STUDY ARTICLE 9
Followim Example blo Jesus for Helpem Narawan
“Man wea givim samting hem barava hapi winim man wea kasem samting.”—ACTS 20:35.
SONG 17 “Mi Laek Duim Datwan”
ARTICLE BAE STORYIM *
1. Wanem nao Bible sei pipol blo Jehovah bae duim?
BIBLE sei pipol blo God bae “hapi tumas fo kam an joen” lo waka blo Jehovah, and Jesus nao bae leadim olketa. (Sams 110:3) Wanem Bible talem hem kamap tru distaem. Evri year, pipol blo Jehovah willing for spendem staka million hour for duim preaching waka, and olketa no kasem pei for duim datwan. Olketa willing for iusim taem blo olketa tu for helpem olketa nara brata and sista, encouragem olketa, and strongim faith blo olketa lo Jehovah. And olketa elder and ministerial servant spendem staka taem for redyim olketa tok for olketa meeting and for visitim olketa brata. Pipol blo Jehovah duim olketa samting hia bikos olketa lovem Jehovah and lovem olketa narawan.—Matt. 22:37-39.
2. Olsem Rome 15:1-3 storyim, wanem example nao Jesus showimaot?
2 Jesus willing for helpem olketa narawan and hem tingim olketa narawan firstaem. Iumi laek for duim best blo iumi for followim example blo hem. (Readim Rome 15:1-3.) Sapos iumi duim olsem, iumi bae kasem gud samting. Jesus sei: “Man wea givim samting hem barava hapi winim man wea kasem samting.”—Acts 20:35.
3. Wanem nao bae iumi storyim lo disfala article?
3 Lo disfala article, bae iumi storyim samfala samting wea Jesus duim wea showimaot hem willing for helpem olketa narawan, and hao iumi savve followim example blo hem. And tu, bae iumi lanem wanem bae helpem iumi for tingim narawan firstaem.
FOLLOWIM EXAMPLE BLO JESUS
Wanem nao Jesus duim taem staka pipol kam lo hem, nomata hem taed? (Lukim paragraf 4)
4. Wanem nao Jesus duim wea showimaot hem willing for helpem olketa narawan?
4 Jesus willing for helpem olketa narawan nomata hem taed. Tingim samting wea Jesus duim taem staka pipol kam for lukim hem taem hem kam daon from wanfala maunten. Nomata Jesus hem taed tumas from hem spendem full naet for prea, taem hem lukim olketa pipol hia hem barava sorre lo olketa wea poor and sik. Hem healim olketa and hem givim tu wanfala tok wea barava encouragem olketa, wea hem nao datfala Sermon lo Maunten.—Luke 6:12-20.
Hao nao iumi evriwan savve followim example blo Jesus for tingim narawan? (Lukim paragraf 5)
5. Nomata famili hed hem taed, hao nao hem savve followim example blo Jesus?
5 Wanem famili hed savve duim for followim example blo Jesus. Tingim disfala example. Wanfala dadi kasem haos lo evening and hem taed tumas bikos hem waka hard for full day. Hem laek for muvim Famili Worship lo narafala evening, bat hem barava askem Jehovah for strongim hem for duim study witim famili blo hem. Jehovah helpem hem for duim datwan, olsem hem savve duim evri week. Datwan helpem olketa pikinini luksavve hao olketa spiritual samting nao important lo dadi and mami winim eni nara samting.
6. Storyim wanfala taem wea Jesus willing for helpem olketa narawan.
6 Jesus willing for spendem staka taem for helpem narawan. Tingim diswan. Jesus mas sorre tumas taem hem herem olketa killim dae fren blo hem John Baptaesa. Bible sei: “Taem Jesus herem [olketa killim dae John], hem go insaed wanfala boat and go long wanfala kwaet ples wea no eniwan stap.” (Matt. 14:10-13) Iumi minim why Jesus duim olsem, bikos maet iumi laek stap seleva taem iumi sorre. Bat Jesus no stap seleva nao, bikos bifor hem kasem kwaet ples wea hem laek go lo hem staka pipol kasem finis datfala ples. Wanem nao Jesus duim? Hem “barava sorre tumas” lo olketa from hem luksavve olketa pipol hia needim help and comfort from God. So stretawe “hem teachim olketa plande samting.”—Mark 6:31-34; Luke 9:10, 11.
7-8. Storyim example lo hao olketa elder savve tingim olketa narawan firstaem, olsem Jesus duim.
7 Wanem olketa elder duim for followim example blo Jesus. Iumi barava tinghae lo hard waka wea olketa elder duim for helpem iumi! Staka lo kongregeson no savve lo evri samting wea olketa elder hia duim for helpem iumi. Olsem example, taem eni brata or sista kasem medical emergency, olketa elder wea waka lo Hospital Liaison Komiti kwiktaem go for helpem olketa. Staka taem kaen samting olsem savve happen lo midol naet! From olketa elder hia and famili blo olketa barava sorre lo brata or sista wea kasem hard taem, datwan mekem olketa for tingim firstaem olketa brata and sista.
8 Samfala elder help tu for wakem olketa Kingdom Hall or waka lo olketa nara construction project, and samfala duim disaster relief waka. And tu, olketa elder spendem staka taem for teachim and encouragem iumi lo kongregeson. Hem gud for talem olketa elder and famili blo olketa iumi barava tinghae lo wanem olketa duim. Iumi sure Jehovah bae blessim olketa for gudfala samting wea olketa duim! Nomata olsem, olketa elder need for balance tu. Olketa shud no busy tumas for duim olketa waka lo kongregeson gogo olketa no garem taem for lukaftarem gud famili blo olketa.
WANEM NAO SAVVE HELPEM IUMI FOR LAEK HELPEM NARAWAN?
9. Olsem Philippi 2:4, 5 storyim, wanem nao iumi laek for duim?
9 Readim Philippi 2:4, 5. Hem tru, iumi evriwan no elder, bat iumi evriwan savve followim example blo Jesus for helpem narawan. Bible sei Jesus “kamap olsem wanfala slave.” (Phil. 2:7) Hao nao iumi savve kamap olsem slave lo narawan? Olsem wanfala gud slave bae lukaotem chance for duim samting wea mekem boss blo hem hapi, iumi tu laek for duim moa samting for Jehovah and for helpem olketa brata and sista. Bae iumi storyim samfala samting wea bae helpem iumi for duim diswan.
10. Olketa wanem kwestin nao bae hem gud for tingim?
10 Tingim sapos hem wei blo iumi for laek help. Hem gud for tingim: ‘Waswe, iumi willing for iusim taem and strong blo iumi for helpem narawan? Olsem example, sapos elder askem iumi for visitim wanfala olo brata for encouragem hem, or for helpem wanfala olo sista for kam lo olketa meeting, waswe, bae iumi willing for duim datwan? Taem olketa ask for olketa volunteer for klinim ples wea convention bae kamap, or for duim waka lo Kingdom Hall, waswe, iumi laek for help?’ Jehovah hapi sapos iumi willing for iusim taem, strong, and olketa samting wea iumi garem for helpem olketa narawan. Bat sapos iumi luksavve iumi no willing for duim samfala samting hia, wanem nao savve helpem iumi?
11. Hao nao prea savve helpem iumi for willing for helpem narawan?
11 Prea lo Jehovah. Maet iumi luksavve samfala taem iumi no willing for helpem narawan and iumi faendem hard for changem datwan. Sapos olsem, prea lo Jehovah and talem hem datwan. Askem Jehovah for helpem iumi for “laek duim samting” for narawan, and then duim datwan.—Phil. 2:13.
12. Wanem nao olketa young brata savve duim for help lo kongregeson?
12 Sapos iu wanfala young brata wea baptaes finis, hem gud for askem Jehovah for helpem iu for laek duim moa samting lo kongregeson. Lo samfala kantri, olketa kongregeson garem staka elder bat no staka ministerial servant. And tu, olketa ministerial servant hia maet mature or olo nao. From staka pipol gohed for kam insaed lo organization blo Jehovah, iumi needim olketa young brata for helpem olketa elder for lukaftarem kongregeson. Bae iu hapi sapos iu willing for helpem olketa brata and sista. Why nao olsem? Bikos iu bae mekem Jehovah hapi, olketa brata and sista bae tinghae lo wanem iu duim, and bae iu satisfae from iu helpem olketa.
Olketa Christian lo Judea akrosim Jordan River and ranawe go lo wanfala taon wea olketa kolem Pella. Olketa Christian wea kasem Pella firstaem givim kaikai lo olketa narawan wea just kam (Lukim paragraf 13)
13-14. Wanem nao samfala samting iumi savve duim for helpem olketa brata and sista? (Lukim piksa lo front page.)
13 Luksavve sapos narawan needim help. Aposol Paul talem olketa Christian lo Judea: “No forget for duim gud samting and for sharem samting wea iu garem witim olketa narawan.” (Heb. 13:16) Datwan hem gudfala advaes! No longtaem bihaen olketa kasem datfala leta, olketa mas lusim haos, bisnis, and olketa relative wea no Christian, and olketa “ranawe go long olketa maunten.” (Matt. 24:16) Taem olketa kasem lo there, olketa need for helpem each other. Sapos olketa followim advaes blo Paul finis for sharem wanem olketa garem, datwan bae helpem olketa for deal witim niu laef blo olketa.
14 Olketa brata and sista blo iumi maet no talem iumi wanem olketa needim. Olsem example, maet waef blo wanfala brata hem dae. Maet brata needim help saed lo kaikai, transport, or samfala waka lo haos. Maet hem shame for askem iumi for helpem hem, bat bae hem tinghae tumas sapos iumi luksavve hem needim help and iumi duim samting for helpem hem. Iumi shud no tingse narawan bae helpem hem or hem nao bae talem iumi wanem hem needim. Bae hem gud for tingim, ‘Sapos sem samting kasem mi, wanem nao bae mi laekem narawan for duim for mi?’
15. Wanem gudfala wei nao iumi laek for garem mekem iumi savve helpem narawan?
15 Kaen and tingim pipol. Masbi iumi savve lo samfala brata and sista lo kongregeson wea kaen tumas and willing for helpem narawan, and iumi no fraet for askem help blo olketa. Iumi laek for olsem olketa tu! Alan, wanfala elder wea 45 years, laekem olketa narawan for feel free for kam lo hem. Alan storyim hao hem laek for followim example blo Jesus. Hem sei: “Jesus hem busy, bat nomata wanem nao age blo pipol, olketa laekem hem and no hol bak for askem hem for helpem olketa. Olketa luksavve Jesus kaen and tingim olketa. Mi barava laek for followim wei blo Jesus, and for pipol no fraet for kam lo mi from olketa luksavve mi kaen and tingim olketa.”
16. Hao nao toktok lo Sams 119:59, 60 savve helpem iumi for followim gud example blo Jesus?
16 Iumi shud no discourage sapos iumi no followim example blo Jesus lo perfect wei for helpem narawan. (Jas. 3:2) Olsem example, painting blo samwan wea lane for paintim piksa bae no barava gud olsem painting blo teacher blo hem. Nomata hem no duim gudfala painting firstaem, sapos hem gohed for followim example blo hao teacher blo hem paintim piksa, bae hem isisi kamap gud. Olsem tu, sapos iumi followim wanem Jesus teachim lo Bible and iumi gohed waka hard for helpem narawan, bae iumi savve followim gud example blo Jesus.—Readim Sams 119:59, 60.
TAEM IUMI TINGIM NARAWAN DATWAN BAE HELPEM EVRIWAN
Taem olketa elder followim example blo Jesus for tingim narawan, datwan helpem olketa young wan for laek duim sem samting (Lukim paragraf 17) *
17-18. Taem iumi followim example blo Jesus for tingim narawan, hao nao datwan savve helpem evriwan?
17 Taem iumi willing for helpem olketa brata and sista, olketa bae laek for duim sem samting tu. Tim, wanfala elder, sei: “Lo kongregeson blo mifala, samfala brata wea barava young kamap ministerial servant. Samting wea helpem olketa for duim datwan hem from olketa lukim olketa narawan wea willing for help, then olketa laek duim sem samting tu. Olketa young brata hia barava helpem kongregeson and helpem mifala olketa elder tu.”
18 Distaem staka pipol lo world tingim olketa seleva nomoa, bat pipol blo Jehovah difren from olketa. Iumi tinghae lo hao Jesus helpem olketa narawan, and iumi laek for followim example blo hem. Hem tru, maet iumi no followim example blo Jesus lo perfect wei, bat iumi fit for “followim gud” example blo hem. (1 Pet. 2:21) Taem iumi waka hard for followim example blo Jesus for tingim narawan firstaem and helpem olketa, bae iumi hapi from iumi mekem Jehovah hapi.
SONG 13 Christ Showim Example for Iumi
^ par. 5 Jesus evritaem tingim narawan and willing for helpem olketa. Lo disfala article, bae iumi storyim samfala samting wea iumi savve duim for followim example blo Jesus for helpem narawan. And tu, iumi bae storyim hao taem iumi tingim narawan firstaem, datwan bae helpem evriwan.
^ par. 57 PIKSA: Dan, wanfala young brata, lukim hao tufala elder visitim dadi blo hem lo hospital. Gudfala example wea olketa showimaot mekem Dan laek for helpem olketa narawan lo kongregeson tu. Ben, nara young brata, lukim Dan taem hem helpem wanfala olo sista. Gudfala example blo Dan encouragem Ben for laek help for klinim Kingdom Hall.
