“Teachim Olketa Samting Hia Long Olketa Man wea Faithful”
“Teachim olketa samting hia long olketa man wea faithful wea bae mekem olketa fit for teachim datwan long narawan tu.”—2 TIM. 2:2.
SONG: 123, 53
1, 2. Wanem nao tingting bilong staka pipol abaotem waka bilong olketa?
LONG tingting bilong staka pipol, waka wea olketa duim hem important samting long laef bilong olketa. Long samfala ples, taem olketa meetim samwan and laek for savve long hem, wanfala samting wea olketa savve askem nao: “Wat kaen waka nao iu duim?”
2 Samfala taem Bible savve story abaotem samwan followim waka wea hem duim. Olsem example, Bible story abaotem “Matthew, wea hem man for tekem tax,” “Simon . . . hem man for redyim skin bilong animal wea pipol savve iusim for wakem samting,” and “Luke, datfala doctor wea staka olketa lovem hem.” (Matt. 10:3; Acts 10:6; Col. 4:14) Samfala taem Bible storyim samfala man tu followim assignment wea olketa kasem from Jehovah. Example nao Bible kolem David, King David, Elijah, profet Elijah, and Paul, aposol Paul. Olketa man hia barava tinghae long waka wea olketa kasem from Jehovah. Iumi tu shud tinghae long eni privilege wea iumi kasem insaed organization bilong Jehovah.
3. Why nao olketa wea olo mas trainim olketa wea young? (Lukim piksa long start bilong study.)
Eccl. 1:4) Long organization bilong Jehovah distaem, preaching waka hem kamap big, and pipol bilong Jehovah iusim technology for helpem staka pipol moa for herem gud nius. Samfala taem hem no isi for olketa olo lanem olketa niu samting hia. (Luke 5:39) And tu, taem man gogo for olo, body bilong hem no strong olsem bifor. (Prov. 20:29) Dastawe hem barava fitim for olketa wea olo for trainim olketa wea young for duim moa waka insaed organization bilong Jehovah.—Readim Psalm 71:18.
3 Iumi hapi tumas for worshipim Jehovah and iumi barava tinghae long eni privilege wea iumi kasem. From iumi enjoyim tumas olketa privilege hia, iumi laek for gohed for duim olketa waka hia. Sorre samting nao, taem man kamap olo, hem no fit for duim evri waka wea hem savve duim taem hem young. (4. Why nao samfala hol bak for givim waka long olketa narawan? (Lukim box “ Why Samfala Brata Hol Bak for Givim Waka Long Narawan.”)
4 Samfala brata wea garem responsibility insaed kongregeson hol bak for givim waka long olketa brata wea young. Samfala brata wea olo savve feel sorre taem olketa stop for duim assignment wea olketa bin duim for longtaem finis. Maet olketa no laek for let go long spesol waka wea olketa barava enjoyim. Or maet olketa tingse sapos narawan duim datfala waka, bae hem no duim gud. Or maet olketa tingse olketa no garem taem for trainim olketa narawan. Bat long semtaem, olketa brata wea young mas patient sapos olketa no kwiktaem kasem samfala moa responsibility.
5. Olketa wanem kwestin nao bae iumi storyim long disfala study?
5 Why nao hem important for olketa olo helpem olketa brata wea young for duim samfala waka moa long kongregeson? Hao nao olketa savve duim diswan? (2 Tim. 2:2) And why nao olketa brata wea young mas garem stretfala tingting taem olketa waka witim olketa olo brata hia wea garem bigfala savve, and lane from olketa? Firstaem bae iumi storyim wanem King David duim for sapotim son bilong hem for duim wanfala barava important waka.
DAVID SAPOTIM SOLOMON FOR BUILDIM TEMPLE
6. Wanem nao King David laek for duim, and wanem nao Jehovah talem long hem?
6 David mas ranawe and haed for staka year from King Saul. Gogo, taem hem kamap king hem stap long wanfala naes haos. So hem sei long profet Nathan: “Mi stap long haos wea olketa wakem long cedar, bat ark bilong agreement bilong Jehovah hem stap insaed long tent nomoa.” David barava laek for wakem wanfala naes temple for Jehovah. Nathan sei long hem: “Sapos iu tingting for duim eni samting, iu duim, bikos trufala God hem stap witim iu.” Bat datwan hem no followim tingting bilong Jehovah. Hem talem Nathan for sei olsem long David: “Iu bae no wakem datfala haos wea mi bae stap insaed.” Nomata Jehovah promisim David bae Hem evritaem stap witim hem, Jehovah talem David son bilong hem Solomon nao bae wakem datfala temple. Wanem nao David duim?—1 Chron. 17:1-4, 8, 11, 12; 29:1.
7. Hao nao feeling bilong David abaotem samting wea Jehovah talem long hem?
7 Maet David hem barava feel nogud from hem laekem tumas for wakem datfala temple for Jehovah. Nomata olsem, hem barava sapotim son bilong hem Solomon for wakem datfala temple. David organizem waka for hipimap iron, copper, silver, gold, and timba. And tu, hem organizem olketa wakaman for wakem datfala temple. David no feel nogud bikos Solomon nao bae kasem praise for buildim datfala temple, wea gogo olketa kolem temple bilong Solomon. Bat hem encouragem Solomon and sei: “Son bilong mi, Jehovah bae stap witim iu, and bae hem helpem iu for wakem datfala haos bilong Jehovah, wea hem God bilong iu, olsem hem promisim finis long iu.”—1 Chron. 22:11, 14-16.
8. Why nao maet David tingse Solomon hem no fit yet for wakem datfala temple, bat wanem nao David duim?
8 Readim 1 Chronicles 22:5. Maet long tingting bilong David, Solomon hem no fit yet for duim bigfala waka olsem. Bae datfala temple hem mas “barava luk naes,” bat Solomon hem “young nomoa and no garem bigfala savve” long datfala taem. Nomata olsem, David hem savve Jehovah bae helpem Solomon for duim datfala spesol waka. So David duim wanem hem fit for duim for sapotim Solomon long datfala big waka.
WEI FOR TRAINIM NARAWAN SAVVE MEKEM IU HAPI
Iumi hapi for lukim olketa brata wea young kasem samfala responsibility moa (Paragraf 9 storyim diswan)
9. Wanem nao bae helpem olketa wea olo for hapi taem olketa givim olketa waka insaed organization long olketa narawan? Storyim example.
9 Olketa brata wea olo shud no sorre taem olketa mas givim samfala responsibility wea olketa garem long olketa brata wea young. Iumi evriwan luksavve waka bilong Jehovah nao hem barava important distaem. Wei for trainim olketa brata wea young for lukaftarem olketa responsibility hia bae mekem datfala waka gohed. Tingim disfala example. Wanfala dadi teachim son bilong hem hao for
draevem wanfala trak. Taem hem smol yet hem savve lukluk nomoa followim hao dadi hem draev. Taem boy hia big lelebet, dadi savve explainim long hem hao for draev. Gogo taem hem tekem license, hemseleva savve draevem datfala trak. Nomata olsem, dadi gohed for givim training long hem. Samfala taem dadi nao draevem trak and samfala taem hem nao draev. Bat taem dadi hem gogo for olo, staka taem bae son bilong hem nao draev. Waswe, bae dadi hem feel nogud long datwan? Nomoa, hem bae hapi for son bilong hem tekem hem long eni ples wea hem laek for go. Long sem wei tu, olketa brata wea olo olketa hapi taem olketa lukim olketa brata wea olketa trainim redi for lukaftarem olketa responsibility insaed organization bilong Jehovah.10. Wanem nao tingting bilong Moses abaotem wei for garem paoa and bignem?
10 Iumi mas keakea for no jealous long olketa narawan taem olketa kasem eni assignment. Iumi savve lane from example bilong Moses taem samfala Israelite duim waka olsem profet. (Readim Numbers 11:24-29.) Joshua laek for stopem olketa for no duim datwan, bat Moses sei: “Waswe, iu wari nogud olketa narawan changem mi? Iu no wari. Bae mi hapi tumas sapos evri pipol bilong Jehovah olketa profet and Jehovah givim spirit bilong hem long olketa!” Moses savve Jehovah nao leadim datfala waka. Moses no aftarem bignem for hemseleva, bat hem laekem evriwan wea worshipim Jehovah for kasem assignment. Waswe long iumi distaem? Waswe, iumi hapi taem olketa narawan kasem assignment insaed organization bilong Jehovah?
11. Wanem nao wanfala brata talem abaotem wei for trainim olketa narawan for duim moa waka?
11 Staka brata wea waka hard insaed organization bilong Jehovah for staka year olketa trainim olketa wea young for duim moa waka for Jehovah. Olsem example, bae iumi storyim wanfala brata wea nem bilong hem Peter. Hem insaed full-taem service for 74 year, and for 35 year hem waka long wanfala branch office long Europe. For staka year hem nao overseer bilong Service Department. Gogo nara brata wea nem bilong Paul, wea Peter hem trainim, hem changem hem. Waswe, Peter hem feel nogud long diswan? Nomoa. Peter sei: “Mi hapi for lukim olketa brata wea kasem gudfala training for duim moa waka insaed organization bilong Jehovah, and olketa barava duim gud datfala waka.’
TINGHAE LONG OLKETA WEA OLO
12. Wanem nao iumi savve lanem from example bilong Rehoboam?
12 Taem son bilong Solomon, Rehoboam hem kamap king, hem askem advaes from olketa wea olo abaotem hao for duim datfala waka. Bat hem no laek followim advaes bilong olketa! Hem followim nao advaes bilong olketa nara young man wea sem age witim hem. Nogud samting nao kamaot from datwan. (2 Chron. 10:6-11, 19) Wanem nao iumi lanem from diswan? Hem gud for askem advaes from olketa wea olo and wea garem savve winim iumi. Nomata olsem, olketa wea young shud no tingse olketa mas gohed followim sem wei wea iumi duim samting bifor. Bat olketa shud tinghae long advaes bilong olketa wea olo and no kwiktaem for tingse advaes hia hem no fitim distaem.
13. Hao nao olketa brata wea young savve waka tugeta witim olketa wea olo?
13 Samfala taem olketa brata wea young kasem bigfala responsibility, and olketa kamap overseer bilong olketa brata wea olo and garem moa savve winim olketa. Hem gud for olketa lane from olketa brata hia wea olo. Long example wea iumi storyim bifor, taem Paul changem Peter for kamap overseer long wanfala department long Bethel, hem sei: “Mi savve askem Peter for advaes staka taem, and mi encouragem olketa narawan long datfala department for duim sem samting.”
14. Wanem nao iumi lanem from wei wea Timothy and aposol Paul waka tugeta?
Philippi 2:20-22.) Paul sei long olketa long Corinth: “Mi sendem Timothy long iufala wea hem olsem pikinini bilong mi. Mi lovem hem and hem faithful for duim waka bilong Lord. Hem bae showim iufala long hao mi duim waka bilong mi for Christ Jesus, wea hem nao mi teachim long olketa kongregeson long evri ples.” (1 Cor. 4:17) Samting wea Paul talem showimaot hem and Timothy waka gud tugeta and sapotim each other. Paul teachim Timothy ‘hao hem duim waka bilong Christ’ and Timothy lane for duim gud datfala waka. Paul lovem Timothy and hem sure hem bae lukaftarem gud olketa brata and sista long Corinth. Olketa elder savve followim example bilong aposol Paul for trainim olketa nara brata for duim waka insaed kongregeson.
14 Timothy hem barava young long aposol Paul and tufala waka tugeta for staka year. (ReadimIUMI EVRIWAN GAREM WAKA FOR DUIM
15. Hao nao Rome 12:3-5 savve helpem iumi taem olketa change affectim iumi?
15 Iumi stap long taem wea hem barava spesol. Organization bilong Jehovah long earth hem gohed for kamap big. So olketa samting insaed organization bae gohed for change. Olketa change hia maet affectim samfala long iumi and maet hem no isi for deal witim. Samting wea bae helpem iumi nao hem for hambol and for ting long waka bilong Jehovah hem important winim wanem iumiseleva laekem. Diswan savve helpem iumi for wan mind. Paul sei long olketa Christian long Rome: “Mi talem iufala evriwan for no tinghae tumas long iufala seleva, bat garem gudfala tingting fitim faith wea God givim long iufala wanwan. Body bilong iumi garem staka part, bat evri part duim difren waka. Long sem wei tu, nomata iumi staka, iumi wanfala body nomoa wea wan mind witim Christ.”—Rome 12:3-5.
16. Wanem nao olketa brata wea olo, olketa wea young, and olketa waef savve duim for helpem kongregeson garem wan mind?
16 Pipol bilong Jehovah laek for sapotim Kingdom and laek for duim eni samting hem askem olketa for duim. Olketa brata wea olo savve trainim olketa wea young. Olketa brata wea young bae willing for kasem samfala moa responsibility, and olketa bae hambol and showimaot respect taem olketa duim diswan. And taem olketa Christian sista sapotim hasband bilong olketa taem olketa change kamap, hasband bilong olketa tinghae long datwan. Olketa woman hia savve followim example bilong Priscilla wea faithful for waka tugeta witim hasband bilong hem, Aquila.—Acts 18:2.
17. Wanem nao Jesus trainim olketa disaepol bilong hem for duim?
17 Jesus showimaot nambawan example for trainim olketa narawan. Jesus savve olketa narawan nao bae gohed for duim waka wea hem startim. Hem savve olketa disaepol bilong hem no perfect. Bat hem trustim olketa and sei olketa bae duim bigfala waka winim waka wea hem duim. (John 14:12) Hem trainim gud long olketa, and olketa talemaot gud nius long full world long datfala taem.—Col. 1:23.
18. Wanem nambawan hope nao iumi garem for future, and wanem waka nao iumi gohed for duim distaem?
18 Bihaen Jesus hem dae, Jehovah mekem hem laef bak and kasem samfala responsibility moa. And tu, Jehovah givim hem paoa wea “winim evri gavman and paoa and rul.” (Eph. 1:19-21) Sapos iumi faithful and iumi dae bifor Armageddon, iumi bae laef bak and garem staka waka for duim long niu world wea mekem iumi hapi. Distaem iumi evriwan garem important waka for talemaot gud nius and teachim pipol for kamap disaepol. So nomata iumi young or iumi olo, iumi evriwan savve gohed “busy long waka bilong Lord.”—1 Cor. 15:58.