1, 2. Hao nao Jehovah showimaot hem kaen long iumi?

JEHOVAH hem kaenfala God. Evri samting wea iumi garem kam from hem. Hem nao ownim evri richfala samting long disfala earth and hem iusim for helpem iumi gohed laef. (Sams 104:13-15; Hagae 2:8) Iumi lanem long Bible hao Jehovah savve duim mirakol for iusim olketa spesol samting hia for provaedem wanem pipol bilong hem needim.

² Olsem example, for 40-fala year Jehovah provaedem manna and wata for nation bilong Israel taem olketa stap long wilderness. (Eksodas 16:35) From datwan olketa no short long eni samting. (Nehemaea 9:20, 21) Bihaen, Jehovah givim paoa long Elisha for mekem lelebet oil wea wanfala widow garem for kamap staka. Datfala present from God helpem woman hia for peim kaon bilong hem and helpem hem and olketa son bilong hem for gohed laef. (Mektu Kings 4:1-7) Jehovah helpem Jesus for duim mirakol for provaedem kaikai and selen tu taem olketa needim datwan.—Matt. 15:35-38; 17:27.

3. Wanem nao bae iumi storyim long disfala study?

³ Jehovah savve iusim eni samting wea hem garem for helpem  evri creation bilong hem. Nomata olsem, hem laekem pipol bilong hem for iusim olketa material samting for sapotim organization bilong hem. (Eksodas 36:3-7; readim Provebs 3:9.) Why nao Jehovah laekem iumi for mas givim bak long hem olketa samting wea iumi kasem from hem? Wanem nao pipol bilong Jehovah duim bifor for sapotim waka bilong hem? Hao nao organization bilong Jehovah iusim olketa donation distaem? Disfala study bae ansarem olketa kwestin hia.

4. Taem iumi sapotim waka bilong Jehovah, wanem nao datwan showimaot?

⁴ Iumi give long Jehovah bikos iumi tinghae and lovem hem. Taem iumi ting abaotem evri samting wea Jehovah givim, datwan barava kasem heart bilong iumi. Iumi agree witim wanem King David talem taem hem storyim samting wea olketa needim for buildim temple. David sei evri samting iumi kasem hem kam from Jehovah and eniting wea iumi givim long Jehovah hem samting wea hem givim iumi finis.—Readim Fas Kronikols 29:11-14.

5. Hao nao Bible showimaot wei for willing for give hem important part long tru worship?

⁵ Iumi give long Jehovah bikos hem part long worship bilong iumi. Long wanfala vision, aposol John herem olketa wakaman bilong Jehovah long heven sei: “Jehovah, wea iu nao God bilong mifala and wea iu garem bigfala paoa, iu nao fit for kasem glory and for evriwan mekhae long iu bikos iu wakem evri samting, and evri samting hem stap bikos hem nao wanem iu laekem.” (Rev. 4:11) Tru nao, Jehovah nomoa fit for kasem glory and for evriwan mekhae long hem, so iumi laek givim best bilong iumi long hem. Thru long Moses, Jehovah komandim nation bilong Israel for celebratem thrifala festival evri year. Taem olketa kam long festival, olketa mas ‘no kam nating’ bikos wei for give long Jehovah hem part long worship bilong olketa. (Diutronomi 16:16) Distaem tu, taem iumi willing for give long organization bilong Jehovah, hem showimaot iumi tinghae and laek sapotim waka bilong hem and diswan hem important part long worship bilong iumi.

6. Why nao hem gud for iumi give? (Lukim piksa long start bilong study.)

⁶ Wei for give savve helpem iumi for stap gud. Dastawe, hem gud for iumi willing for givim samting and no weit for kasem samting nomoa. (Readim Provebs 29:21.) Tingim sapos wanfala pikinini kasem selen from parents bilong hem, then hem iusim datfala selen for peim present for tufala. Hao nao feeling bilong dadi and mami taem olketa kasem datwan? Or tingim wanfala young pioneer wea stap witim parents bilong hem and hem givim samfala selen for help peim rent or hem baem kam samfala kaikai for famili. Maet parents bilong hem no expectim hem for duim datwan, bat bae olketa hapi for acceptim datwan. Why? Bikos hem showimaot hem tinghae long evri samting wea tufala duim for hem. Long sem wei, Jehovah savve iumi savve kasem gud samting taem iumi give long hem.

7, 8. Hao nao pipol bilong Jehovah bifor showimaot nambawan example for givim contribution for (a) olketa difren kaen project? (b) sapotim waka bilong hem?

⁷ Long Bible, iumi lanem hao pipol bilong Jehovah givim contribution for sapotim waka bilong hem. Samfala taem olketa givim contribution for difren kaen project wea gohed. Olsem example, Moses encouragem olketa Israelite for givim contribution for buildim tabernacle. Bihaen, King David tu duim sem samting for buildim temple. (Eksodas 35:5; Fas Kronikols 29:5-9) Long  taem wea King Jehoash rul, olketa priest iusim selen wea pipol givim for repairim temple. (Mektu Kings 12:4, 5) Long first century, olketa Christian herem hangre wea kamap long Judea and olketa brata long there needim help. So olketa disaed for givim wanem each wan fit for givim and sendem relief supply for helpem olketa brata long Judea.—Acts 11:27-30.

⁸ Pipol bilong Jehovah givim tu selen for sapotim olketa wea lead long waka bilong hem. Olsem example, Law bilong Moses talem hao olketa Levite no garem eni land olsem olketa nara tribe bilong Israel. So evri Israelite givim mek-ten part long wanem olketa garem for olketa Levite. Diswan helpem olketa Levite for busy for duim waka bilong olketa long tabernacle. (Nambas 18:21) Long sem wei, samfala woman willing for givim samting wea olketa garem for sapotim Jesus and olketa aposol bilong hem.—Luke 8:1-3.

9. Long bifor, olketa contribution kam from wea?

⁹ Olketa contribution hia kam from wea? Olketa Israelite wea givim contribution for buildim tabernacle maet givim olketa gudfala samting wea olketa tekem from Egypt. (Eksodas 3:21, 22; 35:22-24) Long first century, samfala salem samting wea olketa garem, olsem land or haos, and givim datfala selen long olketa aposol. Olketa aposol iusim datfala selen for helpem olketa brata and sista wea needim help. (Acts 4:34, 35) Samfala Christian long datfala taem savve keepim lelebet selen wea olketa kasem mekem olketa savve givim for sapotim waka bilong Jehovah. (1 Cor. 16:2) So nomata iumi rich or poor, iumi savve give long Jehovah.—Luke 21:1-4.

10, 11. (a) Hao nao iumi savve followim example bilong pipol bilong Jehovah bifor wea willing for give? (b) Wanem nao tingting bilong iu abaotem wei for sapotim Kingdom waka?

¹⁰ Distaem iumi tu givim contribution for sapotim samfala project. Olsem example, maet kongregeson plan for fixim or buildim Kingdom Hall. Maet olketa need for fixim branch office long kantri bilong iu. Or iumi need for help for peim olketa expenses long convention. Or maet olketa brata bilong iumi long nara ples kasem natural disaster and olketa needim help bilong iumi. And tu, olketa contribution wea iumi givim sapotim olketa missionary, spesol pioneer, circuit overseer, and olketa wea waka long world hedquarter and olketa branch office raonem world. Kongregeson bilong iu tu maet evritaem sendem olketa contribution for help buildim olketa Assembly Hall and Kingdom Hall for olketa brata and sista long olketa nara kantri.

¹¹ Iumi evriwan savve givim samting for sapotim waka wea organization bilong Jehovah duim long olketa last day. Staka taem, no eniwan savve hu nao givim olketa donation. Taem iumi putim selen insaed contribution box long Kingdom Hall or mekem donation online long jw.org, iumi no laekem olketa narawan for savve haomas selen nao iumi givim. Bat waswe sapos iu tingse contribution bilong iu hem smol tumas? Tru samting nao, olketa donation wea organization kasem hem kam from staka smol donation winim tu-thri big donation. Nomata olketa brata garem lelebet selen nomoa, olketa followim example bilong olketa Christian long Macedonia. Olketa barava “poor tumas” bat olketa talem Paul olketa mas givim samting and olketa hapi and willing for duim datwan.—2 Cor. 8:1-4.

12. Hao nao organization traem best for iusim donation long gudfala wei?

¹² Governing Body hem faithful and wise taem hem iusim contribution wea pipol givim long organization. (Matt. 24:45) Olketa prea for mekem olketa gud disison and olketa plan gud long hao olketa bae iusim olketa selen hia. (Luke 14:28)  Bible story abaotem olketa faithful man wea lukaftarem olketa contribution and mek sure olketa iusim datwan long worship bilong Jehovah nomoa. Olsem example, taem Ezra go bak long Jerusalem hem tekem olketa donation from king bilong Persia, olsem gold, silver, and nara expensive samting wea kost bilong hem distaem hem winim $100 million U.S. dollar. Ezra ting long olketa donation hia olsem present for Jehovah. So hem talem instruction long hao for olketa protectim datfala donation taem olketa go followim road wea hem no sef. (Esra 8:24-34) Staka year bihaen, aposol Paul tu kolektem selen for helpem olketa brata long Judea. Paul mek sure olketa wea givim datfala selen duim long wei wea olketa ‘honest long evri samting for fitim wanem hem stret long tingting bilong Jehovah and olketa man tu.’ (Readim 2 Corinth 8:18-21.) Distaem organization bilong iumi tu followim example bilong Ezra and Paul, for lukaftarem and iusim gud olketa contribution.

13. Why nao organization mekem samfala change distaem?

¹³ Wanfala famili maet mekem olketa change long hao olketa savve iusim selen bilong olketa mekem olketa no spendem tumas selen. Or maet olketa duim samfala samting for mekem laef bilong olketa simpol mekem olketa duim moa samting for Jehovah. Organization bilong Jehovah olsem tu. No longtaem go nomoa staka interesting niu project kamap and samfala taem olketa spendem selen winim wanem olketa kasem. Olsem wanfala famili, organization hem lukaotem wei for sevem selen and mekem waka hem simpol, mekem olketa savve duim staka gud samting witim olketa contribution wea iu willing for givim.

14-16. (a) Hao nao olketa iusim olketa contribution wea iu givim? (b) Hao nao olketa samting hia helpem iu?

¹⁴ Staka wea stap long truth for longtaem finis, sei distaem iumi kasem staka gud samting from organization winim enitaem bifor. Distaem iumi garem jw.org and JW Broadcasting. Iumi garem tu, New World Translation of the Holy Scriptures long staka difren languis winim bifor. Long 2014 and 2015, thrifala day bilong datfala International Convention, “Evritaem Kingdom Bilong God Mas First!” hem kamap long olketa bigfala stadium long 14-fala taon raonem world. Evriwan wea attend barava hapi tumas!

 ¹⁵ Staka talemaot thankiu bilong olketa long organization bilong Jehovah for olketa samting wea hem provaedem. Olsem example, wanfala hasband and waef wea go stap long Asia sei, “Mifala kasem assignment for help long wanfala smol taon. From datwan, samfala taem mifala feel olsem mifala stap seleva, and hem isi for forgetim hao waka bilong Jehovah hem gohed long staka ples. Bat taem mifala lukim olketa program long JW Broadcasting, mifala luksavve mifala garem olketa brata and sista evriwea long world. Olketa brata and sista long hia barava enjoyim JW Broadcasting. Staka taem bihaen olketa lukim program evri month, olketa savve sei olketa feel klos long olketa member bilong Governing Body. Winim enitaem bifor, olketa barava tinghae long wei wea olketa part long organization bilong God.”

¹⁶ Evriwea raonem world, olketa buildim and fixim klosap 2,500 Kingdom Hall. Taem olketa brata and sista long wanfala kongregeson long Honduras garem niu Kingdom Hall, olketa sei: “Mifala barava hapi from mifala part long famili bilong Jehovah and for enjoyim wei wea mifala garem olketa brata and sista evriwea long world, wea helpem mifala for kasem disfala niu Kingdom Hall wea mifala hope for kasem for longfala taem.” Staka talemaot sem samting tu taem olketa kasem Bible and olketa pablikeson long languis bilong olketa, and taem olketa brata and sista helpem olketa bihaen long natural disaster, or taem olketa lukim gud samting wea kamaot from metropolitan and pablik witnessing long territory bilong olketa.

17. Hao nao iumi savve Jehovah nao sapotim organization bilong hem distaem?

¹⁷ Staka wea no Jehovah’s Witness hard for minim wei wea waka bilong iumi gohed nomata contribution nomoa sapotim datwan. Bigman bilong wanfala big company go tour long wanfala printery bilong iumi. Hem barava sapraes hao olketa volunteer nomoa duim evri waka hia, and donation nomoa sapotim datfala waka, and olketa no duim eni fund raising for diswan. Hem sapraes from hem tingse diswan hem hard tumas for happen. Tru nao, iumi savve only reason diswan happen hem bikos Jehovah nao sapotim disfala waka.—Job 42:2.

18. (a) Wanem blessing nao iumi kasem taem iumi sapotim Kingdom? (b) Hao nao iumi savve teachim olketa pikinini and olketa niu wan for givim contribution?

¹⁸ Jehovah givim iumi nambawan privilege for sapotim datfala important Kingdom waka distaem. Hem promisim hao taem iumi duim datwan, hem bae blessim iumi. (Malakae 3:10) Jehovah promis sapos iumi willing for give, iumi bae stap gud. (Readim Provebs 11:24, 25.) And tu, Jehovah sei “man wea givim samting hem barava hapi winim man wea kasem samting.” (Acts 20:35) Samting iumi talem and duim savve helpem olketa pikinini and olketa niu wan for luksavve olketa tu bae hapi and kasem blessing taem olketa givim contribution.

19. Hao nao disfala study encouragem iu?

¹⁹ Evriting iumi garem hem kam from Jehovah. Taem iumi givim bak samting long hem, iumi showimaot iumi lovem hem and tinghae long evri samting hem duim for iumi. (Fas Kronikols 29:17) Taem olketa Israelite givim contribution for buildim temple, olketa ‘hapi fogud fo givim plande samting long [Jehovah].’ (Fas Kronikols 29:9) Iumi laek for gohed hapi and satisfae taem iumi givim bak samting long Jehovah from wanem hem givim iumi finis.