1-2. (a) Wanem nao wanfala jubilee? (Lukim box “ Wanem Nao Datfala Jubilee?”) (b) Wanem nao Jesus storyim lo Luke 4:16-18?

LO SAMFALA kantri, olketa garem celebration for markem mek-50 year wea wanfala king or queen hem rul. Datfala mek-50 year olketa savve kolem lo Jubilee. Olketa celebration lo taem blo olketa jubilee hia savve gohed for wanfala day, wanfala week, month, or winim datwan, bat taem hem finis, kwiktaem nomoa pipol forgetim nao wei wea olketa enjoyim datfala celebration.

² Iumi bae storyim wanfala jubilee wea gud winim datfala celebration wea savve kamap evri 50 years lo Israel bifor, wea olketa gohed celebratem for wan full year. Datfala Jubilee bifor hem givim freedom lo olketa Israelite. Why nao iumi interest for lane abaotem datwan? Bikos Jubilee blo Israel bifor, hem remindim iumi abaotem wanfala nambawan samting wea Jehovah gohed provaedem for mekem iumi kamap free for olowe, Jesus tu story abaotem disfala freedom.—Readim Luke 4:16-18.

3. Olsem Levitikas 25:8-12 storyim, hao nao olketa Israelite kasem gud samting from datfala Jubilee?

³ For helpem iumi savve gud wanem Jesus minim taem hem story abaotem datfala freedom, bae iumi storyim datfala Jubilee wea God arrangem for pipol blo hem bifor. Jehovah talem olketa Israelite: “Yufala mas mektambu long mekfifti yia.  . . . Hemi yia fo talemaot  . .  olketa man an olketa samting save kamap fri. Long disfala Yia, olketa lan wea pipol i salem go long nara man mas kambaek long famili hu i onam fastaem. An long disfala Yia, olketa hu i bin kamap slev mas go fri  mekem olketa gobaek long famili blong olketa.” (Readim Levitikas 25:8-12.) Lo last study, iumi storyim hao olketa Israelite kasem gud samting from wei for keepim Sabbath evri week. Bat, hao nao olketa Israelite kasem gud samting from Jubilee? Tingim sapos wanfala Israelite garem bigfala kaon, and gogo hem salem land blo hem for peim datfala kaon. Lo year blo Jubilee, hem savve kasem bak land blo hem. From datwan, datfala man savve go bak lo land wea hem ownim, and datfala land bae stap for olketa pikinini blo hem. And tu, maet wanfala man kasem hard taem and gogo hem salem pikinini blo hem or hemseleva for kamap slave mekem hem peim kaon blo hem. Lo year blo Jubilee, datfala slave savve go bak lo famili blo hem. Datwan minim olketa garem hope from no eniwan bae slave for olowe! Diswan showimaot Jehovah barava tingim pipol blo hem!

4-5. Why nao iumi shud interest for lane abaotem Jubilee blo olketa Israelite?

⁴ Wanem nao nara gud samting wea olketa kasem from datfala Jubilee? Jehovah sei no eniwan lo olketa bae poor bikos Jehovah bae blessim olketa lo datfala land wea hem givim lo olketa. (Diutronomi 15:4) Datwan hem barava difren from wanem hem happen lo world distaem, bikos olketa wea rich gohed for rich, and olketa wea poor, just poor go moa!

⁵ Iumi olketa Christian no stap anda Law blo Moses. Datwan minim iumi no followim datfala Jubilee arrangement for mekem olketa slave kamap free, for cancelim olketa kaon, and for givim bak land. (Rome 7:4; 10:4; Ephesus 2:15) Nomata olsem, iumi garem reason for interest lo Jubilee. Why nao olsem? Bikos iumi tu savve kamap free or kasem freedom, wea olsem datfala arrangement blo Jehovah for olketa Israelite.

6. Iumi olketa man need for kamap free from wanem?

⁶ Iumi evriwan need for kamap free bikos iumi slave lo sin, wea hem nogud tumas. From iumi sin, iumi kamap olo, sik, and dae. Staka lukim diswan hem tru taem olketa luk lo mirror or go lo doctor for kasem treatment. And  tu, iumi savve feel discourage taem iumi duim wanfala sin. Aposol Paul sei, ‘Law bilong sin wea stap long body bilong mi hem bossim mi.’ And hem sei tu: “Mi iusles man nomoa! Hu nao bae sevem mi from disfala body wea bae mekem mi dae nomoa?”—Rome 7:23, 24.

7. Wanem nao Isaiah talem abaotem wei for free?

⁷ Iumi hapi bikos God mekem arrangement for iumi kamap free from sin. Jesus nao main wan wea mekem datwan for happen. Winim 700 year bifor Jesus kam lo earth, profet Isaiah storyim wanfala nambawan freedom. And gud samting wea iumi kasem from disfala nambawan freedom hem winim freedom wea olketa Israelite kasem lo Jubilee year. Isaiah raet olsem: “Spirit blong Lod [Jehovah] hemi stap wetem mi, bikos hemi siusim mi finis fo talemaot gudnius long olketa pua pipol. Hemi sendem mi fo finisim sore wea hemi save stap insaet long haat blong pipol. Hemi sendem mi fo talemaot long olketa hu i stap long prisin an olketa hu i waka olsem slev, dat bae olketa fri nao.” (Aesaea 61:1) Datfala profesi hem for hu?

8. Hu nao fulfillim datfala profesi blo Isaiah abaotem wei for kamap free?

⁸ Datfala important profesi abaotem wei for kamap free hem start for fulfill bihaen Jesus startim ministry blo hem. Taem Jesus go lo sinagog, lo homtaon blo hem lo Nazareth, hem readim toktok blo Isaiah lo olketa Jew wea hipap lo there. Jesus sei hem nao bae fulfillim disfala toktok: “Jehovah givim mi spirit bilong hem bikos hem chusim mi for talemaot gud nius long pipol wea poor. Hem sendem mi for talem olketa slave bae olketa kamap free and for talem pipol wea blind bae olketa lukluk moa. Hem sendem mi for mekem pipol wea olketa narawan spoelem olketa for kamap free. Hem sendem mi tu for talem olketa abaotem taem wea olketa savve kasem blessing bilong Jehovah moa.” (Luke 4:16-19) Hao nao Jesus fulfillim datfala profesi?

9. Staka lo taem blo Jesus tingse wanem kaen wei for free nao bae kamap?

⁹ Datfala freedom wea Isaiah profesi abaotem and wea Jesus readim, hem start for happen lo taem blo Jesus. Jesus talemaot datwan taem hem sei: “Tuday, disfala scripture wea mi readim long iufala hem kamap tru nao.” (Luke 4:21) Staka wea lisin taem Jesus readim datfala profesi, hope for wanfala change kamap lo gavman, for kamap free from rul blo Rome. Olketa maet ting olsem tufala man wea sei: “Mifala hope bae hem  nao datfala man for sevem Israel.” (Luke 24:13, 21) Bat iumi savve, Jesus no talem olketa wea followim hem for againstim gavman blo Rome wea raf tumas. Bat, hem sei lo olketa, “Givim go bak long King samting wea hem bilong King.” (Matt. 22:21) So hao nao Jesus mekem olketa kamap free lo datfala taem?

10. Jesus helpem pipol kamap free from wanem samting?

¹⁰ Son blo God kam for helpem pipol for kamap free from tufala samting. First, Jesus helpem pipol kamap free from olketa laea teaching blo olketa bigman lo religion. Staka Jew olketa slave lo wei for followim olketa kastom blo pipol lo datfala taem and olketa laea teaching. (Matt. 5:31-37; 15:1-11) Olketa wea sei olketa nao helpem pipol for worshipim God, olketa blind lo spiritual wei. Taem olketa rejectim Messiah and olketa truth wea hem teachim, hem olsem olketa gohed for blind and God no forgivim sin blo olketa. (John 9:1, 14-16, 35-41) Bikos Jesus teachim truth and showimaot gudfala example, hem teachim olketa wea hambol for savve hao for kamap free from olketa laea teaching.—Mark 1:22; 2:23–3:5.

11. Wanem nao mek-tu wei wea Jesus mekem pipol kamap free?

¹¹ Mek-tu samting, Jesus mekem pipol kamap free from wei for slave lo sin. Bikos lo sakrifaes blo Jesus, God savve forgivim sin blo olketa wea showimaot faith and wea acceptim datfala ransom wea hem provaedem. (Heb. 10:12-18) Jesus sei: “Sapos Son mekem iufala free, bae iufala barava free nao.” (John 8:36) Datfala freedom hem winim freedom wea olketa Israelite kasem lo Jubilee year. Olsem example, wanfala man wea kamap free lo taem blo Jubilee, maet hem kamap slave moa bihaen, and gogo bae hem dae tu.

12. Hu nao olketa first wan wea kasem gud samting from datfala freedom wea Jesus talemaot?

¹² Lo day blo Pentecost 33 C.E., Jehovah anointim olketa aposol and olketa nara faithful man and woman witim holy spirit. Hem adoptim olketa olsem olketa son blo hem mekem lo future bae olketa resurrect lo heven for rul witim Jesus. (Rome 8:2, 15-17) Olketa hia nao first wan for kasem gud samting from datfala freedom wea Jesus talemaot lo sinagog lo Nazareth. Olketa man and woman hia bae no slave moa lo olketa laea teaching and wei blo olketa bigman blo Jew religion wea no followim Bible. And tu, God ting lo olketa olsem olketa free from sin wea lead go lo dae. Datfala Jubilee wea Jesus  talemaot hem start taem Jehovah anointim olketa follower blo Jesus lo 33 C.E and hem bae finis lo end blo Thousand Year Rul blo Jesus. From distaem go kasem datfala taem, olketa wanem gud samting nao bae gohed for happen?

13-14. Hu moa savve kasem datfala freedom wea Jesus storyim?

¹³ Distaem, staka million hambol pipol wea kam from evri kantri, olketa blo “nara sheepsheep.” (John 10:16) God no chusim olketa for rul witim Jesus lo heven. Nomata olsem, olketa garem hope wea Bible storyim, wea hem nao for stap olowe lo disfala earth. Waswe, hem nao hope blo iu?

¹⁴ Distaem iu savve kasem samfala gud samting wea olketa anointed tu kasem. From iu garem faith lo sakrifaes blo Jesus, iu savve askem forgiveness for olketa sin blo iu. Datwan bae mekem God appruvim iu and iu bae garem gudfala konsens. (Eph. 1:7; Rev. 7:14, 15) Tingim tu olketa blessing wea iu kasem bikos iu free from olketa laea teaching. Jesus sei: “Iufala bae savve long samting wea tru, and datwan bae mekem iufala free.” (John 8:32) Iumi barava hapi for garem disfala freedom!

15. Olketa wanem blessing and freedom nao iumi expectim lo future?

¹⁵ Iu savve expectim hao lo future bae iu barava free go moa. Klosap nao Jesus bae duim  samting for finisim olketa false religion and olketa gavman blo man wea corrupt. God bae protectim “wanfala big crowd” wea servem hem, and then hem bae letem olketa for enjoyim olketa blessing lo paradaes earth. (Rev. 7:9, 14) Staka pipol bae resurrect and bae garem chance for kamap free from olketa nogud samting wea kamaot from sin.—Acts 24:15.

16. Wanem nambawan freedom nao iumi bae kasem lo future?

¹⁶ Lo Thousand Year Rul blo Jesus, hem and olketa wea rul witim hem bae helpem iumi olketa man for garem perfect health and bae iumi fren gud witim God lo perfect wei. Lo datfala taem, evriting bae kamap gud moa and evriwan bae kamap free, diswan hem olsem datfala Jubilee lo Israel. Datwan minim evriwan lo full earth wea faithful for servem Jehovah bae perfect and free from sin.

17. Wanem nao Aesaea 65:21-23 storyim abaotem pipol blo God? (Lukim piksa lo kava.)

¹⁷ Wanfala profesi abaotem laef lo earth lo future hem stap lo Aesaea 65:21-23. (Readim.) Lo datfala taem bae iumi no stap nating nomoa. Bat, Bible sei pipol blo God bae garem staka waka for duim and olketa bae barava satisfae lo wanem olketa duim. Bihaen Thousand Year Rul hem end, iumi barava sure olketa samting wea God wakem bae “no slave moa long sin and dae . . . olketa bae free olsem olketa pikinini bilong God, wea datwan hem nambawan samting.”—Rome 8:21.

18. Why nao iumi fit for trustim hao iumi bae garem wanfala nambawan future?

¹⁸ Olsem wei wea Jehovah arrange for olketa Israelite garem taem for waka and rest, hem bae duim sem samting for pipol blo hem lo Thousand Year Rul blo Christ. Olketa bae garem taem for duim olketa spiritual samting. Wei for worshipim God nao main samting wea mekem iumi hapi distaem, and lo niu world bae hem olsem tu. Yes, iumi garem gud reason for hapi lo olketa gudfala waka and spiritual samting wea iumi bae duim anda lo Thousand Year Rul blo Christ.