1-2. Wanem nao wanfala elder lanem abaotem hao for givim kaonsel?

 WANTAEM, tufala elder go visitim wanfala sista wea gohed for misstim olketa meeting. Wanfala elder readim samfala scripture lo datfala sista abaotem why hem gud for attendim olketa meeting. Hem tingse hem encouragem sista hia, batawea, taem tufala redi for go, datfala sista sei, “Olketa brata, iufala nating minim wanem mi deal witim distaem.” Tufala brata givim kaonsel bat no askem sista hia sapos hem deal witim eni problem. Diswan mekem sista hia no hapi lo kaonsel wea hem kasem.

² Elder wea readim olketa scripture for sista hia ting go bak and sei: “Lo datfala taem, mi tingse sista hia no showimaot respect lo mifala. Bat then mi luksavve bifor mi visitim datfala sista mi tingim nomoa olketa scripture for iusim. Bat mi shud tingim samfala kwestin for askem sista hia, olsem ‘Iu feisim eni hard samting distaem?’ and ‘Eni samting mifala savve duim for helpem iu?’” Datfala elder lanem important samting from datfala experience. Distaem hem traem best for tingim feeling blo olketa sheepsheep and for helpem olketa.

3. Hu lo kongregeson nao savve givim kaonsel?

 ³ From olketa elder nao shepherd, olketa garem responsibility for givim kaonsel lo olketa brata and sista. Bat olketa narawan lo kongregeson savve givim kaonsel tu. Olsem example, wanfala brata or sista savve iusim Bible for givim kaonsel lo fren blo hem. (Sams 141:5; Provebs 25:12) Or maet wanfala mature sista savve givim advaes lo “olketa young woman” abaotem olketa samting  wea Titus 2:3-5 storyim. And parents need for teachim and stretem olketa pikinini blo olketa. Nomata disfala article hem for olketa elder, hem bae helpem iumi evriwan for givim kaonsel wea bae isi for man acceptim and followim, and wea “mekem man hapi.”​—Prov. 27:9, NWT.

4. Wanem nao bae iumi storyim lo disfala article?

⁴ Lo disfala article bae iumi storyim fofala kwestin abaotem hao for givim kaonsel: (1) Wanem nao stretfala reason for givim kaonsel? (2) Waswe, elder need for givim kaonsel? (3) Hu nao shud givim kaonsel? (4) Wanem nao bae helpem elder for givim gudfala kaonsel?

5. Why nao hem gud for olketa elder tingim wanem Paul talem bifor hem kaonselem samwan? (1 Corinth 13:4, 7)

⁵ Olketa elder lovem olketa brata and sista lo kongregeson. Wanfala wei wea olketa showimaot love hem for kaonselem samwan lo kongregeson wea start for go rong. (Gal. 6:1) Bat bifor elder givim kaonsel, maet hem gud for hem tingim wanem Paul talem abaotem man wea garem love. Hem sei: “Hem patient and kaen. . . . Nomata wanem hem happen, . . . hem hapi nomoa. Hem gohed for biliv, hem evritaem garem hope, and no eni samting savve mekem hem givap.” (Readim 1 Corinth 13:4, 7.) Taem datfala elder ting raonem olketa verse hia, datwan bae helpem hem for mek sure hem bae kaonselem brata or sista from hem lovem hem. From brata or sista hia luksavve datfala elder lovem hem, datwan bae helpem hem for acceptim kaonsel.​—Rome 12:10.

6. Wanem gud example nao aposol Paul showimaot for olketa elder?

⁶ Aposol Paul hem gudfala example for olketa elder lo hao for givim kaonsel. Olsem example, taem Paul luksavve olketa lo Thessalonica needim kaonsel, hem no hol bak for duim datwan. Taem hem raet lo olketa, firstaem hem praisem olketa. Hem storyim waka wea olketa duim from olketa faithful and garem love, and hao olketa no givap. Hem storyim tu hao laef blo olketa no isi, and hao olketa faithful for deal witim persecution. (1 Thess. 1:3; 2 Thess. 1:4) And tu, hem sei olketa brata and sista showimaot gudfala example for olketa nara Christian. (1 Thess. 1:8, 9) Masbi olketa hapi tumas from Paul praisem olketa! From olketa luksavve Paul lovem olketa, datwan mekem hem isi for olketa acceptim kaonsel wea hem raetem for olketa.​—1 Thess. 4:1, 3-5, 11; 2 Thess. 3:11, 12.

7. Why nao samfala maet no laek followim kaonsel?

⁷ Sapos elder showimaot hem feel nogud lo olketa brata and sista taem hem givim kaonsel, hao nao datwan bae affectim olketa? Wanfala elder sei, “Maet olketa luksavve datfala kaonsel hem stret, bat samfala maet no laek followim datwan from elder hem no showimaot love.” Wanem nao olketa elder savve lanem from diswan? Taem olketa elder givim kaonsel lo kaenfala wei, datwan bae helpem olketa brata and sista for acceptim kaonsel.

8. Bifor elder kaonselem samwan, wanem nao hem shud tingim?

⁸ Hem gud for olketa elder tingting gud firstaem bifor olketa givim kaonsel.  Olketa elder savve tingim: ‘Waswe, mi sure disfala brata or sista duim samting wea no stret and mi need for givim kaonsel lo hem? Waswe, samting wea hem duim hem againstim wanem Bible talem, or wanem hem duim hem no fitim tingting blo mi nomoa?’ Hem wise sapos olketa elder no kwiktaem for kaonselem samwan. (Provebs 29:20) Sapos elder no sure hem need for kaonselem samwan, maet hem story witim nara elder. Tufala savve storyim sapos datfala brata or sista duim samting wea againstim wanem Bible talem and hem needim kaonsel.​—2 Tim. 3:16, 17.

9. Wanem nao olketa elder savve lanem from Paul abaotem hao for givim kaonsel saed lo kaleko or lukluk? (1 Timothy 2:9, 10)

⁹ Tingim disfala example. Wanfala elder maet tingse kaleko or lukluk blo wanfala brata or sista no showimaot respect. Bat hem shud tingim, ‘Waswe, mi garem eni reason from Bible for kaonselem hem, or diswan hem tingting blo mi nomoa?’ Maet hem savve askem tingting blo nara elder or mature brata or sista. Maet tufala savve storyim tugeta kaonsel wea Paul givim abaotem kaleko and lukluk blo olketa Christian. (Readim 1 Timothy 2:9, 10.) Paul storyim olketa principle wea helpem olketa Christian for luksavve olketa shud werem kaleko wea fitim and showimaot respect, bat hem no mekem olketa rul. Hem savve olketa brata and sista garem raet for disaedem wanem olketa bae werem, sapos hem no againstim wanem Bible talem. Bifor olketa elder givim kaonsel abaotem kaleko or lukluk blo samwan, olketa shud ting raonem sapos datfala brata or sista brekem eni Bible principle.

10. Wanem nao olketa elder shud tingim abaotem disison blo olketa brata and sista?

¹⁰ Hem gud for olketa elder tingim hao tufala mature Christian maet no mekem sem disison abaotem wanfala samting, bat datwan no minim disison blo wanfala hem stret and narawan hem rong. Olketa elder shud no trae for forcem olketa brata and sista for duim wanem olketa tingse hem stret.​—Rome 14:10.

11-12. Sapos samwan needim kaonsel, olketa wanem kwestin nao elder shud tingim, and why nao olsem?

¹¹ Sapos elder luksavve samwan needim kaonsel, hem gud for tingim, Hu nao shud givim datfala kaonsel? Sapos wanfala sista wea marit or wanfala pikinini needim kaonsel, elder bae story firstaem witim famili hed bikos maet famili hed nao laek for duim datwan. * Or maet famili hed  laek for stap taem elder givim kaonsel. And olsem  paragraf 3 storyim, samfala taem maet hem gud for wanfala mature sista givim kaonsel lo young sista.

¹² Nara samting wea elder bae need for tingim hem, ‘Waswe, mi nao shud givim kaonsel, or narawan nao best wan for givim?’ Olsem example, maet samwan wea ting daonem hemseleva needim kaonsel. Maet hem gud for wanfala elder wea hem tu ting daonem hemseleva bifor for go story witim hem. From elder minim feeling blo hem, datwan bae helpem brata or sista hia for acceptim datfala kaonsel. Maet no eniwan lo olketa elder kasem sem samting bifor, bat important samting nao hem for givim kaonsel for encouragem brata or sista hia for duim samting followim Bible principle.

13-14. Why nao hem important for olketa elder willing for lisin?

¹³ Willing for lisin. Bifor elder kaonselem samwan, hem shud tingim: ‘Wat nao samfala samting wea brata or sista blo mi deal witim? Waswe, hem kasem samfala hard samting wea mi no savve? Wat kaen help nao hem needim tumas distaem?’

¹⁴ Datfala principle lo James 1:19 hem fitim olketa wea givim kaonsel. James sei: “Evriwan mas willing for lisin, no kwiktaem for toktok, and no kwiktaem for kros.” Elder wea go for kaonselem samwan maet tingse hem savve lo full story, bat waswe, datwan hem tru? Hem gud for elder tingim toktok lo Provebs 18:13 wea sei: “Man hu hemi ansa bifoa hemi lisin, bae hemi krangge an filsem.” Hem gud for elder lisin lo story blo brata or sista abaotem samting wea happen firstaem bifor hem kaonselem hem. Tingim example blo elder lo first paragraf blo disfala article. Hem luksavve bifor hem storyim information wea hem redyim, hem shud askem datfala sista olketa kwestin olsem: “Iu feisim eni hard samting distaem?” and “Eni samting mifala savve duim for helpem iu?” Sapos olketa elder savve lo full story, datwan bae helpem olketa for minim olketa brata and sista and for encouragem olketa.

15. Wanem nao olketa elder savve duim for followim principle lo Proverbs 27:23 (NWT)?

¹⁵ Savve gud lo olketa sheepsheep. Olsem iumi storyim finis, taem elder kaonselem samwan, nomata hem readim samfala scripture and givim advaes, hem important for olketa brata and sista luksavve hem tingim, minim, and laek helpem olketa. Datwan nao bae helpem olketa for acceptim kaonsel. (Readim Proverbs 27:23 *) Olketa elder shud fren gud witim olketa brata and sista lo kongregeson.

16. Wanem nao bae helpem elder for givim kaonsel wea olketa brata and sista savve acceptim?

 ¹⁶ Elder no laekem olketa brata and sista for tingse evritaem hem kam lo olketa, hem for givim kaonsel. So hem gud for elder spendem taem for story witim olketa, and showimaot hem tingim olketa brata and sista taem olketa feisim hard samting. Wanfala elder sei: “Sapos elder duim datwan, bae hem fren gud witim olketa. Then bae hem no hard tumas sapos hem need for givim kaonsel lo olketa.” And datwan bae mekem hem isi for brata or sista for acceptim kaonsel.

17. Wanem taem nao elder maet need for patient and kaen?

¹⁷ Patient and kaen. Sapos samwan no acceptim kaonsel firstaem, elder shud patient and kaen. Elder mas no kros sapos hem no kwiktaem for followim kaonsel. Bible story olsem abaotem wei blo Jesus: “Bae hem no brekem eni longfala grass wea bend finis, and bae hem no killim dae eni laet wea wick bilong hem no laet gud and wea klosap for dae.” (Matt. 12:20) So taem elder prea lo Jehovah, hem savve askem Jehovah for helpem brata or sista wea kasem kaonsel for minim why hem kasem kaonsel and for acceptim datwan. Maet datfala brata or sista needim taem for ting raonem kaonsel hia. Taem elder patient and kaen, bae hem laek for lisin lo datfala kaonsel. Elder mas mek sure tu kaonsel hia hem kam from Bible.

18. (a) Saed lo kaonsel, wanem nao olketa elder shud tingim? (b) Olsem piksa wea join witim datfala box lo page 19 showimaot, wanem nao datfala dadi and mami discussim?

¹⁸ Lane from mistek blo iu. From olketa elder no perfect, maet olketa no evritaem followim olketa idea wea disfala article storyim. (Jas. 3:2) Olketa elder bae duim mistek, bat hem gud for olketa lane from mistek hia. Sapos olketa brata and sista luksavve olketa elder lovem olketa, bae hem isi for olketa forgivim olketa elder taem olketa elder talem or duim samting wea mekem olketa feel nogud.—Lukim tu box “ Samting for Parents Tingim.”

19. Hao nao olketa elder savve givim kaonsel wea barava helpem olketa brata and sista?

¹⁹ Olsem iumi storyim finis, from olketa elder no perfect hem no isi for givim kaonsel lo olketa brata and sista. So hem gud for olketa followim olketa idea lo disfala article. Olsem example, elder need for mek sure hem garem stretfala reason for kaonselem wanfala brata or sista. And tu, hem shud tingim sapos hem need for givim datfala kaonsel, and sapos hem nao best wan for duim datwan. Bifor elder givim kaonsel, hem gud for askem brata or sista samfala kwestin and lisin gud, mekem elder luksavve lo hard samting hem feisim, and for minim hem. Elder laek for kaen and fren gud tu witim olketa brata and sista. Hem gud for olketa elder garem disfala goal: Kaonsel wea olketa givim shud helpem man and “mekem man hapi.”​—Prov. 27:9, NWT.