1. Hao nao wanfala Samaritan wea Jesus healim hem showimaot wei for tinghae?

TENFALA man garem datfala nogud sik leprosy and luk olsem olketa no wei nao. Seknomoa olketa lukim Jesus, datfala Nambawan Teacher. From olketa herem Jesus healim staka difren sik, olketa barava biliv hem bae helpem olketa tu. So olketa singaot long hem and sei: “Jesus, Teacher, plis iu showimaot mercy long mifala!” So Jesus healim tenfala man hia. Iumi sure evriwan hia tinghae long wei wea Jesus kaen long olketa. Bat wanfala long olketa, hem no just garem datfala feeling for tinghae * nomoa, bat hem showimaot wei wea hem thankiu long Jesus. Datfala man wea hem wanfala Samaritan, hem hapi tumas and hem “singaot big and praisem God.”—Luke 17:12-19.

2-3. (a) Why nao maet samfala taem iumi no showimaot wei for thankiu? (b) Wanem nao bae iumi storyim long disfala study?

² Olsem datfala Samaritan, iumi tu laek for showimaot wei for thankiu long olketa wea kaen long iumi. Bat samfala taem, maet iumi forget for talem or duim samting for showimaot iumi thankiu.

³ Long disfala study, bae iumi storyim why hem important for showimaot wei for tinghae thru long toktok and wanem iumi duim. Iumi bae storyim samfala example long Bible abaotem olketa wea showimaot wei for tinghae and samfala wea no tinghae. Then bae iumi storyim samfala idea long hao for showimaot wei for tinghae.

4-5. Why nao iumi shud showimaot wei for tinghae?

⁴ Jehovah showimaot example for iumi saed long wei for  tinghae. Wanfala wei wea hem duim diswan, hem taem hem rewardim olketa wea mekem hem hapi. (Mektu Samuel 22:21; Sams 13:6; Matt. 10:40, 41) And Bible sei olsem: “From iufala olketa pikinini bilong God wea hem lovem, iufala mas followim wei bilong hem.” (Eph. 5:1) So main reason why iumi shud showimaot wei for tinghae hem bikos iumi laek for followim example bilong Jehovah.

⁵ Tingim nara reason why iumi laek for showimaot iumi tinghae. Wei for showimaot iumi tinghae hem olsem wanfala naes kaikai wea iumi savve barava enjoyim sapos iumi sharem witim narawan. Taem iumi luksavve narawan hem tinghae long wanem iumi duim for olketa, iumi feel hapi. Taem iumi showimaot iumi thankiu long narawan, iumi mekem olketa hapi. Man wea iumi sei thankiu long hem bae hapi bikos hem luksavve samting wea hem duim, or givim, hem helpem iumi. From datwan, wei wea iumi fren gud tugeta hem bae kamap barava strong.

6. Long wanem wei nao samting wea iumi talem for sei thankiu hem semsem witim gold apple?

⁶ Wei for showimaot thankiu hem olsem samting wea garem hae price. Bible sei: “Toktok wea man talem long taem wea barava fitim hem naes tumas olsem olketa gold apple wea stap long silver karving.” (Prov. 25:11, NW) Wanfala apple wea olketa wakem from gold hem luk naes tumas taem hem stap insaed wanfala silver karving! And tingim, datwan masbi barava expensive tumas! Hao nao bae iu feel sapos iu kasem kaen present olsem? Tru nao, toktok wea iumi talem for sei thankiu hem olsem datwan. Tingim tu: Apple wea olketa wakem long gold hem savve stap for barava longfala taem. Long sem wei, maet man wea iumi talem thankiu long hem bae no savve forgetim and bae hem tinghae long datwan for full laef bilong hem.

7. Olsem Sams 69:30 storyim, hao nao David and olketa narawan wea raetem psalm showimaot wei for tinghae?

⁷ Staka bifor wea worshipim God showimaot wei for thankiu. Wanfala long olketa hem David. (Readim Sams 69:30.) David barava tinghae long tru worship and hem duim samting for showimaot datwan. Hem givim barava bigfala contribution for wakem temple. Olketa pikinini bilong Asaph tu showimaot olketa tinghae taem olketa raetem olketa psalm, or song bilong praise. Long wanfala song, olketa sei thankiu long God and talem hao olketa tinghae tumas long olketa nambawan samting wea God duim. (Sams 75:1) So, David and olketa pikinini bilong Asaph laek for showimaot long Jehovah hao olketa tinghae long evri blessing wea olketa kasem from hem. Waswe, iu tingim eni wei wea iu savve followim example bilong olketa man hia wea raetem olketa psalm?

8-9. Hao nao aposol Paul showimaot hem tinghae long olketa brata and sista, and wanem nao kamaot from datwan?

⁸ Aposol Paul tinghae long olketa brata and sista and diswan showaot long wei wea hem story abaotem olketa. Taem hem prea seleva hem evritaem thankiu long God bikos long olketa. And tu, taem hem raet long olketa, hem talem hao hem tinghae long olketa. Long first 15-fala verse long Rome 16, Paul talem nem bilong 27-fala Christian. Paul storyim tu hao Prisca and Aquila “putim laef bilong tufala long danger for sevem laef” bilong hem, and hao Phoebe “helpem staka brata,” and hem helpem Paul tu. Hem praisem olketa brata and sista hia wea hem lovem from olketa barava waka hard.—Rome 16:1-15.

⁹ Paul savve olketa brata and sista no perfect, bat long last toktok insaed leta bilong hem for olketa long Rome, hem storyim olketa gudfala wei bilong olketa. Tingim hao toktok bilong Paul mas barava encouragem olketa brata and sista hia taem olketa readim datfala leta long kongregeson! For sure, datwan mekem wei wea olketa fren witim Paul kamap moa klos. Waswe, iu evritaem showimaot iu tinghae long olketa gud samting wea olketa brata and sista long kongregeson talem and duim?

10. Wanem nao iumi savve lanem from wei wea Jesus showimaot hem tinghae long olketa wea followim hem?

¹⁰ Taem Jesus talem message for samfala kongregeson long Asia Minor, hem showimaot hem tinghae long waka wea olketa duim. Olsem example, taem hem startim story bilong hem for kongregeson long Thyatira hem sei: “Mi savve long olketa samting wea iu duim. Mi savve long love, faith, and ministry bilong iu. Iu no givap, and olketa samting wea iu duim distaem hem winim bifor.” (Rev. 2:19) Jesus no storyim nomoa wei wea olketa duim staka samting, bat hem praisem gudfala fasin wea muvim olketa for duim olketa gudfala waka. Nomata Jesus mas kaonselem samfala long Thyatira, taem hem start for talem datfala message and taem hem finisim, hem talem toktok for encouragem olketa. (Rev. 2:25-28) Tingim bigfala paoa wea Jesus garem olsem hed bilong evri kongregeson. Hem no need for talem thankiu for waka wea iumi duim. Nomata olsem, hem evritaem showimaot hem tinghae. Diswan hem nambawan example for olketa elder!

11. Olsem Hebrew 12:16 showimaot, wanem nao tingting bilong Esau abaotem olketa holy samting?

¹¹ Sorre nao, samfala wea Bible storyim olketa no showimaot wei for tinghae. Olsem example, Esau nating tinghae long olketa holy samting nomata dadi and mami bilong hem lovem and respectim Jehovah. (Readim Hebrew 12:16.) Wanem nao showimaot Esau hem no tinghae? Esau kwiktaem for salem raet  bilong hem olsem firstborn long brata bilong hem Jacob for wanfala pleit supsup nomoa. (Jenesis 25:30-34) Bihaen, Esau barava regretim datfala disison. Bat from hem nating tinghae long samting wea hem bin garem, hem no fit for komplen taem hem no kasem blessing wea firstborn son shud kasem.

12-13. Hao nao olketa Israelite showimaot olketa no tinghae, and wanem nao kamaot from datwan?

¹² Olketa Israelite garem staka reason for showimaot olketa tinghae long Jehovah. Hem mekem olketa kamap free taem hem mekem Tenfala Trabol kasem olketa bilong Egypt. Then God sevem olketa long Red Sea taem hem distroem full army bilong Egypt. Olketa Israelite tinghae and barava thankiu so olketa singim wanfala song for praisem Jehovah. Bat waswe, olketa gohed for tinghae long hem?

¹³ Taem olketa Israelite feisim olketa niu challenge, olketa kwiktaem nomoa forgetim gud samting wea Jehovah duim for olketa. Then olketa showimaot olketa nating tinghae nomoa. (Sams 106:7) Wanem nao olketa duim? Olketa start for komplen againstim Moses and Aaron, wea minim olketa komplen againstim Jehovah. (Eksodas 16:2, 8) Jehovah feel nogud long wei wea pipol bilong hem no showimaot olketa tinghae. Bihaen, hem talemaot hao full genereson bilong olketa Israelite hia bae dae long wilderness, Joshua and Caleb nomoa bae go insaed Promis Land. (Nambas 14:22-24; 26:64, 65) Distaem bae iumi storyim hao for followim olketa gud example and no followim olketa nogud example.

14-15. (a) Hao nao hasband and waef savve showimaot tufala tinghae long each other? (b) Hao nao parents savve teachim pikinini for showimaot wei for tinghae?

¹⁴ Showimaot wei for tinghae insaed famili. Full famili savve kasem gud samting sapos evriwan showimaot olketa tinghae long each other. Sapos marit partner showimaot tufala tinghae long each other, bae datwan strongim love bilong tufala. And tu, bae hem moa isi for tufala forgivim each other. Hasband wea tinghae long waef showimaot hem luksavve long gud samting wea waef talem and duim, and tu bae hem praisem hem. (Provebs 31:10, 28) And waef wea wise bae talem thankiu long hasband for olketa samting wea hasband duim wea waef tinghae long hem.

¹⁵ Parents, hao nao iu savve teachim pikinini bilong iu for showimaot wei for tinghae? Tingim hao pikinini bae followim samting iu talem and duim. So, showimaot gud example long wei  for sei thankiu taem olketa duim eni samting for iu. Teachim tu pikinini for sei thankiu taem samwan duim eniting for hem. Helpem pikinini for luksavve wei for sei thankiu hem kam from heart and hao toktok bilong olketa savve barava encouragem narawan. Olsem example, wanfala woman wea nem bilong hem Clary sei: “Taem mami bilong mi kasem 32 year, seknomoa hemseleva mas lukaftarem mi and tufala brata bilong mi. Taem mi kasem 32 year, mi luksavve hao masbi datwan hem barava hard samting for hem deal witim. So mi talem hem hao mi barava tinghae and thankiu for evri samting wea hem duim for lukaftarem mifala. No longtaem go nomoa hem talem mi, toktok wea mi talem kasem heart bilong hem and hem tingim olowe, and datwan savve mekem hem hapi.”

16. Storyim example wea showimaot why wei for sei thankiu savve encouragem narawan.

¹⁶ Showimaot wei for tinghae insaed kongregeson. Wei for showimaot iumi tinghae long olketa brata and sista savve encouragem olketa. Olsem example, Jorge, wanfala elder wea 28 year, hem kasem big sik. Hem no fit for attendim meeting for wan month. And nomata bihaen hem fit for attend moa, hem hard for tekem eni part long meeting. Jorge sei: “Mi feel iusles bikos sik bilong mi mekem mi hard for duim eni waka insaed kongregeson. Bat bihaen wanfala meeting, wanfala brata sei long mi: ‘Mi laek for sei thankiu for nambawan example wea iu showimaot for famili bilong mi. Mifala barava enjoyim olketa tok wea iu givim long olketa year wea go pas, olketa helpem mifala for kamap strong long spiritual wei.’ Taem mi herem, tias fulap long eye bilong mi and mi laek krae, wanem hem talem barava encouragem mi.”

17. Olsem Colossae 3:15 storyim, hao nao iumi savve showimaot iumi tinghae long Jehovah from hem kaen tumas?

¹⁷ Showimaot wei for tinghae long God bilong iumi wea kaen tumas. Jehovah givim iumi staka spiritual kaikai. Olsem example, iumi kasem staka help thru long olketa meeting, magasin, and website bilong iumi. Waswe, enitaem iu herem eni tok, readim eni article, or lukim broadcast and iu ting, ‘Diswan hem barava fitim mi’? Hao nao iumi savve showimaot iumi thankiu long Jehovah? (Readim Colossae 3:15.) Wanfala wei, hem for evritaem talem thankiu long hem insaed prea bilong iumi for evri gud samting wea hem givim iumi.—Jas. 1:17.

18. Hao nao iumi showimaot iumi tinghae long Kingdom Hall bilong iumi?

¹⁸ Iumi showimaot iumi tinghae long Jehovah tu taem iumi keepim ples for worship hem  neat and klin. Iumi share evritaem for klinim and lukaftarem Kingdom Hall. And olketa wea lukaftarem saond and video equipment bilong kongregeson mas keepim gud datwan. Taem iumi lukaftarem gud Kingdom Hall bilong iumi, bae hem no needim staka repair and bae hem stap for longtaem. Taem iumi duim olsem, iumi sevem staka selen for buildim and renovatem olketa nara Kingdom Hall raonem world.

19. Wanem nao iu lanem from experience bilong wanfala circuit overseer and waef?

¹⁹ Showimaot wei for tinghae long olketa wea waka hard for iumi. Toktok wea iumi talem for showimaot iumi tinghae long samwan, maet changem feeling bilong hem abaotem wanfala challenge wea hem feisim. Tingim experience bilong wanfala circuit overseer and waef. Wanday, bihaen tufala go long ministry for full day long winter taem, tufala kasem bak ples tufala stap and tufala barava taed. Long datfala taem hem cold tumas, so waef hia mas werem jacket bilong hem taem hem sleep. Long morning, hem talem hasband bilong hem hao hem no fit for gohed duim circuit waka nao. Bat long datfala sem morning, hem kasem wanfala leta from branch. Datfala leta praisem hem for waka wea hem duim long ministry and wei wea hem no givap. Leta hia storyim tu hao olketa luksavve hem no isi for hem muv go long difren haos evri week. Hasband bilong hem sei olsem: “Praise wea hem kasem barava encouragem hem and no enitaem moa hem ting for lusim circuit waka. For tok stret, samfala taem hem nao encouragem mi for no givap taem mi ting for finis from circuit waka.” Datfala couple gohed for duim circuit waka for samting olsem 40 year.

20. Wanem nao iumi shud trae for duim evriday, and why nao olsem?

²⁰ Evriday iumi shud talem and duim samting for showimaot iumi thankiu. Maet toktok and samting iumi duim helpem samwan for deal witim problem or hevi wea hem kasem from disfala world wea pipol no savve sei thankiu. Wei for showimaot thankiu savve strongim wei wea iumi fren tugeta. Barava important samting nao, taem iumi duim olsem iumi followim example bilong Dadi bilong iumi Jehovah, wea kaen tumas and garem wei for tinghae.