumi lovem wea dae wea bae resurrect and iumi bae feel olsem parents bilong 12 year old gele wea Jesus resurrectim. Bible sei tufala “barava hapi narawe.” (Mark 5:42) Tru nao, gogo evriwan long earth bae garem stretfala wei and bae olketa hapi fogud long Jehovah for olowe.