1-2. Olsem iumi lanem from experience blo Angelito, wanem nao each wan lo iumi mas duim?

WASWE, iu growap lo famili wea parents blo iu Jehovah’s Witness? Sapos olsem, remember wei wea iu fren witim Jehovah hem no depend lo wei wea parents blo iu fren witim hem. Nomata sapos parents blo iumi servem God or nomoa, each wan lo iumi mas strongim wei wea iumi fren witim Jehovah.

² Tingim experience blo wanfala brata wea nem blo hem Angelito. Full famili blo hem Jehovah’s Witness. Bat taem hem young, hem no barava feel klos lo God. Hem sei: “Mi servem Jehovah bikos mi laek for duim nomoa wanem famili blo mi duim.” Bat, Angelito disaed for markem taem for readim Bible and ting raonem, and hem start for prea lo Jehovah evritaem. Wanem nao kamaot from datwan? Angelito sei: “Mi luksavve dat only wei for mi klos lo Dadi blo mi Jehovah, hem nao for miseleva mas savve gud lo hem.” Experience blo Angelito mekem iumi tingim samfala important kwestin olsem: Hao nao wei for savve lo Jehovah hem no semsem witim wei for savve gud lo hem? Wanem nao iumi savve duim for savve gud lo Jehovah?

3. Hao nao wei for savve lo Jehovah hem difren from wei for savve gud lo hem?

³ For savve lo Jehovah, hem minim for savve lo nem blo God or for savve abaotem samfala samting wea God talem or duim. Bat, for savve gud lo Jehovah hem winim moa datwan. Iumi need for spendem taem for lane abaotem Jehovah and olketa nambawan wei blo hem. Datwan nomoa bae helpem  iumi start for minim wanem nao muvim Hem for talem or duim samting. Taem olsem, bae iumi luksavve sapos Jehovah hapi lo wanem iumi tingim, olketa disison blo iumi, and wanem iumi duim. Taem iumi luksavve wanem Jehovah laekem iumi for duim, iumi need for followim wanem iumi lanem.

4. Hao nao wei for ting raonem olketa example lo Bible savve helpem iumi?

⁴ Samfala pipol maet tok spoelem iumi bikos iumi laek for servem Jehovah, and olketa maet againstim iumi taem iumi start for associate witim pipol blo hem. Nomata olsem, sapos iumi trustim Jehovah, hem bae no lusim iumi. Datkaen wei for trust hem mekem iumi garem strong faondeson for fren witim Jehovah for full laef blo iumi. Waswe, iumi fit for savve gud lo Jehovah olsem? Yes, iumi savve duim! Example blo olketa man wea no perfect, olsem Moses and King David, pruvim datwan. Taem iumi storyim samting wea tufala hia duim, iumi bae ansarem tufala kwestin hia: Hao nao gogo tufala savve gud lo Jehovah? And olketa wanem leson nao iumi savve lanem from example blo tufala?

5. Wanem nao Moses chus for duim?

⁵ Moses duim samting followim wanem hem lanem. Taem hem samting olsem 40 year, Moses chus for associate witim olketa Israelite wea olketa nao pipol blo God, winim wei for olketa kolem hem “son bilong dota bilong Pharaoh.” (Heb. 11:24) Moses willing for lusim hae position blo hem. Taem Moses saed witim olketa Israelite wea slave lo Egypt, hem savve Pharaoh wea garem bigfala paoa and pipol ting lo hem olsem wanfala god bae barava kros lo hem. Moses garem strongfala faith! Moses trustim Jehovah. Kaen wei for trust olsem, hem faondeson blo wei wea hem fren witim Jehovah for full laef blo hem.—Provebs 3:5.

6. Wanem nao iumi savve lanem from example blo Moses?

⁶ Wanem nao leson for iumi? Olsem Moses, iumi evriwan mas mekem wanfala disison: Waswe, bae iumi chus for servem Jehovah and associate witim pipol blo hem? Iumi maet need for sakrifaesim samfala samting for servem God, and maet olketa narawan wea no savve lo Jehovah bae againstim iumi. Bat sapos iumi trustim Dadi blo iumi lo heven, iumi sure hem bae sapotim iumi!

7-8. Wanem nao Moses gohed for lanem?

⁷ Moses gohed for lane abaotem olketa wei blo Jehovah and hem duim wanem Jehovah laekem. Olsem example, taem Jehovah askem Moses for leadim nation blo Israel for go aot from Egypt, hem hol bak and gohed talem Jehovah dat hem no fit for duim datwan. God showimaot hem barava tingim Moses, and hem duim samting for helpem hem. (Eksodas 4:10-16) From datwan, Moses fit for talemaot datfala strong judgment message lo Pharaoh. Then Moses lukim hao Jehovah iusim bigfala paoa blo hem for sevem olketa Israelite bat finisim Pharaoh and evri army blo hem lo Red Sea.—Eksodas 14:26-31; Sams 136:15.

⁸ Bihaen Moses leadim olketa Israelite from Egypt, olketa Israelite gohed for komplen. Nomata olsem, Moses lukim hao Jehovah barava patient taem hem deal witim pipol blo hem wea Hem mekem olketa kamap free from wei for slave lo Egypt. (Sams 78:40-43) Moses lukim tu hao Jehovah barava hambol taem hem changem tingting blo Hem bihaen Moses askem Hem for duim datwan.—Eksodas 32:9-14.

9. Olsem Hebrew 11:27 storyim, hao klos nao wei wea Moses fren witim Jehovah?

 ⁹ Bihaen olketa kamap free from Egypt, wei wea Moses fren witim Jehovah hem barava klos, hem olsem hem lukim Dadi blo hem lo heven. (Readim Hebrew 11:27.) For showimaot klos wei wea tufala fren, Bible sei: “[Jehovah] hemi gohed fo tok wetem Mosis olsem wea wanfala man hemi save tok nomoa wetem fren blong hem.”—Eksodas 33:11.

10. For savve gud lo Jehovah, wanem nao iumi mas duim?

¹⁰ Wanem nao leson for iumi? For savve gud lo Jehovah, hem no minim for just lane abaotem olketa wei blo hem nomoa bat hem minim for duim wanem hem laekem. Samting wea Jehovah laekem distaem hem for “evri difren kaen man mas sev and for garem stretfala savve abaotem olketa tru teaching.” (1 Tim. 2:3, 4) Wanfala wei for duim wanem Jehovah laekem hem for teachim olketa narawan abaotem Jehovah.

11. Taem iumi teachim olketa narawan abaotem Jehovah, hao nao datwan mekem iumi savve gud lo Jehovah?

¹¹ Staka taem, taem iumi teachim olketa narawan abaotem Jehovah, datwan mekem iumiseleva tu savve gud lo hem. Olsem example, iumi lukim klia wei wea Jehovah tingim pipol taem hem leadim iumi go lo olketa wea laek for savve abaotem hem. (John 6:44; Acts 13:48) Iumi lukim hao Word blo God garem paoa taem olketa wea iumi study witim lusim olketa nogud wei and garem gudfala wei. (Col. 3:9, 10) And iumi lukim pruv wea showimaot Jehovah hem patient taem hem givim chance lo staka pipol for lane abaotem hem and for olketa sev.—Rome 10:13-15.

12. Olsem Eksodas 33:13 storyim, wat nao Moses askem, and why nao olsem?

¹² Moses no ting nating lo wei wea hem fren witim Jehovah. Nomata bihaen Jehovah givim hem paoa for duim olketa mirakol, Moses still gohed ask for savve gud lo Jehovah. (Readim Eksodas 33:13.) Moses winim 80 year taem hem askem datwan, hem savve hem still garem staka samting for lanem abaotem Dadi blo hem lo heven wea lovem hem.

13. Hao nao iumi savve showimaot iumi tinghae lo wei wea iumi fren witim God?

¹³ Wanem nao leson for iumi? Nomata hao long nao iumi bin servem Jehovah, iumi shud no ting nating lo wei wea iumi fren witim hem. Wanfala wei wea iumi savve showimaot iumi tinghae lo wei wea iumi fren witim God, hem nao taem iumi story witim hem thru lo prea.

14. Why nao prea hem main samting wea helpem iumi for savve gud lo Jehovah?

¹⁴ Wei for story gud tugeta hem main samting wea strongim wei for fren. So fren gud witim God lo wei for prea evritaem, no fraet for talem hem evri tingting and feeling blo iu. (Eph. 6:18) Krista, wea stap lo Turkey, hem sei: “Love blo mi for Jehovah and wei wea mi trustim hem gohed for grow each taem wea mi talem tingting blo mi lo hem thru lo prea and mi lukim dat hem helpem mi. Taem mi luksavve Jehovah ansarem olketa prea blo mi, datwan helpem mi for ting lo Jehovah olsem Dadi and Fren blo mi.”

15. Wanem nao Jehovah talem abaotem King David?

¹⁵ King David born insaed nation wea worshipim Jehovah God. Bat David no worshipim Jehovah bikos hem religion blo famili blo hem. Hemseleva nao strongim wei wea hem fren witim God, and Jehovah barava lovem hem. Jehovah seleva storyim David olsem man wea mekem heart blo hem hapi. (Acts 13:22) Wanem nao mekem David for barava klos lo Jehovah?

16. Wanem nao David lanem abaotem Jehovah taem hem lukluk lo creation?

 ¹⁶ David lane abaotem Jehovah from creation. Taem David young, hem spendem staka taem aotsaed bikos hem lukaftarem sheepsheep blo dadi blo hem. Maet lo datfala taem nao hem start for ting raonem olketa samting wea Jehovah wakem. Olsem example, taem David luk ap lo skae lo naet hem no just lukim staka thousand star nomoa, bat hem luksavve tu lo olketa wei blo Man wea Creatim evri samting hia. Diswan muvim David for raet olsem: “Skae hemi gohed fo somaot olowe bikfala paoa blong God, an evrisamting wea i stap long skae ya hemi gohed fo som yumi olketa gudfala waka wea God hemi duim.” (Sams 19:1, 2) Taem David ting raonem hao Jehovah wakem olketa man, hem luksavve lo nambawan wisdom blo Jehovah. (Sams 139:14) Taem David trae for minim gud olketa creation blo Jehovah, datwan mekem hem for barava hambol.—Sams 139:6.

17. Wanem nao iumi savve lanem sapos iumi ting raonem creation?

¹⁷ Wanem nao leson for iumi? Iumi mas interest lo creation. Iumi no just stap nomoa lo disfala naes ples wea Jehovah wakem, bat iumi laek for barava enjoyim! Evriday, hem gud for ting raonem olketa creation wea stap raonem iu, olsem olketa plant, animal, and pipol, and hao datwan teachim iu abaotem Jehovah. Then evriday bae iu lanem moa samting abaotem Dadi wea lovem iu. (Rome 1:20) And each day bae iu luksavve love blo iu for hem bae kamap moa strong.

18. Olsem Sams 18 storyim, wanem nao David luksavve lo hem?

¹⁸ David luksavve Jehovah nao helpem hem. Olsem example, taem David protectim olketa sheepsheep blo dadi blo hem from wanfala lion and wanfala bear, hem luksavve Jehovah nao helpem hem for killim dae olketa wild animal hia. Taem David killim dae Goliath, hem lukim klia dat Jehovah nao helpem hem. (Fas Samuel 17:37) And taem hem ranawe from King Saul, wea jealous lo hem, David savve Jehovah nao servem hem. (Smol toktok wea stap antap lo Sams 18) Sapos David hem praod maet hem tingse hemseleva nao duim olketa samting hia. Bat David hem hambol, dastawe hem luksavve Jehovah nao helpem hem lo laef blo hem.—Sams 138:6.

19. Wanem nao iumi savve lanem from example blo David?

¹⁹ Wanem nao leson for iumi? Iumi no ask for help blo Jehovah nomoa. Iumi mas trae for luksavve wanem taem and hao hem givim help. Sapos iumi hambol and luksavve iumi no fit for duim samfala samting, iumi bae lukim hao Jehovah savve helpem iumi for duim wanem iumi no fit for duim. And each taem wea iumi lukim Jehovah helpem iumi datwan mekem wei wea iumi fren witim hem for kamap moa strong. Isaac, wanfala brata lo Fiji wea servem Jehovah for staka year finis, hem luksavve lo diswan. Hem sei: “Taem mi ting go bak lo laef blo mi, mi lukim hao Jehovah helpem mi from taem mi start studyim Bible kam kasem distaem. From datwan, Jehovah hem kamap real lo mi.”

20. Wanem nao iumi savve lanem from wei wea David fren witim God?

²⁰ David followim olketa wei blo Jehovah. Jehovah wakem iumi for followim olketa wei blo hem. (Jenesis 1:26) Taem iumi gohed for lane abaotem olketa wei blo Jehovah, datwan bae helpem iumi for garem olketa sem kaen wei tu. David savve gud lo Dadi blo hem lo heven, dastawe taem hem deal witim  olketa narawan hem followim olketa wei blo Jehovah. Tingim wanfala example. David sin againstim Jehovah taem hem duim adultery witim Bath-sheba and then hem killim dae hasband blo hem. (Mektu Samuel 11:1-4, 15) Bat Jehovah showimaot mercy lo David, bikos David hem man for showimaot mercy lo olketa narawan. From David fren gud witim Jehovah, olketa Israelite lovem hem tumas and Jehovah iusim hem olsem example for olketa nara king blo Israel.—Fas Kings 15:11; Mektu Kings 14:1-3.

21. Olsem Ephesus 4:24 and 5:1 storyim, wanem nao bae iumi kasem from iumi ‘followim wei blo God’?

²¹ Wanem nao leson for iumi? Iumi mas ‘followim wei blo God.’ Taem iumi duim datwan, bae iumi no kasem gud samting nomoa, bat hem helpem iumi for savve gud lo Jehovah. Taem iumi followim olketa wei blo Jehovah, datwan showimaot iumi olketa pikinini blo hem.—Readim Ephesus 4:24; 5:1.

22-23. Sapos iumi followim wanem iumi lanem abaotem Jehovah, wanem nao bae happen?

²² Olsem iumi bin storyim, Jehovah helpem iumi for savve gud lo hem thru lo creation and Bible. Datfala spesol buk garem staka example blo olketa faithful servant blo God, olsem Moses and David. Jehovah duim samting finis for mekem iumi savve lo hem. So iumi nao mas duim samting for lane abaotem hem mekem iumi savve gud lo hem.

²³ No enitaem bae iumi stop for lane abaotem Jehovah. (Eklesiastes 3:11) Important samting nao, hem no haomas savve iumi garem, bat hem for followim wanem iumi lanem. Taem iumi followim wanem iumi lanem and traem best for followim example blo Dadi blo iumi, hem bae gohed for fren gud witim iumi. (Jas. 4:8) Lo Bible, Jehovah talem hao hem bae no lusim olketa wea barava laek for savve gud lo hem.