Waswe, Iu Tingim Yet?
Waswe, iu savve ansarem olketa kwestin hia followim olketa information wea stap lo olketa Wastaoa blo 2019?
Wanem nao mining blo disfala promis blo God wea sei: ‘No eni weapon wea pipol iusim for againstim iumi bae win’? (Aesaea 54:17)
Iumi trustim dat God bae protectim iumi from olketa enemy wea againstim iumi. (Aesaea 25:4, 5) Samting olketa enemy blo iumi duim bae no savve spoelem iumi for olowe.—w19.01, page 6-7.
Taem God deal witim olketa Canaanite and olketa Israelite wea no obey, hao nao datwan showimaot justice blo hem?
God judgem olketa wea duim barava nogud samting saed lo sex or wea spoelem olketa woman and pikinini. Hem blessim olketa pipol wea obeyim hem and wea showimaot justice lo narawan.—w19.02, page 22-23.
Wanem nao iumi shud duim sapos iumi stap taem samwan wea no Witness prea?
Iumi stap kwaet nomoa and showimaot respect. Iumi no joinim olketa for sei “amen” or hol hand witim olketa insaed prea. Iumi maet disaed for prea seleva lo heart.—w19.03, page 31.
Hao serious nao child abuse?
Child abuse hem wanfala sin againstim victim, kongregeson, law blo gavman, and againstim God. Taem gavman garem olketa law for reportim samwan wea olketa accusim lo child sexual abuse, olketa elder bae obeyim datfala law blo kantri.—w19.05, page 9-10.
Hao nao iu savve changem datfala strong tingting wea kontrolem wei blo iu?
Important samting for duim nao: Prea lo Jehovah. Ting raonem samting witim goal for lukluk lo wanem iuseleva need for changem. Chusim gud hu nao iu associate witim.—w19.06, page 11.
Wanem nao iumi savve duim distaem for redi for persecution?
Iumi need for strongim hao iumi fren witim Jehovah. Trustim dat Jehovah lovem iumi and bae hem no savve lusim iumi. Readim Bible evriday, and prea evritaem. Barava bilivim hao olketa blessing anda lo Kingdom bae kamap tru. Memorizim olketa fevaret scripture and olketa song for praisem Jehovah.—w19.07, page 2-4.
Wanem nao iumi savve duim for helpem olketa relative blo iumi for sev?
Hem important for showimaot iumi minim feeling blo olketa, showimaot gudfala wei mekem iumi fit for givim witness, mas patient and kaen.—w19.08, page 15-17.
Olsem Jesus promisim lo Matthew 11:28, wanem nao savve strongim iumi?
Iumi garem olketa Christian overseer wea lovem iumi, olketa best fren, and iumi duim best waka.—w19.09, page 23.
Hao nao God savve givim iumi feeling for laek duim samting and strong for duim datwan? (Phil. 2:13)
Taem iumi readim Bible and ting raonem datwan, God savve strongim iumi, taem hem givim iumi feeling for laek duim samting and strong for duim datwan. Spirit blo hem bae helpem iumi for duim samting.—w19.10, page 21.
Wanem nao iumi shud duim bifor iumi mekem wanfala disison?
Faevfala samting: Research gud. Prea for wisdom. Ting raonem why iu disaedem samting. Markem wanem for duim. Garem wei for luksavve.—w19.11, page 27-29.
Waswe, datfala teaching abaotem soul wea no savve dae hem kamap taem Satan story lo Eve?
Luk olsem nomoa. Satan talem Eve dat hem bae no dae, hem no sei hem bae gohed laef samwea bihaen hem dae. No eni idea blo false religion stap bihaen lo Flood. Disfala teaching abaotem soul wea no savve dae masbi hem kamap bifor God mekem pipol wea wakem taoa lo Babel for go lo olketa didifren ples lo earth.—w19.12, page 15.