1-2. Hao nao parents shud react taem pikinini askem kwestin abaotem olketa biliv blo iumi lo Bible?

 STAKA agree dat wei for kamap parents hem big waka. If iu wanfala parents wea garem smol pikinini, mifala laek for praisem wei wea iu waka hard for helpem pikinini blo iu for garem strong faith. (Deut. 6:​6, 7) Taem pikinini blo iu gohed for growap, maet hem start for kwestinim olketa biliv blo iumi lo Bible, wea includim olketa standard blo God abaotem wat hem stret and rong.

² Lo firstaem, maet iu wari abaotem why pikinini blo iu askem olketa kwestin. Maet iu ting wei wea hem askem olketa kwestin olsem showim hem no garem strong faith. Bat really, taem olketa pikinini gohed growap olketa need for askem olketa kwestin mekem olketa convince lo wat olketa bilivim. (1 Cor. 13:11) Taem olsem, iu no need for wari. Ting lo evri kwestin wea pikinini askem abaotem biliv blo iumi olsem chance for helpem hem for savve hao for ting raonem samting.

3. Wat nao bae iumi storyim lo disfala article?

³ Lo disfala article, bae iumi discussim hao parents savve helpem pikinini blo olketa (1) for convince seleva lo wat olketa bilivim, (2) for tinghae lo olketa standard lo Bible abaotem wat hem stret and rong, and (3) for defendim wat olketa bilivim. Bae iumi storyim tu why hem gud for olketa pikinini askem olketa kwestin and wat famili savve duim tugeta wea bae givim chance for parents storyim olketa Christian biliv blo iumi lo olketa pikinini.

 HELPEM PIKININI BLO IU FOR CONVINCE LO TRUTH

4. Wat nao samfala kwestin wea maet pikinini garem, and why nao olsem?

⁴ Olketa Christian parents luksavve dat wei for garem faith lo God hem no samting wea pikinini inheritim. Parents tu no born witim wei for garem faith lo Jehovah. Pikinini tu olsem. Taem pikinini gohed growap, maet hem garem olketa kwestin wea mekem hem konfius, olsem: ‘Hao, God hem really stap tu? Hao, wat Bible talem hem tru?’ Bible encouragem iumi for iusim mind for “ting raonem samting” and for “mek sure long wanem hem tru.” (Rome 12:1; 1 Thess. 5:21) So, hao nao iu savve helpem pikinini blo iu for strongim faith blo hem?

5. Wat nao parents savve duim for helpem pikinini for garem strong faith lo Bible? (Rome 12:2)

⁵ Encouragem pikinini for pruvim truth lo hemseleva. (Readim Rome 12:2.) Taem pikinini askem olketa kwestin, hem gud for iu iusim datfala chance for helpem hem for kasem ansa lo wei for duim research lo olketa tul olsem, Watch Tower Publications Index and Research Index for Olketa Jehovah’s Witness. Iusim Research Index and luk anda lo subject “Bible,” anda lo topic “Kam from God,” and helpem hem for faendem olketa pruv wea showim Bible hem no just buk wea olketa man raetem. Bat, hem “toktok bilong God.” (1 Thess. 2:13) For example, pikinini blo iu savve duim research abaotem datfala old city blo Nineveh bifor, wea hem stap lo Assyria. Lo bifor, samfala scholar sei no eni city blo Nineveh hem bin stap. Bat lo 1850’s, taem olketa digim ap olketa ruin blo datfala city, hem pruvim datfala story lo Bible hem accurate. (Zeph. 2:​13-15) For kasem moa information lo hao Nineveh hem distroe and fulfillim Bible profesi, hem savve lukim article “Waswe, Iu Savve Finis?” lo November 2021, Wastaoa. If pikinini blo iu comparem wat hem lanem lo olketa pablikeson blo iumi witim olketa encyclopedia and olketa nara reference wea man fit for trustim, bae hem strongim go moa faith blo hem lo wat Bible talem.

6. Hao nao parents savve helpem pikinini ting abaotem wat Bible teachim? Storyim example. (Lukim tu piksa.)

⁶ Duim samting for helpem pikinini for ting abaotem wat Bible teachim. Staka difren chance savve kamap for parents garem olketa interesting story witim pikinini abaotem Bible or for garem faith lo God. Maet chance olsem kamap taem olketa visitim museum, botanical garden, or wanfala exhibit lo wanfala branch office blo Olketa Jehovah’s Witness. For example, if iu duim wanfala tour lo museum, maet in person or thru lo Internet, iu savve showim lo pikinini blo iu information abaotem olketa event lo history or olketa artifacts wea  bae helpem hem for convince dat Bible hem accurate. Hao, pikinini blo iu savve dat olketa raetem nem blo God lo wanfala ston wea hem 3,000-year-old, wea olketa kolem lo Moabite Stone? Datfala original Moabite Stone olketa displayim lo Louvre Museum lo Paris, France. And tu, copy blo datfala Moabite Stone hem on display lo World Hedquarter blo Olketa Jehovah’s Witness lo Warwick, New York, lo wanfala exhibit wea olketa kolem lo “Nem blo God Insaed lo Bible.” Datfala Moabite Stone garem story blo King Mesha blo Moab wea againstim Israel. Datfala story hem semsem witim wat Bible talem. (2 Ki. 3:​4, 5) Taem pikinini lukim seleva lo eye blo hem olketa pruv wea showim Bible hem tru and accurate, datwan helpem hem for garem strong faith.—Comparem 2 Chronicles 9:6.

7-8. (a) Wat nao iumi savve lanem from olketa beautiful design wea iumi lukim lo nature? Storyim example. (Lukim tu piksa.) (b) Wat nao samfala kwestin wea savve helpem pikinini blo iu for strongim biliv blo hem lo Creator?

⁷ Encouragem pikinini for ting abaotem creation. Taem iu go wakabaot lo bush or go lo garden, showim olketa interesting pattern wea iumi savve lukim lo creation lo pikinini blo iu. Why? Olketa pattern hia pruvim dat samwan wea wise and garem big savve nao designim evriting. For example, for staka year olketa scientist studyim olketa spiral pattern. Wanfala scientist wea nem blo hem Nicola Fameli, explainim dat taem iu kaontem namba blo olketa spiral wea stap lo nature, iu bae lukim dat hem garem wanfala series blo olketa namba. Disfala series blo olketa namba, olketa kolem lo Fibonacci sequence. Iumi savve lukim olketa spiral pattern lo staka samting, olsem lo sheip blo samfala galaxy, pattern blo nautilus shell, leaf blo samfala plant, and hem lo sunflower tu. a

⁸ Taem pikinini blo iu gohed lane abaotem science lo skul, hem bae lanem dat nature garem olketa law wea affectim sheip blo staka samting. For example, wanfala geometric pattern olketa kolem lo fractal, and iumi savve lukim datwan lo staka tree. Taem tree growap, branch blo hem gohed for divaed lo staka nara branch. Olketa fractal pattern stap tu lo olketa nara samting lo nature. Bat, hu nao putim olketa law wea mekem olketa beautiful pattern olsem? Hu nao creatim olketa samting lo nature for garem design and followim order? Taem pikinini blo iu ting abaotem olketa kwestin olsem, datwan bae helpem hem for barava bilivim dat God nao hem creatim evri samting. (Heb. 3:4) And taem hem growap lelebet, iu savve askem hem disfala kwestin: “If God nao creatim iumi olketa man, hao, hem fitim for hem givim olketa standard for iumi followim wea savve helpem iumi for hapi?” Then iu savve  showim lo hem hao olketa standard hia stap lo Bible.

HELPEM PIKININI TINGHAE LO OLKETA STANDARD LO BIBLE

9. Wat nao maet mekem pikinini for kwestinim why hem important for followim olketa standard lo Bible?

⁹ If pikinini blo iu hem kwestinim why hem important for followim olketa standard lo Bible, trae for luksavve lo reason why hem askem datfala kwestin. Hao, hem really disagree witim olketa standard lo Bible abaotem wat hem stret and rong, or hem just bikos hem no savve hao for defendim olketa Christian standard blo hem taem hem story witim olketa narawan? Nomata wat nao tingting blo hem, iu savve helpem pikinini for tinghae lo olketa standard lo Bible taem iutufala studyim datfala buk, Enjoyim Laef for Olowe! b

10. Hao nao iu savve helpem pikinini for ting abaotem frenship blo hem witim Jehovah?

¹⁰ Encouragem pikinini for tinghae lo frenship blo hem witim Jehovah. Taem iu studyim Bible witim pikinini blo iu, trae for iusim olketa kwestin wea bae helpem pikinini for talem tingting blo hem and for iusim olketa illustration wea stap lo Enjoyim Laef for Olowe! buk. (Prov. 20:5) For example, leson 8 comparem Jehovah witim wanfala gud fren wea talem samting wea savve helpem and protectim iumi. Afta iutufala discussim 1 John 5:​3, maet iu ask olsem, “Taem iu savve dat Jehovah hem wanfala gud fren, hao nao iumi shud ting lo wat hem talem for iumi duim?” Datwan maet here olsem simpol kwestin, bat taem iu askem kwestin olsem, hem helpem pikinini for ting lo law wea Jehovah givim olsem pruv wea showimaot love blo hem.—Isa. 48:​17, 18.

11. Hao nao iu savve helpem pikinini blo iu for luksavve why olketa Bible principle hem important? (Proverbs 2:​10, 11)

¹¹ Discussim gud samting iumi kasem taem iumi followim olketa Bible principle. Taem iu readim Bible or duim text tugeta evriday, discussim hao olketa Bible principle savve helpem famili blo iu. For example, hao, pikinini blo iu luksavve lo gud samting wea hem bae kasem taem hem waka hard and honest? (Heb. 13:18) Iu savve storyim tu hao wei for followim olketa Bible principle savve protectim iumi lo physical wei and feeling blo iumi tu. (Prov. 14:​29, 30) Taem iu discussim olketa principle olsem, bae hem helpem pikinini blo iu for barava appreciatim go moa advaes blo Bible.—Readim Proverbs 2:​10, 11.

12. Hao nao wanfala dadi helpem son blo hem for tinghae lo wei for followim olketa Bible principle?

¹² Steve, wanfala dadi lo France, explainim hao hem and waef helpem teenager son blo tufala, Ethan, for luksavve dat Jehovah lovem iumi dastawe hem putim olketa law. Hem sei: “Mitufala askem hem olketa kwestin olsem, ‘Why nao Jehovah askem iumi for respectim disfala principle? Hao nao diswan showim hem lovem iumi? Wat nao bae happen if iumi no followim datfala principle?’” Olketa discussion olsem, helpem Ethan for garem strong faith for followim olketa standard blo Jehovah. Steve sei: “Goal blo mitufala hem for helpem Ethan for luksavve dat Bible garem wisdom wea beta winim wisdom blo olketa man.”

13. Hao nao parents savve trainim pikinini for followim olketa Bible principle? Storyim example.

¹³ Trainim pikinini for followim olketa Bible principle. Wanfala chance wea parents garem for duim diswan, hem taem pikinini kasem assignment for readim wanfala buk blo skul wea hem part lo skul project. Maet pipol wea buk hia storyim olketa durong or no kontrolem kros blo olketa, and datfala buk maet  encouragem reader for laek followim wei blo datfala person. Iu savve encouragem pikinini for comparem wat olketa pipol lo datfala story duim witim olketa Bible principle. (Prov. 22:​24, 25; 1 Cor. 15:33; Phil. 4:8) Datwan maet helpem hem for witness lo teacher blo hem or olketa nara student taem olketa storyim datfala information lo class.

HELPEM PIKININI FOR DEFENDIM BILIV BLO HEM

14. Wat nao subject wea wanfala young wan maet fraet for storyim, and why nao olsem?

¹⁴ Samfala taem, olketa young wan maet no confident for defendim biliv blo olketa. Maet olketa fraet for explainim biliv blo olketa taem class discussim theory blo evolution. Why? Maet hem bikos olketa teacher storyim evolution olsem hem wanfala tru samting. So hao nao iufala parents savve helpem pikinini blo iu for confident lo wat hem bilivim?

15. Wat nao savve helpem wanfala young wan for confident lo wat hem bilivim?

¹⁵ Helpem pikinini for confident lo wat hem bilivim. Pikinini blo iu no need for shame bikos hem bilivim truth abaotem creation. (2 Tim. 1:8) Why? Bikos staka scientist tu luksavve dat laef hem no samting wea seknomoa kamap seleva. Olketa lukim hao laef hem no wanfala simpol samting bat hem barava complex, so masbi samwan wea garem big savve nao designim. From datwan, olketa no acceptim tu disfala theory blo evolution wea olketa teachim lo staka skul raonem world. Wanfala samting wea savve helpem pikinini for barava convince, hem taem hem ting raonem olketa reason wea samfala brata and sista garem wea mekem olketa for biliv dat God nao creatim laef. c

16. Hao nao parents savve helpem pikinini for defendim biliv blo hem lo Creator? (1 Peter 3:15) (Lukim tu piksa.)

¹⁶ Helpem pikinini for redi for defendim biliv blo hem lo Creator. (Readim 1 Peter 3:15.) Hem gud idea for readim tugeta witim pikinini blo iu olketa article lo jw.org lo datfala series “Young People Ask—Creation or Evolution?” Then iutufala savve discussim which point nao pikinini blo iu laek for iusim for helpem olketa narawan for understandim truth abaotem Creator. Helpem hem for luksavve hem no need for argue witim olketa skulmate blo hem taem hem explainim wat hem bilivim. If samfala skulmate laek for discuss, encouragem hem for iusim olketa simpol idea and kwestin.  For example, wanfala skulmate maet sei: “Mi bilivim nomoa wat mi savve lukim and no enitaem mi lukim God.” Then young wan hia savve sei: “Imaginim dat iu wakabaot lo forest farawe from ples wea pipol stap and then iu lukim wanfala well wea garem ston wall raonem. Wat nao bae iu tingim? Datfala well pruvim dat samwan wea laef and garem savve nao wakem, so lo sem wei tu, taem iumi lukim universe datwan pruvim samwan wea garem big savve nao creatim!”

17. Hao nao parents savve encouragem pikinini for lukaotem olketa chance for storyim Bible truth witim olketa narawan? Storyim example.

¹⁷ Encouragem pikinini for lukaotem chance for storyim Bible truth witim olketa narawan. (Rome 10:10) Maet iu savve comparem wei wea pikinini blo iu hem traem best for storyim faith blo hem, witim wei for lane for pleim wanfala musical instrument. Firstaem, bae man lanem olketa simpol tune for pleim. Then gogo, bae hem kamap moa isi for hem pleim music. Lo sem wei tu, taem wanfala young Christian storyim faith blo hem witim olketa narawan, maet hem iusim wanfala simpol story firstaem. For example, maet hem ask olsem lo skulmate blo hem: “Hao, iu savve tu dat staka taem olketa engineer copyim design from nature? Mi laek showim iu wanfala interesting video.” Bihaen hem showim wanfala video from datfala series Samwan Nao Designim? maet hem sei: “If wanfala scientist kasem praise bikos hem copyim design blo wanfala samting wea stap lo nature, hu nao shud kasem praise for datfala original design?” Simpol wei for story olsem, savve kasem interest blo wanfala young wan and mekem hem laek for lanem samfala samting moa.

GOHED FOR HELPEM PIKININI FOR STRONGIM FAITH BLO HEM

18. Hao nao parents savve gohed for helpem pikinini blo olketa for garem strong faith lo God?

¹⁸ Iumi stap lo world wea staka pipol no garem faith lo Jehovah. (2 Pet. 3:3) Dastawe, taem iufala parents studyim Bible witim pikinini blo iufala, encouragem hem for duim research lo olketa topic wea bae helpem hem for tinghae go moa lo Bible and olketa standard blo hem. Duim samting for helpem hem for ting abaotem olketa nambawan samting lo creation blo Jehovah. Helpem hem for tinghae lo olketa Bible profesi wea fulfill finis. And samting wea moa important, hem nao for iu prea witim pikinini blo iu and for iu prea for hem. Taem iu duim datwan, iu savve sure dat Jehovah bae blessim hard waka blo iu for helpem pikinini blo iu garem strong faith.—2 Chron. 15:7.