1. Why nao iu hapi for garem Bible?

 IUMI thankiu tumas lo Jehovah God bikos hem givim iumi Bible. Hem iusim Bible for teachim iumi olketa wise kaonsel wea savve helpem iumi deal witim olketa problem wea iumi feisim distaem. Hem givim iumi tu nambawan hope for future. And important samting, Jehovah iusim Bible for teachim iumi abaotem hem. Taem iumi ting raonem olketa nambawan wei blo hem, datwan tasim heart blo iumi and muvim iumi for kam klos lo God and laek for kamap fren blo hem.​—Sams 25:14, SIPB.

2. Wat nao samfala wei wea Jehovah iusim for teachim pipol abaotem hem?

² Jehovah laekem pipol for savve lo hem. Lo bifor, hem iusim olketa angel, dream, and vision for teachim pipol abaotem hem. (Num. 12:6; Acts 10:3, 4) Bat hao nao bae iumi savve lo olketa message from olketa angel, dream, and olketa vision hia sapos olketa no raetem daon? Dastawe Jehovah iusim olketa man for raetem “insaed lo wanfala buk” evri samting wea hem laekem iumi for savve. (Jer. 30:2) From ‘wei blo God barava stret fogud,’ iumi trustim hao Bible nao hem best wei wea hem iusim for story lo iumi and for helpem iumi.​—Sams 18:30, SIPB.

3. Hao nao Jehovah mek sure Bible stap kam kasem distaem? (Isaiah 40:8)

³ Readim Isaiah 40:8. For staka thousand year, olketa gudfala advaes lo Word blo God helpem olketa faithful man and woman. Hao nao olsem? Nomata olketa raetem toktok blo God lo material wea savve nogud, and no eni original document stap kam kasem distaem. Jehovah mek  sure olketa copy blo olketa Holy Raeting hia hem stap. Nomata olketa man wea mekem olketa copy no perfect, olketa barava careful. Wanfala scholar hem sei olsem abaotem olketa Hebrew Scripture: “Iumi fit for sei no eni nara oldfala buk olketa copyim stret olsem Bible.” Nomata olketa raetem Bible longtaem go finis lo material wea savve nogud and olketa wea copyim no perfect, iumi sure wat iumi readim lo Bible distaem hem tingting blo Jehovah wea givim kam Bible.

4. Wat nao bae iumi discussim lo disfala article?

⁴ Jehovah hem man for givim “evri gud and perfect present.” (Jas. 1:17) Bible hem wanfala lo olketa best present from Jehovah. Taem samwan givim present, datwan savve showimaot sapos man hia savve gud lo wat iumi needim. Datwan semsem witim God wea givim Bible. Taem iumi studyim gud disfala present from Jehovah, iumi savve lanem staka samting abaotem hem. Iumi luksavve hem savve gud lo iumi and wat iumi needim. Lo disfala article, bae iumi discussim hao Bible teachim iumi thrifala wei hia blo Jehovah: Wisdom, justice, and love blo hem. Firstaem bae iumi storyim hao Bible teachim iumi abaotem wisdom blo God.

5. Wat nao wanfala wei wea Bible teachim iumi abaotem wisdom blo God?

⁵ Jehovah savve iumi needim olketa wise kaonsel blo hem. And disfala present from God, Bible, hem fulap lo wisdom blo hem. Olketa kaonsel lo Bible barava helpem pipol. Bible savve changem laef. Taem Moses raetem olketa first buk lo Bible hem talem olketa Israelite: “Olketa instruction hia barava important, and hem minim laef for iufala.” (Deut. 32:47) Olketa wea obeyim toktok hia garem gudfala laef and hapi. (Sams 1:2, 3, SIPB) Nomata olketa raetem Bible longfala taem go finis, hem still garem paoa for changem laef. Lo jw.org article series, “Bible Changem Laef Bilong Pipol,” bae iu read abaotem staka example wea showim hao Bible garem paoa for ‘mekem olketa wea biliv for duim gud samting.’​—1 Thess. 2:13.

6. Why nao no eni nara buk hem olsem Bible?

⁶ No eni nara buk hem olsem Bible. Why nao olsem? Hem bikos Jehovah God wea givim kam datfala buk, hem Olmaeti, stap for olowe, and garem bigfala wisdom. Staka buk stap wea olketa raetem longtaem bifor, bat kwiktaem nomoa advaes insaed hem out-of-date. Bat olketa wise principle lo Bible stap for olowe and hem barava fitim pipol lo bifor and distaem tu. Taem iumi readim disfala holy buk and ting raonem wat iumi lanem, God wea givim disfala buk hem iusim holy spirit wea garem bigfala paoa for helpem iumi for luksavve hao for followim olketa kaonsel lo Bible. (Sams 119:27; Malakae 3:16, SIPB; Heb. 4:12) Tru nao, God wea givim kam Bible hem laef and hem laekem tumas for helpem iu. Datwan mekem iumi for laek readim Bible evriday!

7. Hao nao Bible mekem pipol blo God bifor for wan mind?

⁷ Nara nambawan wei wea Bible showim wisdom blo God, hem hao hem helpem pipol blo God for wan mind. Lo Promis Land, olketa Israelite stay lo barava big area. Samfala lo olketa, hem olketa fisherman, samfala lukaftarem buluka, and olketa narawan farmer. From datwan,  maet olketa Israelite wea stap lo wanfala part lo Promis Land bae no kea abaotem olketa nara Israelite wea stap lo nara part Promis Land. Bat Jehovah mekem arrangement for evri Israelite for hipap tugeta samfala taem for herem olketa priest readim and explainim Word blo hem wea olketa raetem. (Deut. 31:10-13; Neh. 8:2, 8, 18) Tingim go feeling blo wanfala faithful Israelite taem hem arrive lo Jerusalem, and lukim maet staka million narawan wea worshipim Jehovah wea kam from evri nara part lo kantri! Datwan barava helpem pipol blo Jehovah for gohed wan mind. Lo taem blo Christian kongregeson, olketa man and woman wea insaed lo kongregeson iusim difren languis and garem difren baekgraon. Bat from olketa lovem Bible, olketa wan mind for worshipim tru God. Only wei for olketa Christian savve minim Word blo God hem for kasem help from olketa nara Christian and for hipap tugeta witim olketa.​—Acts 2:42; 8:30, 31.

8. Hao nao Bible helpem pipol blo Jehovah distaem for wan mind?

⁸ God blo iumi wea wise hem iusim Bible for teachim pipol blo hem and helpem olketa for wan mind. Lo Bible nao iumi kasem spiritual kaikai wea iumi laekem tumas. Evritaem iumi savve hipap tugeta lo olketa meeting, assembly, and convention for herem olketa brata readim, explainim, and discussim olketa scripture.  So Bible nao hem important tul wea Jehovah iusim for helpem pipol blo hem for worshipim hem witim wan mind.​—Zeph. 3:9.

9. Wat nao wanfala wei wea man need for garem mekem hem savve minim Bible? (Luke 10:21)

⁹ Tingim nara samting wea showimaot wisdom blo Jehovah. Jehovah helpem olketa man wea raetem Bible for raetem lo wei wea hambol pipol nomoa savve minim. (Readim Luke 10:21.) Evriwea lo world pipol readim Bible. Wanfala scholar sei: “Bible nomoa wanfala buk wea staka pipol readim and studyim gud.” Bat, pipol wea hambol nomoa minim and followim wat Bible talem.​—2 Cor. 3:15, 16.

10. Wat nao narafala wei wea Bible showim wisdom blo Jehovah?

¹⁰ Nara samting tu showim wisdom blo Jehovah lo Bible. Jehovah iusim Bible for teachim iumi olsem wanfala grup, bat hem teachim and comfortim tu each wan lo iumi. Taem iumi readim Bible, iumi luksavve Jehovah interest lo each wan lo iumi. (Isa. 30:21) Taem iu feisim wanfala problem, waswe, staka taem iu faendem wat iu readim lo Bible barava fitim situation blo iu? Bat tingim hao staka million pipol nao laek for readim Bible. Nomata olsem, information insaed hem up-to-date and hem barava fitim need blo each wan lo iumi. Datwan hem olsem bikos Bible hem kam from God wea hem barava wise.​—2 Tim. 3:16, 17.

11. Taem olketa raetem Bible, hao nao God showimaot hem no favorim eniwan?

¹¹ Narafala wei blo Jehovah hem justice. (Deut. 32:4) Justice join witim wei for no teksaed, and Jehovah hem man wea no favorim eniwan. (Acts 10:34, 35; Rome 2:11) Wei blo hem for no favorim eniwan hem showaot lo hao olketa raetem Bible lo olketa difren languis. Staka lo olketa first 39-fala buk lo Bible olketa raetem lo Hebrew languis, wea hem nao languis wea pipol blo God lo datfala taem isi for minim. Bat lo first century C.E., Greek languis nao main languis wea pipol iusim, so big haf lo olketa last 27 buk lo Bible hem lo datfala languis. Jehovah no disaed for olketa raetem Bible lo wanfala languis nomoa. Distaem, klosap eit billion pipol wea stap lo earth iusim staka difren languis. Hao nao bae staka pipol savve lane abaotem Jehovah?

12. Wat nao wanfala wei wea Daniel 12:4 hem fulfill lo olketa last day?

¹² Thru lo profet Daniel, Jehovah promisim hao lo taem blo end, “trufala knowledge” wea stap lo Bible “bae kamap staka.” Staka pipol nao bae minim Bible. (Readim Daniel 12:4.) Wanfala wei wea datfala knowledge hem kamap staka, hem thru lo wei for transleitim, pablisim, and distributim Bible and Bible literature. Bible nao wanfala buk wea olketa transleitim lo staka languis and givimaot lo staka pipol winim eni nara buk. Bible transleison wea olketa bisnis printim hem savve expensive tumas. Pipol blo Jehovah transleitim full Bible or part blo hem lo winim 240 languis, and eniwan savve kasem datwan and hem no need for peim. So datwan hem mekem pipol lo evri kantri savve acceptim “gud nius abaotem Kingdom” bifor end hem kam. (Matt. 24:14) God blo iumi wea hem God blo justice iusim Bible for givim chance lo staka pipol for savve lo hem. Hem duim olsem bikos hem lovem iumi tumas.

13. Why nao iumi fit for sei Bible showimaot love blo Jehovah? (John 21:25)

¹³ Bible showimaot barava nambawan wei blo God wea hem nao love. (1 John 4:8) Tingim wat Jehovah talem for olketa raetem insaed Bible and wat for no raetem insaed. Hem provaedem nomoa wat iumi needim for helpem iumi fren witim hem, garem hapi laef distaem, and for kasem laef olowe. Bat bikos Jehovah lovem iumi, hem no storyim staka samting tumas winim wat iumi fit for minim.​—Readim John 21:25.

14. Wat nao nara wei wea love blo God showaot lo Bible?

¹⁴ Taem Jehovah story lo iumi hem duim lo wei wea showim respect, wea datwan showimaot tu hem lovem iumi. Insaed Bible, hem no givim wanfala long list blo olketa rul for kontrolem evri samting lo laef blo iumi. Bat hem laekem iumi for ting raonem olketa laef story, olketa interesting profesi, and gudfala kaonsel, for helpem iumi mekem gud disison. Datwan mekem iumi for lovem and obeyim God from heart blo iumi.

15. (a) Hao nao Bible showim Jehovah barava tingim olketa wea readim Bible? (b) Lo piksa, which story lo Bible nao datfala smol gele, young brata, and olo sista ting raonem? (Gen. 39:1, 10-12; 2 Ki. 5:1-3; Luke 2:25-38)

¹⁵ Bible showim hao Jehovah barava tingim iumi. Hao nao iumi savve? Insaed Bible iumi savve read abaotem staka story wea pipol storyim feeling blo olketa. Iumi minim feeling blo olketa bikos olketa “olsem iumi nomoa.” (Jas. 5:17) And winim datwan, taem iumi lukim hao Jehovah  treatim olketa pipol hia wea olsem iumi, datwan helpem iumi for luksavve ‘Jehovah hem lovem iumi and hem showimaot mercy.’​—Jas. 5:11.

16. Taem iumi read lo Bible, wat nao iumi lukim abaotem hao Jehovah ting lo olketa wea duim mistek? (Isaiah 55:7)

¹⁶ Bible teachim narafala wei wea Jehovah lovem iumi. Bible sei hao God bae no lusim iumi taem iumi duim olketa mistek. Olketa Israelite sin againstim Jehovah staka taem, nomata olsem, taem olketa barava repent, God forgivim olketa. (Readim Isaiah 55:7.) Olketa Christian lo first century tu luksavve hao God barava lovem olketa. Holy spirit helpem aposol Paul for talem olketa nara Christian for “forgivim and comfortim” man wea duim serious sin bat wea hem repent. (2 Cor. 2:6, 7; 1 Cor. 5:1-5) Iumi barava hapi for savve hao Jehovah no rejectim olketa wea worshipim hem bikos lo mistek wea olketa duim! Bat hem laek for helpem olketa, stretem olketa, and invaetem olketa for fren bak witim hem. Hem promis for duim sem samting distaem for olketa wea repent.​—Jas. 4:8-10.

17. Why nao Bible hem barava spesol present?

¹⁷ Jehovah givim iumi Bible wea hem nambawan present. Why nao Bible barava spesol? Iumi lanem finis hao Bible teachim iumi abaotem wisdom, justice, and love blo God. Datfala buk showim hao Jehovah laekem iumi for savve lo hem and for fren witim hem.

18. Hao nao iumi savve showimaot iumi tinghae lo Bible wea hem ‘gudfala present’ from Jehovah?

¹⁸ Iumi no laek for ting smol lo Bible wea hem wanfala ‘gudfala present’ from God. (Jas. 1:17) So iumi laek for showimaot iumi tinghae lo Bible. Iumi duim datwan taem iumi prea bifor iumi readim and ting raonem wanem iumi readim. Taem iumi duim datwan, Jehovah wea givim kam Bible bae blessim hard waka blo iumi and bae iumi “faendem knowledge blo God.”​—Prov. 2:5.