TAEM ship go ap followim Belfast Lough, wea hem wanfala long bay, smol grup long olketa passenger standap long ship and lukim taem sun long early morning hem shaen long olketa green hill. Datwan hem long May 1910. Wanfala passenger hem Charles Russell, wea go long Ireland for mek-faev taem. Brata Russell savve lukim tufala mamaeti ship wea olketa gohed for buildim long datfala ples, wanfala hem Titanic and narawan Olympic. * Narasaed long slipway, samfala Bible Student standap long wharf for weitim hem arrive.

Samting olsem 20 year bifor datwan, Brata Russell lukaotem wei for spredim gud nius evriwea long world, so hem disaed for duim tour long olketa ples aotsaed long America. First tour start long Ireland, long July 1891. Taem hem long ship, wea nem bilong hem City of Chicago, hem lukim sun go daon long Queenstown and maet hem tingim wanem parents bilong hem storyim abaotem disfala hom kantri bilong olketa. Taem Brata Russell and olketa wea gogo witim hem, travel thru long naesfala taon and olketa beautiful ples, olketa luksavve hao pipol long disfala ples olsem garden wea “redi and weit for eniwan harvestim.”

Brata Russell visitim Ireland sevenfala taem. Firstaem, pipol interest tumas, so taem hem visit long olketa nara taem, staka handred pipol savve kam herem hem givim tok and samfala taem staka thousand pipol nao kam. Long second gogo long May 1903, olketa advertisem pablik meeting long Belfast and Dublin long olketa niuspepa. Bihaen, Russell storyim hao “pipol barava interest tumas” taem hem givim tok “The Oath-Bound Promise” wea storyim faith bilong Abraham and olketa blessing wea evriwan bae kasem long future.

From pipol long Ireland barava interest tumas, Russell disaed for visitim Ireland taem hem duim mek-thri tour long Europe. Long wanfala morning long April 1908, faevfala brata meetim Brata Russell taem hem arrive long wharf long Belfast. Olketa advertisem pablik tok wea title bilong hem “The Overthrow of Satan’s Empire” and long datfala evening, samting olsem “thri handred pipol wea interest nao attend.” Wanfala man start for tok againstim story bilong Russell, bat Russell kwiktaem iusim olketa scripture for ansarem evri kwestin bilong hem. Long Dublin, wanfala man wea strong for againstim olketa Bible Student, hem nao Mr. O’Connor, secretary bilong YMCA. Hem trae for tanem tingting bilong winim 1,000 pipol wea hipap. Wanem nao happen?

Tingim sapos iu long there and iu lukim samting wea maet happen. Maet iu lukim wanfala man wea interest long Bible hem kam attendim pablik tok wea olketa advertisem long The Irish Times niuspepa. Taem hem kasem datfala hall, hem stragol for faendem ples for sidaon bikos hem barava full. Hem lukim Brata Russell wea garem white hair, beard, and werem long blak coat. Wei wea Russell story mekem datfala man barava lisin gud. Russell wakabaot long platform  and gohed for story and akson witim hand for strongim point. Hem iusim olketa scripture for sapotim and pruvim olketa nara scripture. Datwan mekem datfala man wea lisin minim tru samting wea Bible teachim. Nomata Russell no iusim microphone, voice bilong hem kasem evriwea long hall. Audience interest for lisin for wan and haf hour. Bihaen tok, samfala pipol askem kwestin. Then O’Connor and olketa fren bilong hem challengem Russell, bat Russell iusim Bible for defendim samting wea hem storyim. Audience klap for sapotim Russell. Bihaen evriwan story, datfala man wea interest askem olketa brata for teachim hem samfala samting moa. Staka sei hem nao hao pipol lanem truth long datfala taem.

Long May 1909, Brata Russell lusim New York long datfala ship Mauretania for mek-foa visit bilong hem. Hem tekem tu Brata Huntsinger olsem secretary for helpem hem raetem olketa Watch Tower article taem olketa travel long ship. Taem Brata Russell givim pablik tok long Belfast, 450 pipol nao attend and samting olsem 100 long olketa mas standap nomoa bikos pipol staka tumas.

Olsem story long start, mek-faev taem Brata Russell kasem Ireland, sem samting hem happen. Long pablik tok long Dublin, O’Connor tekem kam wanfala famous theologian. Hem kwestinim Brata Russell. Taem Brata Russell iusim Bible for ansarem evri kwestin, audience barava enjoy for herehere long datwan. Long next day, Russell witim olketa narawan go insaed fast ship for kasem Liverpool, then olketa go long datfala famous ship Lusitania for go long New York. *

Long mek-six and seven gogo bilong Brata Russell long 1911 olketa advertisem tu olketa pablik tok. Long spring season, 20-fala Bible Student long Belfast welkamim 2,000 pipol wea kam for herem tok wea garem title “Hereafter.” O’Connor kam moa long Dublin witim nara minister for ask kwestin bat audience klap taem Brata Russell iusim Bible for ansarem kwestin bilong hem. Long autumn season long datfala sem year, Brata Russell go long olketa nara taon for visit and staka pipol kam attend tu. O’Connor witim 100-fala man kam moa long Dublin for trae stopem datfala meeting bat audience barava sapotim Brata Russell.

Nomata Brata Russell hem main wan for givim pablik tok long datfala taem, hem luksavve waka hia “no depend long eniwan” bikos “hem no waka bilong man bat hem waka bilong God.” Olketa pablik tok distaem followim sem wei for givim pablik tok bifor. Hem givim gud chance for teachim narawan truth long Bible. Wanem nao kamap from diswan? Olketa pablik tok help for spredim gud nius and mekem staka kongregeson kamap long olketa taon long Ireland.—From branch office long Britain.