LO LAW blo Moses, olketa Israelite savve givim olketa kurukuru and pigeon for sakrifaesim lo Jehovah. Lo olketa law abaotem sakrifaes hem storyim hao olketa Israelite savve givim kurukuru or pigeon for sakrifaesim. (Levitikas 1:14; 12:8; 14:30) Diswan hem helpem olketa Israelite bikos samfala taem bae hem no isi for faendem olketa kurukuru. Why nao olsem?

Olketa kurukuru savve stap lo Israel lo olketa month wea hot. Bat evri year lo October taem hem cold lo Israel, olketa kurukuru savve flae go lo nara kantri and then kam bak lo Israel lo spring. (Nambawan Singsing 2:11, 12; Jeremaea 8:7) So lo winter bae hem hard for olketa Israelite kasem kurukuru for sakrifaesim lo Jehovah.

Bat hem isi for olketa Israelite kasem olketa pigeon bikos olketa no savve flae go lo nara kantri, and olketa Israelite savve keepim and feedim olketa bird hia. Datfala buk Bible Plants and Animals hem sei, “pipol lo evri vilij and taon lo Israel keepim and feedim olketa pigeon. Pipol savve mekem olketa nest or hol lo thik walling lo haos blo olketa for olketa bird hia stap lo hem.”

Jehovah showimaot hem lovem and tingim olketa Israelite from hem letem olketa for givim tufala difren kaen bird for sakrifaesim wea olketa isi for kasem enitaem lo year.