Waswe, Iu Savve Finis?
Hao nao pipol long bifor savve laetem fire taem olketa go long nara ples?
LONG Genesis chapter 22, God talem Abraham for go long wanfala farawe ples for mekem wanfala sakrifaes. Bible sei: “Abraham givim firewood for datfala sakrifaes long son bilong hem Isaac for hem karem. Then hem holem fire and naef, and tufala wakabaot go nao.”—Gen. 22:6.
Bible no storyim hao pipol long bifor savve laetem fire. So waswe, Abraham and Isaac laetem fire firstaem then karem witim tufala taem tufala gogo? Wanfala savveman sei sapos tufala duim datwan bae hem hard for fire hia gohed laet go kasem datfala farawe ples wea tufala gogo for hem. Maet Abraham and son bilong hem tekem evri samting wea tufala needim for laetem fire.
Bat olketa nara savveman sei long bifor hem no isi for laetem fire. So samting wea isi nao hem for pipol tekem sakol wea laet finis long eni haos wea stap klosap. Staka savveman tingse Abraham hem tekem olketa sakol wea laet finis long datfala gogo bilong tufala. Maet hem karem olketa sakol hia insaed wanfala pot wea garem handol taem tufala gogo. (Isa. 30:14) Then hem iusim olketa sakol hia and olketa smol stik wea drae for startim fire.