1. Wanem nao samfala problem wea iumi mas deal witim, bat why nao Jehovah hapi long olketa wea faithful long hem? (Lukim piksa long start bilong study.)

LAEF long disfala world hem no isi. Staka long iufala olketa brata and sista safa from bigfala sik. Samfala wea olo finis mas lukaftarem olketa nara olo relative. And olketa narawan stragol for provaedem need bilong famili. Mifala savve staka long iufala no deal witim wanfala problem nomoa, bat mas deal witim evri problem hia long semtaem. Diswan savve tekem staka taem, strong, and selen for deal witim datwan. Nomata olsem, iu barava trustim Jehovah bae helpem iu. Iu savve, klosap nao evri samting bae kamap gud bikos hem nao wanem Jehovah promisim. Jehovah barava hapi for lukim iu gohed faithful!

2. Hao nao Aesaea 40:29 encouragem iumi, bat wanem kaen tingting nao iumi shud no garem?

² Waswe, samfala taem iu feel hem hard tumas for deal witim olketa problem wea iu garem? Sapos iu feel olsem, no wari, hem no iuseleva nomoa. Samfala wea faithful long God bifor tu feel olsem olketa no wei nao. (Fas Kings 19:4; Job 7:7) Wanem nao helpem olketa for no givap? Olketa depend long Jehovah for  strongim olketa. Bible sei God “mekem olketa hu i taet fo strong.” (Aesaea 40:29) Sorre samting nao, samfala distaem feel olsem best wei for deal witim olketa problem hem for stop worshipim Jehovah for lelebet taem. Olketa feel olsem wei for worshipim Jehovah hem no wanfala blessing bat hem wanfala hevi. So olketa stop for readim Bible, no go long olketa meeting, and preaching. Datwan nao samting wea Satan laekem olketa for duim.

3. (a) Wanem nao iumi savve duim for no letem Satan mekem iumi wikdaon? (b) Wanem nao bae iumi storyim long disfala study?

³ Satan savve wei wea iumi busy for duim olketa spiritual samting savve strongim iumi, and hem no laekem iumi for strong long spiritual wei. So taem body and tingting bilong iu taed tumas, no lusim Jehovah. Gohed for klos long hem. Bible sei hem bae ‘mekem iu barava strong.’ (1 Pet. 5:10; Jas. 4:8) Long disfala study, iumi bae lane from Aesaea 40:26-31 abaotem wei wea Jehovah savve strongim iumi. Bae iumi storyim tu, tufala samting wea maet happen wea savve mekem iumi no strong for duim waka bilong Jehovah, and iumi bae lanem hao for followim olketa Bible principle for helpem iumi for no givap.

4. Wanem nao iumi lanem from Aesaea 40:26?

⁴ Readim Aesaea 40:26. No eniwan savve haomas star nao stap long full universe. Olketa scientist sei insaed Milky Way galaxy nomoa, hem garem 400 billion star. Nomata olsem, Jehovah givim nem long evri star. Wanem nao iumi lanem from datwan? Jehovah interest long olketa star, nomata olketa no savve worshipim hem. Sapos olsem, datwan minim Jehovah mas barava interest long iu, bikos iu lovem and worshipim hem. (Sams 19:1, 3, 14) Dadi bilong iumi long heven savve long evri samting abaotem iu. Bible sei: “Hem kaontem finis tu evri hair long hed bilong [iu].” (Matt. 10:30) Jehovah laekem iumi for savve hem “gohed fo lukaftarem olketa wea i gohed fo obeim hem.” (Sams 37:18) Tru nao, Jehovah savve long evri problem wea iu garem and hem bae strongim iu for deal witim olketa problem hia.

5. Why nao iumi sure Jehovah savve givim iumi strong wea iumi needim?

⁵ Readim Aesaea 40:28. Jehovah nao givim paoa long evri samting. Olsem example, tingim paoa wea hem givim long sun. Wanfala man for raet abaotem science, David Bodanis, hem sei insaed wanfala second sun hem givimaot paoa wea semsem olsem paoa wea kamap taem staka billion atomic bomb bosta. Wanfala man wea duim research, hem faendaot hao paoa wea sun givimaot insaed wan second nomoa savve givim paoa for pipol long full world for 200,000 year! Tru nao, Jehovah, man wea givim paoa long sun, savve givim iumi strong wea iumi needim for deal witim olketa problem bilong iumi.

6. Why nao hem no hard for duim wanem Jesus laekem, and hao nao datwan affectim wanem iumi duim?

⁶ Readim Aesaea 40:29. Wei for worshipim Jehovah mekem iumi barava hapi. Jesus talem olketa disaepol: “Iufala waka witim mi.” And hem sei, “Wei for duim olsem bae strongim iufala. Bae hem no hard for iufala waka witim mi, and iufala savve karem samting wea mi askem iufala for karem.” (Matt. 11:28-30) Datwan barava tru! Samfala taem iumi feel taed taem iumi lusim haos for go long meeting or preaching. Bat bihaen iumi kam bak long haos, iumi feel strong and redi for deal witim eni problem. Tru nao, hem no hard for duim wanem Jesus laekem.

7. Storyim eni experience wea showimaot wanem Matthew 11:28-30 talem hem tru.

 ⁷ Tingim experience bilong wanfala sista wea garem sik wea mekem hem wik tumas, sorre, and garem olketa headache wea pain tumas. So samfala taem hem hard for hem attendim meeting. Nomata olsem, wanday bihaen hem go long meeting, hem sei: “Tok wea kamap hem abaotem wei for wikdaon. Brata wea givim tok, story long wei wea showimaot hem tingim and minim man wea kasem problem olsem. Taem mi herem datwan mi krae. Datwan helpem mi for tingim hao meeting nao ples wea mi need for go long hem.” Hem barava hapi bikos hem traem best for attendim datfala meeting!

8, 9. Wanem nao aposol Paul minim taem hem sei, “Taem mi wik, hem nao taem wea mi strong”?

⁸ Readim Aesaea 40:30. Nomata sapos iumi savve hao for duim staka samting, bat sapos iumi depend long strong bilong iumiseleva nomoa bae hem hard for iumi duim evri samting wea iumi laek for duim. Iumi evriwan need for luksavve long diswan. Aposol Paul no fit for duim evri samting wea hem laek for duim. Taem hem talem feeling bilong hem long Jehovah, Jehovah sei: “Paoa bilong mi barava strong taem iu wik.” Paul minim wanem Jehovah talem. Dastawe hem sei: “Taem mi wik, hem nao taem wea mi strong.” (2 Cor. 12:7-10) Wanem nao hem minim?

⁹ Paul luksavve hem no fit for depend long strong bilong hemseleva. Hem needim help bilong God wea garem bigfala paoa. Holy spirit bilong God nao fit for strongim hem. And datfala holy spirit savve mekem Paul garem paoa for duim samting wea hemseleva no fit for duim. God savve duim datwan for iumi tu. Taem Jehovah givim iumi holy spirit, datwan mekem iumi kamap barava strong!

10. Hao nao Jehovah helpem David for deal witim olketa problem bilong hem?

¹⁰ David, man wea raetem psalm, hem experiencem wei wea holy spirit bilong God strongim hem. Hem sing olsem, “Yu gohed fo givim paoa long mi, fo faetem olketa enemi blong mi. Ya, yu gohed fo mekem mi strong fo barava winim taon blong olketa enemi blong mi.” (Sams 18:29) Iumi tu kasem samfala problem wea olsem enemy wea iumi no savve winim witim strong bilong iumiseleva. Dastawe iumi needim Jehovah for helpem iumi.

11. Hao nao holy spirit savve helpem iumi for deal witim samting wea no isi?

¹¹ Readim Aesaea 40:31. Eagle no depend long strong bilong hemseleva for flae go ap hae and for flae farawe. Warm air wea go ap long skae savve liftim eagle for hem flae go ap hae, wea mekem eagle hia no taed. So taem iu mas deal witim wanfala samting wea hem no isi, tingim datfala eagle. Barava askem Jehovah for givim ‘holy spirit for helpem iu’ for strong. (John 14:26) Gud samting nao, iumi savve askem Jehovah for givim iumi holy spirit enitaem nomoa. Maet iumi need for askem Jehovah for helpem iumi, especially taem iumi feel nogud long wanfala brata or sista long kongregeson. Bat wanem nao savve mekem iumi feel nogud olsem?

12, 13. (a) Why nao samfala taem iumi feel nogud long each other? (b) Wanem nao iumi lanem abaotem Jehovah from story bilong Joseph?

¹² Wei for feel nogud long each other savve happen bikos iumi evriwan no perfect. Samfala taem maet iumi kros long samting wea narawan talem and duim or maet olketa nao kros long samting wea iumi duim. Diswan no isi for deal witim. Bat datwan givim iumi chance for showimaot iumi faithful long Jehovah taem iumi lane for wan mind for waka tugeta witim olketa brata and sista. Jehovah lovem olketa nomata olketa no perfect, and iumi shud olsem tu.

 ¹³ Jehovah letem pipol bilong hem for kasem test. Iumi lanem datwan from story bilong Joseph. Taem Joseph young, olketa haf brata bilong hem jealous and salem hem and hem kamap slave long Egypt. (Jenesis 37:28) Jehovah lukim evri samting wea happen, and for sure, hem sorre for lukim hao olketa treatim nogud faithful fren bilong hem, Joseph. Bat Jehovah no stopem datwan. And nomata taem olketa accusim Joseph and sei hem trae for reipim waef bilong Potiphar and hem go long prison, still Jehovah no duim eni samting. Bat waswe, God lusim Joseph? Nomoa. Bible sei: “[Jehovah] hemi stap wetem Josef, an hemi gohed fo duim olketa waka ya barava gud tumas.”—Jenesis 39:21-23.

14. Wanem gud samting nao iumi kasem taem iumi no keepim kros?

¹⁴ Nara example hem David, wea staka nogud samting kasem hem. From hem fren bilong God, hem no laek for keepim kros. Hem raet olsem: “Yu no kros, an yu no wari, tufala samting ya i wei fo mekem trabol . . . nomoa.” (Sams 37:8) Important reason why iumi no laek keepim kros hem bikos iumi laek followim example bilong Jehovah, from “hemi no save panisim yumi fitim olketa sin blong yumi,” and hem forgivim iumi. (Sams 103:10) Iumi savve kasem olketa nara gud samting tu sapos iumi no gohed keepim kros. Olsem example, kros savve kosim sik olsem hae blood, shortwind, savve spoelem liver, pancreas, and mekem olketa problem long bele. And taem iumi kros, iumi no savve tingting stret. Samfala taem from iumi kros tumas iumi talem or duim samting wea mekem narawan feel nogud, then bihaen, iumi feel sorre for longtaem. Hem gud for followim advaes long Bible, wea sei: “Garem kuaet tingting, bae yu helti.” (Provebs 14:30) So wanem nao bae iumi duim taem narawan mekem iumi feel nogud, and hao nao iumi savve mek peace? Followim wise advaes insaed Bible.

15, 16. Wanem nao iumi shud duim taem samwan mekem iumi feel nogud?

¹⁵ Readim Ephesus 4:26. Iumi no sapraes taem pipol wea no worshipim Jehovah treatim iumi nogud. Bat taem wanfala Christian brata or sista or famili member talem or duim eniting wea mekem iumi feel nogud, datwan savve barava affectim iumi. Hao sapos iumi no fit for forgetim samting wea happen? Waswe, bae iumi keepim feeling for kros for staka year? Or waswe, bae iumi followim advaes long Bible for stretem datwan kwiktaem? Sapos iumi leavim problem for longtaem, bae hem barava hard for mek peace.

¹⁶ Hao sapos iu feel nogud long wanfala  brata, and iu gohed tingting abaotem datwan? Wanem nao bae iu duim for mek peace? First samting, iu savve prea long Jehovah. Askem hem for helpem iu for story gud witim brata bilong iu. Tingim, brata bilong iu hem fren bilong Jehovah tu. (Sams 25:14) God lovem hem. Jehovah kaen long evri fren bilong hem, and hem expectim iumi for duim sem samting tu. (Provebs 15:23; Matt. 7:12; Col. 4:6) Mek-tu samting, tingting firstaem abaotem wanem bae iu talem long hem. No tingse hem laek spoelem iu. Maet hem mistek nomoa or iu no minim gud wanem hem duim. Willing for luksavve maet iuseleva duim samting wea kosim datfala problem. Maet iu savve startim story olsem, “Taem iumi story yesterday, maet mi kwiktaem feel nogud, bat mi tingse . . . ” Sapos iutufala story bat no mek peace yet, gohed traem best. Prea for brata bilong iu. Askem Jehovah for blessim hem and helpem iu for tingim gudfala wei bilong hem. Iu savve sure Jehovah hapi taem iu traem best for mek peace witim brata bilong iu wea hem fren bilong God.

17. Taem iumi sin, hao nao Jehovah helpem iumi for fren bak witim hem, and why nao iumi shud acceptim datfala help?

¹⁷ Samfala feel olketa no fit for worshipim Jehovah bikos olketa duim serious sin. Wei for feel guilty savve mekem iumi feel wik, no garem peace, and no hapi. King David stragol witim feeling for guilty and hem sei: “Taem mi no talemaot olketa sin blong mi long yu, mi barava wik fogud, bikos mi gohed fo krae nomoa evri de, . . . Long de an long naet, yu gohed fo panisim mi.” Gud samting nao, David no fraet for duim wanem Jehovah laekem hem for duim. “[Hem] tok olsem, ‘Bae mi talemaot sin blong mi long [Jehovah].’” Then hem sei, “Yu fogivim mi an tekemaot olketa sin blong mi.” (Sams 32:3-5) Sapos iu duim serious sin, Jehovah redi for helpem iu for fren bak witim hem. Bat iu mas acceptim help bilong Jehovah thru long olketa elder. (Provebs 24:16; Jas. 5:13-15) Iu mas duim diswan kwiktaem! Sapos nomoa, bae iu no kasem laef olowe. Bat sapos iu gohed feel guilty nomata iu kasem forgiveness, wanem nao iu shud duim?

18. Hao nao example bilong Paul savve helpem olketa wea tingse olketa no fit for worshipim Jehovah?

¹⁸ Samfala taem aposol Paul feel wikdaon from hem tingim sin wea hem duim bifor. Hem sei: “Olketa nara aposol winim mi, and hem no fitim for olketa kolem mi wanfala aposol, bikos mi spoelem olketa long kongregeson bilong God.” Nomata olsem, Paul sei: “Bat from God hem kaen long mi nao mi duim disfala waka.” (1 Cor. 15:9, 10) Jehovah acceptim Paul nomata hem no perfect, and hem laekem Paul for luksavve long datwan. Jehovah savve forgivim iu sapos iu barava repent, and sapos sin wea iu duim hem serious, iu need for story long olketa elder. Trustim hao Jehovah forgivim iu, and acceptim datwan!—Aesaea 55:6, 7.

19. Wanem nao yeartext for 2018, and why nao hem fitim?

¹⁹ From iumi klosap tumas long end bilong world, iumi expectim bae iumi kasem staka problem. Bat iumi shud tingim hao Jehovah, man wea hem “mekem olketa hu i taet fo strong moa. An hemi givim paoa long olketa hu i wik,” bae givim iu wanem iu needim for gohed faithful for worshipim hem. (Aesaea 40:29; Sams 55:22; 68:19) Long 2018, evritaem iumi go long Kingdom Hall bae iumi tingim disfala tru toktok wea stap long yeartext bilong iumi. Hem nao: “Olketa hu i trastem [Jehovah], bae i kamap strong moa.”—Aesaea 40:31.