STUDY ARTICLE 5
Wei for Attendim Meeting Showimaot Iumi Garem Olketa Wanem Fasin?
“Iufala talemaot Lord hem dae, go kasem taem hem kam.”—1 COR. 11:26.
SONG 18 Thankiu for Ransom
WANEM IUMI BAE STORYIM *
1-2. (a) Wanem nao Jehovah lukim taem staka million pipol attendim Evening Kaikai Bilong Lord? (Lukim piksa long kava.) (b) Wanem nao bae iumi storyim long disfala study?
TINGIM samting wea Jehovah lukim taem staka million pipol raonem world attendim Evening Kaikai Bilong Lord. Hem no just luk for staka pipol for attend olsem wanfala big grup, bat hem lukluk long each wan wea attend. Olsem example, hem lukim olketa wea faithful for kam evri year. Insaed diswan, hem olketa wea kam nomata olketa kasem bigfala persecution. Olketa narawan maet no kam evritaem long olketa nara meeting, bat olketa ting wei for attendim Memorial hem important samting. Jehovah lukim tu olketa wea maet firstaem bilong olketa for kam long Memorial from olketa laek for savve moa samting abaotem disfala meeting.
2 Tru nao, Jehovah hapi for lukim staka pipol wea attendim Memorial. (Luke 22:19) Bat, Jehovah no interest long namba bilong pipol wea attend nomoa. Hem barava interest for savve reason why, or wanem nao muvim olketa for kam, bikos datwan nao important long hem. Long disfala study, iumi bae storyim wanfala important kwestin: Why nao iumi no attendim nomoa Memorial wea kamap evri year, bat iumi attendim tu olketa meeting wea kamap evri week wea Jehovah provaedem for olketa wea lovem hem?
Staka million pipol raonem full world welkam for kam attendim Evening Kaikai Bilong Lord (Paragraf 1-2 storyim diswan)
WEI FOR HAMBOL MUVIM IUMI FOR ATTEND
3-4. (a) Why nao iumi attendim olketa meeting? (b) Wei for attendim meeting showimaot iumi garem wanem fasin? (c) For fitim wanem 1 Corinth 11:23-26 talem, why nao iumi shud no misstim Memorial?
3 Main important reason why iumi attendim meeting hem bikos meeting hem part long worship bilong iumi. And tu, 3 John 9) Bat iumi difren, bikos iumi barava laekem Jehovah and organization wea hem iusim for teachim iumi.—Aesaea 30:20; John 6:45.
iumi attend bikos Jehovah teachim iumi long olketa meeting. Pipol wea praod no laekem narawan for teachim olketa. (4 Taem iumi attendim olketa meeting datwan showimaot iumi hambol, redi and willing for Jehovah teachim iumi. Long datfala naet bilong Memorial bilong dae bilong Jesus, iumi savve attendim disfala important meeting no just bikos iumi mas duim datwan, bat bikos iumi hambol for obeyim komand bilong Jesus wea sei: “Gohed for duim diswan for showimaot iufala rememberim mi.” (Readim 1 Corinth 11:23-26.) Datfala meeting strongim hope for future and remindim iumi hao Jehovah barava lovem iumi. Nomata olsem, Jehovah savve iumi need for kasem strong and encouragement no just wantaem long year nomoa. Dastawe hem provaedem olketa meeting evri week and hem laekem iumi for attendim olketa meeting hia. Wei for hambol muvim iumi for obey. Iumi spendem staka taem evri week for prepare and attendim olketa meeting.
5. Why nao olketa hambol pipol acceptim invitation wea Jehovah givim?
5 Evri year, staka hambol pipol acceptim invitation bilong Jehovah for teachim olketa. (Aesaea 50:4) Olketa enjoyim wei for attendim Memorial, and olketa start for attendim olketa nara meeting. (Sekaraea 8:20-23) Iumi wea insaed truth finis and olketa niu wan, hapi for Jehovah teachim and leadim iumi, from hem man wea helpem and sevem iumi. (Sams 40:17) Tru nao, no eni samting hem important or iumi savve barava enjoyim, winim wei for acceptim invitation for lane from Jehovah and Son bilong hem Jesus wea hem barava lovem.—Matt. 17:5; 18:20; 28:20.
6. Hao nao wei for hambol muvim wanfala man for attendim Memorial?
6 Evri year, iumi traem best for invaetem staka pipol for attendim Memorial bilong dae bilong Jesus. Staka hambol pipol kasem gud samting taem olketa acceptim invitation. Tingim wanfala example. Tu-thri year go finis, wanfala man kasem invitation pepa for Memorial, bat hem talem brata wea invaetem hem hao hem bae no attend. Nomata olsem, long naet bilong Memorial, datfala brata sapraes for lukim man hia wakabaot kam insaed Kingdom Hall. Datfala man barava tinghae long wei wea olketa brata and sista welkamim hem, and from datwan hem start for attendim olketa meeting evri week. And long datfala full year, thrifala meeting nomoa hem misstim. Wanem nao muvim hem for disaed for attendim evri meeting? Hem hambol for changem tingting bilong hem. Datfala brata wea invaetem hem sei: “Hem wanfala barava hambol man.” Jehovah leadim datfala man for kam worshipim Hem, and distaem hem wanfala brata.—Mektu Samuel 22:28; John 6:44.
7. Hao nao samting wea iumi lanem long meeting and wanem iumi readim long Bible helpem iumi for hambol?
7 Samting wea iumi lanem long olketa meeting and wanem iumi readim long Bible savve helpem iumi for hambol. Long olketa week bifor Memorial, olketa meeting bilong iumi savve storyim example bilong Jesus and wei wea hem hambol for givim laef bilong hem olsem wanfala ransom. And long olketa day bifor Memorial, hem gud sapos iumi readim olketa story long Bible abaotem olketa samting wea happen taem Jesus dae and taem hem resurrect. Olketa samting wea iumi lanem long olketa meeting hia and wanem iumi readim long Bible mekem iumi barava tinghae go moa long samting wea Jesus duim for iumi. Datwan muvim iumi for followim hambol fasin bilong hem and for duim wanem Jehovah laekem nomata long taem wea hem no isi.—Luke 22:41, 42.
WEI FOR NO FRAET HELPEM IUMI FOR ATTEND
8. Hao nao Jesus showimaot hem no fraet?
8 Iumi traem best tu for followim example bilong Jesus for no fraet. Tingim wei wea hem showimaot hem no fraet long olketa day bifor hem dae. Hem savve olketa enemy bilong hem bae tok spoelem, whipim hem, and killim hem dae. (Matt. 20:17-19) Nomata olsem, hem willing for dae. Kasem taem for olketa enemy arrestim hem, hem sei olsem long olketa faithful aposol bilong hem wea stap witim hem long Gethsemane: “Standap, iumi go. Man wea bae givim mi go long enemy hem klosap for kam nao!” (Matt. 26:36, 46) Taem olketa soldia kam, hem go long olketa, hem talemaot hu nao hem, and komandim olketa soldia for letem olketa aposol bilong hem for go. (John 18:3-8) Jesus showimaot nambawan example for no fraet! Distaem, olketa anointed Christian and nara sheep traem best for followim example bilong Jesus for no fraet. Long wanem wei?
Wei wea iu no fraet for attendim olketa meeting strongim olketa narawan (Paragraf 9 storyim diswan) *
9. (a) Why nao iumi needim wei for no fraet for attendim olketa meeting evritaem? (b) Hao nao example bilong iumi affectim olketa brata wea stap long prison from olketa faithful long God?
9 For attendim olketa meeting evritaem, iumi bae need for garem wei for no fraet taem iumi deal witim olketa hard taem. Samfala brata and sista attendim olketa meeting nomata olketa sorre from samwan wea olketa lovem hem dae, maet olketa feel wikdaon, or garem health problem. Olketa gohed for no fraet for attendim meeting nomata famili member or gavman barava againstim olketa. Tingim tu hao example bilong iumi savve affectim olketa brata wea stap long prison from olketa faithful long God. (Heb. 13:3) Taem olketa herem iumi gohed faithful for worshipim Jehovah nomata iumi kasem olketa hard taem, datwan strongim olketa for faithful, no fraet, and no givap. Aposol Paul tu kasem sem samting. Taem hem stap insaed prison long Rome, hem hapi tumas for herem olketa brata faithful for worshipim God. (Phil. 1:3-5, 12-14) No longtaem bifor or bihaen Paul go aot from prison, hem raetem leta for olketa Hebrew Christian. Long datfala leta, hem encouragem olketa faithful Christian hia for “gohed lovem narawan” and for no misstim wei for hipap tugeta.—Heb. 10:24, 25; 13:1.
10-11. (a) Hu nao iumi shud invaetem long Memorial? (b) Olsem Ephesus 1:7 storyim, why nao iumi duim datwan?
10 Iumi showimaot iumi no fraet taem iumi invaetem olketa relative, waka fren, and olketa neiba for attendim Memorial. Why nao iumi invaetem olketa? Iumi barava tinghae long samting wea Jehovah and Jesus duim for iumi, dastawe iumi no hol bak for invaetem olketa narawan for attendim Memorial. Iumi laekem olketa for lane abaotem hao olketa tu savve kasem gud samting from wei wea Jehovah “hem kaen tumas” taem hem givim datfala ransom.—Readim Ephesus 1:7; Rev. 22:17.
11 Taem iumi no fraet for go long olketa meeting, iumi showimaot tu nara nambawan fasin wea God and Son bilong hem showimaot.
LOVE MUVIM IUMI FOR MAS ATTEND
12. (a) Hao nao olketa meeting strongim love bilong iumi for Jehovah and Jesus? (b) Wanem nao 2 Corinth 5:14, 15 encouragem iumi for duim for followim example bilong Jesus?
12 Love bilong iumi for Jehovah and Jesus muvim iumi for mas attendim olketa meeting. And then, samting wea iumi lanem long meeting bae strongim moa datfala love wea iumi garem for Jehovah and Son bilong hem. Long meeting iumi herem evritaem samting wea tufala duim for iumi. (Rome 5:8) And especially, datfala Memorial savve remindim iumi hao tufala garem bigfala love for iumi and for olketa wea no minim yet datfala ransom. From iumi barava tinghae long datwan, iumi traem best for followim example bilong Jesus evriday. (Readim 2 Corinth 5:14, 15.) And tu, heart bilong iumi muvim iumi for praisem Jehovah bikos hem givim kam datfala ransom. Wanfala wei for duim datwan, hem nao taem iumi givim olketa koment long meeting wea kam from heart.
13. Hao nao iumi savve showimaot iumi barava lovem Jehovah and Son bilong hem? Explainim datwan.
13 Iumi savve showimaot iumi barava lovem Jehovah and Son bilong hem taem iumi willing for sakrifaesim samfala samting for tufala. Staka taem, iumi mas sakrifaesim samfala samting for attendim olketa meeting. Long staka kongregeson, meeting savve kamap long end long day long taem wea maet iumi taed from iumi waka full day. And nara meeting savve kamap long weekend long taem wea pipol rest. Waswe, Jehovah lukim wei wea iumi attendim meeting nomata iumi taed? Ia, hem lukim datwan! For sure, Jehovah barava tinghae long love wea iumi showimaot for hem and hem lukim tu hard taem wea iumi mas deal witim.—Mark 12:41-44.
14. Hao nao Jesus showimaot example for garem love wea muvim man for no tingim seleva?
14 Jesus showimaot example for garem love wea muvim hem for no tingim hemseleva. Hem showimaot diswan taem hem willing for dae for olketa disaepol bilong hem. And tu, evriday hem tingim wanem olketa needim winim wanem hemseleva needim. Olsem example, nomata taem hem wari or taed tumas hem willing for spendem taem witim olketa follower bilong hem. (Luke 22:39-46) And hem evritaem tingim samting wea hem savve duim for narawan, and no samting wea hem kasem from narawan. (Matt. 20:28) Taem love bilong iumi for Jehovah and olketa brata hem strong olsem, iumi bae traem best for attendim Evening Kaikai Bilong Lord and evri nara meeting tu.
15. Hu nao olketa main wan wea iumi laek for helpem?
Gal. 6:10) Iumi showimaot iumi lovem olketa taem iumi encouragem olketa for attendim olketa meeting, especially Memorial. Olsem Jehovah and Jesus, iumi barava hapi taem wanfala wea inactive kam bak long Jehovah, wea hem nao Shepherd and Dadi wea lovem iumi.—Matt. 18:14.
15 Iumi insaed wanfala spiritual famili bilong olketa tru Christian evriwea long world, and iumi hapi for spendem staka taem for invaetem olketa niu wan for joinim iumi. Nomata olsem, olketa main wan wea iumi laek for helpem hem nao “olketa wea garem sem biliv” olsem iumi, bat olketa kamap inactive. (16. (a) Hao nao iumi savve encouragem each other, and wanem gud samting nao iumi kasem from olketa meeting? (b) Why nao distaem hem wanfala gud taem for tingim toktok bilong Jesus wea stap long John 3:16?
16 Long olketa week bifor Memorial, iumi laek for invaetem staka pipol for attendim Memorial long Friday evening, long April 19, 2019. (Lukim box “ Waswe, Bae Iu Invaetem Olketa?”) Insaed long full year, iumi laek for gohed for encouragem each other thru long wei for attendim evritaem olketa meeting wea Jehovah provaedem for iumi. Taem disfala world gogo for finis, iumi need for attendim meeting for helpem iumi for gohed hambol, no fraet, and for garem love. (1 Thess. 5:8-11) So witim full heart bilong iumi, iumi laek showimaot hao iumi feel abaotem Jehovah and Son bilong hem wea barava lovem iumi tumas!—Readim John 3:16.
SONG 126 Mas Lukaot, Mas Faithful, and Mas Strong
^ par. 5 Memorial bilong dae bilong Christ long Friday evening, April 19, 2019, hem barava important meeting long full year. Why nao iumi laek attendim datfala meeting? For sure, iumi laekem Jehovah for hapi. Long disfala study, iumi bae storyim olketa fasin wea muvim iumi for attendim Memorial and olketa nara meeting insaed week.
^ par. 52 PIKSA: Wanfala brata wea stap long prison from hem faithful long God hem kasem encouragement taem hem readim leta from famili bilong hem. Hem luksavve famili bilong hem no forgetim hem, and hem barava hapi taem hem herem nius hao famili bilong hem tu gohed faithful long Jehovah nomata faet abaotem politik gohed long ples wea olketa stap.