1. Hao nao tingting blo Jehovah abaotem laef blo iumi?

 IMAGINIM diswan: Fren blo iu hem givim iu wanfala haos wea samfala part lo hem needim paint and hem leak. Nomata olsem, value blo datfala haos hem staka million dollar. Masbi iu barava tinghae lo datfala haos and laek for lukaftarem gud. Olsem tu, Jehovah givim iumi laef, wea value blo hem hae tumas. Jehovah showimaot hao hem barava tinghae lo laef blo iumi taem hem sendem kam Son blo hem for dae for iumi.​—John 3:16.

2. Olsem 2 Corinth 7:1 storyim, wat nao Jehovah laekem iumi for duim?

² Laef hem kam from Jehovah. (Sams 36:9, SIPB) Aposol Paul bilivim datwan and hem sei: “[God] nao mekem iumi laef and savve wakabaot and duim samting.” (Acts 17:25, 28) So hem fitim for iumi sei laef hem present from God. From hem lovem iumi, hem provaedem evri samting wea iumi needim for stap laef. (Acts 14:15-17) Jehovah no duim mirakol distaem for sevem laef blo iumi. Bat hem laekem iumi for duim best blo iumi for stap healthy and for gohed worshipim hem. (Readim 2 Corinth 7:1.) Why nao iumi shud lukaftarem health and laef blo iumi, and hao nao iumi savve duim datwan?

3. Wat nao wanfala reason why iumi shud trae for stap healthy?

³ Wanfala reason why iumi shud trae for stap healthy hem for iumi worshipim Jehovah witim best blo iumi. (Mark 12:30) From iumi laek for ‘givim body blo iumi olsem wanfala sakrifaes wea laef and holy and wea God hapi lo hem,’ iumi no laek for duim olketa samting wea bae spoelem health blo iumi. (Rome 12:1) Nomata iumi duim best blo iumi, samfala taem iumi savve sik. Bat iumi laek for duim best blo iumi for stap healthy, for showim lo Jehovah hao iumi tinghae lo laef wea hem givim lo iumi.

4. Wat nao King David laek for duim?

⁴ King David storyim why hem tinghae lo laef wea hem present from God, taem hem sei: ‘Sapos mi dae, watkaen gudfala samting nao bae yu garem? Olketa man wea dae finis no save preisim yu an no save talemaot gudfala wei blong yu.’ (Sams 30:9, SIPB) Maet David olo nao taem hem raetem olketa toktok hia. Nomata olsem, hem duim best blo hem for gohed laef and stap healthy mekem hem gohed praisem Jehovah. Iumi evriwan tu laek for duim datwan.

5. Nomata iumi barava sik or olo, wat nao iumi savve duim?

⁵ Sapos iumi sik or olo, datwan maet mekem iumi no fit for duim wanem iumi savve duim bifor. From datwan, maet iumi feel nogud and sorre. Nomata olsem, iumi shud duim best for lukaftarem health blo iumi. Iumi laek for duim olsem bikos nomata iumi olo or sik, iumi still savve praisem Jehovah olsem King David. Iumi barava hapi for savve hao God tinghae lo iumi nomata iumi sik or olo! (Matt. 10:29-31) And nomata iumi dae, God laekem tumas for resurrectim iumi. (Job 14:14, 15) So taem iumi laef, iumi laek for duim best blo iumi for lukaftarem gud health and laef blo iumi.

6. Wat nao Jehovah laekem iumi for duim saed lo kaikai and drink?

⁶ Bible hem no buk abaotem health or diet, bat hem storyim tingting blo Jehovah abaotem olketa samting hia. For example, Bible sei for iumi “avoidim eni samting wea savve kosim problem” lo body blo iumi. (Eccl. 11:10) Bible sei for iumi shud no ova tumas lo kaikai and alcohol, bikos diswan savve spoelem health and killim iumi dae tu. (Provebs 23:20, SIPB) Jehovah laekem iumi for kontrolem iumiseleva taem iumi disaedem wanem and haomas for iumi kaikaim and drinkim.​—1 Cor. 6:12; 9:25.

7. Hao nao kaonsel lo Provebs 2:11 helpem iumi for mekem wise disison abaotem health blo iumi?

⁷ Iumi savve mekem olketa disison wea showim iumi barava tinghae lo laef taem iumi iusim gudfala tingting. (Sams 119:99, 100; readim Provebs 2:11, SIBP.) For example, iumi bae tingting gud abaotem wanem iumi bae kaikaim. If iumi laekem wanfala kaen kaikai bat iumi savve hem bae mekem iumi sik, iumi mek sure iumi no kaikaim datwan. And tu, iumi iusim gudfala tingting taem iumi sleep early, exercise evritaem, gohed keepim gud body, and keepim klin insaed and aotsaed haos blo iumi.

8. Wat nao Bible talem abaotem tingting blo Jehovah saed lo safety?

⁸ Jehovah givim olketa law lo olketa Israelite for helpem olketa for avoidim  olketa serious accident lo haos and taem olketa waka. (Ex. 21:28, 29; Deut. 22:8) If samwan killim dae narawan and hem no min for duim, datwan hem serious samting. (Deut. 19:4, 5) Law sei if samwan killim dae baby wea no born yet nomata hem no min for duim, hem mas kasem panis. (Ex. 21:22, 23) Bible showimaot klia Jehovah laekem iumi for tingim safety.

9. Wat nao iumi savve duim for avoidim accident? (Lukim tu piksa.)

⁹ Iumi showimaot iumi tinghae lo laef wea hem present from God taem iumi tingim safety lo haos and lo waka. For example, if iumi torowem olketa samting wea sharp, chemical wea poison, or medicine, mek sure iumi torowem lo ples wea bae no spoelem eniwan, and keepim olketa samting olsem lo ples wea sef from olketa pikinini. Iumi need for careful taem iumi laetem fire, boelem wata, and iusim olketa paoa tul. Iumi bae no draev if medicine, alcohol, or wei wea iumi taed hem affectim tingting blo iumi and hem mekem hem no sef for draev. And tu, no iusim phone taem iumi draev.

10. Wat nao iumi savve duim bifor and lo taem blo wanfala disaster?

¹⁰ Samfala taem iumi no fit for avoidim wanfala situation wea danger tumas, olsem natural disaster, sik wea isi for spred, and eni faet wea kamap lo kantri. Bat taem diswan happen, iumi savve duim best blo iumi for stap sef taem iumi obeyim eni restriction from gavman and instruction for lusim datfala area. (Rome 13:1, 5-7) Iumi fit for prepare for samfala disaster, so iumi shud followim eni direction wea kam from gavman for mekem iumi redi for disaster. For example, maet hem gud for redyim wata and samfala kaikai wea no kwiktaem for nogud, and samfala first-aid.

11. If wanfala sik spred lo community, wat nao iumi shud willing for duim?

¹¹ Wat nao iumi shud duim if wanfala sik spred lo community? Iumi shud obeyim olketa direction from gavman olsem for wasim hand, social distancing, werem mask, and for quarantine. Taem iumi duim olketa samting hia, iumi showimaot iumi barava tinghae lo laef wea hem present from God.

12. Hao nao Provebs 14:15 savve helpem iumi for disaedem wanem information for bilivim taem disaster happen?

¹² Taem wanfala disaster happen, samfala taem iumi savve herem samfala information wea no tru from olketa fren, olketa narawan, and lo nius. Hem gud for no bilivim “enisamting” nomoa wea iumi herem, bat iumi shud lisin lo olketa information wea iumi savve trustim from gavman and olketa doctor. (Readim Provebs 14:15.) Governing Body and olketa branch office duim best for mek sure information wea olketa kasem hem stret bifor olketa givim direction abaotem olketa meeting and preaching waka. (Heb. 13:17) Taem iumi followim direction, iumi protectim iumiseleva and olketa narawan. Iumi help tu for mekem olketa narawan garem gudfala tingting abaotem pipol blo Jehovah.​—1 Pet. 2:12.

13. Hao nao iumi showimaot iumi tinghae lo laef taem iumi obeyim law blo Jehovah abaotem blood?

¹³ Staka pipol savve Olketa Jehovah’s Witness bilivim hao blood hem holy. Iumi no acceptim blood transfusion nomata lo taem blo medical emergency from iumi obeyim law blo Jehovah abaotem blood. (Acts 15:28, 29) Datwan no minim iumi laek for dae, bat iumi tinghae lo laef wea kam from God. Iumi laek for kasem help from olketa doctor wea willing for provaedem best treatment wea no iusim blood transfusion.

14. Wat nao iumi savve duim for avoidim eni serious medical treatment or operation?

¹⁴ Taem iumi duim olketa samting wea iumi storyim finis lo disfala article, maet hem helpem iumi for avoidim eni serious medical treatment or eni operation. And nomata iumi need for kasem eni operation, taem iumi lukaftarem gud healthy blo iumi, iumi bae recover kwiktaem. And tu, iumi bae katem daon chance for kasem operation, taem iumi keepim haos and waka ples blo iumi sef and iumi obeyim olketa law blo traffic.

15. (a) Why nao hem important for evritaem karem witim iumi wanfala durable power of attorney card wea update? (Lukim tu piksa.) (b) Olsem iumi lukim lo video, hao nao iumi savve mekem wise disison abaotem treatment for iusim blood?

¹⁵ From iumi tinghae lo laef wea hem  present from God, iumi bae fillimap datfala durable power of attorney (advance health-care directive) card and karem evritaem witim iumi. b Iumi savve raetem disison blo iumi abaotem blood transfusion and samfala medical treatment insaed disfala card. Waswe, iu updatem DPA card blo iu? Sapos iu need for fillimap or updatem wanfala, duim stretawe. Taem iumi raetem klia disison blo iumi, datwan bae helpem iumi for kwiktaem kasem treatment wea iumi needim. And tu, datwan bae helpem olketa doctor and nurse for mek sure iumi kasem treatment wea bae no spoelem iumi. c

16. Wat nao iu savve duim if iu no savve hao for fillimap datfala DPA card?

¹⁶ Nomata iumi young or healthy, eniwan lo iumi savve kasem accident or sik. (Eccl. 9:11) So hem wise for fillimap datfala DPA card. If iu no savve hao for fillimap, askem eni elder for helpem iu bikos staka taem olketa savve gud lo hao for fillimap datfala card. Bat, olketa bae no mekem olketa medical disison for iu.  Datwan hem responsibility blo iu. (Gal. 6:4, 5) Bat olketa savve helpem iu for minim olketa option wea stap and helpem iu tu for raetem olketa disison wea iu mekem.

17. Hao nao iumi savve showimaot iumi balance abaotem olketa samting saed lo health blo iumi?

¹⁷ Olketa disison wea iumi mekem abaotem health blo iumi and medical treatment wea iumi bae tekem hem base lo wanem iumi lanem lo Bible. (Acts 24:16; 1 Tim. 3:9) Taem iumi mekem olketa disison and discussim witim olketa narawan, hem gud for followim principle lo Philippi 4:5 wea sei: “Showimaot long evriwan, iufala no ova tumas.” Taem iumi balance, bae iumi no ova tumas for wari abaotem health blo iumi and iumi no forcem olketa narawan for garem sem tingting olsem iumi. Iumi lovem and respectim olketa brata and sista nomata disison blo olketa difren from iumi.​—Rome 14:10-12.

18. Hao nao iumi savve showimaot iumi thankiu lo Jehovah, wea givim laef lo iumi?

¹⁸ Iumi showimaot iumi thankiu lo Jehovah, wea givim laef lo iumi, taem iumi lukaftarem gud laef blo iumi and duim best for worshipim hem. (Rev. 4:11) Distaem iumi mas deal witim sik and olketa hard taem. Bat Jehovah no laekem iumi for garem diskaen laef. Klosap nao hem bae givim iumi laef olowe, wea bae iumi no feelim pain and dae tu. (Rev. 21:4) Go kasem datfala taem, iumi hapi tumas for gohed laef and for worshipim Dadi blo iumi lo heven, Jehovah!