LO TAEM blo Bible, boy or famili blo hem bae peim bride-price lo famili blo gele taem tufala famili hia agree for tufala marit. Maet olketa givim olketa animal, selen, or olketa nara samting for peim bride-price. And samfala, olsem Jacob, duim waka for peim bride-price. Dadi blo Rachel agree for Jacob maritim Rachel sapos Jacob waka for hem for sevenfala year. (Jenesis 29:17, 18, 20) Wanem nao samfala reason for olketa peim bride-price?

Carol Meyers, wea hem studyim laef blo pipol lo datfala taem, hem sei: “Boy peim bride-price lo famili blo gele bikos bihaen gele marit bae hem no waka moa lo garden or farm blo famili blo hem.” Bihaen boy peim bride-price, maet famili blo hem and famili blo gele kamap fren nao bikos lo datfala marit, and tufala famili savve helpem each other sapos eni hard taem kamap. Nara samting tu, bihaen famili blo gele acceptim bride-price, datwan showimaot famili letem gele for engage witim boy and bae hem lusim famili blo hem, and datfala boy wea hem bae maritim nao bae lukaftarem hem.

Datfala bride-price hem no minim famili blo datfala gele salem gele lo boy. Wanfala buk wea storyim laef lo Israel bifor sei: “Maet taem boy peim bride-price lo famili blo gele hem luk olsem hem baem datfala gele. Bat [bride-price] hem no for baem gele. Hem peim bride-price lo famili blo gele from gele blo olketa bae lusim olketa.”

Distaem, lo samfala kantri, pipol peim bride-price tu. Taem Christian parents askem bride-price, olketa no laek for “ova tumas” lo wanem olketa askem. (Phil. 4:5; 1 Cor. 10:32, 33) Datwan bae showimaot olketa no “laekem tumas selen” and olketa no greedy. (2 Tim. 3:2) Sapos parents blo gele askem bride-price wea hae tumas, maet boy mas weit firstaem for maritim gele and mas waka for kasem selen for peim datfala bride-price. Or maet datfala boy mas stop for duim pioneer waka mekem hem waka full taem for selen for peim datfala bride-price wea hae tumas.

Lo samfala kantri, gavman nao markem bride-price. Sapos olsem, Christian parents mas followim law and peim price wea gavman markem. Why nao olsem? Bikos Bible sei olketa Christian mas “stap anda long olketa wea rul” and obeyim olketa law wea no againstim olketa law blo God.​—Rome 13:1; Acts 5:29.