1. Wanem nao Jehovah givim lo olketa parents?

JEHOVAH creatim first couple witim feeling for laek garem pikinini. Bible talem tru samting taem hem sei olketa pikinini hem present from God. (Sams 127:3.) Wanem nao datwan minim? Tingim sapos wanfala klos fren blo iu askem iu for keepim wanfala big amount lo selen blo hem. Hao nao bae iu feel? Luk olsem, iu bae tinghae lo wei wea hem trustim iu. Bat maet iu wari abaotem hao nao iu bae keepim gud datfala big selen. Jehovah, wea hem klos fren blo iumi, givim olketa parents wanfala samting for lukaftarem wea garem hae price winim selen. Hem givim olketa datfala responsibility for lukaftarem gud olketa pikinini and mek sure olketa hapi.

2. Wanem kwestin nao iumi bae storyim?

² Hu nao shud mekem disison for wanfala couple garem pikinini and wanem taem tufala shud garem? And wat nao parents savve duim for helpem pikinini blo olketa for hapi? Tingim samfala lo olketa principle hia wea stap insaed Bible wea savve helpem olketa Christian couple for mekem wise disison.

3. (a) Hu nao bae disaed sapos wanfala couple shud garem pikinini? (b) Wanem Bible principle nao olketa fren and famili blo wanfala couple mas tingim?

³ Lo samfala culture, olketa expectim olketa couple wea just marit for mas garem pikinini kwiktaem. Maet olketa kasem pressure from famili and olketa narawan for mas followim datfala culture. Jethro, wanfala brata lo Asia, hem sei: “Lo kongregeson,  samfala wea garem pikinini savve putim pressure lo olketa nara couple for olketa mas garem pikinini.” Nara brata lo Asia wea nem blo hem Jeffrey, hem sei: “Samfala sei lo olketa couple wea no garem pikinini, sapos olketa olo bae olketa no garem eniwan for lukaftarem olketa.” Bat each couple seleva nao shud disaed sapos olketa bae garem pikinini. Datwan hem disison blo tufala seleva, hem responsibility blo tufala. (Gal. 6:5) Olketa famili and frens blo wanfala couple wea just marit laekem tufala for hapi. Bat evriwan need for tingim, disison for garem pikinini or nomoa, hem disison blo datfala couple.—1 Thess. 4:11.

4-5. Wanem nao tufala samting wea wanfala couple need for storyim, and wanem nao best taem for storyim datwan? Explainim kam.

⁴ Wanfala couple wea disaed for garem pikinini shud story raonem tufala important samting hia: First, wanem taem nao tufala laek for garem pikinini? Mek-tu, haomas pikinini nao tufala bae garem? Wanem nao best taem for tufala storyim diswan? And why nao tufala samting hia hem barava important?

⁵ Staka taem, disfala subject abaotem wei for garem pikinini hem samting wea wanfala couple shud story raonem firstaem bifor tufala marit. Why nao olsem? Wanfala reason hem bikos hem important for tufala garem sem tingting abaotem datwan. And tu, tufala mas ting raonem sapos tufala redi for datfala responsibility. Samfala couple disaed for weit firstaem for wan or tufala year bihaen tufala marit then tufala just garem pikinini, bikos taem tufala garem pikinini datwan bae tekem staka taem and strong blo tufala. Why tufala laek for weit lelebet hem bikos tufala laek for garem taem for adjust fitim marit laef and for tufala kamap moa klos lo each other.—Eph. 5:33.

6. Hao nao taem wea iumi stap lo hem distaem hem affectim disison blo samfala couple?

⁶ Samfala Christian chus for followim example blo thrifala son blo Noah and waef blo olketa. Thrifala couple hia no garem pikinini stretawe. (Jenesis 6:18; 9:18, 19; 10:1; 2 Pet. 2:5) Jesus sei taem blo iumi hem olsem “taem bilong Noah,” and iumi lukim klia dat iumi stap lo taem wea “evri samting hem hard tumas.” (Matt. 24:37; 2 Tim. 3:1) From datwan, samfala couple disaed for weit firstaem mekem olketa savve garem moa taem for duim waka blo Jehovah.

7. Hao nao olketa principle lo Luke 14:28, 29 and Provebs 15:22 savve helpem wanfala couple?

 ⁷ Taem wanfala couple ting raonem sapos tufala bae garem pikinini and haomas pikinini for garem, hem wise for tufala ting raonem firstaem expense blo datwan. (Readim Luke 14:28, 29.) Olketa wea garem pikinini finis savve hao wei for lukaftarem pikinini hem no kostim selen nomoa bat hem tekem taem and strong blo olketa tu. So hem important for wanfala couple for ting raonem olketa kwestin olsem: ‘Waswe, bae iumi tufala evriwan mas waka for provaedem need blo famili? Waswe, iumi tufala agree lo wanem nao need blo famili? Sapos iumi tufala evriwan bae waka, hu nao bae lukaftarem olketa pikinini? Teaching blo hu nao bae affectim datfala pikinini?’ Taem wanfala couple story gud abaotem olketa kwestin hia, olketa followim toktok wea stap lo Provebs 15:22.—Readim.

8. Wanem challenge nao olketa couple bae expectim, and wanem nao wanfala hasband savve duim?

⁸ Pikinini needim taem and strong blo each parents and hem shud kasem datwan. So sapos wanfala couple garem tu-thri pikinini wea age blo olketa klos tumas, tufala maet faendem hem hard for givim help wea each pikinini needim. Samfala couple wea garem staka smol pikinini semtaem sei hem big waka tumas for lukaftarem olketa. Wanfala mami maet barava feel taed tumas evritaem. Datwan savve affectim wei wea hem study, prea, and go lo ministry evritaem. Nara challenge for mami tu hem wei for lisin gud and kasem gud samting from olketa meeting. So wanfala hasband wea showimaot love savve duim best blo hem for sapotim waef taem hem helpem hem for lukaftarem pikinini lo meeting and lo haos tu. Olsem example, hem savve helpem waef for duim olketa waka lo haos. Hem bae waka hard for mek sure evriwan kasem gud samting from Famili Worship evri week. And olketa Christian dadi bae evritaem waka tugeta witim famili lo ministry.

9-10. Wanem important samting nao olketa parents wea laek for helpem pikinini blo olketa bae duim?

⁹ Wanem nao samfala samting wea parents savve duim for helpem pikinini for lane for lovem Jehovah? Hao nao olketa savve protectim pikinini from olketa danger lo disfala nogud world? Tingim samfala samting wea parents savve duim.

¹⁰ Prea lo Jehovah for help. Tingim example blo Manoah and waef blo hem, parents blo Samson. Taem Manoah faendaot dat tufala bae garem wanfala son, hem barava askem  Jehovah for helpem hem lo hao for teachim datfala pikinini.

11. Hao nao parents savve followim example blo Manoah, wea stap lo Jajis 13:8?

¹¹ Nihad and Alma, from Bosnia and Herzegovina, lane from example blo Manoah. Tufala sei: “Olsem Manoah, mitufala barava askem Jehovah for teachim mitufala hao for kamap gudfala parents. And Jehovah ansarem prea blo mitufala lo staka difren wei. Hem duim diswan thru lo olketa Scripture, Bible pablikeson, kongregeson meeting, and convention.”—Readim Jajis 13:8.

12. Wanem example nao Joseph and Mary showimaot for olketa pikinini blo tufala?

¹² Teach thru lo example blo iu. Wanem iu talem hem important, bat wanem iu duim nao bae barava affectim wanem pikinini blo iu hem duim. Iumi sure Joseph and Mary showimaot gud example for Jesus and olketa nara pikinini blo tufala. Joseph waka hard for lukaftarem famili blo hem. And tu, Joseph encouragem famili blo hem for tinghae lo olketa spiritual samting. (Diutronomi 4:9, 10) Nomata Law no talem for tekem full famili go lo Jerusalem “evri year” for celebratem pasova, Joseph duim datwan. (Luke 2:41, 42) Samfala dadi lo datfala taem, maet ting kaen gogo olsem hem hard waka tumas, tekem staka taem, and hem expensive. Bat Joseph tinghae lo olketa spiritual samting and hem teachim olketa pikinini blo hem for duim sem samting. And tu, Mary hem savve gud lo olketa Scripture. So thru lo toktok blo hem and wanem hem duim, hem teachim olketa pikinini blo hem for lovem Toktok blo God.

13. Hao nao wanfala couple followim example blo Joseph and Mary?

¹³ Nihad and Alma, wea iumi storyim finis laek for followim example blo Joseph and Mary. Hao nao datwan helpem tufala for teachim son blo tufala for lovem and servem God? Tufala sei, “Lo evri samting wea mifala duim, mifala trae for showim lo son blo mitufala hao hem gud tumas for followim olketa principle blo Jehovah.” Nihad sei moa, “Wanem iu laekem pikinini blo iu for duim, iu nao mas duim firstaem.”

14. Why nao olketa parents need for savve lo hu nao pikinini associate witim?

¹⁴ Helpem pikinini blo iu for chusim olketa gud frens. Dadi and mami, iutufala evriwan need for savve hu nao pikinini associate witim and wanem nao olketa duim. Datwan minim olketa parents need for savve hu nao pikinini story witim thru lo social media and lo mobile phone. Olketa wea pikinini associate witim savve barava affectim tingting blo hem and samting wea hem duim.—1 Cor. 15:33.

15. Wanem nao olketa parents savve lanem from example blo Jessie?

¹⁵ Wanem nao parents savve duim sapos olketa no savve hao for iusim computer or olketa mobile device? Jessie, wanfala dadi lo Philippines, hem sei: “Mi no savve gud lo technology, bat mi no letem datwan stopem mi for helpem olketa pikinini blo mi for luksavve lo danger wea savve kamap from wei for iusim olketa electronic device.” Nomata Jessie no savve gud for iusim olketa device olsem, hem no stopem olketa pikinini for iusim. Hem sei: “Mi encouragem pikinini blo mi for iusim olketa device blo olketa for lanem wanfala niu languis, for prepare for olketa meeting, and for readim Bible evriday.” Sapos iu wanfala dadi and mami, waswe, iu readim and storyim olketa naes advaes wea stap lo datfala sekson “Olketa Teenager” lo jw.org^® abaotem wei for text and postim olketa photo lo Internet? Waswe, iufala watchim and storyim tugeta olketa video olsem, videos Waswe, Iu Nao kontrolem Technology, or Hem Kontrolem Iu? and  Mas Wise Taem Iu Iusim Social Network? * Olketa information hia barava naes for teachim olketa pikinini hao for iusim olketa electronic device.—Provebs 13:20.

16. Wanem nao staka parents duim, and wanem nao kamaot from datwan?

¹⁶ Staka parents traem best for arrangem taem for olketa pikinini blo olketa for associate witim olketa wea showimaot gudfala example for servem God. Olsem example, N’Déni and Bomine, wanfala couple lo Côte d’Ivoire, savve invaetem circuit overseer for kam stap lo haos blo olketa. N’Déni hem sei: “Diswan barava helpem son blo mifala. Hem start for pioneer and distaem hem serve olsem wanfala substitute circuit overseer.” Waswe, iu savve arrangem sem kaen association olsem for olketa pikinini blo iu?

17-18. Wanem taem nao parents shud start for trainim pikinini?

¹⁷ Start for trainim pikinini taem hem smol yet. Taem parents barava start early for trainim pikinini, hem bae moabeta. (Provebs 22:6) Tingim Timothy, wea gogo witim aposol Paul taem hem young. Eunice, mami blo Timothy, and granmami blo hem Lois, teachim hem taem hem “baby yet.”—2 Tim. 1:5; 3:15.

¹⁸ Nara couple lo Côte d’Ivoire, Jean-Claude and Peace, olketa win for teachim sixfala pikinini evriwan for lovem and servem Jehovah. Wanem nao helpem tufala for win? Tufala followim example blo Eunice and Lois. Datfala couple sei, “Mitufala teachim toktok blo God lo olketa pikinini blo mitufala taem olketa baby yet, mitufala start no longtaem bihaen olketa born.”—Diutronomi 6:6, 7.

19. Wanem nao hem minim for teachim Toktok blo God lo olketa pikinini blo iu?

¹⁹ Wanem nao hem minim for teachim Toktok blo Jehovah lo pikinini blo iu? Lo Diutronomi 6:7 datfala Hebrew toktok for teach, hem minim for “teachim and remindim olketa thru lo wei for repeatim samting evritaem.” For duim datwan, parents need for spendem staka taem witim pikinini. Maet parents savve feel nogud taem olketa repeatim evritaem sem toktok lo pikinini. Nomata olsem, parents savve ting lo diswan olsem wanfala wei  for helpem pikinini minim Toktok blo God and for followim datwan.

20. Explainim hao nao Sams 127:4 hem join witim wei for teachim pikinini.

²⁰ Savve gud lo pikinini blo iu. Sams 127 comparem olketa pikinini witim olketa arrow. (Readim Sams 127:4.) Olsem olketa arrow wea olketa wakem from olketa difren kaen material and garem olketa didifren size, evri pikinini no semsem. So parents need for luksavve hao nao for trainim each pikinini. Wanfala couple lo Israel distaem, wea teachim gud tufala pikinini blo tufala for servem Jehovah, storyim samting wea helpem tufala, “Mitufala conductim Bible study witim each pikinini.” Each hed lo famili nao bae disaed sapos diskaen wei for study hem fitim situation blo olketa or nomoa.

21. Wanem help nao parents savve kasem from Jehovah?

²¹ Samfala taem olketa challenge wea parents feisim hem mekem olketa feel olsem laef hem hard tumas, nomata olsem olketa pikinini hem present from Jehovah. Hem evritaem redi for helpem olketa parents. Hem willing for lisin lo prea blo olketa. And hem ansarem olketa prea hia thru lo Bible, olketa pablikeson, and example and advaes blo olketa nara mature parents lo kongregeson.

22. Wanem nao wanfala lo olketa best samting wea parents savve givim lo pikinini?

²² Samfala sei wei for teachim pikinini hem wanfala 20-year project, bat for kamap dadi and mami hem for olowe nao. Wanfala lo olketa best samting wea olketa savve givim lo pikinini hem love, taem, and training wea kam from Bible. Hao each pikinini followim training wea hem kasem hem no semsem. Nomata olsem, staka pikinini wea parents blo olketa lovem Jehovah, olketa feel olsem Joanna Mae, wanfala sista lo Asia wea sei: “Taem mi ting go bak lo training wea mi kasem from parents blo mi, mi barava thankiu lo wei wea olketa disciplinem mi and teachim mi for lovem Jehovah. Olketa no just givim mi laef nomoa, bat olketa givim mi laef wea garem mining.” (Provebs 23:24, 25) Staka million brata and sista feel olsem tu.