1. Hao nao wanfala tok lo convention lo 1935 changem tingting blo wanfala young man?

LO BIFOR, nem blo Olketa Jehovah’s Witness hem Olketa Bible Student. Wanfala mami and dadi wea tufala Bible Student hia, tufala garem thrifala son and tufala dota. Tufala teachim olketa pikinini for worshipim Jehovah and for followim example blo Jesus Christ. Lo 1926, wanfala son blo tufala hem baptaes taem hem 18 years. Evri year lo Memorial, datfala son drinkim wine and kaikaim bred, olsem evri nara Bible Student savve duim. Bat bihaen hem herem wanfala important tok wea garem title, “The Great Multitude” tingting blo hem abaotem hope for future hem change. Joseph Rutherford givim datfala tok lo wanfala convention lo Washington, D.C., U.S.A., lo 1935. Wanem nao Olketa Bible Student lanem lo datfala convention?

2. Olketa wea lisin lo tok blo Brata Rutherford hapi for herem wanem niu samting?

² Lo datfala tok, Brata Rutherford storyim hu nao insaed datfala “great multitude” (King James Version), wea hem “datfala big crowd” wea Revelation 7:9 storyim. Firstaem, Olketa Bible Student tingse datfala big crowd bae go lo heven bat olketa no barava gud olsem nara grup. Brata Rutherford iusim Bible for explainim datfala big crowd bae no go lo heven. Bat big crowd hem olketa nara sheepsheep * blo Christ wea bae no dae lo “datfala  big trabol” and bae laef olowe lo earth. (Rev. 7:14) Jesus sei: “Mi garem olketa nara sheepsheep wea no insaed disfala fence. Mi mas tekem kam olketa hia tu and bae olketa herem toktok bilong mi. Evri sheepsheep hia bae wanfala sekson nomoa and wanfala man nao bae lukaftarem olketa.” (John 10:16) So olketa nara sheepsheep hem olketa wea faithful for witness abaotem Jehovah and garem hope for laef olowe lo Paradaes earth. (Matt. 25:31-33, 46) Taem Olketa Bible Student savve lo stretfala mining abaotem olketa nara sheepsheep, hao nao hem changem laef blo datfala young brata and olketa narawan wea worshipim Jehovah?—Sams 97:11; Provebs 4:18.

3-4. Lo convention lo 1935, staka thousand brata and sista luksavve olketa garem wanem hope, and hao nao olsem?

³ Staka wea attendim datfala convention barava hapi taem Brata Rutherford sei lo audience: “Olketa wea garem hope for laef olowe lo earth, plis standap!” Wanfala brata wea attendim datfala convention sei samting olsem winim 10,000 standap. Then Rutherford sei lo olketa: “Iufala nao datfala big crowd!” Olketa singaot and klap from olketa hapi for herem datwan. Olketa luksavve Jehovah no chusim olketa for go lo heven and no anointim olketa witim holy spirit. Lo next day blo convention, klosap evriwan lo 840 wea baptaes hem olketa blo olketa nara sheepsheep.

⁴ Bihaen datfala tok, datfala young man wea iumi storyim firstaem and staka thousand narawan stop nao for kaikaim bred and drinkim wine lo Memorial. Staka lo olketa hia garem sem tingting olsem wanfala brata wea sei: “Lo 1935, hem lastfala taem wea mi kaikaim bred and drinkim wine lo Memorial. Mi luksavve Jehovah no iusim holy spirit blo hem for givim mi hope for go lo heven. Bat mi garem hope for stap lo earth and for help for mekem earth for kamap paradaes.” (Rome 8:16, 17; 2 Cor. 1:21, 22) From datfala taem, olketa lo big crowd kamap staka and waka witim olketa anointed Christian wea stap yet lo earth.

5. Wanem nao tingting blo Jehovah abaotem olketa wea stop for kaikaim bred and drinkim wine lo Memorial?

⁵ Wanem nao tingting blo Jehovah abaotem olketa wea stop for kaikaim bred and drinkim wine lo Memorial bihaen lo 1935? And waswe lo olketa Witness distaem wea kaikaim bred and drinkim wine lo Memorial bat gogo olketa luksavve olketa no anointed? (1 Cor. 11:28) Samfala wea kaikaim bred and drinkim wine tingse olketa garem hope for go lo heven. Sapos olketa luksavve wanem olketa duim hem no stret and olketa stop for duim datwan, masbi Jehovah bae acceptim olketa for insaed datfala grup blo olketa nara sheepsheep. Then, nomata olketa no kaikaim bred and drinkim wine lo Memorial, olketa bae gohed for attend evritaem bikos olketa barava tinghae lo wanem Jehovah and Jesus duim for olketa.

6. Wanem nao Jesus talem olketa angel for duim?

⁶ From big trabol hem klosap, bae iumi storyim wanem Revelation chapter 7  talem abaotem olketa anointed Christian and datfala big crowd. Datwan bae barava encouragem iumi. Lo chapter 7, Jesus talem olketa angel for hol strong lo fofala wind. Olketa mas no letem wind hia for blow kam lo earth go kasem taem Jehovah putim mark lo forhed blo olketa last wan blo 144,000, wea minim Jehovah ting lo olketa hia olketa faithful. (Rev. 7:1-4) From olketa anointed brata blo Christ faithful, olketa bae kasem reward for kamap king and priest witim Jesus lo heven. (Rev. 20:6) Jehovah, Jesus, and olketa angel bae hapi for lukim datfala 144,000 wea anointed kasem reward blo olketa lo heven.

7. Hu nao John lukim lo vision wea hem storyim lo Revelation 7:9, 10, and wanem nao olketa duim? (Lukim piksa lo front page.)

⁷ Bihaen John story abaotem 144,000 king and priest, hem lukim tu “wanfala big crowd” wea gohed laef bihaen Armageddon. John no talem namba blo olketa wea insaed lo big crowd bat hem staka winim namba blo olketa wea bae go lo heven. (Readim Revelation 7:9, 10.) Datfala big crowd “werem white kaleko” wea showimaot olketa “stap klia long olketa rabis wei” lo world blo Satan, and gohed faithful lo God and Christ. (Jas. 1:27) Olketa mekhae lo Jehovah and Jesus, datfala Pikinini Sheepsheep, from tufala sevem olketa. Olketa holem leaf blo olketa palm tree tu, wea showimaot olketa acceptim Jesus hem King wea Jehovah chusim.​—Comparem John 12:12, 13.

8. Wanem nao Revelation 7:11, 12 talem abaotem olketa lo heven?

⁸ Readim Revelation 7:11, 12. Hao nao olketa lo heven feel taem olketa lukim datfala big crowd? John sei olketa hapi and praisem God. Masbi olketa hia bae hapi tumas for lukim datfala vision kamap tru taem datfala big crowd no dae lo big trabol.

9. Wanem nao big crowd duim distaem olsem Revelation 7:13-15 talem?

⁹ Readim Revelation 7:13-15. John sei datfala big crowd “wasim kaleko bilong olketa long blood bilong datfala Pikinini Sheepsheep and kaleko bilong olketa kamap white.” Diswan minim olketa garem klin konsens and Jehovah hapi lo olketa. (Aesaea 1:18) Olketa dedicate, baptaes, garem strong faith lo sakrifaes blo Jesus, and fren gud witim Jehovah. (John 3:36; 1 Pet. 3:21) Datwan mekem olketa fit for standap front lo throne blo God (wea minim olketa stap lo earth) for “worshipim hem evri day and evri naet” insaed lo spiritual temple. From olketa tinghae lo Kingdom blo God, olketa duim big part lo preaching waka and helpem pipol for kamap disaepol.​—Matt. 6:33; 24:14; 28:19, 20.

10. Wanem nao big crowd barava sure lo hem, and wanem promis nao bae kamap tru?

¹⁰ Datfala big crowd wea no dae lo big trabol barava sure bae God gohed lukaftarem olketa bikos “God wea hem sidaon long datfala throne bae kavarem olketa witim tent bilong hem.” Distaem olketa luk forward lo taem wea disfala promis bae kamap tru: “[God] bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”​—Rev. 21:3, 4.

11-12. (a) Olketa wanem blessing nao Revelation 7:16, 17 sei olketa blo datfala big crowd bae kasem? (b) Wanem nao olketa nara sheepsheep fit for duim lo Memorial, and why nao olsem?

 ¹¹ Readim Revelation 7:16, 17. Distaem samfala pipol blo Jehovah hangre from olketa no garem inaf kaikai bikos olketa short lo selen or bikos war hem gohed lo ples blo olketa. Olketa narawan stap lo prison bikos olketa faithful lo God. Bat from olketa hia part blo big crowd olketa barava hapi bikos olketa savve bihaen disfala nogud world finis, olketa bae garem staka kaikai and kasem tu staka spiritual kaikai. Taem Jehovah finisim nogud pipol lo world blo Satan, “sun bae no hotem” olketa blo big crowd wea minim Jehovah bae protectim olketa. Lo end blo datfala big trabol, Jesus bae leadim olketa hia go lo “olketa springwata wea savve mekem man laef [olowe].” Tru nao, datfala big crowd garem nambawan hope. Nomata staka billion pipol dae kam kasem distaem, olketa hia bae no savve dae!​—John 11:26.

¹² Olketa nara sheepsheep barava tinghae lo nambawan hope wea olketa kasem from Jehovah and Jesus! Nomata Jehovah no chusim olketa for go lo heven olsem olketa wea anointed, hem barava lovem olketa evriwan. Dastawe olketa nara sheepsheep and olketa anointed fit for mekhae lo God and Christ. Wanfala wei for mekhae lo tufala, hem for attendim Memorial blo dae blo Jesus.

13-14. Why nao iumi evriwan shud attendim Memorial?

¹³ Lo olketa year wea just go pas, no staka wea attendim Memorial kaikaim bred and drinkim wine. Lo staka kongregeson no eniwan duim datwan. Klosap evriwan wea attendim Memorial garem hope for stap lo earth. So why nao olketa wea no garem hope for go lo heven attendim Memorial? Olketa duim olsem for sem reason pipol attendim wedding blo fren blo olketa. Olketa showimaot olketa tinghae and lovem tufala wea bae marit. Lo sem wei tu, olketa nara sheepsheep attendim Memorial bikos olketa tinghae and lovem Christ and olketa anointed  Christian. And tu, olketa go lo Memorial for showimaot olketa tinghae lo sakrifaes blo Jesus wea givim chance for olketa savve laef olowe lo earth.

¹⁴ Nara important reason olketa nara sheepsheep attendim Memorial hem bikos olketa laek obeyim komand blo Jesus. Taem Jesus duim firstfala Evening Kaikai blo Lord witim olketa faithful aposol, hem sei: “Gohed for duim diswan for showimaot iufala rememberim mi.” (1 Cor. 11:23-26) So olketa nara sheepsheep bae gohed duim diswan, go kasem taem no eni anointed Christian stap lo earth. And olketa invaetem olketa narawan for kam lo Memorial tu.

15. Lo Memorial, wanem nao iumi savve duim for mekhae lo God and Christ?

¹⁵ Lo Memorial, bae iumi singsing and prea for showimaot iumi tinghae lo God and Christ. Theme blo tok lo Memorial for disfala year hem “Showimaot Iu Tinghae lo Wanem God and Christ Duim for Iu!” Tok hia bae barava helpem iumi for tinghae lo Jehovah and Christ. Taem iumi evriwan pasim bred and wine, bae iumi tingim bred and wine piksarem body and blood blo Jesus. And bae iumi tingim love wea Jehovah showimaot from hem givim Son blo hem for dae for iumi. (Matt. 20:28) Evriwan wea lovem Jehovah and Son blo hem bae laek for attendim Memorial.

16. Olketa anointed and olketa nara sheepsheep semsem lo olketa wanem wei?

¹⁶ Lo staka wei olketa anointed and olketa nara sheepsheep olketa semsem. Jehovah barava lovem olketa evriwan, and hem no lovem wanfala grup winim narawan. Iumi savve lo datwan bikos Jehovah peim sem price, wea hem nao laef blo Son blo hem, for olketa anointed Christian and olketa nara sheepsheep. Samting wea mekem tufala grup difren nomoa, hem hope blo olketa. Bat tufala grup hia mas gohed faithful lo God and Christ. (Ps. 31:23, NW) And tingim, Jehovah givim holy spirit lo each wan, nomata hem wanfala blo anointed or hem blo olketa nara sheepsheep.

17. Wanem nao olketa anointed luk forward lo hem?

¹⁷ Olketa anointed Christian kasem hope for go lo heven from God. Hem no samting wea olketa seleva disaedem. Taem olketa kasem datfala hope, olketa gohed tingim and prea abaotem datwan, and olketa luk forward tumas for go lo heven. Olketa no savve wanem kaen body bae olketa garem lo heven. (Phil. 3: 20, 21; 1 John 3:2) Nomata olsem, olketa luk forward for meetim Jehovah, Jesus, olketa angel, and olketa nara anointed wan. Olketa laekem tumas for stap witim olketa lo datfala Kingdom lo heven.

18. Wanem nao olketa nara sheepsheep luk forward lo hem?

¹⁸ Olketa nara sheepsheep garem hope for laef olowe lo earth. Olketa hapi lo diswan bikos no eniwan laek for dae. (Eccl. 3:11, NW) Olketa luk forward lo taem wea olketa bae help for mekem disfala full earth kamap paradaes. Olketa tingim taem wea olketa bae buildim haos blo olketa seleva, plantim garden, and evriwan bae no sik. (Aesaea 65:21-23) Olketa luk forward for travel lo staka ples lo earth for lukim maunten, forest, and sea blo nara ples, and for lane abaotem evri samting wea Jehovah wakem. Bat samting wea olketa luk forward tumas lo hem, hem chance for barava fren gud witim Jehovah.

19. Memorial hem chance for iumi evriwan duim wanem, and lo disfala year Memorial bae kamap lo wanem date?

¹⁹ Jehovah givim each wan wea worshipim hem gud samting for luk forward lo hem. (Jeremaea 29:11) Memorial hem spesol taem wea iumi evriwan savve mekhae lo God and Christ for olketa samting wea tufala duim for mekem iumi kasem laef olowe. Memorial hem barava important meeting wea iumi olketa Christian mas attendim evri year. Memorial bae kamap lo Saturday, March 27, 2021 and staka nao bae attendim datfala meeting. Samfala bae kasem hard taem from olketa laek attend, and nomata hem no isi samfala wea stap lo prison bae celebratem Memorial. Nomata wanem iumi feisim, Jehovah, Jesus, olketa angel, and olketa anointed wea lo heven finis bae hapi for lukim iumi evriwan tinghae lo Memorial. Mifala hope iufala evriwan enjoyim Memorial!