1-2. (a) Why nao staka pipol faendem hard for trustim olketa wea garem paoa? (b) Wanem nao bae iumi storyim lo disfala article?

 DISTAEM pipol faendem hard for trustim olketa wea garem paoa. Maet olketa lukim olketa gavman and law protectim olketa wea rich or garem hae position, bat olketa no helpem pipol wea poor. Bible sei olsem: “Samfala taem pipol i bosim olketa narafala pipol, so olketa safa.” (Eklesiastes 8:9) Pipol maet lukim tu olketa bigman blo religion duim olketa nogud samting, and diswan mekem olketa for no trustim God. So taem iumi studyim Bible witim samwan, iumi need for helpem hem for trustim Jehovah and olketa brata wea lead lo organization blo hem.

² Iumi wea insaed lo truth for staka year finis tu mas gohed for trustim Jehovah and organization blo hem lo evri samting. Bat samting kamap wea maet mekem iumi garem daot. So lo disfala article bae iumi storyim thrifala samting wea maet testim faith blo iumi, olsem: (1) taem iumi readim samfala story lo Bible, (2) taem iumi kasem samfala direction from organization blo Jehovah, and (3) taem iumi feisim olketa hard samting lo future.

3. Taem iumi readim samfala story lo Bible, why nao maet iumi kwestinim disison blo Jehovah?

 ³ Taem iumi readim samfala story lo Bible, maet iumi kwestinim why Jehovah mekem samfala disison and hao hem judgem samfala pipol. Olsem example, lo Bible  buk blo Nambas, iumi read abaotem wanfala Israelite wea kolektem firewood lo Sabbath, and then Jehovah judgem hem for dae. Bat Mek-tu Samuel storyim hao staka handred year bihaen datwan, Jehovah forgivim King David, nomata hem duim adultery and killim nara man dae. (Nambas 15:32, 35; Mektu Samuel 12:9, 13) Maet iumi ting olsem, ‘Why nao Jehovah forgivim David wea duim adultery and wea killim man dae, bat hem judgem datfala nara man for dae nomata hem duim sin wea luk olsem hem smol nomoa?’ For ansarem disfala kwestin, bae iumi storyim thrifala samting iumi shud tingim taem iumi readim Bible.

4. Hao nao Jenesis 18:20, 21 and Diutronomi 10:17 helpem iumi for trustim olketa disison blo Jehovah?

⁴ Bible no evritaem storyim evri samting wea happen. Olsem example, iumi savve David hem barava repent from olketa sin blo hem. (Sams 51:2-4) Bat staka samting iumi no savve abaotem datfala man wea brekem law blo Sabbath. Olsem example, waswe, hem sorre lo wanem hem duim? Waswe, hem duim olketa nara samting wea brekem law blo Jehovah bifor? Waswe, hem kasem eni warning bifor wea hem no laek followim? Bible no storyim olketa samting hia. Bat samting wea iumi barava sure lo hem nao: Jehovah evritaem duim “stret” samting. (Diutronomi 32:4) From Jehovah savve lo full story, hem no olsem olketa man wea savve judge followim wanem narawan talem, or from hem fevarem samwan, or eni nara reason. (Readim Jenesis 18:20, 21; Diutronomi 10:17.) Taem iumi sure Jehovah evritaem duim wanem hem stret, datwan helpem iumi for trustim wanem hem disaedem. Nomata maet iumi garem olketa kwestin abaotem samting wea iumi readim lo Bible, iumi savve evri samting wea Jehovah duim hem “stret fogud.”​—Sams 145:17.

5. Why nao iumi no savve judgem samwan olsem Jehovah? (Lukim tu box “ Iumi No Savve Judgem Narawan Olsem Jehovah From Iumi No Perfect.”)

⁵ From iumi no perfect iumi no savve judgem narawan olsem Jehovah. Iumi sorre lo pipol taem olketa kasem samting  wea no stret bikos God wakem iumi for olsem. (Jenesis 1:26) Bat from iumi no perfect, maet iumi no judgem samwan lo stretfala wei, nomata iumi tingse iumi savve lo full story. Olsem example, tingim hao Jonah no hapi witim disison blo Jehovah for showimaot mercy lo pipol lo Nineveh. (Jona 3:10–4:1) Bat tingim gud samting wea kamaot from datfala disison. Winim 120,000 pipol lo Nineveh olketa sev! Jehovah nao disaedem stretfala samting and no Jonah.

6. Why nao Jehovah no need for explainim lo iumi why hem duim samting?

⁶ Jehovah no need for explainim why hem duim samting. Hem tru, Jehovah letem samfala lo bifor for storyim feeling blo olketa abaotem olketa disison blo hem. (Jenesis 18:25; Jona 4:2, 3) And samfala taem hem explainim why hem disaedem samfala samting. (Jona 4:10, 11) Nomata olsem, Jehovah no need for explainim lo iumi why hem duim samting. Hem no needim iumi for appruvim olketa disison blo hem, from hem nao Creator blo iumi.​—Aesaea 40:13, 14; 55:9.

7. Wanem nao maet hem no isi for duim, and why nao olsem?

⁷ Iumi trustim Jehovah for evritaem duim wanem hem stret. Bat maet hem no isi for iumi trustim olketa man wea hem appointim for leadim iumi. Maet iumi kwestinim sapos olketa followim direction blo Jehovah or followim tingting blo olketa seleva nomoa. Samfala lo bifor tu maet garem tingting olsem. Tingim tufala example wea  paragraf 3 storyim. Maet relative blo man wea brekem law blo Sabbath kwestinim sapos Moses story witim Jehovah bifor Moses sei hem mas dae. And maet eni fren blo Uriah kwestinim sapos David iusim position blo hem for no kasem panis wea hem fit for kasem from hem duim adultery witim waef blo Uriah. Jehovah trustim olketa wea hem appointim for lead lo organization blo hem and lo kongregeson. So sapos iumi no trustim olketa hia, hem olsem iumi no trustim Jehovah.

8. Olsem Acts 16:4, 5 storyim, wanem nao governing body lo first-century duim wea semsem witim wanem “datfala wakaman wea faithful and wise” duim distaem?

⁸ Distaem Jehovah iusim “datfala wakaman wea faithful and wise” for leadim organization blo hem lo earth. (Matt. 24:45) Olsem governing body lo first century, Jehovah iusim datfala wakaman for lukaftarem pipol blo hem and datfala wakaman givim olketa direction lo olketa elder. (Readim Acts 16:4, 5.) Olketa elder mek sure kongregeson kasem olketa direction hia. Iumi showimaot iumi trustim Jehovah lo evri samting taem iumi followim direction wea iumi kasem from organization and olketa elder.

9. Why nao maet samfala taem iumi faendem hard for sapotim disison blo olketa elder?

⁹ Samfala taem, maet iumi faendem hard for sapotim disison blo olketa elder. Olsem example, no longtaem go nomoa samfala change kamap lo olketa kongregeson and circuit. Maet olketa elder askem samfala pablisa for muv lo nara kongregeson lo datfala area mekem kongregeson wea smol garem moa pablisa. Sapos olketa askem iumi for joinim nara kongregeson, maet iumi sorre for lusim olketa fren and famili blo iumi. Olketa elder no kasem direction from God for which kongregeson each pablisa bae  joinim, so maet iumi tingse iumi no need for followim disison blo olketa. Bat Jehovah trustim olketa elder for mekem olketa disison hia, and iumi mas trustim olketa tu. *

10. Olsem Hebrew 13:17 storyim, why nao iumi shud sapotim disison blo olketa elder?

¹⁰ Why nao iumi shud sapotim disison blo olketa elder nomata iumi no agree witim datwan? Bikos hem bae helpem kongregeson for gohed garem wan mind. (Eph. 4:2, 3) Taem evriwan lo kongregeson hambol for followim olketa disison blo olketa elder, hem bae mekem kongregeson gohed gud. (Readim Hebrew 13:17.) And tu, taem iumi showimaot iumi trustim olketa elder wea Jehovah appointim for lukaftarem kongregeson, iumi showimaot iumi trustim hem tu.​—Acts 20:28.

11. Wanem nao savve helpem iumi for trustim direction wea iumi kasem from olketa elder?

¹¹ Samting wea bae helpem iumi for trustim direction wea iumi kasem from olketa elder, hem for tingim hao olketa prea for holy spirit taem olketa ting raonem olketa samting wea affectim kongregeson. And tu, olketa ting raonem olketa Bible principle, and lukluk lo olketa gaedlaen wea olketa kasem from organization blo Jehovah. Olketa elder barava laek for mekem Jehovah hapi and for lukaftarem gud pipol blo hem. Olketa savve olketa mas ansa lo Jehovah for olketa disison wea olketa mekem. (1 Pet. 5:2, 3) Tingim diswan, pipol lo world no stap gud tugeta bikos lo religion, politik, and skin kala, bat pipol blo Jehovah wan mind for worshipim hem. Diswan hem bikos Jehovah nao leadim and blessim organization blo hem.

12. Wanem nao samfala samting wea olketa elder mas tingim for luksavve sapos samwan hem repent?

¹² Jehovah givim big responsibility lo olketa elder for keepim kongregeson klin lo spiritual wei. Sapos wanfala brata or sista duim bigfala sin, Jehovah expectim olketa elder for disaed sapos hem savve stap lo kongregeson. Olketa need for faendaot sapos hem repent. Olketa bae tingim olketa samting olsem: Maet brata or sista hia sei hem repent, bat waswe, hem barava sorre lo nogud samting wea hem duim? Waswe, hem disaed strong for no duim moa datfala sin? Sapos hem garem olketa nogud fren and gogo hem sin, waswe, hem willing for stop for fren witim olketa? Olketa elder bae prea lo Jehovah, ting raonem information wea olketa kasem and olketa Bible principle, and trae for luksavve sapos hem barava repent. Then bae olketa disaed sapos hem savve stap lo kongregeson, or hem mas disfellowship.​—1 Cor. 5:11-13.

13. Wanem nao maet iumi warim sapos wanfala fren or relative blo iumi hem disfellowship?

¹³ Sapos olketa elder disaed for disfellowshipim samwan and hem no wanfala fren or relative blo iumi, maet hem isi for iumi acceptim disison blo olketa. Bat sapos hem wanfala fren or relative blo iumi, maet iumi faendem hard for trustim disison blo olketa elder. Maet iumi wari nogud olketa elder no savve lo full story, or maet iumi wari olketa elder no judgem hem followim hao Jehovah bae judgem hem. Wanem nao bae helpem iumi for trustim disison blo olketa elder?

14. Wanem nao bae helpem iumi sapos olketa elder disfellowshipim wanfala fren or relative blo iumi?

 ¹⁴ Iumi shud tingim hao hem arrangement blo Jehovah for disfellowshipim samwan, bikos datwan bae protectim kongregeson and maet helpem man wea sin. Sapos man wea sin and no repent gohed stap lo kongregeson, maet olketa narawan followim hem for duim sin tu. (Gal. 5:9) And tu, maet hem no luksavve hao sin wea hem duim hem barava nogud and maet hem tingse hem no need for changem tingting and wei blo hem for mekem Jehovah hapi. (Eklesiastes 8:11) Iumi savve sure olketa elder luksavve hem big responsibility for disaed for disfellowshipim samwan. Olsem olketa judge lo Israel bifor, olketa elder luksavve olketa mas judge followim hao Jehovah bae judgem samwan.​—Mektu Kronikols 19:6, 7.

15. Why nao iumi need for trustim Jehovah lo evri samting distaem?

¹⁵ Disfala nogud world hem klosap tumas for finis, so iumi need for trustim Jehovah lo evri samting. Why nao olsem? Lo taem blo bigfala trabol maet iumi kasem olketa direction wea no mek sense lo iumi or wea no isi for followim. Iumi savve Jehovah seleva bae no talem iumi olketa direction hia, bat hem bae iusim olketa brata wea lead for duim datwan. Lo datfala taem iumi bae no laek for kwestinim sapos direction hem kam from Jehovah, and for kwestinim sapos olketa brata hia followim tingting blo olketa seleva nomoa. Waswe, bae iumi trustim Jehovah and organization blo hem lo datfala taem? Sapos iumi trustim direction blo organization distaem, datwan bae helpem iumi for trustim olketa direction wea iumi kasem lo taem blo bigfala trabol.​—Luke 16:10.

16. Why nao bae iumi need for trustim hao Jehovah judgem pipol lo taem blo Armageddon?

¹⁶ Bae iumi need for trustim tu hao Jehovah bae judgem pipol lo taem blo Armageddon. Bifor datwan, iumi laekem olketa relative blo iumi wea no Witness for disaed for worshipim Jehovah bifor end hem kam. Bat lo Armageddon, Jehovah bae iusim Jesus for judgem olketa sapos olketa bae laef or dae. (Matt. 25:31-33; 2 Thess. 1:7-9) Iumi bae no disaedem hu nao shud kasem mercy blo Jehovah or nomoa. (Matt. 25:34, 41, 46) Waswe, bae iumi trustim wanem Jehovah disaedem, or bae samting hem disaedem mekem  iumi for stambol? Diswan helpem iumi for luksavve hem important for trustim Jehovah distaem, mekem iumi barava trustim hem lo future.

17. Wanem nao olketa gud samting wea bae kamaot from olketa disison and judgment blo Jehovah?

¹⁷ Lo niu world iumi bae hapi tumas taem iumi lukim olketa gud samting wea kamaot from judgment blo Jehovah. Jehovah bae finisim false religion, olketa bigfala bisnis, and olketa gavman wea spoelem pipol and mekem olketa for safa. Lo datfala taem iumi bae no sik or olo, and no eniwan bae dae. Satan and olketa demon blo hem bae no savve spoelem iumi for wan thousand year and evri nogud samting wea olketa kosim bae nomoa nao. (Rev. 20:2, 3) Lo datfala taem bae iumi hapi tumas from iumi trustim olketa disison and judgment blo Jehovah!

18. Wanem nao iumi savve lanem from olketa Israelite, olsem Nambas 11:4-6 and 21:5 storyim?

¹⁸ Lo niu world bae iumi need for trustim Jehovah tu bikos samfala hard samting bae kamap. Tingim wanem hem happen lo olketa Israelite no longtaem bihaen olketa kamap free from Egypt. Samfala start for komplen bikos olketa misstim olketa frut and vegetable lo Egypt, and olketa les lo manna wea Jehovah provaedem. (Readim Nambas 11:4-6; 21:5.) Maet iumi warim olketa semkaen samting tu bihaen lo bigfala trabol. Maet staka waka stap for iumi duim for klin ap bihaen lo Armageddon and for isisi mekem earth kamap paradaes. And tu, maet firstaem laef blo iumi no isi. Waswe, bae iumi komplen abaotem samting wea Jehovah provaedem for iumi lo datfala taem? Iumi savve sure sapos iumi tinghae lo olketa samting wea Jehovah provaedem for iumi distaem, bae iumi tinghae lo wanem hem bae provaedem for iumi lo datfala taem.

19. Storyim olketa main point blo disfala article.

¹⁹ Iumi need for trustim hao Jehovah hem evritaem duim stret samting. And tu, iumi need for trustim olketa wea lead lo organization blo Jehovah bae followim olketa direction blo hem. Evritaem tingim toktok blo Jehovah wea Isaiah raetem: “Sapos iufala no wari tumas and trustim mi, bae mi strongim iufala.”​—Isa. 30:15, NWT.