1-2. Wanem nao iumi storyim lo last article, and wanem nao bae iumi storyim lo disfala article?

LO LAST article, iumi storyim samfala kaonsel from Levitikas chapter 19. Olsem example, lo verse 3 hem storyim hao Jehovah talem olketa Israelite for respectim parents. Iumi savve duim datwan taem iumi helpem parents lo physical or spiritual saed. Verse 3 storyim tu hao olketa Israelite mas keepim Sabbath. Nomata iumi no keepim Sabbath distaem, iumi savve followim datfala principle for spendem taem evriday for duim spiritual samting. Taem iumi duim olketa samting hia, iumi followim toktok lo Levitikas 19:1, 2 and 1 Peter 1:15 wea sei for iumi mas holy.

² Lo disfala article, bae iumi storyim samfala verse moa from Levitikas chapter 19. Bae iumi storyim hao for kaen and tingim olketa wea blind, earpas, or kripol. Bae iumi storyim tu hao for honest taem iumi duim bisnis, and hao for showimaot love lo olketa narawan. Sapos iumi duim olketa samting hia, datwan bae helpem iumi for followim example blo God for holy.

3-4. Olsem Levitikas 19:14 storyim, hao nao olketa Israelite shud treatim olketa wea blind and earpas?

³ Readim Levitikas 19:14. Jehovah laekem pipol blo hem for mas kaen lo olketa wea blind, earpas, or kripol. Olsem example, hem talem olketa Israelite for no talem eni nogud samting lo man wea earpas. Datwan hem barava nogud samting for duim bikos man wea earpas no  savve herem datwan, and no savve talem samting go bak lo samwan wea tok spoelem hem.

⁴ Lo verse 14 tu, God sei olketa Israelite “mas no mekem eni blaen man fo hemi foldaon.” Wanfala buk wea storyim pipol wea blind, earpas, and kripol sei: “Pipol lo Midol East lo datfala taem savve treatim nogud [kaen pipol olsem].” Maet olketa duim samting for mekem man wea blind for foldaon from olketa les lo hem or for laflaf lo hem. Olketa barava spoelem man olsem! Datfala law lo verse 14 helpem pipol blo Jehovah for luksavve olketa shud tingim and kaen lo pipol wea earpas, blind, or kripol.

5. Wanem nao iumi savve duim for kaen lo pipol wea blind, earpas, and kripol?

⁵ Jesus kaen lo pipol wea blind, earpas, and kripol. Tingim message wea hem sendem lo John Baptaesa: “Olketa wea blind savve lukluk nao, olketa wea kripol savve wakabaot, olketa wea garem leprosy olketa gud bak, and olketa wea earpas savve herehere moa. Olketa wea dae finis olketa laef bak.” Bihaen pipol lukim olketa mirakol wea Jesus duim “olketa praisem God.” (Luke 7:20-22; 18:43) Olketa Christian followim example blo Jesus for kaen, tingim, and patient witim pipol olsem. Hem tru, Jehovah no givim iumi paoa for duim olketa mirakol olsem Jesus. Bat iumi garem privilege for storyim gud nius lo pipol wea blind lo physical or spiritual wei. Iumi savve storyim hao lo paradaes evriwan bae perfect and fren gud witim Jehovah. (Luke 4:18) Disfala gud nius hem helpem finis staka lo olketa for worshipim Jehovah.

6. Hao nao Levitikas chapter 19 helpem iumi for minim moa samting abaotem datfala Ten Komandment?

⁶ Samfala verse lo Levitikas chapter 19 explainim moa samting abaotem Ten Komandment wea God givim lo Moses. Olsem example, mek-eit komandment no talem staka samting bat sei nomoa:  “Yufala mas no stil.” (Eksodas 20:15) So samfala maet tingse sapos olketa no tekem eni samting blo narawan, olketa obeyim datfala komand nao. Bat olketa verse blo Levitikas 19 showimaot nara wei for stealim samting tu hem stap.

7. Hao nao man wea salem samting savve steal from narawan?

⁷ Man wea salem olketa samting maet sei hem no enitaem stealim samting from narawan. Bat waswe, hem honest taem hem duim bisnis? Lo Levitikas 19:35, 36 Jehovah sei: “Yufala mas no ravem eniwan taem yu salem enisamting. Yufala mas no skelem o mesarem datfala samting long ravis wei. Taem yufala skelem hevi blong samting, o yufala mesarem haomas lita blong samting, yufala mas duim long wei wea hemi stret fogud.” Samwan wea ravem narawan hem olsem hem steal. Samfala nara verse lo Levitikas 19 storyim klia datwan.

8. Hao nao Levitikas 19:11-13 helpem olketa Jew for followim olketa principle blo mek-eit komandment, and hao nao olketa principle hia savve helpem iumi?

⁸ Readim Levitikas 19:11-13. Firstfala toktok lo verse 11 sei: “Yufala mas no stil.” Verse 13 showimaot man wea no honest lo bisnis hem steal tu. Hem sei: “Yufala mas no ravem o mekful long wantok blong yufala.” Mek-eit komand sei hem rong for steal, bat olketa verse lo Levitikas 19 helpem olketa Jew for tingim olketa principle wea join witim datfala law, for mas honest lo evri samting. Hem gud for tingim sapos iumi followim olketa principle hia. Maet hem gud for tingim tu sapos iumi need for changem eni samting for mekem iumi barava honest lo bisnis or lo hao iumi duim waka.

9. Hao nao law wea stap lo Levitikas 19:13 helpem olketa Israelite?

⁹ Sapos wanfala Christian hem boss lo wanfala bisnis, hem mas tingim nara principle wea join witim honest fasin. Levitikas 19:13 sei: “Yufala mas no kipim pei blong hem go kasem neks de.” Lo Israel bifor, staka pipol waka lo farm and boss savve peim olketa wakaman lo end blo each day. Sapos boss no duim datwan, datfala wakaman bae no garem selen for peim samting wea famili blo hem needim lo datfala day. Jehovah sei: “Yufala mas peim hem long waka blong hem, bikos man ya hemi pua tumas an hemi nidim seleni.”​—Diutronomi 24:14, 15; Matt. 20:8.

10. Wanem nao iumi lanem from principle lo Levitikas 19:13?

¹⁰ Distaem staka wakaman savve kasem pei bihaen tufala week or lo end lo month, and no evriday. Nomata olsem, principle lo Levitikas 19:13 hem fitim distaem tu. Samfala boss no peim selen wea olketa wakaman fit for kasem, bikos maet olketa savve olketa wakaman barava needim datfala waka. So hem olsem olketa boss hia “kipim pei” blo olketa wakaman. Wanfala Christian wea boss bae no laek for duim olsem. Wanem moa iumi savve lanem from Levitikas chapter 19?

11-12. Wanem point nao Jesus mekhae lo hem taem hem quotem Levitikas 19:17, 18?

¹¹ So hao nao God laekem iumi for treatim pipol? Iumi lukim datwan lo Levitikas 19:17, 18. (Readim.) God komandim iumi for ‘lavem olketa narawan olsem yufala lavem yufala seleva.’ Sapos iumi laek for mekem God hapi, iumi mas duim datwan.

 ¹² Tingim hao Jesus mekhae lo datfala komand lo Levitikas 19:18. Wantaem wanfala Pharisee askem Jesus olsem: “Wanem law nao hem important winim olketa nara law?” Jesus sei iumi mas lovem Jehovah lo full heart, lo full soul, and lo full mind blo iumi. Then Jesus quotem Levitikas 19:18 and sei: “Nara law wea barava important nao hem: ‘Iu mas lovem narawan long sem wei wea iu lovem iuseleva.’” (Matt. 22:35-40) Iumi savve showimaot love lo olketa narawan lo staka difren wei, bat bae iumi tingim samting wea Levitikas chapter 19 storyim.

13. Hao nao samting wea Joseph duim helpem iumi for minim gud wanem Levitikas 19:18 storyim?

¹³ Wanfala wei for showimaot love lo narawan hem for followim kaonsel wea stap lo Levitikas 19:18. Hem sei: ‘Yufala mas no gohed fo heitem eniwan o sensimbaek eni ravis wei blong hem.’ Staka lo iumi savve lo samwan wea gohed heitim wanfala lo waka ples, lo skul, or lo famili, maet for staka year! Tingim hao tenfala haf brata blo Joseph heitim hem gogo olketa duim nogud samting lo hem. (Jenesis 37:2-8, 25-28) Bat Joseph no heitim olketa brata blo hem! Nomata taem hem kamap bigman and hem garem chance for changem bak wanem olketa duim lo hem, hem showimaot mercy lo olketa. Hem duim wanem Levitikas 19:18 talem for showimaot love lo olketa.​—Jenesis 50:19-21.

14. Why nao olketa Christian shud followim olketa principle wea stap lo Levitikas 19:18?

¹⁴ Olketa Christian wea laek for mekem God hapi shud followim example blo Joseph for forgivim narawan and no gohed heitim hem. Jesus talem sem samting lo datfala example prea blo hem taem hem sei for forgivim olketa wea sin againstim iumi. (Matt. 6:9, 12) Aposol Paul tu talem olketa Christian for “no changem bak nogud samting wea narawan duim.” (Rome 12:19) Hem sei tu: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem.” (Col. 3:13) Olketa principle blo Jehovah no  savve change, so iumi mas gohed followim olketa principle wea stap lo Levitikas 19:18.

15. Wanem tokpiksa nao helpem iumi for luksavve why hem important for forgivim samwan wea mekem iumi feel nogud?

¹⁵ Tingim disfala tokpiksa. Taem iumi feel nogud lo samwan hem olsem garekil. Samfala garekil hem smol, bat samfala barava big. Olsem example, maet iumi katem finger, bat hem smol kat nomoa. Datwan savve soa tumas, bat bae hem kamap gud bihaen wan or tufala day. Maet gogo iumi forgetim nao datfala kat. Olsem datfala kat, maet samting wea wanfala fren talem or duim mekem iumi feel nogud, bat hem no big samting nomoa and hem isi for forgivim hem. Bat sapos iumi garem bigfala kat lo hand blo iumi, doctor maet need for stitchim and bandagem datfala garekil. Sapos iumi gohed for tasim and skrasem datfala garekil, maet bae hem no heal or bae kamap worse. Olsem tu, maet samwan wea barava feel nogud lo narawan gohed for tingim nogud samting wea man hia talem or duim. Sapos hem gohed heitim datfala man, bae hem spoelem hemseleva nomoa. So hem gud tumas for followim kaonsel wea stap lo Levitikas 19:18!

16. Olsem Levitikas 19:33, 34 storyim, hao nao olketa Israelite shud treatim pipol from difren kantri, and wanem nao iumi savve lanem from datwan?

¹⁶ Taem Jehovah sei for olketa Israelite mas lovem narawan, hem no sei for olketa lovem nomoa olketa nara Israelite. Hem laekem olketa for lovem tu pipol from difren kantri wea stap witim olketa. Iumi savve read abaotem datwan lo Levitikas 19:33, 34. (Readim.) Olketa Israelite mas no treatim pipol from nara kantri olsem difren pipol, bat mas “lavem olketa” hia olsem olketa lovem olketa seleva. Olsem example, Law sei for olketa Israelite shud letem pipol from difren kantri and olketa wea poor for kolektem leftova lo harvest blo olketa. (Levitikas 19:9, 10) Datfala principle hem fitim iumi distaem tu. (Luke 10:30-37) Iumi savve showimaot love lo pipol from difren kantri wea muv kam lo kantri blo iumi. Nomata man, woman, or pikinini, hem barava important for kaen and showim respect lo olketa hia.

17-18. (a) Wanem nao Levitikas 19:1, 2 and 1 Peter 1:15 sei for iumi mas duim? (b) Wanem spesol waka nao aposol Peter encouragem iumi for duim?

¹⁷ Levitikas 19:1, 2 and 1 Peter 1:15 encouragem pipol blo God for holy. Staka nara verse lo Levitikas chapter 19 helpem iumi for luksavve wanem iumi savve duim for Jehovah hapi lo iumi. Olketa verse wea iumi storyim finis helpem iumi for luksavve samfala samting for duim and for no duim wea bae mekem iumi for holy. * Olketa Christian Greek Scripture tu showimaot hao olketa Christian shud duim sem samting distaem. Bat aposol Peter storyim nara samting for iumi mas duim.

¹⁸ Iumi worshipim Jehovah and duim olketa gud samting for olketa narawan, bat Peter encouragem iumi for duim wanfala spesol waka tu. Bifor Peter talem iumi for mas holy lo evri samting, hem sei: “Redyim tingting bilong iufala for bigfala waka.” (1 Pet. 1:13, 15) Wanem nao datfala waka? Peter sei olketa anointed brata blo Christ bae “talemaot long evri ples olketa nambawan wei” blo God. (1 Pet. 2:9) Evri Christian distaem garem privilege for duim disfala important waka wea winim eni nara waka wea iumi savve duim for helpem pipol. Hem spesol privilege for pipol blo God busy for duim datfala preaching and teaching waka! (Mark 13:10) Taem iumi followim olketa principle lo Levitikas chapter 19, iumi showimaot iumi lovem God and olketa narawan. And iumi showimaot tu iumi laek for “holy” lo evri samting wea iumi duim.