1. Why nao maet iumi kasem kaonsel, and why nao iumi evriwan needim datwan?

 IUMI evriwan needim kaonsel samfala taem. Maet iumi askem samwan wea iumi respectim for givim iumi advaes. Or sapos wanfala brata lukim iumi “start for go rong,” maet hem givim kaonsel lo iumi. (Gal. 6:1) Or samwan bae kaonselem iumi sapos iumi duim sin. Nomata why nao iumi kasem kaonsel iumi shud lisin and followim datfala kaonsel, bikos datwan bae helpem iumi and maet sevem laef blo iumi.​—Provebs 6:23.

2. Olsem Provebs 12:15 storyim, why nao iumi shud lisin lo advaes or kaonsel?

² Theme scripture blo disfala study encouragem iumi for ‘lisin long toktok blong waesman.’ (Provebs 22:17) No eniwan savve lo evri samting. Nomata iumi garem savve abaotem samting, samwan bae garem bigfala savve and experience winim iumi. (Readim Provebs 12:15.) So taem iumi lisin lo kaonsel or advaes, datwan showimaot iumi hambol, and hem showimaot iumi luksavve iumi no savve lo evri samting and needim help for duim samfala samting. Wise King Solomon sei: “No eni advaes, bae plan gorong, plande advaes, bae plan gohed.”​—Provebs 15:22.

3. Wanem nao tufala wei wea iumi savve kasem kaonsel?

³ Iumi savve kasem kaonsel taem iumi readim samting lo Bible or lo olketa pablikeson blo iumi, and datwan mekem iumiseleva luksavve lo samting wea iumi need for stretem. (Heb. 4:12) Iumi savve kasem kaonsel tu taem samwan story lo iumi olsem taem wanfala elder or nara brata talem iumi samting wea iumi need for waka lo hem. Samwan wea givim kaonsel from Bible lo iumi duim datwan bikos hem  lovem iumi. So iumi showimaot iumi tinghae taem iumi lisin and followim datfala kaonsel.

4. Olsem Eklesiastes 7:9 storyim, wanem nao iumi no laek for duim taem iumi kasem kaonsel?

⁴ Maet iumi faendem hard for acceptim kaonsel wea samwan givim lo iumi, and maet iumi feel nogud tu. Why nao olsem? Iumi savve iumi no perfect, bat taem samwan talem stret mistek blo iumi maet hem no isi for acceptim datwan. (Readim Eklesiastes 7:9.) Maet iumi mekem excuse and sei man wea kaonselem iumi no garem stretfala reason for givim iumi datfala kaonsel, or maet iumi sei hem no story kaen lo iumi. Or maet iumi sei: ‘Man hia no garem raet for kaonselem mi from hem tu garem olketa wik point!’ Sapos iumi tingse datfala kaonsel no fitim iumi, maet iumi no followim datwan, or maet iumi go story lo samwan wea bae talem samting wea iumi laek herem.

5. Wanem nao bae iumi storyim lo disfala article?

⁵ Lo disfala article bae iumi storyim samfala lo Bible wea no acceptim kaonsel and samfala wea acceptim kaonsel. Iumi bae storyim tu wanem bae helpem iumi for acceptim kaonsel and hao kaonsel savve helpem iumi.

6. Wanem nao iumi lanem from samting wea King Rehoboam duim taem hem kasem kaonsel?

⁶ Tingim example blo Rehoboam. Taem hem kamap king lo Israel, olketa pipol askem hem for mekem laef blo olketa isi winim wanem dadi blo hem, Solomon, askem olketa for duim. Gud samting wea Rehoboam duim nao hem askem advaes lo olketa leader blo Israel lo wanem for talem lo olketa pipol. Olketa leader hia talem hem, sapos hem duim wanem olketa pipol askem bae olketa gohed for sapotim hem. (Fas Kings 12:3-7) Luk olsem Rehoboam no laekem datfala advaes, so hem go askem advaes lo olketa fren blo hem wea hem growap witim olketa. Age blo olketa maet samting olsem 40 years, so masbi olketa garem samfala experience lo laef. (Mektu Kronikols 12:13) Nomata olsem, olketa givim rong advaes lo hem. Olketa talem hem for mekem laef blo pipol for hard go moa winim wanem Solomon duim. (Fas Kings 12:8-11) Rehoboam kasem tufala difren advaes, and hem shud askem Jehovah which wan nao hem shud followim. Bat hem disaed for followim advaes wea hem laekem, wea hem kasem from olketa fren blo hem. Rehoboam and olketa pipol blo Israel kasem nogud samting from datwan. Samfala taem iumi tu kasem kaonsel wea iumi no laekem. Nomata olsem, sapos datfala kaonsel hem kam from Bible iumi shud acceptim.

7. Wanem nao iumi lanem from samting wea happen lo King Uzziah?

⁷ King Uzziah no laek followim kaonsel. Hem go insaed lo holy ples lo temple wea olketa priest nomoa savve go insaed, and hem laek for bonem incense. Olketa priest blo Jehovah talem hem: ‘Yu no garem raet fo bonem insens fo mekem wosip long Jehovah! Mifala prist nomoa garem raet fo bonem insens.’ Waswe, Uzziah acceptim datfala kaonsel? Sapos hem hambol and stretawe go aot from temple, Jehovah maet forgivim hem. Bat Uzziah no duim olsem and hem “kros tumas.” Why nao hem no laek followim kaonsel blo olketa priest? From hem nao king, hem tingse hem garem raet for duim eni samting hem laekem, bat wanem hem duim hem againstim Jehovah.  So Jehovah panisim Uzziah and hem garem leprosy “go kasem taem hemi dae.” (Mektu Kronikols 26:16-21) Wanem nao iumi lanem from diswan? Nomata wanem responsibility iumi garem, sapos iumi no laek followim kaonsel wea kam from Bible, bae Jehovah no hapi lo iumi.

8. Waswe, Job followim kaonsel wea hem kasem?

⁸ Bible storyim samfala wea no laek followim kaonsel, bat Bible storyim tu olketa wea acceptim kaonsel and kasem blessing from datwan. Tingim example blo Job. Hem wanfala gud man, bat hem no perfect. Taem hem kasem hard taem, hem talem samting wea no stret, so Elihu and Jehovah kaonselem hem. Waswe, Job followim datfala kaonsel? Ia, hem hambol and acceptim datwan. Hem sei: “Mi bin tokabaotem olketa samting wea mi no minim . . . So, mi les tumas long mi seleva nao, an mi sidaon insaet long asis an long dast fo somaot dat mi sensim tingting blong mi.” Jehovah blessim Job bikos hem hambol.​—Job 42:3-6, 12-17.

9. Wanem nao Moses duim taem hem kasem kaonsel, and wanem gud example nao hem showimaot for iumi?

⁹ Moses tu willing for acceptim kaonsel taem hem duim bigfala mistek. From Moses kros lo olketa Israelite hem no mekhae lo Jehovah bat mekhae lo hemseleva. From diswan, Jehovah disaed for no letem hem for go insaed lo Promis Land. (Nambas 20:1-13) Taem Moses askem Jehovah for changem disison blo hem, Jehovah sei lo Moses: “Yu mas no talem eni toktok moa abaotem disfala samting.” (Diutronomi 3:23-27) Moses no feel nogud lo datwan, bat hem acceptim wanem Jehovah talem, and Jehovah gohed for iusim hem for leadim olketa Israelite. (Diutronomi 4:1) Job and Moses acceptim kaonsel, and tufala hia gud example for iumi followim. Job willing for stretem tingting blo hem, and Moses showimaot hem acceptim kaonsel blo Jehovah bikos hem gohed faithful nomata hem lusim bigfala privilege blo hem.

10. (a) Olsem Provebs 4:10-13 storyim, hao nao kaonsel savve helpem iumi? (b) Storyim example blo samfala wea acceptim kaonsel?

¹⁰ Taem iumi followim example blo olketa olsem Job and Moses, datwan bae barava helpem iumi. (Readim Provebs 4:10-13.) Staka brata and sista blo iumi duim datwan. Olsem example, Emmanuel, wanfala brata lo Congo storyim wanem hem duim taem hem kasem kaonsel: “Samfala brata lo kongregeson luksavve mi start for wikdaon lo spiritual wei and givim mi kaonsel for helpem mi. Mi followim datfala kaonsel, and datwan helpem mi for misstim staka problem.” * Megan, wanfala pioneer sista lo Canada, hem sei: “Taem mi kasem kaonsel, samfala taem mi no laek herem, bat mi luksavve mi needim datfala kaonsel.” And Marko, wanfala brata from Croatia sei: “Nomata mi lusim wanfala privilege bifor, mi luksavve kaonsel wea mi kasem lo datfala taem helpem mi for fren bak witim Jehovah.”

11. Wanem nao Brata Karl Klein lanem abaotem why hem gud for acceptim kaonsel?

¹¹ Brata Karl Klein wea hem wanfala member blo Governing Body bifor, hem tu kasem kaonsel wea helpem hem. Brata Klein storyim hao wantaem hem kasem strong kaonsel from Brata Rutherford, wea hem gud fren blo hem. Brata Klein sei  firstaem hem feel nogud taem hem kasem datfala kaonsel. Hem sei: “Next taem [Brata Rutherford] lukim mi, hem hello gud kam lo mi. Bat from mi feel nogud, mi no hello gud lo hem nao. Brata Rutherford warnim mi olsem, ‘Keakea Karl, Devil hem aftarem iu!’ Mi shame so mi sei, ‘No eniting nomoa Brata Rutherford.’ Bat hem luksavve mi feel nogud, and talem moa datfala warning, ‘Hem olraet, bat keakea. Devil hem aftarem iu!’ Wanem hem talem hem tru, bikos taem iumi gohed feel nogud lo samting wea wanfala brata talem nomata hem stret . . . hem isi for Devil spoelem iumi.” * (Ephesus 4:25-27) Brata Klein acceptim kaonsel blo Brata Rutherford and tufala gohed for fren gud.

12. Wanem nao savve helpem iumi for acceptim kaonsel? (Sams 141:5)

¹² Wanem nao savve helpem iumi for acceptim kaonsel? Iumi need for hambol and tingim hao iumi no perfect and samfala taem iumi no tingting gud bifor iumi duim samting. Olsem iumi storyim finis, firstaem Job garem tingting wea no stret abaotem samting. Bat gogo hem acceptim kaonsel, and Jehovah blessim hem bikos hem hambol. Job acceptim kaonsel wea hem kasem from Elihu nomata Elihu young winim hem. (Job 32:6, 7) Sapos iumi hambol iumi bae acceptim kaonsel, nomata iumi tingse iumi shud no kasem datwan, or samwan wea kaonselem iumi hem young winim iumi. Wanfala elder lo Canada sei, “Olketa narawan savve lukim olketa wik point blo iumi winim iumiseleva, so taem narawan kaonselem iumi datwan hem for helpem iumi gohed gud lo spiritual wei.” Iumi evriwan need for gohed waka hard for showimaot olketa gudfala wei and for duim gud ministry blo iumi.​—Readim Sams 141:5.

13. Hao nao iumi shud ting lo kaonsel?

¹³ Luksavve kaonsel hem wanfala wei wea Jehovah showimaot hem lovem iumi. Jehovah laekem iumi for garem gudfala laef. (Provebs 4:20-22) Hem showimaot hem lovem iumi taem iumi kasem kaonsel from nara Christian, or iumi readim samting lo Bible or olketa pablikeson blo iumi wea helpem iumi. Hebrew 12:9, 10 sei: “God stretem iumi for helpem iumi.”

14. Wanem nao iumi shud tingim taem iumi kasem kaonsel?

¹⁴ Tingim hao kaonsel savve helpem iumi. Taem iumi kasem kaonsel, maet iumi tingse man wea kaonselem iumi no tingim feeling blo iumi. Hem tru, man wea givim kaonsel shud traem best for  kaen taem hem duim datwan. * (Galatia 6:1) Bat nomata iumi tingse man wea kaonselem iumi hem tok stret tumas lo iumi, hem gud for tingim hao datfala kaonsel savve helpem iumi. Bae hem gud for tingim: ‘Nomata mi no laekem hao datfala man story lo mi, maet samting hem talem lo mi hem tru. Nomata mi savve hem garem olketa wik point, waswe, kaonsel blo hem savve helpem mi?’ Bae hem wise for lisin and followim kaonsel wea iumi kasem.​—Provebs 15:31.

15. Why nao iumi shud askem advaes?

¹⁵ Bible sei hem gud for askem advaes. Provebs 13:10 sei: “Man hemi herem advaes hemi waes.” Hem tru, iumi bae mekem olketa gud disison sapos iumi askem advaes and no weit for samwan givim kaonsel lo iumi. So iumi shud no hol bak for askem advaes lo olketa narawan.

16. Wanem nao samfala samting wea iumi maet needim advaes or kaonsel for hem?

¹⁶ Wanem nao samfala samting wea iumi maet needim advaes or kaonsel for hem from olketa nara brata or sista? Tingim olketa example hia. (1) Wanfala sista askem nara sista for go witim hem lo Bible study blo hem. Bihaen hem askem datfala sista for givim hem advaes lo hao for kamap gudfala teacher. (2) Wanfala singol sista laek peim longkwi, so hem askem tingting blo wanfala mature sista abaotem longkwi wea hem laekem. (3) Wanfala brata bae duim first pablik tok blo hem. Hem askem brata wea savve tumas lo hao for duim tok for lisin gud lo tok blo hem, and then talem hem eni samting for hem waka lo hem. Hem gud tu for olketa brata wea givim tok for staka year finis for askem kaonsel from nara brata wea garem experience, and then followim datfala kaonsel.

17. Sapos iumi lisin lo kaonsel, hao nao datwan savve helpem iumi?

¹⁷ Lo olketa week and month wea bae kam, iumi bae kasem kaonsel from samwan or iumi bae readim samting wea mekem iumi luksavve iumi need for stretem samting. Lo taem olsem, hem gud for tingim wanem iumi lanem lo disfala article. Iumi mas hambol, tingim hao datfala kaonsel savve helpem iumi, and followim kaonsel wea iumi kasem. Iumi evriwan needim kaonsel and advaes, and Bible sei sapos iumi “lisin long advaes” bae iumi kamap wise.​—Provebs 19:20.