Long 2 Corinth 12:2, 3, Paul story abaotem wanfala man wea “go ap kasem mek-thri heven.” Hu nao ia? Taem Paul raet long kongregeson long Corinth, hem strongim hao God chusim hem for kamap wanfala aposol. (2 Cor. 11:5, 23) Then hem storyim “olketa vision and olketa message [or, revelation] from Lord.” Long datfala taem, Paul no storyim olketa nara brata. So diswan showimaot masbi hem minim hemseleva nao lukim olketa vision hia and olketa revelation.—2 Cor. 12:1, 5.

So Paul nao datfala man wea “go ap kasem mek-thri heven” and “go long paradaes.” (2 Cor. 12:2-4) Wei wea hem iusim disfala toktok revelation, savve minim wei for showimaot samting wea bae kamap long future.

Wanem nao “mek-thri heven” wea Paul lukim?

Insaed Bible, datfala word “heven” savve minim really skae. (Jenesis 11:4; Job 35:5) Bat heven or skae savve minim olketa nara samting tu. Samfala taem hem minim wei wea wanfala man hem rul. (Daniel 4:20-22) Or hem savve minim wei wea God hem rul. Olsem example, wei wea God rul thru long Kingdom bilong hem.—Rev. 21:1.

Paul lukim “mek-thri heven.” Wanem nao disfala toktok “mek-thri” hem minim? Samfala taem Bible repeatim wanfala samting thrifala taem for strongim point. (Esikiel 21:27; Rev. 4:8; ftn.) Luk olsem wei wea Paul storyim “mek-thri heven,” hem for strongim hao disfala wei for rul, wea hem nao Kingdom wea Jesus Christ and 144,000 rulim, hem barava hae and nambawan. (Lukim Insight on the Scriptures, Vol. 1, page 1059, 1062.) Olsem aposol Peter talem, iumi gohed for weitim datfala “niu skae” wea God promisim.—2 Pet. 3:13.

Bat wanem nao Paul minim taem hem talem datfala toktok “paradaes”?

Datfala toktok “paradaes” savve garem staka mining tu: (1) Datfala “paradaes” wea first man and woman stap bifor hem wanfala really ples, so disfala toktok savve minim physical Paradaes long earth wea bae kamap long future. (2) Hem savve minim datfala spiritual paradaes wea pipol bilong God evriwea long earth bae enjoyim long niu world. (3) Hem savve minim tu laef long heven long “datfala paradaes bilong God” wea Revelation 2:7 story abaotem.—Lukim Wastaoa bilong July 15, 2015, page 8, paragraf 8.

Taem Paul story abaotem wei wea hem go long paradaes long 2 Corinth 12:4, maet wanem hem story abaotem hem minim thrifala mining evriwan.

Olketa main point wea iumi lanem:

Luk olsem “mek-thri heven” wea 2 Corinth 12:2 storyim hem nao Kingdom wea Jesus Christ and 144,000 rulim, wea nara nem bilong hem nao datfala “niu skae.”—2 Pet. 3:13.

Hem “mek-thri heven” bikos wei wea disfala Kingdom hem rul hem barava hae and nambawan.

Luk olsem datfala “paradaes” wea Paul “go ap” long hem insaed vision hem minim (1) datfala physical Paradaes long earth long future, (2) datfala spiritual paradaes wea bae kamap long future, wea hem winim spiritual paradaes wea stap distaem, and (3) “datfala paradaes bilong God” long heven wea gohed stap long semtaem witim datfala paradaes long earth insaed datfala niu world.

So, datfala toktok niu world hem minim tufala ples hia evriwan, datfala niu skae and datfala niu earth. Hem wanfala niu arrangement, wea insaed diswan hem datfala gavman wea hem nao Kingdom long heven and olketa man wea worshipim Jehovah long paradaes earth.