Nomoa, no eni samting lo history or lo Bible hem showimaot olketa Christian baptaes for pipol wea dae finis.

Hao samfala Bible transleitim disfala verse hem mekem pipol for tingse lo taem blo Paul pipol savve baptaes for olketa wea dae finis. Olsem example, datfala New International Version Bible hem sei: “Sapos no eni resurrection hem happen, wat nao olketa wea baptaes for olketa wea dae finis bae duim?”

Bat, tingim wanem tufala savveman talem. Dr. Gregory Lockwood hem storyim hao datfala idea “for baptaes for olketa wea dae finis” hem “kaen wei for baptaes wea luk olsem hem no bin happen insaed lo history or lo Bible.” And tu, Professor Gordon Fee raet olsem: “No eni samting saed lo history or insaed lo Bible hem showim kaen wei for baptaes olsem. No enitaem datwan hem kamap insaed lo Niu Testament and no eni pruv hem showimaot hao datwan hem happen lo taem blo olketa Christian bifor, or lo eni church wea kamap no longtaem bihaen olketa aposol olketa dae.”

Bible hem sei dat olketa follower blo Jesus mas ‘teachim pipol lo evri kantri for kamap disaepol, baptaesim olketa and teachim olketa for followim evri samting wea hem laekem.’ (Matt. 28:19, 20) Bifor samwan hem baptaes and kamap wanfala disaepol, hem need for lane abaotem, bilivim, and obeyim Jehovah and Son blo Hem. Samwan wea dae finis and wea insaed lo grev, hem hard for duim olketa samting hia and wanfala Christian wea laef bae hard for duim datwan for hem.—Eklesiastes 9:5, 10; John 4:1; 1 Cor. 1:14-16.

So wanem nao Paul hem minim?

Samfala lo Corinth no bilivim hao man wea dae bae resurrect. (1 Cor. 15:12) Paul showimaot hao datfala idea hem rong. Hem storyim hao evriday hem feisim dae. Hem tru, hem laef yet. Nomata olsem, hem feisim olketa danger bat hem bilivim hao bihaen hem dae, hem bae resurrect and kamap wanfala spirit olsem Jesus.—1 Cor. 15:30-32, 42-44.

Olketa lo Corinth need for luksavve, from olketa anointed Christian, bae olketa feisim olketa hard samting evriday and olketa mas dae bifor olketa savve resurrect. For baptaes lo Christ Jesus hem minim tu for “baptaes lo dae bilong hem.” (Rome 6:3) Datkaen wei for baptaes hem minim bae olketa mas kasem tu olketa sem samting wea Jesus kasem and olketa mas dae and resurrect lo heven.

Winim tufala year bihaen Jesus baptaes lo wata, hem talem tufala lo olketa aposol blo hem: “Iutufala bae baptaes long sem baptaes wea mi bae baptaes long hem.” (Mark 10:38, 39) Lo datfala taem wea Jesus talem datfala toktok, hem no minim wei for baptaes lo wata. Bat hem minim wei wea hem gohed faithful and gogo datwan bae lead go lo dae blo hem. Paul hem sei olketa anointed wan bae ‘safa tugeta mekem olketa savve kasem datfala nambawan reward tugeta.’ (Rome 8:16, 17; 2 Cor. 4:17) So olketa tu mas dae mekem olketa savve resurrect and laef lo heven.

Dastawe iumi transleitim toktok blo Paul olsem: “Sapos olketa wea dae finis bae no laef bak, wanem nao bae happen lo olketa wea baptaes for dae? Why nao olketa gohed for baptaes olsem?”