OLKETA Bible raeta repeatim olketa sem phrase samfala taem. Bae iumi storyim thrifala samting wea maet mekem olketa raeta hia for duim olsem:

Taem wea olketa raetem. Lo Israel bifor, pipol no garem personal copy blo Law. Olketa only herem Law taem datfala nation hipap tugeta lo tabernacle and lo temple. (Deut. 31:​10-12) Luk olsem samfala samting mas disturbim olketa taem olketa lisin and standap for samfala hour insaed lo big crowd. (Neh. 8:​2, 3, 7) Lo taem olsem, for repeatim olketa important phrase bae mekem hem isi for pipol rememberim olketa scripture and followim. For repeatim samfala word, datwan bae helpem olketa for rememberim olketa detail samting abaotem olketa law wea Jehovah givim lo olketa.—Lev. 18:​4-22; Deut. 5:1.

Hao olketa raetem. Samfala part lo Bible olketa raetem lo olketa song olsem, Bible buk Psalms, Song of Solomon, and Lamentations. Samfala taem olketa repeatim olketa word insaed olketa song for mekhae lo main point blo song and helpem olketa wea lisin for memorizim olketa word. For example, lukim olketa word wea olketa iusim lo Psalm 115:​9-11: “O Israel, trustim Jehovah. Hem nao helpem iufala and hem shield blo iufala. O famili blo Aaron, trustim Jehovah. Hem nao helpem iufala and hem shield blo iufala. Iufala wea fraet lo Jehovah, trustim Jehovah. Hem nao helpem iufala and hem shield blo iufala.” Waswe, iu lukim hao taem olketa repeatim olketa word hia bae hem barava kasem heart blo olketa wea singim disfala song?

Why olketa raetem. Samfala taem olketa Bible raeta repeatim olketa important phrase. For example, taem Jehovah talem olketa Israelite for no kaikaim blood, Moses mas repeatim for staka taem reason why olketa no duim datwan. God laekem olketa for luksavve laef blo eni samting wea laef hem insaed lo blood, wea minim, blood hem representim laef. (Lev. 17:​11, 14) Gogo taem olketa aposol and olketa elder lo Jerusalem listim samfala samting wea olketa Christian need for avoidim for mekem God hapi, olketa repeatim moa why olketa mas avoidim blood.—Acts 15:​20, 29.

Nomata Bible repeatim olketa phrase and word samfala taem, datwan no minim Jehovah laekem for hem kamap habit blo iumi for repeatim olketa Bible phrase. For example, Jesus sei: “Taem iu prea, no talem sem samting evritaem.” (Matt. 6:7) Bihaen hem talem datwan, hem talem iumi olketa samting wea iumi savve prea abaotem wea fitim will blo God. (Matt. 6:​9-13) So nomata iumi no repeatim olketa sem word lo prea blo iumi, iumi savve continue for prea abaotem olketa sem topic staka taem.—Matt. 7:​7-11.

So hem for gudfala reason why Bible hem repeatim samfala word and samfala phrase. Datwan hem wanfala wei wea Nambawan Teacher blo iumi teachim iumi for kasem gud samting.—Isa. 48:​17, 18.