YOMARA and tufala brata blo hem Marcelo and Hiver stap lo wanfala smol vilij lo Guatemala. Yomara start for studyim Bible witim olketa Witness, and gogo tufala brata blo hem tu start for study. Bat olketa garem wanfala problem, thrifala evriwan blind, and olketa no savve readim braille. So Bible teacher blo olketa bae readim olketa paragraf lo leson and olketa Bible verse.

For attendim olketa kongregeson meeting tu hem no isi. Hem hard for olketa seleva wakabaot for 40 minute for go lo wanfala Kingdom Hall wea klosap lelebet lo olketa. Bat olketa brata lo kongregeson arrange for tekem olketa kam lo evri meeting. And taem olketa start for duim olketa student assignment lo midol week meeting, olketa brata and sista savve helpem olketa for memorizim presentation blo olketa.

Lo May 2019, olketa start for duim olketa kongregeson meeting lo vilij blo olketa. Lo datfala taem, wanfala regular pioneer couple muv go for stap lo datfala vilij. Nomata couple hia no savve hao for readim and raetem braille, tufala markem goal for teachim thrifala hia for readim and for raetem braille. Tufala go lo wanfala library and tekem samfala buk abaotem braille for tufala lanem braille mekem tufala savve hao for teachim olketa hia hao for iusim.

Insaed tu-thri month nomoa, thrifala savve nao hao readim braille, and datwan helpem olketa for fren gud witim Jehovah. a Distaem Yomara, Marcelo, and Hiver olketa regular pioneer, and Marcelo hem ministerial servant. Evri week, olketa busy for duim olketa spiritual samting. Datwan barava encouragem olketa brata and sista.

Thrifala tinghae tumas lo love wea kongregeson showim for sapotim olketa. Yomara sei: “Start lo taem wea mifala savve lo olketa Witness, olketa showim tru Christian love lo mifala.” Marcelo sei tu: “Mifala garem olketa gudfala fren lo kongregeson, and mifala part lo famili wea stap evriwea lo world wea wan mind. Yomara and tufala brata blo hem barava luk forward lo taem wea Jehovah bae mekem disfala earth kamap paradaes.​—Sams 37:10, 11, SIPB; Isa. 35:5.