FROM 1930 go kasem 1935, no staka pipol long Brazil herem gud nius. Bat long 1935, tufala regular pioneer Nathaniel and Maud Yuille raet go long Joseph Rutherford, wea lukaftarem preaching waka long datfala taem. Tufala sei tufala “willing for go long eni ples” for help long preaching waka.

Long datfala taem, Nathaniel wea hem wanfala civil engineer, hem 62 year. Hem elder long kongregeson bilong Olketa Jehovah’s Witness long San Francisco, California, U.S.A. Long datfala kongregeson hem organizem preaching waka, and hem iusim phonograph machine for preach. Savve wea hem garem and wei wea hem willing helpem hem for duim gud niu assignment wea hem kasem for kamap branch servant long Brazil, wanfala big kantri wea pipol iusim staka difren languis.

Long 1936, Nathaniel and Maud arrive long Brazil, witim nara pioneer Antonio Andrade, wea transleit for tufala. Olketa tekem kam 35 phonograph and wanfala saond car (car wea garem laodspeaker). Brazil hem bigfala kantri, and long datfala taem 60 pablisa nomoa stap long there! Nomata olsem, datfala saond car and olketa phonograph helpem olketa for preach long plande million pipol insaed tu-thri year nomoa.

Wanfala month bihaen Nathaniel and Maud arrive long Brazil, branch office organizem firstfala convention long São Paulo. Olketa iusim saond car for talem  pipol abaotem pablik tok long convention, and 110 pipol nao kam herem datfala tok! Datfala convention barava encouragem olketa brata and sista and strongim olketa for duim preaching waka. Olketa lanem hao for iusim olketa pablikeson, olketa testimony card, and phonograph long preaching waka. Olketa garem olketa recording long English, German, Hungarian, Polish, Spanish and bihaen, long Portuguese languis.

Long 1937, olketa convention wea kamap long São Paulo, Rio de Janeiro, and Curitiba barava encouragem olketa brata and sista for duim preaching waka. Taem olketa duim preaching waka long haos tu haos olketa iusim saond car tu. José Maglovsky, wea hem wanfala young boy long datfala taem, sei: “Mifala putim olketa Bible pablikeson long tebol, and pleim recording long saond car. Then, taem pipol kamaot from haos bilong olketa for lukim wanem nao hem happen, mifala preach long olketa.”

Olketa baptaesim olketa niu wan long river, and from staka pipol long pablik swim long datfala river, olketa tu savve herem baptism tok wea Brata Rutherford givim wea olketa pleim long saond car. Pipol hipap raonem datfala car and herehere taem wanfala brata transleitim datfala tok long Portuguese languis. Then olketa pleim olketa Kingdom song long Polish languis taem olketa niu wan baptaes. Olketa brata and sista singsing tu long languis bilong olketa. Long 1938 Yearbook hem sei: “Hem olsem taem pipol herem gud nius long languis bilong olketa seleva long Pentecost 33.C.E.”

Bihaen long olketa convention hia, evri Sunday nomata hem rain or sun, olketa iusim saond car for preach long pipol long olketa park, olketa haos, and olketa factory long São Paulo and long olketa nara taon. And evri month olketa iusim saond car for pleim olketa recording for 3,000 pipol wea garem leprosy wea stap long ples wea 97 kilometer northwest long São Paulo. Gogo, wanfala kongregeson start long there, and nomata olketa sik, olketa go preach long nara ples wea pipol wea garem leprosy stap.

Long 1938, olketa kasem olketa tok long Portuguese languis for pleim long saond car. Long day wea pipol long Brazil garem wanfala celebration for tingim olketa wea dae finis, olketa brata iusim saond car for pleim olketa recording hia, “Where Are the Dead?,” “Jehovah,” and “Riches,” long winim 40,000 pipol wea go long olketa beregraon!

Samfala bigman bilong religion trae for stopem olketa brata for no iusim saond car. Sista Yuille tingim taem wea wanfala priest wea kros fogud talem staka pipol for hipap raonem datfala saond car. Bat taem mayor and olketa police arrive, olketa lisin long full recording from datfala saond car. Bihaen, datfala mayor tekem samfala Bible pablikeson. Long datfala day, no eni raeot. Nomata samfala pipol againstim olketa brata, 1940 Yearbook report for Brazil sei year 1939 “hem nambawan taem for worshipim God and talemaot nem bilong hem.”

Bihaen “saond car bilong Wastaoa” kasem Brazil, plande million pipol herem message abaotem Kingdom. Long 1941, olketa salem datfala saond car. Nomata olsem, staka handred thousand Jehovah’s Witness long Brazil gohed for preachim gud nius long hambol pipol long there.—From branch office long Brazil.