1. Why nao iumi needim Jehovah for leadim iumi? Storyim example.

 IMAGINIM iu lus insaed wanfala forest. Lo there, hem danger tumas bikos hem garem olketa wild animal, staka moskito, olketa poison plant, and olketa deep hol lo bush. Bae iu hapi tumas if samwan wea savve gud lo datfala area hem leadim iu and helpem iu for no kasem olketa danger hia. Disfala world hem olsem datfala forest. Hem barava danger and fulap lo staka danger samting wea savve spoelem spiritual health blo iumi. Bat iumi garem Jehovah wea hem perfect Leader blo iumi. Hem leadim iumi from olketa danger samting lo world for kasem destination blo iumi, wea hem nao datfala niu world.

2. Hao nao Jehovah leadim iumi?

² Hao nao Jehovah leadim iumi? Main samting wea hem iusim, hem Bible. Hem iusim tu olketa man for leadim iumi. For example, hem iusim “datfala wakaman wea faithful and wise” for provaedem spiritual kaikai wea helpem iumi for mekem olketa wise disison. (Matt. 24:45) Jehovah iusim tu olketa man olsem olketa circuit overseer and olketa elder for leadim iumi. Olketa savve encouragem and givim instruction wea savve helpem iumi for deal witim olketa hard taem wea kasem iumi. Iumi barava hapi for kasem direction from Jehovah wea iumi savve trustim lo olketa last day distaem wea no isi! Datwan helpem iumi for fren gud witim Jehovah and for gohed followim road for kasem laef olowe.

3. Wat nao bae iumi storyim lo disfala article?

³ Bat samfala taem maet hem challenging for iumi followim direction blo Jehovah, especially taem hem iusim olketa man wea no perfect for givim. Why nao olsem? Maet datfala direction no followim wat iumi tingim or laekem. Or maet lo tingting blo iumi datfala direction no mek sense and iumi tingse  hem no kam from Jehovah. Lo taem olsem, iumi need for trustim hao Jehovah nao leadim pipol blo hem and taem iumi gohed followim direction blo Hem, datwan bae helpem iumi. For strongim trust blo iumi, disfala article bae storyim (1) hao Jehovah leadim olketa Israelite, (2) hao hem leadim iumi distaem, and (3) gud samting wea iumi savve kasem taem iumi gohed followim direction blo hem.

HAO JEHOVAH LEADIM OLKETA ISRAELITE

4-5. Wat nao Jehovah duim wea showim hem iusim Moses for leadim olketa Israelite? (Lukim piksa.)

⁴ Jehovah appointim Moses for leadim olketa Israelite for go aot from Egypt. And hem givim olketa klia evidence wea pruvim hem iusim Moses for leadim olketa. For example, Jehovah iusim wanfala cloud lo daytaem for leadim olketa and lo naet cloud hia luk olsem fire mekem olketa savve followim laet blo hem. (Ex. 13:21) Moses followim datfala cloud wea leadim hem and olketa Israelite go lo Red Sea. Bat taem army blo Egypt ran bihaenem olketa, olketa barava panic bikos olketa tingse datfala army bae killim olketa dae. So olketa tingse Moses mekem mistek for leadim olketa go lo Red Sea. Bat Moses no mekem mistek. Jehovah nao iusim hem for leadim pipol blo hem go lo there. (Ex. 14:2) Then God sevem olketa lo barava spesol wei wea olketa no expectim.—Ex. 14:​26-28.

⁵ For 40 years bihaen datwan, Moses gohed depend lo datfala cloud for leadim pipol blo God lo wilderness. a For samfala taem, Jehovah putim datfala cloud antap lo tent blo Moses, mekem evri Israelite savve lukim. (Ex. 33:​7, 9, 10) Jehovah story kam lo datfala cloud for Moses, then Moses storyim evri instruction blo Jehovah lo olketa pipol. (Ps. 99:7) Olketa Israelite savve lukim olketa klia evidence wea pruvim Jehovah iusim Moses for leadim olketa.

6. Hao nao tingting blo olketa Israelite abaotem direction blo Jehovah? (Numbers 14:​2, 10, 11)

⁶ Sorre samting nao, staka Israelite rejectim olketa klia evidence wea pruvim Jehovah iusim Moses for representim Hem. (Readim Numbers 14:​2, 10, 11.) Staka taem olketa no acceptim dat Jehovah iusim Moses for leadim olketa. From datwan, Jehovah no allowim datfala genereson for enter lo Promis Land.—Num. 14:30.

7. Storyim example blo samfala wea followim direction blo Jehovah. (Numbers 14:24) (Lukim tu piksa.)

⁷ Bat samfala Israelite obeyim direction blo Jehovah. For example, Jehovah sei: “Caleb . . . gohed obeyim mi witim full heart.” (Readim Numbers 14:24.) God rewardim Caleb, and even allowim hem for chusim ples wea hem laek for stap lo Promis Land. (Josh. 14:​12-14) Next genereson blo olketa Israelite tu showim gud example, taem olketa continue for followim direction blo Jehovah. Taem Joshua kamap leader blo olketa Israelite bihaen lo Moses, “for full laef blo hem olketa barava respectim hem.” (Josh. 4:14) From datwan, Jehovah blessim olketa and givim land wea hem promisim for olketa.—Josh. 21:​43, 44.

8. Storyim hao Jehovah leadim pipol blo hem lo taem blo olketa king. (Lukim tu piksa.)

⁸ Staka year bihaen, Jehovah appointim olketa judge for leadim pipol blo hem. Then lo taem blo olketa king, Jehovah appointim olketa profet for leadim pipol blo hem. Olketa faithful king followim advaes blo olketa profet. For example, King David hambol for  acceptim kaonsel from profet Nathan. (2 Sam. 12:​7, 13; 1 Chron. 17:​3, 4) King Jehoshaphat followim direction wea hem kasem from profet Jahaziel and encouragem pipol blo Judah for ‘garem faith lo olketa profet blo God.’ (2 Chron. 20:​14, 15, 20) Taem King Hezekiah barava wari tumas, hem go askem help from profet Isaiah. (Isa. 37:​1-6) Each taem wea olketa king obeyim direction blo Jehovah, Jehovah blessim olketa and protectim datfala nation. (2 Chron. 20:​29, 30; 32:22) Evriwan shud lukim klia nomoa dat Jehovah iusim olketa profet for leadim pipol blo hem. Bat staka king and olketa pipol rejectim olketa profet blo Jehovah.—Jer. 35:​12-15.

HAO JEHOVAH LEADIM OLKETA CHRISTIAN LO FIRST CENTURY

9. Hu nao Jehovah iusim for leadim olketa Christian lo first century? (Lukim tu piksa.)

⁹ Lo first century C.E., Jehovah startim Christian kongregeson. Hao nao hem leadim olketa Christian lo datfala taem? Hem appointim Jesus for hed lo kongregeson. (Eph. 5:23) Bat Jesus no story direct lo each disaepol for talem olketa wat for duim. Hem iusim olketa aposol and elder lo Jerusalem for givim direction lo olketa kongregeson. (Acts 15:​1, 2) And tu, hem appointim olketa elder for lead insaed olketa kongregeson.—1 Thess. 5:12; Titus 1:5.

10. (a) Hao nao staka lo olketa first century Christian ting abaotem direction wea olketa kasem? (Acts 15:​30, 31) (b) Why nao samfala lo taem blo Bible rejectim olketa man wea Jehovah iusim for leadim olketa? (Lukim box “ Why Samfala Rejectim Klia Evidence.”)

¹⁰ Hao nao tingting blo olketa first century Christian abaotem datwan? Staka lo olketa hapi for followim direction wea olketa kasem. Tru nao, “olketa hapi tumas” lo olketa encouragement wea olketa kasem. (Readim Acts 15:​30, 31.) Bat hao nao Jehovah leadim pipol blo hem distaem?

HAO JEHOVAH LEADIM IUMI DISTAEM

11. Storyim example wea showim dat Jehovah iusim olketa man for leadim iumi distaem.

¹¹ Jehovah continue for leadim pipol blo hem distaem. Hem iusim Bible and Son blo hem, wea hed lo kongregeson for duim datwan. Waswe, iumi lukim olketa evidence wea pruvim God continue for iusim olketa man for leadim iumi distaem? Yes. For example,  tingim wat happen bihaen lo year 1870. Charles Taze Russell and olketa fren blo hem start for luksavve dat year 1914 bae Kingdom blo God hem start for rul. (Dan. 4:​25, 26) Olketa faendaot lo diswan bikos olketa studyim Bible and sure olketa Bible profesi bae fulfill. Waswe, Jehovah leadim research wea olketa duim lo Bible? Barava nao. Wat hem happen lo world lo year 1914 confirmim Kingdom blo God start for rul lo datfala taem. World War I hem happen, then olketa barava nogud sik kamap, olketa earthquake, and bigfala hangere. (Luke 21:​10, 11) Tru nao, Jehovah iusim olketa man hia wea garem gud and honest heart for leadim pipol blo hem.

12-13. During lo World War II, wat nao olketa arrangement wea olketa brata lo hedquarter mekem for increasim preaching and teaching waka?

¹² Tingim tu wat hem happen during lo World War II. Olketa brata lo world hedquarter studyim Revelation 17:8. So olketa luksavve datfala war bae no lead go lo Armageddon. Bat peace bae kamap bihaen war hia and datwan bae allowim pipol blo Jehovah for preach lo staka pipol moa. So organization blo Jehovah startim wanfala samting wea maet no mek sense lo datfala taem. Hem startim datfala Watchtower Bible College (Skul) of Gilead for trainim olketa missionary for preach and teach lo olketa kantri raonem earth. Olketa brata lo hedquarter sendem olketa missionary nomata lo taem blo war. And tu, datfala wakaman wea faithful startim datfala Course in Theocratic Ministry b for trainim evri pablisa lo olketa kongregeson for savve gud lo hao for preach and teach. Olketa training hia helpem pipol blo God for duim preaching waka.

¹³ Taem iumi ting go bak, iumi luksavve dat Jehovah leadim pipol blo hem lo datfala hard taem. Since World War II, pipol blo Jehovah free for duim preaching waka lo staka kantri. Tru nao, staka pipol lane abaotem Jehovah, and pipol blo hem preach evriwea lo earth.

14. Why nao iumi savve trustim direction wea kam from organization blo Jehovah and from olketa elder wea hem appointim? (Revelation 2:1) (Lukim tu piksa.)

 ¹⁴ Distaem, olketa member blo Governing Body continue for depend lo Christ for direction. Olketa laekem olketa instruction wea olketa givim lo olketa brata and sista mas followim tingting blo Jehovah and Jesus. And tufala iusim olketa circuit overseer and olketa elder for givim direction lo olketa kongregeson. c Olketa anointed elder and olketa elder lo kongregeson tu olketa insaed lo “raet hand” blo Christ. (Readim Revelation 2:1.) Bat olketa elder hia no perfect and savve mekem mistek. Moses and Joshua mekem mistek samfala taem, olsem tu olketa aposol. (Num. 20:12; Josh. 9:​14, 15; Rome 3:23) Nomata olsem, iumi luksavve hao Jesus leadim datfala wakaman wea faithful and olketa elder wea holy spirit appointim olketa, and bae hem continue for duim olsem “go kasem taem wea world hem finis.” (Matt. 28:20) So iumi garem evri reason for trustim direction wea hem iusim olketa elder for givim lo iumi.

IUMI KASEM GUD SAMTING TAEM IUMI FOLLOWIM DIRECTION BLO JEHOVAH

15-16. Wat nao iu lanem from experience blo olketa wea followim direction blo Jehovah?

¹⁵ Taem iumi continue for followim direction blo Jehovah, iumi kasem gud samting even distaem tu. For example, Andy and Robyn followim datfala encouragement for garem simpol laef. (Lukim study note blo Matthew 6:22 lo English.) From datwan, tufala savve volunteer for waka lo olketa theocratic construction project. Robyn sei: “Samfala taem ples wea mitufala savve stap hem smol, and no even garem kitchen. And mi mas salem staka equipment wea mi iusim for tekpiksa, nomata mi lovem tumas datwan. Mi sorre tumas taem mi salem olketa samting hia. Bat olsem Sarah, waef blo Abraham, mi no sorre for olketa samting wea mi lusim bat mi hapi lo wat mi duim for Jehovah distaem.” (Heb. 11:15) Wat nao gud samting wea disfala couple kasem from tufala disaed olsem? Robyn sei: “Mitufala barava hapi bikos mitufala savve dat mitufala givim lo Jehovah evri samting wea mitufala garem. Taem mitufala waka lo olketa theocratic assignment, mitufala garem piksa abaotem laef lo niu world.” Andy sei: “Mitufala hapi and satisfae bikos mitufala givim taem and strong for sapotim Kingdom.”

¹⁶ Wanem gud samting tu iumi savve kasem taem iumi continue for followim direction blo Jehovah? Bihaen Marcia graduate from hae skul, hem laek for followim encouragement for kamap pioneer. (Matt. 6:33; Rome 12:11)  Hem sei: “Mi kasem scholarship for study lo wanfala university for fofala year. Bat mi laek for kasem olketa spiritual goal blo mi. So mi tanem daon datfala scholarship and disaed for attendim wanfala technical training skul mekem mi lanem wanfala waka wea bae sapotim mi taem mi pioneer. Datwan hem best disison wea mi mekem. Distaem mi hapi mi regular pioneer, and bikos mi savve adjustim waka schedule blo mi, mi fit for commute lo Bethel and mi kasem olketa nara spesol privilege tu.”

17. Wat nao olketa nara gud samting wea iumi bae kasem taem iumi continue for followim direction blo Jehovah? (Isaiah 48:​17, 18)

¹⁷ Samfala taem, iumi kasem kaonsel from organization wea protectim iumi. For example, iumi kasem warning abaotem wei for lovem selen and olketa samting wea savve putim iumi lo danger for brekem law blo God. Iumi kasem gud samting tu taem iumi followim olketa warning hia. Iumi garem gud konsens and avoidim staka problem. (1 Tim. 6:​9, 10) From datwan, iumi savve worshipim Jehovah lo full heart blo iumi, wea bae mekem iumi for barava hapi, garem peace, and satisfae.—Readim Isaiah 48:​17, 18.

18. Why nao iumi laek continue for followim direction blo Jehovah?

¹⁸ Iumi sure Jehovah bae continue for iusim olketa man for givim direction lo iumi during lo bigfala trabol and insaed lo Wan Thousand Year Rul blo Jesus. (Ps. 45:16) Waswe, bae iumi gohed followim direction nomata hem no followim tingting blo iumi? Hem bae isi for iumi duim olsem if iumi followim direction blo Jehovah distaem. So iumi laek for evritaem followim direction blo Jehovah, wea insaed diswan hem direction wea iumi kasem from olketa man wea hem iusim for leadim iumi. (Isa. 32:​1, 2; Heb. 13:17) And taem iumi duim olsem, iumi savve trustim Jehovah, wea hem Leader blo iumi, bikos hem leadim iumi from olketa spiritual danger and for iumi kasem destination blo iumi, wea hem nao for laef olowe lo niu world.