1. Wat nao Jesus talem lo olketa disaepol blo hem abaotem taem blo end, and wanem warning nao hem givim?

 TU-THRI day bifor Jesus dae, fofala disaepol blo hem askem hem: “Wanem nao saen wea bae showimaot . . . world hem gogo for finis?” (Matt. 24:3) Luk olsem olketa disaepol ask abaotem wat nao saen wea bae helpem olketa for luksavve lo taem wea Jerusalem and temple bae distroe. Lo ansa blo Jesus, hem no storyim nomoa taem wea Jerusalem and temple bae distroe, bat hem storyim tu taem wea “world hem gogo for finis” wea hem nao iumi insaed distaem. Bat taem wea end bae kam, Jesus sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve.” Then hem warnim olketa disaepol for “gohed for wekap” and “gohed for lukaot.”​—Mark 13:32-37.

2. Why nao hem important for olketa Jew lo datfala taem for mas gohed for lukaot?

² Olketa Jew Christian lo first century mas gohed for lukaot bikos datwan savve sevem laef blo olketa. Jesus talem olketa disaepol blo hem abaotem olketa saen wea bae helpem olketa for luksavve hao klosap nao Jerusalem bae distroe. Hem sei: “Taem iufala lukim army hem raonem Jerusalem, iufala savve nao datfala taon hem klosap for finis.” Taem datwan happen, olketa mas obeyim warning blo Jesus and “mas ranawe go long olketa maunten.” (Luke 21:20, 21) Olketa wea obeyim warning hia olketa sef taem army blo Rome distroem Jerusalem.

3. Wat nao bae iumi storyim lo disfala article?

 ³ Distaem iumi stap lo taem wea disfala nogud world hem klosap for finis. So gohed for garem gudfala tingting and gohed for lukaot. Lo disfala article, bae iumi storyim hao iumi savve garem balance tingting taem iumi lukim olketa samting wea gohed happen lo world distaem, hao iumi savve lukluk gud lo iumiseleva, and hao iumi savve iusim gud lelebet taem wea stap.

4. Why nao iumi shud interest for savve lo olketa samting wea happen lo world distaem wea fulfillim Bible profesi?

⁴ Iumi garem gudfala reason for interest lo olketa samting wea happen lo world distaem wea gohed fulfillim Bible profesi. For example, Jesus talem samfala samting wea bae happen for helpem iumi luksavve dat klosap nao world blo Satan bae finis. (Matt. 24:3-14) Aposol Peter encouragem iumi for ting raonem gud olketa samting wea fulfillim olketa Bible profesi mekem iumi gohed for garem strong faith. (2 Pet. 1:19-21) Last buk lo Bible hem start witim disfala toktok: “Olketa toktok hia hem olketa samting wea Jesus Christ showimaot klia long distaem. Jesus kasem olketa samting hia from God for showim olketa wakaman bilong God olketa samting wea no longtaem nomoa mas happen.” (Rev. 1:1) So iumi barava interest lo olketa samting wea happen lo world distaem and iumi laek for savve hao olketa samting hia maet fulfillim Bible profesi. And maet iumi barava laek for storyim olketa samting hia witim olketa narawan.

5. Wat nao iumi mas careful lo hem, bat wat nao iumi shud duim? (Lukim tu piksa.)

⁵ Taem iumi discussim wanfala Bible profesi, hem gud for iumi no trae for guessim wat bae happen. Why nao olsem? Bikos iumi no laek for talem eni samting wea bae divaedem kongregeson. For example, iumi maet herem hao olketa world leader storyim hao olketa bae finisim wanfala war and mekem peace and security for kamap. Winim wei for guessim hao diswan nao fulfillim profesi lo 1 Thessalonica 5:3, iumi need for gohed up-to-date witim latest information lo olketa pablikeson blo iumi. Taem information wea iumi storyim hem kam from organization blo Jehovah, iumi help for mekem kongregeson for gohed wan mind and garem sem “tingting” abaotem samting.”​—1 Cor. 1:10; 4:6.

6. Wat nao iumi lanem from 2 Peter 3:11-13?

⁶ Readim 2 Peter 3:11-13. Aposol Peter helpem iumi for gohed garem balance tingting taem iumi ting raonem olketa Bible profesi. Hem encouragem iumi for “tingim evritaem datfala day bilong Jehovah.” Iumi laek for duim datwan, no bikos iumi trae for savve lo “day and taem” wea Jehovah markem Armageddon for kam, bat bikos iumi laek for iusim lelebet taem wea stap for iumi “holy and duim samting wea showimaot [iumi] faithful long God.” (Matt. 24:36; Luke 12:40) Datwan minim iumi laek for gohed garem gudfala wei and for mek sure evri samting wea iumi duim for Jehovah hem bikos iumi lovem hem. For duim datwan, iumi mas gohed lukluk gud lo iumiseleva.

7. Wat nao hem minim for man lukluk gud lo hemseleva? (Luke 21:34)

⁷ Jesus talem olketa disaepol for lukluk gud lo olketa samting wea happen lo world and for lukluk gud lo olketa seleva tu. Jesus storyim klia diswan lo Luke 21:34.  (Readim.) Hem sei: “Iufala mas lukluk gud long iufala seleva.” Man wea lukluk gud lo hemseleva hem kwiktaem luksavve lo samting wea bae spoelem frenship blo hem witim Jehovah, and trae for avoidim datwan. Diswan bae helpem hem for gohed fren gud witim God.​—Provebs 22:3, SIPB; Jude 20, 21.

8. Wat nao aposol Paul encouragem olketa Christian for duim?

⁸ Aposol Paul encouragem olketa Christian for lukluk gud lo olketa seleva. For example, hem talem olketa Christian lo Ephesus: “Lukluk gud long samting wea iufala duim, mekem iufala wise and no olsem pipol wea no wise.” (Eph. 5:15, 16) From Satan laek for spoelem frenship blo iumi witim Jehovah, Bible sei for iumi “gohed for luksavve long samting wea Jehovah laekem [iumi] for duim” mekem iumi savve protectim iumiseleva from Satan.​—Eph. 5:17.

9. Hao nao for iumi luksavve lo samting wea Jehovah laekem iumi for duim?

⁹ Bible no storyim evri samting wea savve spoelem frenship blo iumi witim Jehovah. Staka taem iumi mas mekem disison abaotem samfala samting wea Bible no talem stret. So for mekem wise disison, iumi need for luksavve lo “samting wea Jehovah laekem [iumi] for duim.” Iumi bae luksavve lo datwan if iumi evritaem studyim Bible and ting raonem. Taem iumi savve gud lo wanem Jehovah laekem and iumi trae for “garem tingting bilong Christ,” iumi bae mekem olketa wise disison nomata no eni rul stap for followim. (1 Cor. 2:14-16) Samfala samting wea savve spoelem frenship blo iumi witim Jehovah hem isi for luksavve, bat samfala nomoa.

10. Wat nao samfala samting wea iumi mas avoidim?

¹⁰ Samfala samting wea iumi mas avoidim nao hem for switim samwan wea no marit partner blo iumi, ova tumas for drinkim alcohol, ova tumas lo kaikai, and for tok spoelem narawan. Iumi mas no watchim tu olketa raf entertainment, pornography, and samfala samting olsem. (Sams 101:3, SIPB) Devil, wea hem enemy blo iumi, hem gohed lukaotem eni chance for spoelem frenship blo iumi witim Jehovah. (1 Pet. 5:8) If iumi no careful, Satan savve duim samting for mekem iumi for garem mind and heart wea jealous, no honest, greedy, heit, praod, and for keepim kros. (Gal. 5:19-21) Firstaem, maet iumi tingse olketa feeling hia bae no spoelem iumi. Bat if iumi no duim samting kwiktaem for stopem olketa feeling hia, bae gogo olketa spoelem iumi.​—Jas. 1:14, 15.

11. Wat nao wanfala samting wea no isi for iumi luksavve wea iumi mas avoidim, and why nao olsem?

¹¹ Wanfala samting wea no isi for iumi luksavve lo hem bat wea savve spoelem iumi, hem nao nogud association. Tingim disfala situation. Iu waka witim samwan wea no Witness and iu laekem hem for garem gud tingting abaotem iumi olketa Witness, so iu helpem and kaen lo hem. And samfala taem maet iu lunch witim hem tu. Then no longtaem bihaen, iutufala lunch evritaem. Samfala taem datfala workmate savve talem olketa dirty story wea firstaem iu no laekem, bat gogo from iu getius lo olketa story hia, iu no feel nogud lo hem nao. Then wantaem, hem invaetem iu for go drink lelebet witim hem bihaen waka, and iu agree. Gogo, iu start for garem sem tingting olsem hem. Taem olsem, no longtaem bae iu duim sem samting wea hem duim. Hem tru, iumi kaen and respectim evriwan, bat iumi mas tingim hao olketa wea iumi spendem taem witim olketa bae spoelem gudfala wei blo iumi.  (1 Cor. 15:33) If iumi lukluk gud lo iumiseleva, olsem Jesus talem iumi for duim, bae iumi no associate witim olketa wea no followim standard blo Jehovah. (2 Cor. 6:15) Bae iumi luksavve lo olketa samting wea savve spoelem frenship blo iumi witim Jehovah and bae iumi avoidim.

12. Wanem waka nao olketa disaepol blo Jesus gohed for duim taem olketa weitim Jerusalem and temple for distroe?

¹² Jesus laekem olketa disaepol blo hem for busy taem olketa weitim Jerusalem and temple for distroe. So Jesus givim waka for olketa duim. Hem komandim olketa for preachim gud nius “long Jerusalem, long evri ples long Judea and long Samaria, and long evri farawe ples long earth.” (Acts 1:6-8) Datwan hem bigfala waka! Taem olketa busy for preach lo olketa narawan, olketa iusim gud taem blo olketa.

13. Why nao iumi need for iusim gud taem blo iumi? (Colossae 4:5)

¹³ Readim Colossae 4:5. For lukluk gud lo iumiseleva, iumi need for tingting gud abaotem hao iumi iusim taem blo iumi. “Olketa samting wea iumi no expectim” savve happen lo iumi. (Eccl. 9:11) And iumi savve dae lo enitaem nomoa.

14-15. Hao nao iumi savve iusim gud taem blo iumi? (Hebrew 6:11, 12) (Lukim tu piksa.)

 ¹⁴ Iumi savve iusim gud taem blo iumi, taem iumi duim wanem Jehovah laekem and strongim frenship blo iumi witim hem. (John 14:21) Iumi need for ‘faithful and gohed strong and evritaem busy long waka bilong Lord.’ (1 Cor. 15:58) Then if iumi dae or end blo disfala nogud world hem kam, iumi bae no regret bikos iumi iusim gud taem blo iumi.​—Matt. 24:13; Rome 14:8.

¹⁵ Distaem, Jesus gohed for leadim olketa disaepol blo hem for preach abaotem Kingdom blo God evriwea lo earth. Hem duim wanem hem promisim. Lo olketa meeting and pablikeson blo iumi, Jesus teachim iumi hao for preachim gud nius. And tu, hem givim evri samting wea iumi needim for duim disfala waka. (Matt. 28:18-20) Iumi obeyim Jesus taem iumi waka hard for preach and teachim narawan, and for gohed lukaot taem iumi weit lo Jehovah for finisim disfala nogud world. Taem iumi followim kaonsel lo Hebrew 6:11, 12, iumi bae biliv strong lo hope blo iumi “go kasem end.”​—Readim.

16. Wat nao iumi laek disaed strong for duim?

¹⁶ Jehovah hem disaedem finis day and taem wea hem bae finisim disfala world blo Satan. Lo datfala day, Jehovah bae fulfillim evri profesi abaotem niu world wea stap lo Bible. Samfala taem maet iumi tingse end blo disfala world hem delay. Bat day blo Jehovah “bae hemi mas hapen long raet taem blong hem.” (Habakuk 2:3, SIPB) So iumi laek for disaed strong for “gohed for lukluk and weit lo Jehovah,” and “patient for weitim God wea bae sevem [iumi].”​—Mic. 7:7.