1. Wanem nao wanfala reason why evriwan lo famili blo Jehovah wan mind?

IUMI hapi iumi insaed famili blo Jehovah. Why nao iumi evriwan stap gud and wan mind? Wanfala reason hem bikos lo hao Jehovah organizem famili blo hem. And taem iumi minim gud datfala arrangement and followim, datwan mekem iumi for wan mind.

2. Olketa wanem kwestin nao bae iumi ansarem lo disfala article?

² Lo disfala article bae iumi storyim hao kongregeson waka anda lo Christ, and bae iumi ansarem olketa kwestin olsem: Wanem waka nao Jehovah laekem olketa sista lo kongregeson for duim? Waswe, evri brata lo kongregeson hed blo evri sista? Waswe, elder hem hed blo evri brata and sista lo kongregeson olsem hasband hem hed lo waef and olketa pikinini? Firstaem, bae iumi storyim hao olketa brata shud ting lo olketa sista.

3. Wanem nao bae helpem iumi for tinghae lo olketa sista?

³ Iumi tinghae lo olketa sista wea waka hard for lukaftarem famili blo olketa, for preachim gud nius, and for helpem olketa narawan lo kongregeson. And taem iumi lanem hao Jehovah and Jesus ting lo olketa woman, datwan bae helpem iumi for barava tinghae lo olketa sista. Bae iumi storyim tu hao olketa brata savve followim example blo Paul lo hao hem treatim olketa woman.

4. Wanem nao Bible storyim wea showimaot Jehovah tinghae lo olketa woman?

 ⁴ Bible showimaot Jehovah tinghae lo olketa woman. For example, lo first century, Jehovah givim holy spirit lo olketa man, and olketa woman. Olketa savve duim olketa mirakol olsem for story lo difren languis. (Acts 2:1-4, 15-18) Olketa man and woman bae rul witim Christ bikos Jehovah anointim olketa witim holy spirit. (Gal. 3:26-29) No olketa man nomoa, bat olketa woman tu bae kasem laef olowe lo disfala earth. (Rev. 7:9, 10, 13-15) And tu, olketa woman and man preachim gud nius and teachim narawan. (Matt. 28:19, 20) For example, Bible buk blo Acts story abaotem wanfala sista wea nem blo hem Priscilla. Hem and hasband blo hem Aquila helpem Apollos for minim gud moa olketa scripture nomata Apollos hem man wea skul gud.​—Acts 18:24-26.

5. Hao nao Luke 10:38, 39, 42 showimaot Jesus respectim olketa woman?

⁵ Jesus respectim olketa woman. Jesus no followim wei blo olketa Pharisee wea ting daonem olketa woman, no story witim olketa lo pablik ples, and no storyim Scripture witim olketa. Bat Jesus hapi for storyim scripture witim olketa woman, and olketa man. * (Readim Luke 10:38, 39, 42.) Hem hapi tu for olketa woman kam witim hem taem hem go preach lo olketa difren ples. (Luke 8:1-3) And Jesus givim olketa woman bigfala privilege for go storyim lo olketa disaepol hem laef bak nao.​—John 20:16-18.

6. Hao nao aposol Paul showimaot hem respectim olketa woman?

⁶ Aposol Paul talem Timothy for respectim olketa woman. Paul talem Timothy for treatim olketa woman wea olo olsem mami blo hem and olketa young gele olsem sista blo hem. (1 Tim. 5:1, 2) Paul duim staka samting for helpem Timothy for kamap mature Christian. Bat Paul luksavve mami and granmami blo Timothy nao first wan wea helpem hem for savve lo olketa holy raeting. (2 Tim. 1:5; 3:14, 15) Paul respectim olketa woman. Taem hem raetem leta lo wanfala kongregeson hem sei hello lo samfala sista tu. Hem luksavve olketa sista waka hard lo ministry and hem talem thankiu lo olketa.​—Rome 16:1-4, 6, 12; Phil. 4:3.

7. Olketa wanem kwestin nao bae iumi storyim distaem?

⁷ Olsem iumi storyim finis, Bible no sei olketa brata gud winim olketa sista. Iumi hapi tumas for garem olketa sista lo kongregeson, and olketa elder depend lo olketa sista for helpem kongregeson stap gud and garem wan mind. Bat datwan mekem samfala kwestin for kamap: Why nao Jehovah sei olketa sista mas kavarem hed samfala taem? Iumi savve Jehovah markem olketa brata for elder and ministerial servant, so waswe, diswan minim evri brata lo kongregeson hed blo evri sista?

8. Hu nao Ephesus 5:23 sei hem hed blo evri sista? Minim kam diswan.

⁸ Ansa blo datwan nomoa! Christ nao hed blo evri sista lo kongregeson. (Readim Ephesus 5:23.) Insaed lo famili,  hasband nao hed blo waef. Nomata wanfala son lo famili hem baptaes, hem no hed blo mami blo hem. (Eph. 6:1, 2) And insaed lo kongregeson olketa elder lukaftarem kongregeson, bat olketa no hed blo olketa brata and sista. (1 Thess. 5:12; Heb. 13:17) Waswe lo wanfala singol sista wea no stap witim parents blo hem? Hem bae gohed for respectim parents, bat dadi no hed blo hem. Hem bae respectim olketa elder lo kongregeson tu. Bat olsem olketa brata lo kongregeson, hem garem wanfala hed nomoa wea hem nao Jesus.

9. Why nao samfala taem sista mas kavarem hed?

⁹ Jehovah laekem kongregeson for organize gud. So hem markem Jesus for hed blo olketa man. And hem markem tu olketa man for lead lo kongregeson and no olketa woman. (1 Tim. 2:12) Bat sapos sista mas duim waka wea wanfala brata shud duim, then Jehovah laekem datfala sista for kavarem hed blo hem. * (1 Cor. 11:4-7) Taem sista kavarem hed, hem showimaot respect for olketa brata wea Jehovah markem for lead. From iumi savve lo datwan, hem gud for tingim diswan: Waswe, waka blo hed lo famili and elder hem semsem?

10. Why nao maet wanfala elder tingse hem savve mekem rul for olketa lo kongregeson?

¹⁰ Olketa elder lovem Christ and olketa sheepsheep wea Jehovah and Jesus askem olketa for lukaftarem. (John 21:15-17) From datwan, wanfala elder maet ting hem olsem dadi blo olketa lo kongregeson.  So maet hem tingse sapos hed blo famili savve mekem olketa rul for protectim famili blo hem, from hem olsem dadi, hem savve mekem olketa rul for protectim olketa sheepsheep blo God. Nara samting, samfala brata and sista askem olketa elder for mekem disison for olketa, and datwan mekem samfala elder for tingse olketa spiritual hed blo olketa hia. Bat waswe, waka blo olketa elder and hed blo famili hem semsem?

11. Hao nao waka blo olketa elder and hed blo famili hem semsem?

¹¹ Aposol Paul sei samfala samting wea elder duim hem semsem olsem samting wea wanfala dadi duim. (1 Tim. 3:4, 5) For example, Jehovah sei olketa pikinini mas obeyim dadi. (Col. 3:20) And hem laekem olketa lo kongregeson for obeyim olketa elder. Jehovah expectim hed blo famili for teachim olketa pikinini abaotem Jehovah, and olketa elder for teachim olketa lo kongregeson. Tufala evriwan mas showimaot love for olketa wea olketa lukaftarem. And tu, olsem dadi wea helpem pikinini wea kasem problem, olketa elder bae helpem eniwan lo kongregeson wea garem problem. (Jas. 2:15-17) Jehovah sei tu, olketa elder mas helpem kongregeson and dadi  mas helpem pikinini for obeyim olketa law blo Jehovah. Hem expectim olketa elder and dadi for “followim nomoa samting wea” stap insaed Bible.​—1 Cor. 4:6.

12-13. Olsem Rome 7:2 sei, hao nao waka blo olketa elder difren from waka blo hed blo famili?

¹² Nomata samfala waka blo olketa elder and hed blo famili semsem, samfala waka no semsem. Olsem example, Jehovah sei olketa elder savve judgem olketa wea no repent and aotem from kongregeson.​—1 Cor. 5:11-13.

¹³ And tu, Jehovah givim samfala waka lo hed blo famili wea hem no givim lo olketa elder, olsem Jehovah sei dadi savve mekem olketa rul for famili and for mek sure olketa followim olketa rul hia. (Readim Rome 7:2.) For example, dadi garem raet for markem wanem taem lo evening for pikinini kam bak lo haos. And sapos pikinini no obeyim datfala rul, dadi fit for disciplinem hem. (Eph. 6:1) Nomata olsem, dadi wea lovem famili blo hem bae story witim waef bifor hem mekem olketa rul bikos tufala “wanfala body nomoa.” *​—Matt. 19:6.

14. (a) Wanem nao Mark 10:45 sei wea showimaot hem fitim for Jehovah markem Jesus for hed blo kongregeson? (b) Wanem nao waka blo Governing Body? (Lukim box “ Waka blo Governing Body.”)

¹⁴ Jesus sakrifaesim laef blo hem for olketa lo kongregeson and for eni narawan wea bae showimaot faith lo hem. (Readim Mark 10:45; Acts 20:28;  1 Cor. 15:21, 22) So hem fitim for Jehovah markem Jesus for hed blo kongregeson. From Jesus hem hed blo iumi, hem garem raet for mekem olketa rul for iumi and for olketa kongregeson, and for mek sure iumi followim olketa rul hia. (Gal. 6:2) Bat Jesus no mekem olketa rul nomoa. Hem lovem iumi and barava lukaftarem iumi gud.​—Eph. 5:29.

15-16. Wanem nao iu lanem from samting wea Marley and Benjamin talem?

¹⁵ Olketa sista showimaot olketa luksavve Christ hem hed blo olketa taem olketa followim direction blo olketa elder, wea Jesus markem for lukaftarem olketa. Staka sista garem sem tingting olsem Marley, wanfala sista lo United States. Hem sei: “Mi wanfala sista lo kongregeson and wanfala waef tu, and mi hapi lo datwan. Samting wea mekem hem isi for mi followim direction blo olketa elder and for stap anda lo hasband blo mi, hem taem hasband and olketa brata showimaot olketa respectim mi and sei olketa tinghae lo wanem mi duim.”

¹⁶ Olketa brata showimaot olketa luksavve Christ hem hed blo kongregeson taem olketa respectim olketa sista. Benjamin, wanfala brata lo England sei: “Mi lanem staka naes point from koment blo olketa sista lo meeting and mi kasem samfala idea lo hao for duim study seleva, and hao for kamap gud lo ministry. Mi tinghae lo wanem olketa sista duim lo kongregeson.”

17. Why nao iumi shud tinghae and followim hao Jehovah organizem famili blo hem?

¹⁷ Taem evriwan lo kongregeson, nomata man, woman, hed blo famili, and olketa elder tinghae and followim hao Jehovah organizem famili blo hem for samfala stap anda lo narawan, then evriwan lo kongregeson bae stap gud tugeta. And tu, datwan bae mekhae lo Dadi blo iumi lo heven, Jehovah.​—Sams 150:6.