Mi born lo 1941 lo Paris, France, and mami and dadi blo mi no rich. Mi barava laekem skul bikos mi savve lanem staka samting. So taem mi ten years mi sorre tumas bikos mi mas stop for skul from mi kasem TB. Taem mi muv raon mi savve kofkof and shortwind, so olketa doctor sei mi mas rest. For staka month, mi iusim datfala taem for readim wanfala dictionary and for lisin lo olketa university program lo radio. Mi hapi tumas taem doctor sei mi kamap gud nao and mi savve go bak lo skul. Mi tinghae tumas lo waka blo olketa doctor, and mi start for garem hope hao wanday bae mi savve healim sik pipol. Taem dadi askem mi wanem mi laek for duim taem mi growap, mi evritaem sei “mi laek for kamap doctor.” Datwan nao goal blo mi.

Famili blo mi Catholic, bat mi no savve lo staka samting abaotem God and mi garem staka kwestin abaotem religion. Taem mi studyim science lo university, datwan nao helpem mi for luksavve God wakem olketa samting.

Mi tingim hao lo wanfala class mi iusim microscope for lukluk lo olketa cell blo wanfala plant. Mi interest for lukim hao olketa cell garem wei for protectim seleva from hot and cold. Mi lukim tu hao solt or wata savve mekem size blo samting insaed lo cell (cytoplasm) for change. Kaen samting olsem mekem mi luksavve olketa samting wea laef savve change taem samting affectim olketa. Taem mi studyim design blo olketa cell, mi luksavve datfala design hem barava spesol, so hard for laef kamap seleva.

 Lo mek-tu year blo mi lo university, mi studyim olketa nara samting wea pruvim God hem stap. Mi studyim hao olketa masol and tendon lo arm and lo hand waka tugeta for mekem olketa finger savve bend. Hao evri masol and tendon waka gud tugeta hem showimaot arm and hand blo iumi barava design gud. Olsem example, mi lanem hao tendon lo finger wea join lo wanfala masol lo arm divaed lo ples wea tendon join lo mek-tu bon blo finger. Ples wea datfala tendon divaed mekem hem olsem wanfala bridge. Olketa nara tendon wea join lo bon lo end blo finger stap andanit disfala bridge and savve muv ap and daon, bat olketa tissue holem olketa tendon hia klosap lo bon. Datwan mekem olketa tendon no poke aot from finger. Wanem mi lanem helpem mi for luksavve samwan wea garem bigfala savve nao designim body blo iumi.

Mi tinghae go moa lo God taem mi lanem olketa samting wea happen taem baby hem born. Mi lanem hao bifor baby hem born hem kasem oxygen from mami thru lo cord lo bele blo baby. Dastawe, alveoli (wea olsem staka barava smol balloon insaed lo lung) hem no garem air insaed bifor baby hem born. Bihaen 26 week each alveoli start for garem liquid insaed (wea olketa kolem surfactant). Stretawe bihaen baby hem born staka spesol samting hem happen mekem baby savve brith. Firstaem, wanfala hol lo heart blo baby hem klos mekem blood go lo tufala lung. Then, taem baby start for brith, air go insaed lo olketa alveoli and datfala liquid mekem hem isi for alveoli open for tekem air insaed. Then baby fit for gohed brith seleva.

Mi laek for savve lo God wea designim olketa samting hia, so mi start for readim Bible. Mi barava interest lo olketa law abaotem hao for stap klin, wea God givim olketa Israelite winim 3,000 year go finis. God talem olketa Israelite hao bihaen olketa toilet olketa mas berem datwan. Hem sei tu olketa mas swim mekem olketa klin, and samwan wea garem sik wea savve spred mas quarantine. (Levitikas 13:50; 15:11; Diutronomi 23:13) Bible storyim diswan longtaem go finis, bat olketa scientist just luksavve hao sik savve spred 150 year go finis nomoa. Mi lanem tu hao olketa law for olketa Israelite mas keepim olketa seleva klin hem helpem olketa for misstim samfala sik. (Levitikas 12:1-6; 15:16-24) Mi luksavve hao God givim olketa law hia mekem olketa Israelite savve stap gud, and hem blessim olketa wea followim law blo hem. Diswan mekem mi sure Bible hem kam from God, bat mi no savve lo nem blo God lo datfala taem.

Taem mi duim university course blo mi for kamap doctor, mi meetim Lydie. Mi no finisim university yet taem mitufala marit lo 1965. Lo taem wea mi startim datfala niu clinic lo 1971, mitufala Lydie garem finis thrifala pikinini, and gogo mifala garem sixfala pikinini. Lydie hem gudfala waef and mami and hem barava sapotim mi lo waka blo mi.

 Mi waka lo wanfala hospital for thrifala year bifor mi startim datfala niu clinic. Olsem mi storyim finis, wanfala hasband and waef kam lo clinic blo mi. Mi redi for prescribem medicine wea hasband needim, and waef sei lo mi: “Plis Doctor, mifala no acceptim medicine wea garem blood insaed.” Mi sapraes and sei: “Why nao olsem?” Waef hem sei: “Mitufala Jehovah’s Witness.” Mi nating savve lo disfala religion and mi no savve lo wanem olketa bilivim abaotem blood. So waef showim mi from Bible why nao tufala disaed for no tekem blood. (Acts 15:28, 29) Then tufala storyim hao Kingdom blo God bae finisim sik and dae, and pipol bae no safa moa. (Rev. 21:3, 4) Mi sei lo tufala: “Iu barava storyim wanem mi hope for hem from taem mi smol yet! Mi kamap doctor for helpem pipol wea safa.” Mi hapi tumas lo story hia so mifala gohed story for wan and haf hour. Tufala teachim mi tu hao Jehovah nao hem nem blo datfala God wea mi tinghae lo olketa design blo hem. Bihaen tufala go, mi disaed for lusim Catholic religion.

Thrifala taem datfala hasband and waef kam lukim mi lo clinic, and each taem mifala story for winim wan hour. Mi laek for gohed storyim Bible, so mi invaetem tufala for kam lo haos blo mi. Tufala start for studyim Bible witim mi and Lydie, bat Lydie no agree hao olketa teaching blo Catholic hem no stret. So mi invaetem wanfala priest for kam story witim mitufala lo haos. Mi sei for priest iusim Bible nomoa for storyim wanem olketa Catholic bilivim, and datfala story gohed kasem leit naet. Bihaen datwan, Lydie luksavve Olketa Jehovah’s Witness teachim olketa tru samting. Mitufala gohed study and gogo mitufala baptaes lo 1974.

Mi hapi tumas for duim waka blo doctor, bat bihaen mi lanem plan blo God for olketa man, mi luksavve hem barava important for mi and famili blo mi for worshipim Jehovah. Mi and Lydie teachim olketa pikinini for lovem God and pipol, and for followim olketa standard blo God. Datwan mekem famili blo mifala hapi and stap gud tugeta.​—Matt. 22:37-39.

Olketa pikinini blo mitufala savve mi and Lydie disaedem evri samting tugeta. Olketa savve mitufala evritaem followim datfala Bible principle wea sei “sapos iu sei iu  bae duim samting, iu mas duim datwan.” (Matt. 5:37) Olsem example, wantaem Lydie stopem big gele blo mifala wea 17 years for go wakabaot witim samfala young wan. Wanfala lo olketa hia sei lo hem, “Sapos mami no letem iu, go askem dadi blo iu bikos bae hem letem iu for go!” Bat dota blo mifala sei: “Mi savve finis dadi bae agree witim mami. Tufala disaedem evri samting tugeta.” Sixfala pikinini blo mifala savve mitufala traem best for followim olketa Bible principle. Mitufala hapi tumas bikos distaem staka lo famili blo mifala gohed for worshipim Jehovah.

From mi wanfala doctor, mi laek iusim savve blo mi for helpem olketa brata and sista. So mi duim volunteer waka lo Bethel lo Paris and then lo niu Bethel lo Louviers. Mi commuter lo Bethel for samting olsem 50-fala year. Mi garem staka fren lo Bethel and samfala winim 90 years. Wanfala naes samting happen tu taem mi meetim wanfala niu Bethelite. Mi faendaot mi nao doctor wea helpem mami blo hem taem hem born 20 year go finis!

For staka year mi lukim hao Jehovah iusim organization blo hem for leadim and protectim pipol blo hem, and datwan mekem mi tinghae tumas lo Jehovah. Start lo samting olsem 1980, Governing Body arrange for samfala brata from branch lo United States for visitim olketa big hospital for story witim olketa doctor and olketa narawan wea waka lo hospital for helpem olketa minim why olketa Witness no tekem blood.

Then lo 1988, Governing Body startim wanfala niu department lo Bethel wea olketa kolem Hospital Information Service. Firstaem, disfala department lukaftarem olketa Hospital Liaison Committee (HLC) lo United States. HLC helpem olketa Witness wea sik for faendem olketa doctor wea willing for no iusim blood taem olketa operate. Gogo, Governing Body disaed for garem olketa HLC lo France and olketa nara kantri lo world. Mi tinghae tumas lo hao Jehovah iusim organization blo hem for helpem olketa brata and sista wea sik.

Nomata mi laekem tumas for helpem pipol wea sik, mi luksavve hem barava important for helpem pipol for savve lo Jehovah God. Bihaen mi retire, mi and Lydie duim regular pioneer waka and spendem staka hour evri month for preachim gud nius abaotem Kingdom blo God. Distaem, nomata mifala olo mifala gohed for duim best lo preaching waka.

Mi gohed for duim wanem mi fit for duim for helpem olketa wea sik. Bat mi luksavve nomata doctor wea garem bigfala savve, hem no fit for finisim sik or dae. So mi luk forward for taem wea God bae finisim pain, sik, and dae lo niu world. Lo datfala taem, bae mi garem staka taem for lanem moa samting abaotem spesol wei wea God designim body blo iumi and olketa nara creation blo hem. Wanem mi hope for hem taem mi pikinini hem klosap nao for kamap tru. Lo datfala taem laef bae hem gud tumas!