STUDY ARTICLE 49
Evri Samting Garem Taem, Taem for Waka and for Rest
“Kam iumi go long wanfala kwaet ples and rest lelebet.”—MARK 6:31.
SONG 143 Gohed Waka Hard, Lukluk, and Weit
WANEM IUMI BAE STORYIM *
1. Hao nao staka pipol ting lo wei for waka?
WANEM nao tingting blo staka pipol lo ples wea iu stap abaotem waka? Lo staka kantri, pipol waka hard tumas and spendem staka taem lo waka winim enitaem bifor. Pipol wea waka hard tumas, staka taem olketa busy and no garem taem for rest, spendem taem witim famili, or for duim olketa spiritual samting. (Eklesiastes 2:23) Bat, samfala pipol nating laek for waka and olketa talem staka excuse for no duim eni samting.—Provebs 26:13, 14.
2-3. Olketa wanem example nao Jehovah and Jesus showimaot saed lo waka?
2 Pipol lo world no garem balance tingting abaotem waka. Bat, Jehovah and Jesus barava difren. Jehovah hem man for waka. Jesus talem klia datwan taem hem sei: “Dadi bilong mi hem gohed waka kam kasem distaem, and mi tu gohed waka.” (John 5:17) Tingim evri samting wea God duim taem hem creatim staka million angel and full universe. Iumi savve lukim tu staka samting wea God wakem lo earth wea luk naes tumas. Wanfala man wea raetem psalm sei olsem: “Lod [Jehovah], yu nao yu mekem plande samting tumas. Evrisamting ya hemi somaot dat wei blong yu hemi waes fogud. Ya, disfala wol hemi fulap long evrisamting wea yu bin mekem.”—Sams 104:24
3 Jesus followim example blo Dadi blo hem. Datfala Son helpem Jehovah taem Hem start for creatim evri samting. Hem nao main wakaman blo Jehovah. (Provebs 8:27-31) Taem Jesus lo earth, hem barava duim gudfala waka. And hem ting lo datfala waka olsem kaikai blo hem, and evri samting wea hem duim pruvim God nao sendem hem kam.—John 4:34; 5:36; 14:10.
4. Wanem nao iumi savve lanem from Jehovah and Jesus abaotem wei for rest?
4 Waswe, example wea Jehovah and Jesus showimaot saed lo wei for waka hard hem minim iumi no need for rest nao? Nomoa. Jehovah no savve taed, so hem no needim rest bihaen hem duim wanfala waka. Nomata olsem, Bible sei bihaen Jehovah creatim heven and earth hem rest tu. (Eksodas 31:17) Luk olsem datwan minim bihaen Jehovah creatim evri samting, hem stop and spendem lelebet taem for hapi lo olketa samting wea hem wakem. And nomata Jesus waka hard taem hem stap lo earth, hem markem taem tu for rest and enjoy for kaikai witim olketa fren blo hem.—Matt. 14:13; Luke 7:34.
5. Wanem nao staka pipol mas stragol witim?
5 Bible encouragem pipol blo God for mas waka. Olketa servant blo hem shud waka hard and no lesy. (Provebs 15:19) Maet iu mas waka for selen for provaed for famili blo iu. And from iumi disaepol blo Christ, iumi garem responsibility for share lo waka for preachim gud nius. Nomata olsem, iu needim tu inaf taem for rest. Waswe, samfala taem iu stragol for balancem taem for waka, duim ministry, and rest? Hao nao bae iumi savve lo haomas taem for waka and haomas taem for rest?
HAO FOR BALANCE
6. Hao nao Mark 6:30-34 showimaot Jesus garem balance tingting saed lo waka and rest?
6 Saed lo waka, wei for balance hem barava important. God muvim King Solomon for raet olsem: “Evrisamting hemi kamap long barava taem blong hem.” Hem storyim taem for plant, build, krae, laflaf, dance, and for duim olketa nara samting. (Eklesiastes 3:1-8) So hem klia hao tufala main samting lo laef hem nao for waka and for rest. Jesus garem balance tingting abaotem waka and rest. Wantaem olketa aposol kam bak from preaching. From olketa busy tumas, gogo olketa no garem taem for kaikai. Jesus sei lo olketa: “Kam iumi go long wanfala kwaet ples and rest lelebet.” (Readim Mark 6:30-34.) Nomata staka taem Jesus and olketa disaepol no garem chance for rest, Jesus savve olketa evriwan needim rest.
7. Hao nao wei for lane abaotem law blo Sabbath savve helpem iumi?
7 Samfala taem, iumi evriwan needim taem for rest or duim samfala difren samting. Diswan hem showaot lo wanfala arrangement wea God mekem witim pipol blo hem bifor, wea hem nao datfala Sabbath evri week. Iumi no stap anda lo Law blo Moses, nomata olsem, iumi savve kasem gud samting from wei for lane abaotem Sabbath. Samting wea iumi bae lanem savve helpem iumi for luksavve sapos iumi garem balance tingting abaotem waka and rest.
SABBATH HEM TAEM FOR REST AND WORSHIP
8. Olsem Eksodas 31:12-15 storyim, Sabbath day hem for wanem?
8 Bible sei bihaen sixfala day wea hem creatim evriting, God hem stop for wakem olketa samting lo earth. (Jenesis 2:2) Bat, Jehovah hem man wea laekem tumas for waka, and lo narafala wei, hem still “gohed waka” kam kasem distaem. (John 5:17) Datfala arrangement for keepim Sabbath evri week hem followim sem wei blo Jehovah for rest wea Genesis storyim. God sei datfala Sabbath hem wanfala saen midolwan hem and olketa Israelite. Hem wanfala day for rest and hem blo Jehovah. (Readim Eksodas 31:12-15.) Datfala law stopem evriwan for waka, nomata olketa pikinini, olketa slave, and olketa animal tu. (Eksodas 20:10) Diswan hem for mekem pipol garem moa taem for duim olketa spiritual samting.
9. Lo taem blo Jesus, wanem tingting wea no stret nao pipol garem abaotem Sabbath?
9 Sabbath day hem gud samting for pipol blo God, nomata olsem, staka bigman blo religion lo taem blo Jesus barava ova tumas lo hao olketa ting lo datwan. Olketa sei man hem brekem law sapos hem pikim eni wheat lo taem blo Sabbath, or healim man wea sik. (Mark 2:23-27; 3:2-5) Olketa kaen tingting olsem no followim tingting blo God, and Jesus mekem klia datwan lo olketa wea willing for lisin lo hem.
Famili blo Jesus iusim taem blo Sabbath for duim olketa spiritual samting (Paragraf 10 storyim diswan) *
10. Wanem nao iumi savve lanem from Matthew 12:9-12 abaotem hao Jesus ting lo Sabbath?
10 Jesus and olketa Jew wea followim hem keepim Sabbath bikos olketa stap anda lo Law blo Moses. * Bat, wanem Jesus talem and duim showimaot man mas balance taem hem keepim Sabbath, and hem stret nomoa for man kaen and helpem narawan lo Sabbath. Hem talem klia olsem: ‘Hem stret for duim gud samting long Sabbath.’ (Readim Matthew 12:9-12.) Lo tingting blo hem, wei for kaen and helpem narawan hem no brekem law blo Sabbath. Samting wea Jesus duim mekhae lo main reason why God talem pipol blo hem for keepim Sabbath. From pipol blo God olketa rest from waka, datwan mekem olketa savve duim olketa spiritual samting. Jesus growap lo famili wea iusim taem blo Sabbath for duim olketa spiritual samting. Iumi lukim datwan taem iumi read abaotem Jesus taem hem stap lo hom blo hem lo Nazareth. Bible sei: “Long Sabbath [Jesus] go long sinagog olsem hem savve duim olowe, and hem standap for read.”—Luke 4:15-19.
HAO NAO IU TING LO WAKA?
11. Gudfala example blo hu nao Jesus lukim saed lo wei for waka hard?
11 For sure, Joseph garem sem tingting olsem God abaotem waka taem hem teachim son blo hem Jesus for kamap wanfala carpenter. (Matt. 13:55, 56) And masbi Jesus lukim wei wea Joseph waka hard evriday for sapotim big famili blo hem. Bihaen, Jesus talem lo olketa disaepol blo hem: “Man wea duim waka fit for kasem pei.” (Luke 10:7) Tru nao, Jesus barava minim gud wei for waka hard.
12. Olketa wanem scripture nao showimaot hao Bible storyim wei for waka hard?
12 Aposol Paul tu minim gud wei for waka hard. Main waka blo Paul hem for witness abaotem Jesus and teaching blo hem. Nomata olsem, Paul mas waka for sapotim hemseleva tu. Olketa lo Thessalonica savve hao hem man for “barava waka hard,” hem duim diswan ‘day and naet’ mekem hem no putim hevi lo eniwan. (2 Thess. 3:8; Acts 20:34, 35) Luk olsem taem Paul storyim diswan, hem minim datfala waka blo hem for wakem tent. Taem hem lo Corinth, hem stap and waka witim Aquila and Priscilla, bikos “waka bilong tufala hem for wakem tent.” Wei wea Paul waka ‘day and naet’ hem no minim hem gohed waka and no rest. Samfala taem hem savve rest from wei for wakem tent, olsem lo taem blo Sabbath. Datfala day hem chance for hem preach lo olketa Jew, wea olketa tu no waka lo datfala day.—Acts 13:14-16, 42-44; 16:13; 18:1-4.
13. Wanem nao iumi savve lanem from example blo Paul?
13 Aposol Paul showimaot gudfala example. Hem duim waka for kasem selen, nomata olsem, hem mek sure hem evritaem duim waka for “talemaot gud nius bilong God.” (Rome 15:16; 2 Cor. 11:23) Hem encouragem tu olketa narawan for duim sem samting. Dastawe, Aquila and Priscilla waka tugeta witim Paul for “duim waka bilong Christ Jesus.” (Rome 12:11; 16:3) Paul encouragem olketa lo Corinth for “evritaem busy long waka bilong Lord.” (1 Cor. 15:58; 2 Cor. 9:8) Jehovah muvim tu aposol Paul for raetem disfala toktok: “Man wea no laek waka shud no kaikai tu.”—2 Thess. 3:10.
14. Wanem nao Jesus minim taem hem talem toktok lo John 14:12?
14 Main important waka lo olketa last day distaem, hem for preach and teachim pipol for kamap disaepol. And Jesus talem stret dat olketa disaepol blo hem bae duim waka wea winim wanem hem duim! (Readim John 14:12.) Hem no minim bae iumi duim olketa mirakol olsem hem. Bat, hem minim olketa follower blo hem bae preach and teach lo staka ples, lo staka pipol, and for longfala taem winim hem.
15. Olketa wanem kwestin nao iu savve askem iuseleva, and why nao olsem?
15 Sapos iu garem waka for selen, iu savve askem iuseleva olketa kwestin hia: ‘Waswe, pipol lo waka ples blo mi savve lo mi olsem samwan wea waka hard? Waswe, mi finisim waka lo barava taem and duim best lo waka blo mi?’ Sapos ansa blo iu hem yes, then boss blo iu bae trustim iu. Taem olsem, pipol wea lukim wei blo iu bae interest lo Kingdom message. Taem iumi duim waka for preach and teach, iumi savve askem iumiseleva olsem: ‘Waswe, mi samwan wea waka hard lo ministry? Waswe, mi prepare gud for preach? Waswe, mi kwiktaem go bak lo olketa wea interest? And waswe, mi evritaem duim olketa difren kaen wei for preach?’ Sapos ansa blo iu hem yes, iu bae barava hapi lo waka blo iu for preach.
HAO NAO IU TING LO WEI FOR REST?
16. Hao nao tingting blo Jesus and olketa aposol abaotem wei for rest hem difren from staka distaem?
16 Jesus savve hao samfala taem hem and olketa aposol blo hem needim taem for rest. Bat, staka pipol lo bifor and distaem, olketa olsem datfala rich man lo tokpiksa blo Jesus. Datfala man talem olsem lo hemseleva: “Bae mi rest, kaikai, drink, and hapi nomoa.” (Luke 12:19; 2 Tim. 3:4) Hem ting lo wei for rest and hapi olsem main samting lo laef blo hem. Bat Jesus and olketa aposol blo hem barava difren, olketa no ting dat wei for mekem olketa seleva hapi nao main samting lo laef.
Wei for balance lo waka and rest savve mekem iumi garem chance for duim olketa gud samting wea savve strongim iumi (Paragraf 17 storyim diswan) *
17. Hao nao iumi savve iusim olketa taem wea iumi no waka?
17 Iumi trae for followim example blo Jesus distaem tu. Taem iumi no waka iumi no just rest nomoa, bat iumi iusim datfala taem for preach and for attendim olketa meeting. Iumi ting lo disfala waka for teachim pipol for kamap disaepol and wei for attendim meeting, olsem hem important tumas, dastawe iumi duim best blo iumi for evritaem duim olketa samting hia. (Heb. 10:24, 25) Nomata sapos iumi go holiday lo nara ples, iumi evritaem attendim olketa meeting, and iumi lukaotem olketa chance for story lo eniwan wea iumi meetim.—2 Tim. 4:2.
18. Wanem nao King blo iumi, Christ Jesus, laekem iumi for duim?
18 Iumi barava hapi tumas from King blo iumi, Christ Jesus, hem no expectim iumi for duim samting winim wanem iumi fit for duim, and hem helpem iumi for garem balance tingting lo waka and rest! (Heb. 4:15) Hem laekem iumi for mas kasem rest wea iumi needim. Hem laekem iumi tu for waka hard for provaed for olketa need blo iumi and for enjoyim waka for teachim pipol for kamap disaepol. Lo next study, iumi bae storyim waka wea Jesus duim for mekem iumi kamap free from wanfala nogud wei for slave.
SONG 38 Hem Bae Mekem Iu Strong
^ par. 5 Bible teachim iumi for garem balance tingting abaotem waka and rest. Example blo olketa Israelite abaotem hao olketa keepim sabbath evri week bae helpem iumi for luksavve lo datwan, disfala study bae helpem iumi for lukluk gud lo iumiseleva lo hao iumi ting lo waka and rest.
^ par. 10 Olketa disaepol blo Jesus barava tinghae lo datfala law blo Sabbath, dastawe olketa weit go kasem taem wea Sabbath hem finis bifor olketa finis for redyim evri samting for putim lo body blo Jesus.—Luke 23:55, 56.
