1. Since bifor yet, hao nao tingting blo staka pipol abaotem frenship blo olketa witim Jehovah?

 WASWE, frenship blo iu witim Jehovah hem barava important lo iu? For sure, iu duim datwan! And ino iuseleva nomoa. Since bifor yet, staka pipol tu feel olsem. (Ps. 104:​33, 34) Staka mekem olketa sakrifaes for worshipim Jehovah. Hem nao samting wea olketa Nazirite lo Israel bifor duim. Hu nao olketa Nazirite, and wat nao iumi savve lanem from example blo olketa?

2. (a) Hu nao olketa Nazirite? (Numbers 6:​1, 2) (b) Why nao wanfala Israelite disaed for mekem vow for kamap Nazirite?

² Disfala word Nazirite, hem kam from wanfala Hebrew word wea minim samwan wea olketa chusim, stap separate, or dedicate for wanfala spesol waka. Disfala word hem fitim olketa Israelite wea lovem Jehovah wea mekem samfala personal sakrifaes for servem Jehovah lo spesol wei. Anda lo Law blo Moses, wanfala man or woman savve mekem wanfala spesol vow lo Jehovah taem hem chus for kamap Nazirite for wanfala taem period. a (Readim Numbers 6:​1, 2.) Taem wanfala Israelite mekem vow for kamap Nazirite, hem mas followim olketa gaedlaen wea evri nara Israelite no followim. So why nao wanfala Israelite disaed for mekem vow for kamap Nazirite? Luk olsem, hem duim datwan bikos hem lovem Jehovah and barava tinghae lo olketa blessing wea hem kasem from Jehovah.—Deut. 6:5; 16:17.

3. Wat nao samting wea pipol blo God distaem and olketa Nazirite semsem lo hem?

 ³ Taem “law bilong Christ” replacim Law blo Moses, datfala Nazirite arrangement hem finis. (Gal. 6:2; Rome 10:4) Bat olsem olketa Nazirite, pipol blo Jehovah distaem barava laek for worshipim Jehovah witim full heart, soul, mind, and strong blo olketa. (Mark 12:30) Iumi mekem vow for worshipim Jehovah taem iumi dedicatem iumiseleva lo hem. For keepim datfala vow, iumi mas duim will blo Jehovah and mekem samfala sakrifaes for worshipim hem. Taem iumi storyim hao olketa Nazirite keepim vow blo olketa, iumi savve lanem olketa important leson abaotem hao iumi savve keepim dedication vow blo iumi. b (Matt. 16:24) Bae iumi storyim samfala example.

WILLING FOR MEKEM OLKETA SAKRIFAES

4. Olsem Numbers 6:​3, 4 storyim, wat kaen sakrifaes nao olketa Nazirite willing for mekem?

⁴ Readim Numbers 6:​3, 4. Olketa Nazirite no allowed for drinkim alcohol and kaikaim eni samting olsem grape and raisin. Olketa nara Israelite enjoyim olketa kaikai olsem bikos no eniting hem rong witim olketa kaikai hia. Bible sei “wine mekem heart blo man hapi” and hem present from God. (Ps. 104:​14, 15) Nomata olketa samting hia savve mekem man hapi, olketa Nazirite willing for avoidim. c

5. Wat nao personal sakrifaes wea Madián and Marcela chus for mekem, and why nao olsem?

⁵ Olsem olketa Nazirite, iumi tu mekem olketa sakrifaes for duim moa samting lo worship blo iumi for Jehovah. Tingim example blo Madián and Marcela. d Disfala couple garem comfortable laef. Madián garem gud waka for selen and tufala stap lo wanfala expensive apartment. Bat tufala laek for duim moa samting lo service blo tufala for Jehovah. For kasem datfala goal, tufala mas mekem samfala adjustment. Tufala sei: “Mitufala stop for spendem staka selen. Mitufala muv lo wanfala smol apartment, and salem car blo mitufala.” Madián and Marcela no need for mekem olketa sakrifaes hia, bat tufala chus for duim olsem bikos tufala laek for duim moa samting lo ministry. Tufala satisfae and hapi lo disison blo tufala.

6. Why nao olketa Christian distaem mekem olketa sakrifaes? (Lukim tu piksa.)

 ⁶ Pipol blo Jehovah distaem hapi for mekem olketa sakrifaes mekem olketa garem moa taem for duim olketa spiritual samting. (1 Cor. 9:​3-6) Jehovah no askem iumi for mekem olketa sakrifaes hia, and hem no rong tu for garem olketa samting hia. For example, samfala disaed for lusim waka and haos blo olketa. Staka disaed for stap singol for lelebet taem, and samfala disaed for no garem pikinini stretawe afta olketa marit. Samfala disaed for go serve lo ples wea garem big need nomata datwan minim olketa mas stap farawe from olketa frens and famili. Staka lo iumi willing for mekem olketa sakrifaes olsem bikos iumi laek for givim best blo iumi lo Jehovah. For sure, Jehovah barava tinghae lo eni sakrifaes wea iumi mekem for servem hem nomata hem big or smol.—Heb. 6:10.

NO FRAET FOR DIFREN FROM OLKETA NARAWAN

7. Why nao maet hem no isi for wanfala Nazirite gohed keepim vow blo hem? (Numbers 6:5) (Lukim tu piksa.)

⁷ Readim Numbers 6:5. Olketa Nazirite mekem vow for no katem hair blo olketa. Datwan hem for showim olketa barava willing for obeyim Jehovah. Sapos wanfala Israelite kamap Nazirite for longtaem, hair blo hem bae long and maet olketa narawan savve noticem datwan. If olketa narawan respectim hem and encouragem hem for keepim Nazirite vow blo hem, bae hem isi for hem keepim vow blo hem. Bat sorre samting, samfala taem lo Israel bifor, pipol no tinghae or sapotim olketa Nazirite. During lo taem blo profet Amos, olketa apostate Israelite “gohed givim wine for olketa Nazirite drinkim,” maet hem for mekem olketa no keepim vow blo olketa for no drinkim wine. (Amos 2:12) Samfala taem, olketa Nazirite need for no fraet for gohed keepim vow blo olketa and for difren from olketa narawan.

8. Wat nao iu faendem abaotem experience blo Benjamin wea encouragem iu?

⁸ Witim help blo Jehovah, iumi tu bae no fraet for difren from olketa narawan nomata iumi man for shame. Tingim example blo ten years old Benjamin from Norway. Bikos lo war wea gohed lo Ukraine, skul blo hem arrangem wanfala event for sapotim pipol lo there. Olketa askem olketa pikinini for werem kaleko wea garem kala blo flag blo Ukraine and for singsing. For no joinim datfala event, Benjamin plan for standap farawe from ples wea datfala event bae tek ples. Bat wanfala teacher lukim hem and singaot go lo hem: “Iu kam and joinim mifala distaem. Mifala evriwan weitim iu!” Benjamin no fraet for go story  lo datfala teacher and sei: “Mi neutral, and mi no joinim olketa politikol demonstration. Bat staka Jehovah’s Witness stap lo prison bikos olketa disaed for no go lo war.” Datfala teacher acceptim wat hem talem and sei for hem no joinim olketa. Bat olketa classmate blo hem askem why hem no joinim olketa. Benjamin hem fraet tumas and klosap krae nao. Nomata olsem, hem brave for talem full class wat hem talem lo datfala teacher. Bihaen, Benjamin talem parents blo hem dat Jehovah helpem hem for defendim biliv blo hem.

9. Hao nao iumi savve mekem heart blo Jehovah hapi?

⁹ From iumi chus for obeyim Jehovah, pipol bae noticem hao iumi difren from olketa narawan. Iumi shud no fraet for talem olketa narawan lo waka ples or lo skul hao iumi wanfala Jehovah’s Witness. And taem attitude blo pipol and wei blo olketa gohed for kamap worst, bae hem no isi for iumi followim olketa Bible principle and for storyim gud nius lo olketa narawan. (2 Tim. 1:8; 3:13) Bat evritaem tingim hao iumi “mekem heart blo [Jehovah] hapi,” taem iumi no fraet for difren from olketa wea no worshipim hem.—Prov. 27:11; Mal. 3:18.

PUTIM JEHOVAH FIRST LO LAEF BLO IU

10. Hao nao wei for followim olketa requirement wea Numbers 6:​6, 7 storyim, savve olsem wanfala challenge for olketa Nazirite?

¹⁰ Readim Numbers 6:​6, 7. Olketa Nazirite mas no go klosap lo wanfala dead body. Taem iumi tingim datwan, maet iumi tingse diswan hem no wanfala big sakrifaes. Lo taem blo Bible, wanfala Nazirite savve kasem big challenge lo diswan taem wanfala klos relative hem dae. Kastom lo datfala taem, olketa man mas sidaon klosap lo dead body. (John 19:​39, 40; Acts 9:​36-40) Taem samwan vow for kamap Nazirite, hem bae no followim samfala kastom olsem. Nomata olketa deal witim wanfala situation lo famili wea mekem olketa sorre tumas, olketa Nazirite showim olketa garem strong faith taem olketa gohed for keepim vow blo olketa. Iumi sure Jehovah gohed strongim olketa faithful wan hia for deal witim eni challenge wea olketa feisim.

11. Wat nao wanfala Christian mas disaed strong for duim taem hem deal witim samfala samting lo famili? (Lukim tu piksa.)

¹¹ Iumi olketa Christian tu ting serious abaotem dedication vow blo iumi for Jehovah. Diswan affectim olketa disison and  samfala samting wea iumi duim witim famili blo iumi. Iumi waka hard for kea for olketa responsibility blo iumi for famili, bat iumi bae no letem wat olketa famili member laekem for kamap first lo wat Jehovah laekem iumi for duim. (Matt. 10:​35-37; 1 Tim. 5:8) Samfala taem, maet iumi mekem olketa disison wea olketa relative no hapi lo hem bikos iumi laek for mekem Jehovah nao hapi.

12. Taem Alexandru deal witim wanfala hard situation lo famili, wat nao hem duim and no duim?

¹² Tingim experience blo Alexandru and waef blo hem, Dorina. Afta tufala studyim Bible for klosap wan year, Dorina disaed for stop and hem laekem hasband tu for stop study. Bat lo kaenfala wei, Alexandru talem lo waef dat bae hem continue lo study. Dorina no hapi and trae for forcem hem for stop study. Alexandru sei hem trae for understandim why nao waef blo hem feel olsem, bat hem no minim. Samfala taem wea Dorina tok strong and tok spoelem hem, hem laek givap nao for study. Bat Alexandru gohed for putim Jehovah first lo laef blo hem, and lo semtaem hem respectim and lovem waef blo hem. Bikos lo gudfala example wea Alexandru showim, waef disaed for study bak moa and gogo hem baptaes.—Lukim lo jw.org video Alexandru and Dorina Văcar: “Man wea Garem Love Hem Patient and Kaen” lo series “Truth Changem Laef blo Pipol.”

13. Hao nao iumi savve showim love for Jehovah and for famili blo iumi?

¹³ Jehovah nao startim famili arrangement, and hem laekem iumi for garem hapi famili. (Eph. 3:​14, 15) If iumi laek for garem trufala hapi, iumi need for duim olketa samting followim wei blo Jehovah. Iumi sure Jehovah tinghae lo olketa sakrifaes wea iumi duim for worshipim hem taem iumi kea and showimaot love and respect for famili blo iumi.—Rome 12:10.

ENCOURAGEM NARAWAN FOR GAREM WILLING SPIRIT OLSEM OLKETA NAZIRITE

14. Hu nao iumi laek traem best for encouragem olketa?

¹⁴ Evriwan wea chus for worshipim Jehovah distaem mas willing for mekem olketa sakrifaes bikos olketa lovem hem. Samfala taem, hem no isi for duim datwan. Hao nao iumi savve helpem narawan for garem willing spirit olsem? Taem iumi talem toktok wea encouragem olketa. (Job 16:5) Waswe, samfala lo kongregeson blo iu trae for mekem laef blo olketa simpol mekem olketa duim moa samting lo service blo Jehovah? Hao, iu savve lo samfala young wan wea brave for difren from olketa narawan lo skul, nomata hem no isi for  olketa duim datwan? Waswe, samfala Bible student and olketa nara brata and sista maet stragol for gohed faithful bikos famili againstim olketa? Iumi laek duim evri samting wea iumi fit for duim for encouragem olketa and talem hao iumi tinghae lo wei wea olketa no fraet and for olketa sakrifaes wea olketa duim for Jehovah.—Philem. 4, 5, 7.

15. Hao nao samfala sapotim olketa wea insaed full-taem service?

¹⁵ Samfala taem, maet iumi savve duim samting for helpem olketa brata and sista wea insaed full-taem service. (Prov. 19:17; Heb. 13:16) Hem nao wat wanfala faithful olo sista lo Sri Lanka barava laek for duim. Pension wea hem kasem from gavman hem increase, so hem laek for helpem tufala young pioneer sista for continue lo ministry blo tufala bikos tufala kasem hard taem saed lo selen. Hem disaed for givim wanfala specific amount lo selen each month for help for peim telephone bill blo tufala. Datfala sista garem naesfala wei!

16. Wat nao iumi savve lanem from datfala Nazirite arrangement lo bifor?

¹⁶ Iumi savve lanem staka samting from gudfala example blo olketa wea chus seleva for kamap Nazirite bifor showimaot! Bat datfala arrangement teachim iumi samting abaotem Jehovah tu. Jehovah savve iumi laek for duim samting for mekem hem hapi and hao iumi willing for mekem olketa sakrifaes for keepim dedication vow blo iumi. Jehovah respectim iumi taem hem givim iumi chance for chus for duim samting for showimaot iumi lovem hem. (Prov. 23:​15, 16; Mark 10:​28-30; 1 John 4:19) Datfala Nazirite arrangement lo bifor hem showimaot hao Jehovah noticem and tinghae lo olketa sakrifaes wea iumi mekem for servem hem. Iumi laek disaed strong for continue for servem Jehovah, and willing for givim best blo iumi for hem.